അസ്യ ശ്രീ പഞ്ചമുഖഹനുമന്മന്ത്രസ്യ ബ്രഹ്മാ ഋഷിഃ ഗായത്രീഛന്ദഃ പഞ്ചമുഖവിരാട് ഹനുമാൻ ദേവതാ ഹ്രീം ബീജം ശ്രീം ശക്തിഃ ക്രൗം കീലകം ക്രൂം കവചം ക്രൈം അസ്ത്രായ ഫട് ഇതി ദിഗ്ബന്ധഃ । ശ്രീ ഗരുഡ ഉവാച । അഥ ധ്യാനം പ്രവക്ഷ്യാമി ശൃണു സർവാംഗസുന്ദരി । യത്കൃതം ദേവദേവേന ധ്യാനം ഹനുമതഃ പ്രിയം ॥ 1 ॥ പഞ്ചവക്ത്രം മഹാഭീമം ത്രിപഞ്ചനയനൈര്യുതം । ബാഹുഭിർദശഭിര്യുക്തം സർവകാമാർഥസിദ്ധിദം ॥ 2 ॥ പൂർവം തു വാനരം വക്ത്രം കോടിസൂര്യസമപ്രഭം । ദംഷ്ട്രാകരാലവദനം ഭൃകുടീകുടിലേക്ഷണം ॥ 3 ॥ അസ്യൈവ ദക്ഷിണം വക്ത്രം നാരസിംഹം മഹാദ്ഭുതം । അത്യുഗ്രതേജോവപുഷം ഭീഷണം ഭയനാശനം ॥ 4 ॥ പശ്ചിമം ഗാരുഡം വക്ത്രം വക്രതുണ്ഡം മഹാബലം । സർവനാഗപ്രശമനം വിഷഭൂതാദികൃന്തനം ॥ 5 ॥ ഉത്തരം സൗകരം വക്ത്രം കൃഷ്ണം ദീപ്തം നഭോപമം । പാതാലസിംഹവേതാലജ്വരരോഗാദികൃന്തനം ॥ 6 ॥ ഊർധ്വം ഹയാനനം ഘോരം ദാനവാന്തകരം പരം । യേന വക്ത്രേണ വിപ്രേന്ദ്ര താരകാഖ്യം മഹാസുരം ॥ 7 ॥ ജഘാന ശരണം തത്സ്യാത്സർവശത്രുഹരം പരം । ധ്യാത്വാ പഞ്ചമുഖം രുദ്രം ഹനൂമന്തം ദയാനിധിം ॥ 8 ॥ ഖഡ്ഗം ത്രിശൂലം ഖട്വാംഗം പാശമങ്കുശപർവതം । മുഷ്ടിം കൗമോദകീം വൃക്ഷം ധാരയന്തം കമണ്ഡലും ॥ 9 ॥ ഭിന്ദിപാലം ജ്ഞാനമുദ്രാം ദശഭിർമുനിപുംഗവം । ഏതാന്യായുധജാലാനി ധാരയന്തം ഭജാമ്യഹം ॥ 10 ॥ പ്രേതാസനോപവിഷ്ടം തം സർവാഭരണഭൂഷിതം । ദിവ്യമാല്യാംബരധരം ദിവ്യഗന്ധാനുലേപനം । സർവാശ്ചര്യമയം ദേവം ഹനുമദ്വിശ്വതോമുഖം ॥ 11 ॥ പഞ്ചാസ്യമച്യുതമനേകവിചിത്രവർണ- -വക്ത്രം ശശാങ്കശിഖരം കപിരാജവര്യം । പീതാംബരാദിമുകുടൈരുപശോഭിതാംഗം പിംഗാക്ഷമാദ്യമനിശം മനസാ സ്മരാമി ॥ 12 ॥ മർകടേശം മഹോത്സാഹം സർവശത്രുഹരം പരം । ശത്രും സംഹര മാം രക്ഷ ശ്രീമന്നാപദമുദ്ധര ॥ 13 ॥ ഹരിമർകട മർകട മന്ത്രമിദം പരിലിഖ്യതി ലിഖ്യതി വാമതലേ । യദി നശ്യതി നശ്യതി ശത്രുകുലം യദി മുഞ്ചതി മുഞ്ചതി വാമലതാ ॥ 14 ॥ ഓം ഹരിമർകടായ സ്വാഹാ । ഓം നമോ ഭഗവതേ പഞ്ചവദനായ പൂർവകപിമുഖായ സകലശത്രുസംഹാരകായ സ്വാഹാ । ഓം നമോ ഭഗവതേ പഞ്ചവദനായ ദക്ഷിണമുഖായ കരാലവദനായ നരസിംഹായ സകലഭൂതപ്രമഥനായ സ്വാഹാ । ഓം നമോ ഭഗവതേ പഞ്ചവദനായ പശ്ചിമമുഖായ ഗരുഡാനനായ സകലവിഷഹരായ സ്വാഹാ । ഓം നമോ ഭഗവതേ പഞ്ചവദനായ ഉത്തരമുഖായ ആദിവരാഹായ സകലസമ്പത്കരായ സ്വാഹാ । ഓം നമോ ഭഗവതേ പഞ്ചവദനായ ഊർധ്വമുഖായ ഹയഗ്രീവായ സകലജനവശങ്കരായ സ്വാഹാ । ഓം അസ്യ ശ്രീ പഞ്ചമുഖഹനുമന്മന്ത്രസ്യ ശ്രീരാമചന്ദ്ര ഋഷിഃ അനുഷ്ടുപ്ഛന്ദഃ പഞ്ചമുഖവീരഹനുമാൻ ദേവതാ ഹനുമാൻ ഇതി ബീജം വായുപുത്ര ഇതി ശക്തിഃ അഞ്ജനീസുത ഇതി കീലകം ശ്രീരാമദൂതഹനുമത്പ്രസാദസിദ്ധ്യർഥേ ജപേ വിനിയോഗഃ । ഇതി ഋഷ്യാദികം വിന്യസേത് । അഥ കരന്യാസഃ । ഓം അഞ്ജനീസുതായ അംഗുഷ്ഠാഭ്യാം നമഃ । ഓം രുദ്രമൂർതയേ തർജനീഭ്യാം നമഃ । ഓം വായുപുത്രായ മധ്യമാഭ്യാം നമഃ । ഓം അഗ്നിഗർഭായ അനാമികാഭ്യാം നമഃ । ഓം രാമദൂതായ കനിഷ്ഠികാഭ്യാം നമഃ । ഓം പഞ്ചമുഖഹനുമതേ കരതലകരപൃഷ്ഠാഭ്യാം നമഃ । അഥ അംഗന്യാസഃ । ഓം അഞ്ജനീസുതായ ഹൃദയായ നമഃ । ഓം രുദ്രമൂർതയേ ശിരസേ സ്വാഹാ । ഓം വായുപുത്രായ ശിഖായൈ വഷട് । ഓം അഗ്നിഗർഭായ കവചായ ഹും । ഓം രാമദൂതായ നേത്രത്രയായ വൗഷട് । ഓം പഞ്ചമുഖഹനുമതേ അസ്ത്രായ ഫട് । പഞ്ചമുഖഹനുമതേ സ്വാഹാ ഇതി ദിഗ്ബന്ധഃ । അഥ ധ്യാനം । വന്ദേ വാനരനാരസിംഹഖഗരാട്ക്രോഡാശ്വവക്ത്രാന്വിതം ദിവ്യാലങ്കരണം ത്രിപഞ്ചനയനം ദേദീപ്യമാനം രുചാ । ഹസ്താബ്ജൈരസിഖേടപുസ്തകസുധാകുംഭാങ്കുശാദ്രിം ഹലം ഖട്വാംഗം ഫണിഭൂരുഹം ദശഭുജം സർവാരിവീരാപഹം । അഥ മന്ത്രഃ । ഓം ശ്രീരാമദൂതായ ആഞ്ജനേയായ വായുപുത്രായ മഹാബലപരാക്രമായ സീതാദുഃഖനിവാരണായ ലങ്കാദഹനകാരണായ മഹാബലപ്രചണ്ഡായ ഫാൽഗുനസഖായ കോലാഹലസകലബ്രഹ്മാണ്ഡവിശ്വരൂപായ സപ്തസമുദ്രനിർലംഘനായ പിംഗലനയനായ അമിതവിക്രമായ സൂര്യബിംബഫലസേവനായ ദുഷ്ടനിവാരണായ ദൃഷ്ടിനിരാലങ്കൃതായ സഞ്ജീവിനീസഞ്ജീവിതാംഗദ-ലക്ഷ്മണമഹാകപിസൈന്യപ്രാണദായ ദശകണ്ഠവിധ്വംസനായ രാമേഷ്ടായ മഹാഫാൽഗുനസഖായ സീതാസഹിതരാമവരപ്രദായ ഷട്പ്രയോഗാഗമപഞ്ചമുഖവീരഹനുമന്മന്ത്രജപേ വിനിയോഗഃ । ഓം ഹരിമർകടമർകടായ ബംബമ്ബംബമ്ബം വൗഷട് സ്വാഹാ । ഓം ഹരിമർകടമർകടായ ഫംഫമ്ഫംഫമ്ഫം ഫട് സ്വാഹാ । ഓം ഹരിമർകടമർകടായ ഖേംഖേംഖേംഖേംഖേം മാരണായ സ്വാഹാ । ഓം ഹരിമർകടമർകടായ ലുംലുംലുംലുംലും ആകർഷിതസകലസമ്പത്കരായ സ്വാഹാ । ഓം ഹരിമർകടമർകടായ ധന്ധന്ധന്ധന്ധം ശത്രുസ്തംഭനായ സ്വാഹാ । ഓം ടണ്ടണ്ടണ്ടണ്ടം കൂർമമൂർതയേ പഞ്ചമുഖവീരഹനുമതേ പരയന്ത്ര പരതന്ത്രോച്ചാടനായ സ്വാഹാ । ഓം കംഖങ്ഗംഘംങം ചഞ്ഛഞ്ജഞ്ഝംഞം ടണ്ഠണ്ഡണ്ഢംണം തന്ഥന്ദന്ധന്നം പംഫമ്ബംഭമ്മം യംരംലംവം ശംഷംസംഹം ലങ്ക്ഷം സ്വാഹാ । ഇതി ദിഗ്ബന്ധഃ । ഓം പൂർവകപിമുഖായ പഞ്ചമുഖഹനുമതേ ടണ്ടണ്ടണ്ടണ്ടം സകലശത്രുസംഹരണായ സ്വാഹാ । ഓം ദക്ഷിണമുഖായ പഞ്ചമുഖഹനുമതേ കരാലവദനായ നരസിംഹായ ഓം ഹ്രാം ഹ്രീം ഹ്രൂം ഹ്രൈം ഹ്രൗം ഹ്രഃ സകലഭൂതപ്രേതദമനായ സ്വാഹാ । ഓം പശ്ചിമമുഖായ ഗരുഡാനനായ പഞ്ചമുഖഹനുമതേ മമ്മമ്മമ്മമ്മം സകലവിഷഹരായ സ്വാഹാ । ഓം ഉത്തരമുഖായ ആദിവരാഹായ ലംലംലംലംലം നൃസിംഹായ നീലകണ്ഠമൂർതയേ പഞ്ചമുഖഹനുമതേ സ്വാഹാ । ഓം ഊർധ്വമുഖായ ഹയഗ്രീവായ രുംരുംരുംരുംരും രുദ്രമൂർതയേ സകലപ്രയോജനനിർവാഹകായ സ്വാഹാ । ഓം അഞ്ജനീസുതായ വായുപുത്രായ മഹാബലായ സീതാശോകനിവാരണായ ശ്രീരാമചന്ദ്രകൃപാപാദുകായ മഹാവീര്യപ്രമഥനായ ബ്രഹ്മാണ്ഡനാഥായ കാമദായ പഞ്ചമുഖവീരഹനുമതേ സ്വാഹാ । ഭൂതപ്രേതപിശാചബ്രഹ്മരാക്ഷസ ശാകിനീഡാകിന്യന്തരിക്ഷഗ്രഹ പരയന്ത്ര പരതന്ത്രോച്ചടനായ സ്വാഹാ । സകലപ്രയോജനനിർവാഹകായ പഞ്ചമുഖവീരഹനുമതേ ശ്രീരാമചന്ദ്രവരപ്രസാദായ ജഞ്ജഞ്ജഞ്ജഞ്ജം സ്വാഹാ । ഇദം കവചം പഠിത്വാ തു മഹാകവചം പഠേന്നരഃ । ഏകവാരം ജപേത് സ്തോത്രം സർവശത്രുനിവാരണം ॥ 15 ॥ ദ്വിവാരം തു പഠേന്നിത്യം പുത്രപൗത്രപ്രവർധനം । ത്രിവാരം ച പഠേന്നിത്യം സർവസമ്പത്കരം ശുഭം ॥ 16 ॥ ചതുർവാരം പഠേന്നിത്യം സർവരോഗനിവാരണം । പഞ്ചവാരം പഠേന്നിത്യം സർവലോകവശങ്കരം ॥ 17 ॥ ഷഡ്വാരം ച പഠേന്നിത്യം സർവദേവവശങ്കരം । സപ്തവാരം പഠേന്നിത്യം സർവസൗഭാഗ്യദായകം ॥ 18 ॥ അഷ്ടവാരം പഠേന്നിത്യമിഷ്ടകാമാർഥസിദ്ധിദം । നവവാരം പഠേന്നിത്യം രാജഭോഗമവാപ്നുയാത് ॥ 19 ॥ ദശവാരം പഠേന്നിത്യം ത്രൈലോക്യജ്ഞാനദർശനം । രുദ്രാവൃത്തിം പഠേന്നിത്യം സർവസിദ്ധിർഭവേദ്ധൃവം ॥ 20 ॥ നിർബലോ രോഗയുക്തശ്ച മഹാവ്യാധ്യാദിപീഡിതഃ । കവചസ്മരണേനൈവ മഹാബലമവാപ്നുയാത് ॥ 21 ॥ ഇതി സുദർശനസംഹിതായാം ശ്രീരാമചന്ദ്രസീതാപ്രോക്തം ശ്രീ പഞ്ചമുഖഹനുമത്കവചം ।