ತ್ರೈಲೋಕ್ಯಮೋಹನ ಗಣಪತಿ ಕವಚಂ

ನಮಸ್ತಸ್ಮೈ ಗಣೇಶಾಯ ಸರ್ವವಿಘ್ನವಿನಾಶಿನೇ ।

ಕಾರ್ಯಾರಂಭೇಷು ಸರ್ವೇಷು ಪೂಜ್ಯತೇ ಯಃ ಸುರೈರಪಿ ॥ 1 ॥

ಶ್ರೀಮನ್ಮಹಾಗಣಪತೇಃ ಕವಚಸ್ಯ ಋಷಿಃ ಶಿವಃ ।

ಗಣಪತಿರ್ದೇವತಾ ಚ ಗಾಯತ್ರೀ ಛಂದಃ ಏವ ಚ ।

ಧರ್ಮಾರ್ಥಕಾಮಮೋಕ್ಷೇಷು ವಿನಿಯೋಗಃ ಪ್ರಕೀರ್ತಿತಃ ।

ಶಕ್ತಿಃ ಸ್ವಾಹಾ ಗ್ಲೈಂ ಬೀಜಂ ವಿನಿಯೋಗಸ್ಯ ಕೀರ್ತಿತಃ ॥

ಅಥ ನ್ಯಾಸಃ –

ಓಂ ಶ್ರೀಂ ಹ್ರೀಂ ಕ್ಲೀಂ ಅಂಗುಷ್ಠಾಭ್ಯಾಂ ನಮಃ ।

ಗ್ಲೌಂ ಗಂ ಗಣಪತಯೇ ತರ್ಜನೀಭ್ಯಾಂ ನಮಃ ।

ವರವರದ ಮಧ್ಯಮಾಭ್ಯಾಂ ನಮಃ ।

ಸರ್ವಜನಂ ಮೇ ಅನಾಮಿಕಾಭ್ಯಾಂ ನಮಃ ।

ವಶಮಾನಯ ಕನಿಷ್ಠಿಕಾಭ್ಯಾಂ ನಮಃ ।

ಸ್ವಾಹಾ ಕರತಲಕರಪೃಷ್ಠಾಭ್ಯಾಂ ನಮಃ ।

ಏವಂ ಹೃದಯಾದಿ ನ್ಯಾಸಃ ॥

ಧ್ಯಾನಂ –

ಹಸ್ತೀಂದ್ರಾನನಮಿಂದುಚೂಡಮರುಣಚ್ಛಾಯಂ ತ್ರಿನೇತ್ರಂ ರಸಾ-

-ದಾಶ್ಲಿಷ್ಟಂ ಪ್ರಿಯಯಾ ಸಪದ್ಮಕರಯಾ ಸ್ವಾಂಕಸ್ಥಯಾ ಸಂತತಂ ।

ಬೀಜಾಪೂರಗದಾಧನುಸ್ತ್ರಿಶಿಖಯುಕ್ ಚಕ್ರಾಬ್ಜಪಾಶೋತ್ಪಲ

ವ್ರೀಹ್ಯಗ್ರಸ್ವವಿಷಾಣರತ್ನಕಲಶಾನ್ ಹಸ್ತೈರ್ವಹಂತಂ ಭಜೇ ।

ಕವಚಂ –

ಓಂ ಬ್ರಹ್ಮಬೀಜಂ ಶಿರಃ ಪಾತು ಕೇವಲಂ ಮುಕ್ತಿದಾಯಕಂ ।

ಶ್ರೀಂ ಬೀಜಮಕ್ಷಿಣೀ ಪಾತು ಸರ್ವಸಿದ್ಧಿಸಮರ್ಪಕಂ ॥ 1 ॥

ಹೃಲ್ಲೇಖಾ ಶ್ರೋತ್ರಯೋಃ ಪಾತು ಸರ್ವಶತ್ರುವಿನಾಶಿನೀ ।

ಕಾಮಬೀಜಂ ಕಪೋಲೌ ಚ ಸರ್ವದುಷ್ಟನಿವಾರಣಂ ॥ 2 ॥

ಗ್ಲೌಂ ಗಂ ಚ ಗಣಪತಯೇ ವಾಚಂ ಪಾತು ವಿನಾಯಕಃ ।

ವರಬೀಜಂ ತಥಾ ಜಿಹ್ವಾಂ ವರದಂ ಹಸ್ತಯೋಸ್ತಥಾ ॥ 3 ॥

ಸರ್ವಜನಂ ಮೇ ಚ ಬಾಹುದ್ವಯಂ ಕಂಠಂ ಗಣೇಶ್ವರಃ ।

ವಶಂ ಮೇ ಪಾತು ಹೃದಯಂ ಪಾತು ಸಿದ್ಧೀಶ್ವರಸ್ತಥಾ ॥ 4 ॥

ನಾಭಿಂ ಆನಯ ಮೇ ಪಾತು ಸರ್ವಸಿದ್ಧಿವಿನಾಯಕಃ ।

ಜಂಘಯೋರ್ಗುಲ್ಫಯೋಃ ಸ್ವಾಹಾ ಸರ್ವಾಂಗಂ ವಿಘ್ನನಾಯಕಃ ॥ 5 ॥

ಗಣಪತಿಸ್ತ್ವಗ್ರತಃ ಪಾತು ಗಣೇಶಃ ಪೃಷ್ಠತಸ್ತಥಾ ।

ದಕ್ಷಿಣೇ ಸಿದ್ಧಿದಃ ಪಾತು ವಾಮೇ ವಿಶ್ವಾರ್ತಿಹಾರಕಃ ॥ 6 ॥

ದುರ್ಜಯೋ ರಕ್ಷತು ಪ್ರಾಚ್ಯಾಮಾಗ್ನೇಯ್ಯಾಂ ಗಣಪಸ್ತಥಾ ।

ದಕ್ಷಿಣಸ್ಯಾಂ ಗಿರಿಜಜೋ ನೈರೃತ್ಯಾಂ ಶಂಭುನಂದನಃ ॥ 7 ॥

ಪ್ರತೀಚ್ಯಾಂ ಸ್ಥಾಣುಜಃ ಪಾತು ವಾಯವ್ಯಾಮಾಖುವಾಹನಃ ।

ಕೌಬೇರ್ಯಾಮೀಶ್ವರಃ ಪಾತು ಈಶಾನ್ಯಾಮೀಶ್ವರಾತ್ಮಜಃ ॥ 8 ॥

ಅಧೋ ಗಣಪತಿಃ ಪಾತು ಊರ್ಧಂ ಪಾತು ವಿನಾಯಕಃ ।

ಏತಾಭ್ಯೋ ದಶದಿಗ್ಭ್ಯಸ್ತು ಪಾತು ನಿತ್ಯಂ ಗಣೇಶ್ವರಃ ॥ 9 ॥

ಇತೀದಂ ಕಥಿತಂ ದೇವಿ ಬ್ರಹ್ಮವಿದ್ಯಾಕಲೇವರಂ ।

ತ್ರೈಲೋಕ್ಯಮೋಹನಂ ನಾಮ ಕವಚಂ ಬ್ರಹ್ಮರೂಪಕಂ ॥ 10 ॥

ಇತಿ ಶ್ರೀಮಹಾಗಣಪತಿ ತ್ರೈಲೋಕ್ಯಮೋಹನಕವಚಂ ಸಂಪೂರ್ಣಂ ।

Recite with devotion and pure heart

Regular practice brings spiritual benefits