āstāṃ tāvadiyaṃ prasūtisamaye durvāraśūlavyathā nairujyaṃ tanuśoṣaṇaṃ malamayī śayyā ca sāṃvatsarī । ekasyāpi na garbhabhārabharaṇakleśasya yasya kṣamaḥ dātuṃ niṣkṛtimunnato'pi tanayastasyai jananyai namaḥ ॥ 1 ॥ gurukulamupasṛtya svapnakāle tu dṛṣṭvā yatisamucitaveṣaṃ prārudo māṃ tvamuccaiḥ । gurukulamatha sarvaṃ prārudatte samakṣaṃ sapadi caraṇayoste mātarastu praṇāmaḥ ॥ 2 ॥ na dattaṃ mātaste maraṇasamaye toyamapi vā svadhā vā no dattā maraṇadivase śrāddhavidhinā । na japto mātaste maraṇasamaye tārakamanuḥ akāle samprāpte mayi kuru dayāṃ mātaratulām ॥ 3 ॥ muktāmaṇistvaṃ nayanaṃ mameti rājeti jīveti ciraṃ suta tvam । ityuktavatyāstava vāci mātaḥ dadāmyahaṃ taṇḍulameṣa śuṣkam ॥ 4 ॥ ambeti tāteti śiveti tasmin prasūtikāle yadavoca uccaiḥ । kṛṣṇeti govinda hare mukunde- -tyaho jananyai racito'yamañjaliḥ ॥ 5 ॥ iti śrīmacchaṅkarācārya viracitaṃ mātṛ pañcakam ॥