ദത്ത നവരത്ന മാലികാ

വിത്തതർഷരഹിതൈർമനുജാനാം

സത്തമൈരനിശസേവ്യപദാബ്ജം ।

ചിത്തശുദ്ധിമഭിലിപ്സുരഹം ദ്രാക്

ദത്തദേവമനിശം കലയാമി ॥ 1 ॥

കാർതവീര്യഗുരുമത്രിതനൂജം

പാദനമ്രശിര ആഹിതഹസ്തം ।

ശ്രീദമുഖ്യഹരിദീശ്വരപൂജ്യം

ദത്തദേവമനിശം കലയാമി ॥ 2 ॥

നാകനായകസമർചിതപാദം

പാകചന്ദ്രധര മൗല്യവതാരം ।

കോകബന്ധുസമവേക്ഷ്യമഹസ്കം

ദത്തദേവമനിശം കലയാമി ॥ 3 ॥

മൂകപംഗു ബധിരാദിമലോകാൻ

ലോകതസ്തദിതരാന്വിദധാനം ।

ഏകവസ്തുപരിബോധയിതാരം

ദത്തദേവമനിശം കലയാമി ॥ 4 ॥

യോഗദാനത ഇഹൈവ ഹരന്തം

രോഗമാശു നമതാം ഭവസഞ്ജ്ഞം ।

രാഗമോഹമുഖ വൈരിനിവൃത്ത്യൈ

ദത്തദേവമനിശം കലയാമി ॥ 5 ॥

ജാമദഗ്ന്യമുനയേ ത്രിപുരായാഃ

ജ്ഞാനഖണ്ഡമവബോധിതവന്തം ।

ജാമിതാവിദലനം നതപങ്ക്തേഃ

ദത്തദേവമനിശം കലയാമി ॥ 6 ॥

താരകം ഭവമഹാജലരാശേഃ

പൂരകം പദനതേപ്സിതരാശേഃ ।

വാരകം കലിമുഖോത്ഥഭയാനാം

ദത്തദേവമനിശം കലയാമി ॥ 7 ॥

സത്യവിത്സുഖനിരന്തരസക്തം

സ്വാന്തമാനതജനം വിദധാനം ।

ശ്രാന്തലോകതതിതോഷണചന്ദ്രം

ദത്തദേവമനിശം കലയാമി ॥ 8 ॥

രക്ഷണായ ജഗതോ ധൃതദേഹം

ശിക്ഷണായ ച ദുരധ്വഗതാനാം ।

ഋക്ഷരാജപരിഭാവിനിടാലം

ദത്തദേവമനിശം കലയാമി ॥ 9 ॥

നവരത്നമാലികേയം

ഗ്രഥിതാ ഭക്തേന കേനചിദ്യതിനാ ।

ഗുരുവരചരണാബ്ജയുഗേ

തന്മോദായാർപിതാ ചിരം ജീയാത് ॥ 10 ॥

ഇതി ശ്രീ ജഗദ്ഗുരു ശ്രീ ചന്ദ്രശേഖരഭാരതീസ്വാമിപാദൈഃ വിരചിതാ ശ്രീ ദത്ത നവരത്ന മാലികാ ।

Recite with devotion and pure heart

Regular practice brings spiritual benefits