mauliṃ maheśaputro'vyādbhālaṃ pātu vināyakaḥ । trinetraḥ pātu me netre śūrpakarṇo'vatu śrutī ॥ 1 ॥ herambo rakṣatu ghrāṇaṃ mukhaṃ pātu gajānanaḥ । jihvāṃ pātu gaṇeśo me kaṇṭhaṃ śrīkaṇṭhavallabhaḥ ॥ 2 ॥ skandhau mahābalaḥ pātu vighnahā pātu me bhujau । karau paraśubhṛtpātu hṛdayaṃ skandapūrvajaḥ ॥ 3 ॥ madhyaṃ lambodaraḥ pātu nābhiṃ sindūrabhūṣitaḥ । jaghanaṃ pārvatīputraḥ sakthinī pātu pāśabhṛt ॥ 4 ॥ jānunī jagatāṃ nātho jaṅghe mūṣakavāhanaḥ । pādau padmāsanaḥ pātu pādādho daityadarpahā ॥ 5 ॥ ekadanto'grataḥ pātu pṛṣṭhe pātu gaṇādhipaḥ । pārśvayormodakāhāro digvidikṣu ca siddhidaḥ ॥ 6 ॥ vrajatastiṣṭhato vāpi jāgrataḥ svapato'śnataḥ । caturthīvallabho devaḥ pātu me bhuktimuktidaḥ ॥ 7 ॥ idaṃ pavitraṃ stotraṃ ca caturthyāṃ niyataḥ paṭhet । sindūraraktaḥ kusumairdūrvayā pūjya vighnapam ॥ 8 ॥ rājā rājasuto rājapatnī mantrī kulaṃ calam । tasyāvaśyaṃ bhavedvaśyaṃ vighnarājaprasādataḥ ॥ 9 ॥ samantrayantraṃ yaḥ stotraṃ kare saṃlikhya dhārayet । dhanadhānyasamṛddhiḥ syāttasya nāstyatra saṃśayaḥ ॥ 10 ॥ asya mantraḥ – aiṃ klīṃ hrīṃ vakratuṇḍāya hum । rasalakṣaṃ sadaikāgryaḥ ṣaḍaṅganyāsapūrvakam । hutvā tadante vidhivadaṣṭadravyaṃ payo ghṛtam ॥ 11 ॥ yaṃ yaṃ kāmamabhidhyāyan kurute karma kiñcana । taṃ taṃ sarvamavāpnoti vakratuṇḍaprasādataḥ ॥ 12 ॥ bhṛgupraṇītaṃ yaḥ stotraṃ paṭhate bhuvi mānavaḥ । bhavedavyāhataiśvaryaḥ sa gaṇeśaprasādataḥ ॥ 13 ॥ iti gaṇeśarakṣākaraṃ stotraṃ sampūrṇam ।