हैंహైHaindavamஹிહિં
📍
Font Size:
ದತ್ತ ಮಾನಸಪೂಜಾ
ಪರಾನಂದಮಯೋ ವಿಷ್ಣುರ್ಹೃತ್ಸ್ಥೋ ವೇದ್ಯೋಪ್ಯತೀಂದ್ರಿಯಃ ।
ಸದಾ ಸಂಪೂಜ್ಯತೇ ಭಕ್ತೈರ್ಭಗವಾನ್ ಭಕ್ತಿಭಾವನಃ ॥ 1 ॥
ಅಚಿಂತ್ಯಸ್ಯ ಕುತೋ ಧ್ಯಾನಂ ಕೂಟಸ್ಥಾವಾಹನಂ ಕುತಃ ।
ಕ್ವಾಸನಂ ವಿಶ್ವಸಂಸ್ಥಸ್ಯ ಪಾದ್ಯಂ ಪೂತಾತ್ಮನಃ ಕುತಃ ॥ 2 ॥
ಕ್ವಾನರ್ಘೋರುಕ್ರಮಸ್ಯಾರ್ಘ್ಯಂ ವಿಷ್ಣೋರಾಚಮನಂ ಕುತಃ ।
ನಿರ್ಮಲಸ್ಯ ಕುತಃ ಸ್ನಾನಂ ಕ್ವ ನಿರಾವರಣೇಂಬರಂ ॥ 3 ॥
ಸ್ವಸೂತ್ರಸ್ಯ ಕುತಃ ಸೂತ್ರಂ ನಿರ್ಮಲಸ್ಯ ಚ ಲೇಪನಂ ।
ನಿಸ್ತೃಷಃ ಸುಮನೋಭಿಃ ಕಿಂ ಕಿಮಕ್ಲೇದ್ಯಸ್ಯ ಧೂಪತಃ ॥ 4 ॥
ಸ್ವಪ್ರಕಾಶಸ್ಯ ದೀಪೈಃ ಕಿಂ ಕಿಂ ಭಕ್ಷ್ಯಾದ್ಯೈರ್ಜಗದ್ಭೃತಃ ।
ಕಿಂ ದೇಯಂ ಪರಿತೃಪ್ತಸ್ಯ ವಿರಾಜಃ ಕ್ವ ಪ್ರದಕ್ಷಿಣಾಃ ॥ 5 ॥
ಕಿಮನಂತಸ್ಯ ನತಿಭಿಃ ಸ್ತೌತಿ ಕೋ ವಾಗಗೋಚರಂ ।
ಅಂತರ್ಬಹಿಃ ಪ್ರಪೂರ್ಣಸ್ಯ ಕಥಮುದ್ವಾಸನಂ ಭವೇತ್ ॥ 6 ॥
ಸರ್ವತೋಽಪೀತ್ಯಸಂಭಾವ್ಯೋ ಭಾವ್ಯತೇ ಭಕ್ತಿಭಾವನಃ ।
ಸೇವ್ಯಸೇವಕಭಾವೇನ ಭಕ್ತೈರ್ಲೀಲಾನೃವಿಗ್ರಹಃ ॥ 7 ॥
ತವೇಶಾತೀಂದ್ರಿಯಸ್ಯಾಪಿ ಪಾರಂಪರ್ಯಾಶ್ರುತಾಂ ತನುಂ ।
ಪ್ರಕಲ್ಪ್ಯಾಶ್ಮಾದಾವರ್ಚಂತಿ ಪ್ರಾರ್ಚಯೇಽರ್ಚಾಂ ಮನೋಮಯೀಂ ॥ 8 ॥
ಕಲಸುಶ್ಲೋಕಗೀತೇನ ಭಗವನ್ ದತ್ತ ಜಾಗೃಹಿ ।
ಭಕ್ತವತ್ಸಲ ಸಾಮೀಪ್ಯಂ ಕುರು ಮೇ ಮಾನಸಾರ್ಚನೇ ॥ 9 ॥
ಶ್ರೀದತ್ತಂ ಖೇಚರೀಮುದ್ರಾಮುದ್ರಿತಂ ಯೋಗಿಸದ್ಗುರುಂ ।
ಸಿದ್ಧಾಸನಸ್ಥಂ ಧ್ಯಾಯೇಽಭೀವರಪ್ರದಕರಂ ಹರಿಂ ॥ 10 ॥
ದತ್ತಾತ್ರೇಯಾಹ್ವಯಾಮ್ಯತ್ರ ಪರಿವಾರೈಃ ಸಹಾರ್ಚನೇ ।
ಶ್ರದ್ಧಾಭಕ್ತ್ಯೇಶ್ವರಾಗಚ್ಛ ಧ್ಯಾತಧಾಮ್ನಾಂಜಸಾ ವಿಭೋ ॥ 11 ॥
ಸೌವರ್ಣಂ ರತ್ನಜಡಿತಂ ಕಲ್ಪಿತಂ ದೇವತಾಮಯಂ ।
ರಮ್ಯಂ ಸಿಂಹಾಸನಂ ದತ್ತ ತತ್ರೋಪವಿಶ ಯಂತ್ರಿತೇ ॥ 12 ॥
ಪಾದ್ಯಂ ಚಂದನಕರ್ಪೂರಸುರಭಿ ಸ್ವಾದು ವಾರಿ ತೇ ।
ಗೃಹಾಣ ಕಲ್ಪಿತಂ ತೇನ ದತ್ತಾಂಘ್ರೀ ಕ್ಷಾಲಯಾಮಿ ತೇ ॥ 13 ॥
ಗಂಧಾಬ್ಜತುಲಸೀಬಿಲ್ವಶಮೀಪತ್ರಾಕ್ಷತಾನ್ವಿತಂ ।
ಸಾಂಬ್ವರ್ಘ್ಯಂ ಸ್ವರ್ಣಪಾತ್ರೇಣ ಕಲ್ಪಿತಂ ದತ್ತ ಗೃಹ್ಯತಾಂ ॥ 14 ॥
ಸುಸ್ವಾದ್ವಾಚಮನೀಯಾಂಬು ಹೈಮಪಾತ್ರೇಣ ಕಲ್ಪಿತಂ ।
ತುಭ್ಯಮಾಚಮ್ಯತಾಂ ದತ್ತ ಮಧುಪರ್ಕಂ ಗೃಹಾಣ ಚ ॥ 15 ॥
ಪುಷ್ಪವಾಸಿತಸತ್ತೈಲಮಂಗೇಷ್ವಾಲಿಪ್ಯ ದತ್ತ ಭೋಃ ।
ಪಂಚಾಮೃತೈಶ್ಚ ಗಾಂಗಾದ್ಭಿಃ ಸ್ನಾನಂ ತೇ ಕಲ್ಪಯಾಮ್ಯಹಂ ॥ 16 ॥
ಭಕ್ತ್ಯಾ ದಿಗಂಬರಾಚಾಂತ ಜಲೇದಂ ದತ್ತ ಕಲ್ಪಿತಂ ।
ಕಾಷಾಯಪರಿಧಾನಂ ತದ್ಗೃಹಾಣೈಣೇಯಚರ್ಮ ಚ ॥ 17 ॥
ನಾನಾಸೂತ್ರಧರೈತೇ ತೇ ಬ್ರಹ್ಮಸೂತ್ರೇ ಪ್ರಕಲ್ಪಿತೇ ।
ಗೃಹಾಣ ದೈವತಮಯೇ ಶ್ರೀದತ್ತ ನವತಂತುಕೇ ॥ 18 ॥
ಭೂತಿಮೃತ್ಸ್ನಾಸುಕಸ್ತೂರೀಕೇಶರಾನ್ವಿತಚಂದನಂ ।
ರತ್ನಾಕ್ಷತಾಃ ಕಲ್ಪಿತಾಸ್ತ್ವಾಮಲಂಕುರ್ವೇಽಥ ದತ್ತ ತೈಃ ॥ 19 ॥
ಸಚ್ಛಮೀಬಿಲ್ವತುಲಸೀಪತ್ರೈಃ ಸೌಗಂಧಿಕೈಃ ಸುಮೈಃ ।
ಮನಸಾ ಕಲ್ಪಿತೈರ್ನಾನಾವಿಧೈರ್ದತ್ತಾರ್ಚಯಾಮ್ಯಹಂ ॥ 20 ॥
ಲಾಕ್ಷಾಸಿತಾಭ್ರಶ್ರೀವಾಸಶ್ರೀಖಂಡಾಗರುಗುಗ್ಗುಲೈಃ ।
ಯುಕ್ತೋಽಗ್ನಿಯೋಜಿತೋ ಧೂಪೋ ಹೃದಾ ಸ್ವೀಕುರು ದತ್ತ ತಂ ॥ 21 ॥
ಸ್ವರ್ಣಪಾತ್ರೇ ಗೋಘೃತಾಕ್ತವರ್ತಿಪ್ರಜ್ವಾಲಿತಂ ಹೃದಾ ।
ದೀಪಂ ದತ್ತ ಸಕರ್ಪೂರಂ ಗೃಹಾಣ ಸ್ವಪ್ರಕಾಶಕ ॥ 22 ॥
ಸಷಡ್ರಸಂ ಷಡ್ವಿಧಾನ್ನಂ ನೈವೇದ್ಯಂ ಗವ್ಯಸಮ್ಯುತಂ ।
ಕಲ್ಪಿತಂ ಹೈಮಪಾತ್ರೇ ತೇ ಭುಂಕ್ಷ್ವ ದತ್ತಾಂಬ್ವದಃ ಪಿಬ ॥ 23 ॥
ಪ್ರಕ್ಷಾಲ್ಯಾಸ್ಯಂ ಕರೌ ಚಾದ್ಭಿರ್ದತ್ತಾಚಮ್ಯ ಪ್ರಗೃಹ್ಯತಾಂ ।
ತಾಂಬೂಲಂ ದಕ್ಷಿಣಾಂ ಹೈಮೀಂ ಕಲ್ಪಿತಾನಿ ಫಲಾನಿ ಚ ॥ 24 ॥
ನೀರಾಜ್ಯ ರತ್ನದೀಪೈಸ್ತ್ವಾಂ ಪ್ರಣಮ್ಯ ಮನಸಾ ಚ ತೇ ।
ಪರಿತಸ್ತ್ವತ್ಕಥೋದ್ಘಾತೈಃ ಕುರ್ವೇ ದತ್ತ ಪ್ರದಕ್ಷಿಣಾಃ ॥ 25 ॥
ಮಂತ್ರವನ್ನಿಹಿತೋ ಮೂರ್ಧ್ನಿ ದತ್ತ ತೇ ಕುಸುಮಾಂಜಲಿಃ ।
ಕಲ್ಪ್ಯಂತೇ ಮನಸಾ ಗೀತವಾದ್ಯನೃತ್ಯೋಪಚಾರಕಾಃ ॥ 26 ॥
ಪ್ರೇರ್ಯಮಾಣಪ್ರೇರಕೇಣ ತ್ವಯಾ ದತ್ತೇರಿತೇನ ತೇ ।
ಕೃತೇಯಂ ಮನಸಾ ಪೂಜಾ ಶ್ರೀಮಂಸ್ತುಷ್ಟೋ ಭವಾನಯಾ ॥ 27 ॥
ದತ್ತ ಮಾನಸತಲ್ಪೇ ಮೇ ಸುಖನಿದ್ರಾಂ ರಹಃ ಕುರು ।
ರಮ್ಯೇ ವ್ಯಾಯತಭಕ್ತ್ಯಾಮತೂಲಿಕಾಢ್ಯೇ ಸುವೀಜಿತೇ ॥ 28 ॥
ಇತಿ ಶ್ರೀವಾಸುದೇವಾನಂದಸರಸ್ವತೀ ವಿರಚಿತಂ ಶ್ರೀ ದತ್ತ ಮಾನಸಪೂಜಾ ।
Recite with devotion and pure heart
Regular practice brings spiritual benefits