brahmaviṣṇumaheśā ūcuḥ – ajaṃ nirvikalpaṃ nirākāramekaṃ nirānaṃdamadvaitamānaṃdapūrṇam । paraṃ nirguṇaṃ nirviśeṣaṃ nirīhaṃ parabrahmarūpaṃ gaṇeśaṃ bhajema ॥ 1 ॥ guṇātītamādyaṃ cidānaṃdarūpaṃ cidābhāsakaṃ sarvagaṃ jñānagamyam । munidhyeyamākāśarūpaṃ pareśaṃ parabrahmarūpaṃ gaṇeśaṃ bhajema ॥ 2 ॥ jagatkāraṇaṃ kāraṇajñānarūpaṃ surādiṃ sukhādiṃ yugādiṃ gaṇeśam । jagadvyāpinaṃ viśvavaṃdyaṃ sureśaṃ parabrahmarūpaṃ gaṇeśaṃ bhajema ॥ 3 ॥ rajoyogato brahmarūpaṃ śrutijñaṃ sadā kāryasaktaṃ hṛdāciṃtyarūpam । jagatkārakaṃ sarvavidyānidhānaṃ parabrahmarūpaṃ gaṇeśaṃ natāsmaḥ ॥ 4 ॥ sadā sattvayogaṃ mudā krīḍamānaṃ surārīnharaṃtaṃ jagatpālayaṃtam । anekāvatāraṃ nijajñānahāraṃ sadā viṣṇurūpaṃ gaṇeśaṃ namāmaḥ ॥ 5 ॥ tamoyoginaṃ rudrarūpaṃ trinetraṃ jagaddhārakaṃ tārakaṃ jñānahetum । anekāgamaiḥ svaṃ janaṃ bodhayaṃtaṃ sadā śarvarūpaṃ gaṇeśaṃ namāmaḥ ॥ 6 ॥ tamastomahāraṃ janājñānahāraṃ trayīvedasāraṃ parabrahmapāram । munijñānakāraṃ vidūrevikāraṃ sadā brahmarūpaṃ gaṇeśaṃ namāmaḥ ॥ 7 ॥ nijairoṣadhīstarpayaṃtaṃ karodyaiḥ saraughānkalābhiḥ sudhāsrāviṇībhiḥ । dineśāṃśu saṃtāpahāraṃ dvijeśaṃ śaśāṃkasvarūpaṃ gaṇeśaṃ namāmaḥ ॥ 8 ॥ prakāśasvarūpaṃ nabhovāyurūpaṃ vikārādihetuṃ kalākālabhūtam । anekakriyānekaśaktisvarūpaṃ sadā śaktirūpaṃ gaṇeśaṃ namāmaḥ ॥ 9 ॥ pradhānasvarūpaṃ mahattattvarūpaṃ dharāvārirūpaṃ digīśādirūpam । asatsatsvarūpaṃ jagaddhetubhūtaṃ sadā viśvarūpaṃ gaṇeśaṃ natāsmaḥ ॥ 10 ॥ tvadīye manaḥ sthāpayedaṃghriyugme jano vighnasaṃghānna pīḍāṃ labheta । lasatsūryabiṃbe viśāle sthito'yaṃ janodhvāṃta pīḍāṃ kathaṃ vā labheta ॥ 11 ॥ vayaṃ bhrāmitāḥ sarvathā'jñānayogā- -dalabdhā tavāṃghriṃ bahūnvarṣapūgān । idānīmavāptāstavaiva prasādā- -tprapannānsadā pāhi viśvaṃbharādya ॥ 12 ॥ gaṇeśa uvāca – idaṃ yaḥ paṭhetprātarutthāya dhīmān trisaṃdhyaṃ sadā bhaktiyukto viśuddhaḥ । saputrān śriyaṃ sarvakāmān labheta parabrahmarūpo bhavedaṃtakāle ॥ 13 ॥ iti gaṇeśapurāṇe upāsanākhaṃḍe trayodaśo'dhyāye śrīgaṇapatistavaḥ ।