വന്ദേ സിന്ദൂരവർണാഭം വാമോരുന്യസ്തവല്ലഭം । ഇക്ഷുവാരിധിമധ്യസ്ഥമിഭരാജമുഖം മഹഃ ॥ 1 ॥ ഗംഭീരലഹരീജാലഗണ്ഡൂഷിതദിഗന്തരഃ । അവ്യാന്മാമമൃതാംഭോധിരനർഘമണിസമ്യുതഃ ॥ 2 ॥ മധ്യേ തസ്യ മനോഹാരി മധുപാരവമേദുരം । പ്രസൂനവിഗലന്മാധ്വീപ്രവാഹപരിപൂരിതം ॥ 3 ॥ കിന്നരീഗാനമേദസ്വി ക്രീഡാകന്ദരദന്തുരം । കാഞ്ചനദ്രുമധൂലീഭിഃ കല്പിതാവാലവദ്ദ്രുമം ॥ 4 ॥ മുഗ്ധകോകിലനിക്വാണമുഖരീകൃതദിങ്മുഖം । മന്ദാരതരുസന്താനമഞ്ജരീപുഞ്ജപിഞ്ജരം ॥ 5 ॥ നാസാനാഡിന്ധമസ്മേരനമേരുസുമസൗരഭം । ആവൃന്തഹസിതാംഭോജദീവ്യദ്വിഭ്രമദീർഘികം ॥ 6 ॥ മന്ദരക്തശുകീദഷ്ടമാതുലുംഗഫലാന്വിതം । സവിധസ്യന്ദമാനാഭ്രസരിത്കല്ലോലവേല്ലിതം ॥ 7 ॥ പ്രസൂനപാംസുസൗരഭ്യപശ്യതോഹരമാരുതം । വകുലപ്രസവാകീർണം വന്ദേ നന്ദനകാനനം ॥ 8 ॥ തന്മധ്യേ നീപകാന്താരം തരണിസ്തംഭകാരണം । മധുപാലിവിമർദാലികലക്വാണകരംബിതം ॥ 9 ॥ കോമലശ്വശനാധൂതകോരകോദ്ഗതധൂലിഭിഃ । സിന്ദൂരിതനഭോമാർഗം ചിന്തിതം സിദ്ധവന്ദിഭിഃ ॥ 10 ॥ മധ്യേ തസ്യ മരുന്മാർഗലംബിമാണിക്യതോരണം । ശാണോല്ലിഖിതവൈദൂര്യക്ലുപ്തസാലസമാകുലം ॥ 11 ॥ മാണിക്യസ്തംഭപടലീമയൂഖവ്യാപ്തദിക്തടം । പഞ്ചവിംശതിസാലാഢ്യാം നമാമി നഗരോത്തമം ॥ 12 ॥ തത്ര ചിന്താമണിഗൃഹം തഡിത്കോടിസമുജ്ജ്വലം । നീലോത്പലസമാകീർണനിര്യൂഹശതസങ്കുലം ॥ 13 ॥ സോമകാന്തമണിക്ലുപ്തസോപാനോദ്ഭാസിവേദികം । ചന്ദ്രശാലാചരത്കേതുസമാലീഢനഭോന്തരം ॥ 14 ॥ ഗാരുത്മതമണീക്ലുപ്തമണ്ഡപവ്യൂഹമണ്ഡിതം । നിത്യസേവാപരാമർത്യനിബിഡദ്വാരശോഭിതം ॥ 15 ॥ അധിഷ്ഠിതം ദ്വാരപാലൈരസിതോമരപാണിഭിഃ । നമാമി നാകനാരീണാം സാന്ദ്രസംഗീതമേദുരം ॥ 16 ॥ തന്മധ്യേ തരുണാർകാഭം തപ്തകാഞ്ചനനിർമിതം । ശക്രാദിമദ്ദ്വാരപാലൈഃ സന്തതം പരിവേഷ്ടിതം ॥ 17 ॥ ചതുഷ്ഷഷ്ടിമഹാവിദ്യാകലാഭിരഭിസംവൃതം । രക്ഷിതം യോഗിനീബൃന്ദൈ രത്നസിംഹാസനം ഭജേ ॥ 18 ॥ മധ്യേ തസ്യ മരുത്സേവ്യം ചതുർദ്വാരസമുജ്ജ്വലം । ചതുരസ്രത്രിരേഖാഢ്യാം ചാരുത്രിവലയാന്വിതം ॥ 19 ॥ കലാദലസമായുക്തം കനദഷ്ടദലാന്വിതം । ചതുർദശാരസഹിതം ദശാരദ്വിതയാന്വിതം ॥ 20 ॥ അഷ്ടകോണയുതം ദിവ്യമഗ്നികോണവിരാജിതം । യോഗിഭിഃ പൂജിതം യോഗിയോഗിനീഗണസേവിതം ॥ 21 ॥ സർവദുഃഖപ്രശമനം സർവവ്യാധിവിനാശനം । വിഷജ്വരഹരം പുണ്യം വിവിധാപദ്വിദാരണം ॥ 22 ॥ സർവദാരിദ്ര്യശമനം സർവഭൂപാലമോഹനം । ആശാഭിപൂരകം ദിവ്യമർചകാനാമഹർനിശം ॥ 23 ॥ അഷ്ടാദശസുമർമാഢ്യം ചതുർവിംശതിസന്ധിനം । ശ്രീമദ്ബിന്ദുഗൃഹോപേതം ശ്രീചക്രം പ്രണമാമ്യഹം ॥ 24 ॥ തത്രൈവ ബൈന്ദവസ്ഥാനേ തരുണാദിത്യസന്നിഭം । പാശാങ്കുശധനുർബാണപരിഷ്കൃതകരാംബുജം ॥ 25 ॥ പൂർണേന്ദുബിംബവദനം ഫുല്ലപങ്കജലോചനം । കുസുമായുധശൃംഗാരകോദണ്ഡകുടിലഭ്രുവം ॥ 26 ॥ ചാരുചന്ദ്രകലോപേതം ചന്ദനാഗുരുരൂഷിതം । മന്ദസ്മിതമധൂകാലികിഞ്ജൽകിതമുഖാംബുജം ॥ 27 ॥ പാടീരതിലകോദ്ഭാസിഫാലസ്ഥലമനോഹരം । അനേകകോടികന്ദർപലാവണ്യമരുണാധരം ॥ 28 ॥ തപനീയാംശുകധരം താരുണ്യശ്രീനിഷേവിതം । കാമേശ്വരമഹം വന്ദേ കാമിതാർഥപ്രദം നൃണാം ॥ 29 ॥ തസ്യാങ്കമധ്യമാസീനാം തപ്തഹാടകസന്നിഭാം । മാണിക്യമുകുടച്ഛായാമണ്ഡലാരുണദിങ്മുഖാം ॥ 30 ॥ കലവേണീകനത്ഫുല്ലകഹ്ലാരകുസുമോജ്ജ്വലാം । ഉഡുരാജകൃതോത്തംസാമുത്പലശ്യാമലാലകാം ॥ 31 ॥ ചതുർഥീചന്ദ്രസച്ഛാത്രഫാലരേഖാപരിഷ്കൃതാം । കസ്തൂരീതിലകാരൂഢകമനീയലലന്തികാം ॥ 32 ॥ ഭ്രൂലതാശ്രീപരാഭൂതപുഷ്പായുധശരാസനാം । നാലീകദലദായാദനയനത്രയശോഭിതാം ॥ 33 ॥ കരുണാരസസമ്പൂർണകടാക്ഷഹസിതോജ്ജ്വലാം । ഭവ്യമുക്താമണിചാരുനാസാമൗക്തികവേഷ്ടിതാം ॥ 34 ॥ കപോലയുഗലീനൃത്യകർണതാടങ്കശോഭിതാം । മാണിക്യവാലീയുഗലീമയൂഖാരുണദിങ്മുഖാം ॥ 35 ॥ പരിപക്വസുബിംബാഭാപാടലാധരപല്ലവാം । മഞ്ജുലാധരപർവസ്ഥമന്ദസ്മിതമനോഹരാം ॥ 36 ॥ ദ്വിഖണ്ഡദ്വിജരാജാഭഗണ്ഡദ്വിതയമണ്ഡിതാം । ദരഫുല്ലലസദ്ഗണ്ഡധവലാപൂരിതാനനാം ॥ 37 ॥ പചേലിമേന്ദുസുഷമാപാടച്ചരമുഖപ്രഭാം । കന്ധരാകാന്തിഹസിതകംബുബിംബോകഡംബരാം ॥ 38 ॥ കസ്തൂരീകർദമാശ്യാമകന്ധരാമൂലകന്ദരാം । വാമാംസശിഖരോപാന്തവ്യാലംബിഘനവേണികാം ॥ 39 ॥ മൃണാലകാണ്ഡദായാദമൃദുബാഹുചതുഷ്ടയാം । മണികേയൂരയുഗലീമയൂഖാരുണവിഗ്രഹാം ॥ 40 ॥ കരമൂലലസദ്രത്നകങ്കണക്വാണപേശലാം । കരകാന്തിസമാധൂതകല്പാനോകഹപല്ലവാം ॥ 41 ॥ പദ്മരാഗോർമികാശ്രേണിഭാസുരാംഗുലിപാലികാം । പുണ്ഡ്രകോദണ്ഡപുഷ്പാസ്ത്രപാശാങ്കുശലസത്കരാം ॥ 42 ॥ തപ്തകാഞ്ചനകുംഭാഭസ്തനമണ്ഡലമണ്ഡിതാം । ഘനസ്തനതടീക്ലുപ്തകാശ്മീരക്ഷോദപാടലാം ॥ 43 ॥ കൂലങ്കഷകുചസ്ഫാരതാരഹാരവിരാജിതാം । ചാരുകൗസുംഭകൂർപാസച്ഛന്നവക്ഷോജമണ്ഡലാം ॥ 44 ॥ നവനീലഘനശ്യാമരോമരാജിവിരാജിതാം । ലാവണ്യസാഗരാവർതനിഭനാഭിവിഭൂഷിതാം ॥ 45 ॥ ഡിംഭമുഷ്ടിതലഗ്രാഹ്യമധ്യയഷ്ടിമനോഹരാം । നിതംബമണ്ഡലാഭോഗനിക്വണന്മണിമേഖലാം ॥ 46 ॥ സന്ധ്യാരുണക്ഷൗമപടീസഞ്ഛന്നജഘനസ്ഥലാം । ഘനോരുകാന്തിഹസിതകദലീകാണ്ഡവിഭ്രമാം ॥ 47 ॥ ജാനുസമ്പുടകദ്വന്ദ്വജിതമാണിക്യദർപണാം । ജംഘായുഗലസൗന്ദര്യവിജിതാനംഗകാഹലാം ॥ 48 ॥ പ്രപദച്ഛായസന്താനജിതപ്രാചീനകച്ഛപാം । നീരജാസനകോടീരനിഘൃഷ്ടചരണാംബുജാം ॥ 49 ॥ പാദശോഭാപരാഭൂതപാകാരിതരുപല്ലവാം । ചരണാംഭോജശിഞ്ജാനമണിമഞ്ജീരമഞ്ജുലാം ॥ 50 ॥ വിബുധേന്ദ്രവധൂത്സംഗവിന്യസ്തപദപല്ലവാം । പാർശ്വസ്ഥഭാരതീലക്ഷ്മീപാണിചാമരവീജിതാം ॥ 51 ॥ പുരതോ നാകനാരീണാം പശ്യന്തീം നൃത്തമദ്ഭുതം । ഭ്രൂലതാഞ്ചലസംഭൂതപുഷ്പായുധപരമ്പരാം ॥ 52 ॥ പ്രത്യഗ്രയൗവനോന്മത്തപരിഫുല്ലവിലോചനാം । താമ്രോഷ്ഠീം തരലാപാംഗീം സുനാസാം സുന്ദരസ്മിതാം ॥ 53 ॥ ചതുരർഥധ്രുവോദാരാം ചാമ്പേയോദ്ഗന്ധികുന്തലാം । മധുസ്നപിതമൃദ്വീകമധുരാലാപപേശലാം ॥ 54 ॥ ശിവാം ഷോഡശവാർഷീകാം ശിവാങ്കതലവാസിനീം । ചിന്മയീം ഹൃദയാംഭോജേ ചിന്തയേജ്ജാപകോത്തമഃ ॥ 55 ॥ ഇതി ത്രിപുരസുന്ദര്യാ ഹൃദയം സർവകാമദം । സർവദാരിദ്ര്യശമനം സർവസമ്പത്പ്രദം നൃണാം ॥ 56 ॥ താപജ്വരാർതിശമനം തരുണീജനമോഹനം । മഹാവിഷഹരം പുണ്യം മാംഗല്യകരമദ്ഭുതം ॥ 57 ॥ അപമൃത്യുഹരം ദിവ്യമായുഷ്യശ്രീകരം പരം । അപവർഗൈകനിലയമവനീപാലവശ്യദം ॥ 58 ॥ പഠതി ധ്യാനരത്നം യഃ പ്രാതഃ സായമതന്ദ്രിതഃ । ന വിഷാദൈഃ സ ച പുമാൻ പ്രാപ്നോതി ഭുവനത്രയം ॥ 59 ॥ ഇതി ശ്രീമഹാത്രിപുരസുന്ദരീഹൃദയം സമ്പൂർണം ।