ಕೃಷ್ಣಾವೇಣೀಪಂಚಗಂಗಾಯುತಿಸ್ಥಂ ಶ್ರೀಪಾದಂ ಶ್ರೀವಲ್ಲಭಂ ಭಕ್ತಹೃತ್ಸ್ಥಂ । ದತ್ತಾತ್ರೇಯಂ ಪಾದುಕಾರೂಪಿಣಂ ತಂ ವಂದೇ ವಿದ್ಯಾಂ ಶಾಲಿನೀಂ ಸಂಗೃಣಂತಂ ॥ 1 ॥ ಉಪೇಂದ್ರವಜ್ರಾಯುಧಪೂರ್ವದೇವೈಃ ಸಪೂರ್ವದೇವೈರ್ಮುನಿಭಿಶ್ಚ ಗೀತಂ । ನೃಸಿಂಹಸಂಜ್ಞಂ ನಿಗಮಾಗಮಾದ್ಯಂ ಗಮಾಗಮಾದ್ಯಂತಕರಂ ಪ್ರಪದ್ಯೇ ॥ 2 ॥ ಪರಿಹೃತನತಜೂರ್ತಿಃ ಸ್ವೀಯಕಾಮಪ್ರಪೂರ್ತಿ- -ರ್ಹೃತನಿಜಭಜಕಾರ್ತಿಃ ಸಚ್ಚಿದಾನಂದಮೂರ್ತಿಃ । ಸದಯಹೃದಯವರ್ತೀ ಯೋಗವಿಚ್ಚಕ್ರವರ್ತೀ ಸ ಜಯತಿ ಯತಿರಾಟ್ ದಿಙ್ಮಾಲಿನೀ ಯಸ್ಯ ಕೀರ್ತಿಃ ॥ 3 ॥ ದ್ರುತವಿಲಂಬಿತಕರ್ಮವಿಚಾರಣಾ ಫಲಸುಸಿದ್ಧಿರತೋಽಮರಭಾಗ್ಜನಃ । ಅನುಭವತ್ಯಕಮೇವ ತದುದ್ಧೃತೌ ಹರಿರಿಹಾವಿರಭೂತ್ಪದರೂಪ್ಯಸೌ ॥ 4 ॥ ವಿದ್ಯುನ್ಮಾಲಾತುಲ್ಯಾ ಸಂಪತ್ಪ್ರಾಙ್ಮಧ್ಯಾಂತೇಽಪ್ಯಸ್ಯಾ ಆಪತ್ । ತತ್ತೇ ಧಾರ್ಯಂ ಜ್ಯೋತಿರ್ನಿತ್ಯಂ ಧ್ಯಾನೇ ಮೇಽಸ್ತು ಬ್ರಹ್ಮನ್ ಸತ್ಯಂ ॥ 5 ॥ ತ್ರಿದ್ವಾರಂ ತವ ಭವನಂ ಬಹುಪ್ರದೀಪಂ ವಿಘ್ನೇಶಾಮರಪತಿಯೋಗಿನೀಮರುಜ್ಜೈಃ । ಜಾಹ್ನವ್ಯಾವೃತಮಭಿತೋಽನ್ನಪೂರ್ಣಯಾ ಚ ಸ್ಮೃತ್ವಾ ಮೇ ಭವತಿ ಮತಿಃ ಪ್ರಹರ್ಷಿಣೀಯಂ ॥ 6 ॥ ತತಿಂ ದ್ವಿಜಾನಾಂ ಶಿವಸೋಪಜಾತಿಂ ಪುಷ್ಣಾತಿ ಕೃಷ್ಣಾಽತ್ರ ವಿನಷ್ಟತೃಷ್ಣಾ । ಅವಾಕ್ಪ್ರವಾಹಾಽನುಮತಾಶಿವಾಹಾ ಯಾ ಸಾಽಷ್ಟತೀರ್ಥಾ ಸ್ಮೃತಿಮೇತು ಸಾರ್ಥಾ ॥ 7 ॥ ಕಲೌ ಮಲೌಘಾಂತಕರಂ ಕರಂಜ- -ಪುರೇ ವರೇ ಜಾತಮಕಾಮಕಾಮಂ । ಚರಾಚರಾದ್ಯಂ ಭುವನಾವನಾರ್ಥಂ ಕ್ಷಣೇ ಕ್ಷಣೇ ಸಜ್ಜನತಾನತಾಂಘ್ರಿಂ ॥ 8 ॥ ಭುಜಂಗಪ್ರಯಾತಾದ್ಗುಣೋತ್ಥಾದಿವಾಸ್ಮಾ- -ದ್ಭವಾದ್ಭೀತ ಆಗತ್ಯ ನ ತ್ಯಕ್ತುಮಿಚ್ಛೇತ್ । ನೃಸಿಂಹಸ್ಯ ವಾಟ್ಯಾಂ ಪ್ರಭೋ ರಾಜಧಾನ್ಯಾಂ ಸ ಯಾಯಾತ್ಸುಧನ್ಯಾಂ ಗತಿಂ ಲೋಕಮಾನ್ಯಾಂ ॥ 9 ॥ ಇತಿ ಶ್ರೀವಾಸುದೇವಾನಂದಸರಸ್ವತೀ ವಿರಚಿತಂ ದತ್ತ ಪಾದುಕಾಷ್ಟಕಂ ।