സൂര്യഗ്രഹണ ശാന്തി ശ്ലോകാഃ

ശാന്തി ശ്ലോകാഃ –

ഇന്ദ്രോഽനലോ ദണ്ഡധരശ്ച രക്ഷഃ

പ്രാചേതസോ വായു കുബേര ശർവാഃ ।

മജ്ജന്മ ഋക്ഷേ മമ രാശി സംസ്ഥേ

സൂര്യോപരാഗം ശമയന്തു സർവേ ॥

ഗ്രഹണ പീഡാ പരിഹാര ശ്ലോകാഃ –

യോഽസൗ വജ്രധരോ ദേവഃ ആദിത്യാനാം പ്രഭുർമതഃ ।

സഹസ്രനയനഃ ശക്രഃ ഗ്രഹപീഡാം വ്യപോഹതു ॥ 1

മുഖം യഃ സർവദേവാനാം സപ്താർചിരമിതദ്യുതിഃ ।

ചന്ദ്രസൂര്യോപരാഗോത്ഥാം അഗ്നിഃ പീഡാം വ്യപോഹതു ॥ 2

യഃ കർമസാക്ഷീ ലോകാനാം യമോ മഹിഷവാഹനഃ ।

ചന്ദ്രസൂര്യോപരാഗോത്ഥാം ഗ്രഹപീഡാം വ്യപോഹതു ॥ 3

രക്ഷോ ഗണാധിപഃ സാക്ഷാത് പ്രലയാനലസന്നിഭഃ ।

ഉഗ്രഃ കരാലോ നിർഋതിഃ ഗ്രഹപീഡാം വ്യപോഹതു ॥ 4

നാഗപാശധരോ ദേവഃ സദാ മകരവാഹനഃ ।

വരുണോ ജലലോകേശോ ഗ്രഹപീഡാം വ്യപോഹതു ॥ 5

യഃ പ്രാണരൂപോ ലോകാനാം വായുഃ കൃഷ്ണമൃഗപ്രിയഃ ।

ചന്ദ്രസൂര്യോപരാഗോത്ഥാം ഗ്രഹപീഡാം വ്യപോഹതു ॥ 6

യോഽസൗ നിധിപതിർദേവഃ ഖഡ്ഗശൂലധരോ വരഃ ।

ചന്ദ്രസൂര്യോപരാഗോത്ഥാം കലുഷം മേ വ്യപോഹതു ॥ 7

യോഽസൗ ശൂലധരോ രുദ്രഃ ശങ്കരോ വൃഷവാഹനഃ ।

ചന്ദ്രസൂര്യോപരാഗോത്ഥാം ദോഷം നാശയതു ദ്രുതം ॥ 8

ഓം ശാന്തിഃ ശാന്തിഃ ശാന്തിഃ ।

Recite with devotion and pure heart

Regular practice brings spiritual benefits