ഓം അസ്യ ശ്രീ ആപദുദ്ധാരക ഹനുമത് സ്തോത്ര മഹാമന്ത്ര കവചസ്യ, വിഭീഷണ ഋഷിഃ, ഹനുമാൻ ദേവതാ, സർവാപദുദ്ധാരക ശ്രീഹനുമത്പ്രസാദേന മമ സർവാപന്നിവൃത്ത്യർഥേ, സർവകാര്യാനുകൂല്യ സിദ്ധ്യർഥേ ജപേ വിനിയോഗഃ । ധ്യാനം – വാമേ കരേ വൈരിഭിദം വഹന്തം ശൈലം പരേ ശൃംഖലഹാരിടങ്കം । ദധാനമച്ഛച്ഛവിയജ്ഞസൂത്രം ഭജേ ജ്വലത്കുണ്ഡലമാഞ്ജനേയം ॥ 1 ॥ സംവീതകൗപീന മുദഞ്ചിതാംഗുലിം സമുജ്ജ്വലന്മൗഞ്ജിമഥോപവീതിനം । സകുണ്ഡലം ലംബിശിഖാസമാവൃതം തമാഞ്ജനേയം ശരണം പ്രപദ്യേ ॥ 2 ॥ ആപന്നാഖിലലോകാർതിഹാരിണേ ശ്രീഹനൂമതേ । അകസ്മാദാഗതോത്പാത നാശനായ നമോ നമഃ ॥ 3 ॥ സീതാവിയുക്തശ്രീരാമശോകദുഃഖഭയാപഹ । താപത്രിതയസംഹാരിൻ ആഞ്ജനേയ നമോഽസ്തു തേ ॥ 4 ॥ ആധിവ്യാധി മഹാമാരീ ഗ്രഹപീഡാപഹാരിണേ । പ്രാണാപഹർത്രേദൈത്യാനാം രാമപ്രാണാത്മനേ നമഃ ॥ 5 ॥ സംസാരസാഗരാവർത കർതവ്യഭ്രാന്തചേതസാം । ശരണാഗതമർത്യാനാം ശരണ്യായ നമോഽസ്തു തേ ॥ 6 ॥ വജ്രദേഹായ കാലാഗ്നിരുദ്രായാഽമിതതേജസേ । ബ്രഹ്മാസ്ത്രസ്തംഭനായാസ്മൈ നമഃ ശ്രീരുദ്രമൂർതയേ ॥ 7 ॥ രാമേഷ്ടം കരുണാപൂർണം ഹനൂമന്തം ഭയാപഹം । ശത്രുനാശകരം ഭീമം സർവാഭീഷ്ടപ്രദായകം ॥ 8 ॥ കാരാഗൃഹേ പ്രയാണേ വാ സംഗ്രാമേ ശത്രുസങ്കടേ । ജലേ സ്ഥലേ തഥാഽഽകാശേ വാഹനേഷു ചതുഷ്പഥേ ॥ 9 ॥ ഗജസിംഹ മഹാവ്യാഘ്ര ചോര ഭീഷണ കാനനേ । യേ സ്മരന്തി ഹനൂമന്തം തേഷാം നാസ്തി വിപത് ക്വചിത് ॥ 10 ॥ സർവവാനരമുഖ്യാനാം പ്രാണഭൂതാത്മനേ നമഃ । ശരണ്യായ വരേണ്യായ വായുപുത്രായ തേ നമഃ ॥ 11 ॥ പ്രദോഷേ വാ പ്രഭാതേ വാ യേ സ്മരന്ത്യഞ്ജനാസുതം । അർഥസിദ്ധിം ജയം കീർതിം പ്രാപ്നുവന്തി ന സംശയഃ ॥ 12 ॥ ജപ്ത്വാ സ്തോത്രമിദം മന്ത്രം പ്രതിവാരം പഠേന്നരഃ । രാജസ്ഥാനേ സഭാസ്ഥാനേ പ്രാപ്തേ വാദേ ലഭേജ്ജയം ॥ 13 ॥ വിഭീഷണകൃതം സ്തോത്രം യഃ പഠേത് പ്രയതോ നരഃ । സർവാപദ്ഭ്യോ വിമുച്യേത നാഽത്ര കാര്യാ വിചാരണാ ॥ 14 ॥ മന്ത്രഃ – മർകടേശ മഹോത്സാഹ സർവശോകനിവാരക । ശത്രൂൻ സംഹര മാം രക്ഷ ശ്രിയം ദാപയ ഭോ ഹരേ ॥ 15 ഇതി വിഭീഷണകൃതം സർവാപദുദ്ധാരക ശ്രീഹനുമത് സ്തോത്രം ॥