śiva uvāca । padmāsanaḥ padmakaraḥ padmagarbhasamadyutiḥ । saptāśvaḥ saptarajjuśca dvibhujaḥ syāt sadā raviḥ ॥ 1 ॥ śvetaḥ śvetāmbaradharaḥ śvetāśvaḥ śvetavāhanaḥ । gadāpāṇirdvibāhuśca kartavyo varadaḥ śaśī ॥ 2 ॥ raktamālyāmbaradharaḥ śaktiśūlagadādharaḥ । caturbhujaḥ raktaromā varadaḥ syāddharāsutaḥ ॥ 3 ॥ pītamālyāmbaradharaḥ karṇikārasamadyutiḥ । khaḍgacarmagadāpāṇiḥ siṃhastho varado budhaḥ ॥ 3 ॥ devadaityagurū tadvatpītaśvetau caturbhujau । daṇḍinau varadau kāryau sākṣasūtrakamaṇḍalū ॥ 5 ॥ indranīladyutiḥ śūlī varado gṛdhravāhanaḥ । bāṇabāṇāsanadharaḥ kartavyo'rkasutastathā ॥ 6 ॥ karālavadanaḥ khaḍgacarmaśūlī varapradaḥ । nīlasiṃhāsanasthaśca rāhuratra praśasyate ॥ 7 ॥ dhūmrā dvibāhavaḥ sarve gadino vikṛtānanāḥ । gṛdhrāsanagatā nityaṃ ketavaḥ syurvarapradāḥ ॥ 8 ॥ sarve kirīṭinaḥ kāryā grahā lokahitāvahāḥ । hyaṅgulenocchritāḥ sarve śatamaṣṭottaraṃ sadā ॥ 9 ॥