നവഗ്രഹ മംഗലാഷ്ടകം

ഭാസ്വാൻ കാശ്യപഗോത്രജോഽരുണരുചിര്യഃ സിംഹപോഽർകഃ സമി-

-ത്ഷട്ത്രിസ്ഥോഽദശശോഭനോ ഗുരുശശീ ഭൗമാഃ സുമിത്രാഃ സദാ ।

ശുക്രോ മന്ദരിപുഃ കലിംഗജനപശ്ചാഗ്നീശ്വരൗ ദേവതേ

മധ്യേവർതുലപൂർവദിഗ്ദിനകരഃ കുര്യാത്സദാ മംഗലം ॥ 1 ॥

ചന്ദ്രഃ കർകടകപ്രഭുഃ സിതനിഭശ്ചാത്രേയഗോത്രോദ്ഭവ-

-ശ്ചാത്രേയശ്ചതുരശ്രവാരുണമുഖശ്ചാപേ ഉമാധീശ്വരഃ ।

ഷട്സപ്താഗ്നി ദശൈകശോഭനഫലോ നോരിർബുധാർകൗപ്രിയൗ

സ്വാമീ യാമുനജശ്ച പർണസമിധഃ കുര്യാത്സദാ മംഗലം ॥ 2 ॥

ഭൗമോ ദക്ഷിണദിക്ത്രികോണയമദിഗ്വിന്ധ്യേശ്വരഃ ഖാദിരഃ

സ്വാമീ വൃശ്ചികമേഷയോസ്തു സുഗുരുശ്ചാർകഃ ശശീ സൗഹൃദഃ ।

ജ്ഞോഽരിഃ ഷട്ത്രിഫലപ്രദശ്ച വസുധാസ്കന്ദൗ ക്രമാദ്ദേവതേ

ഭാരദ്വാജകുലോദ്വഹോഽരുണരുചിഃ കുര്യാത്സദാ മംഗലം ॥ 3 ॥

സൗമ്യഃ പീത ഉദങ്മുഖഃ സമിദപാമാർഗോഽത്രിഗോത്രോദ്ഭവോ

ബാണേശാനദിശഃ സുഹൃദ്രവിസുതഃ ശാന്തഃ സുതഃ ശീതഗോഃ ।

കന്യായുഗ്മപതിർദശാഷ്ടചതുരഃ ഷണ്ണേത്രഗഃ ശോഭനോ

വിഷ്ണുർദേവ്യധിദേവതേ മഗധപഃ കുര്യാത്സദാ മംഗലം ॥ 4 ॥

ജീവശ്ചാംഗിരഗോത്രജോത്തരമുഖോ ദീർഘോത്തരാശാസ്ഥിതഃ

പീതോഽശ്വത്ഥസമിച്ച സിന്ധുജനിതശ്ചാപോഽഥ മീനാധിപഃ ।

സൂര്യേന്ദുക്ഷിതിജാഃ പ്രിയാ ബുധസിതൗ ശത്രൂ സമാശ്ചാപരേ

സപ്തദ്വേ നവപഞ്ചമേ ശുഭകരഃ കുര്യാത്സദാ മംഗലം ॥ 5 ॥

ശുക്രോ ഭാർഗവഗോത്രജഃ സിതരുചിഃ പൂർവാമുഖഃ പൂർവദിക്

പാഞ്ചാലസ്ഥ വൃഷസ്തുലാധിപമഹാരാഷ്ട്രാധിപൗദുംബരഃ ।

ഇന്ദ്രാണീമഘവാ ബുധശ്ച രവിജോ മിത്രോർക ചന്ദ്രാവരീ

ഷഷ്ഠത്രിർദശവർജിതേ ഭൃഗുസുതഃ കുര്യാത്സദാ മംഗലം ॥ 6 ॥

മന്ദഃ കൃഷ്ണനിഭഃ സപശ്ചിമമുഖഃ സൗരാഷ്ട്രപഃ കാശ്യപഃ

സ്വാമീ നക്രസുകുംഭയോർബുധസിതൗ മിത്രൗ കുജേന്ദൂ ദ്വിഷൗ ।

സ്ഥാനം പശ്ചിമദിക് പ്രജാപതിയമൗ ദേവൗ ധനുർധാരകഃ

ഷട്ത്രിസ്ഥഃ ശുഭകൃച്ഛനീ രവിസുതഃ കുര്യാത്സദാ മംഗലം ॥ 7 ॥

രാഹുഃ സിംഹലദേശപോഽപി സതമഃ കൃഷ്ണാംഗശൂർപാസനോ

യഃ പൈഠീനസഗോത്രസംഭവസമിദ്ദൂർവാമുഖോ ദക്ഷിണഃ ।

യഃ സർപഃ പശുദൈവതോഽഖിലഗതഃ സൂര്യഗ്രഹേ ഛാദകഃ

ഷട്ത്രിസ്ഥഃ ശുഭകൃച്ച സിംഹകസുതഃ കുര്യാത്സദാ മംഗലം ॥ 8 ॥

കേതുർജൈമിനിഗോത്രജഃ കുശസമിദ്വായവ്യകോണേസ്ഥിത-

-ശ്ചിത്രാങ്കധ്വജലാഞ്ഛനോ ഹി ഭഗവാൻ യോ ദക്ഷിണാശാമുഖഃ ।

ബ്രഹ്മാ ചൈവ തു ചിത്രഗുപ്തപതിമാൻ പ്രീത്യാധിദേവഃ സദാ

ഷട്ത്രിസ്ഥഃ ശുഭകൃച്ച ബർബരപതിഃ കുര്യാത്സദാ മംഗലം ॥ 9 ॥

Recite with devotion and pure heart

Regular practice brings spiritual benefits