औदुम्बर पादुका स्तोत्रम्

वन्दे वाङ्मनसातीतं निर्गुणं सगुणं गुरुम् ।

दत्तमात्रेयमानन्दकन्दं भक्तेष्टपूरकम् ॥ 1 ॥

नमामि सततं दत्तमौदुम्बरनिवासिनम् ।

यतीन्द्ररूपं च सदा निजानन्दप्रबोधनम् ॥ 2 ॥

कृष्णा यदग्रे भुवनेशानी विद्यानिधिस्तथा ।

औदुम्बराः कल्पवृक्षाः सर्वतः सुखदाः सदा ॥ 3 ॥

भक्तबृन्दान् दर्शनतः पुरुषार्थचतुष्टयम् ।

ददाति भगवान् भूमा सच्चिदानन्दविग्रहः ॥ 4 ॥

जागर्ति गुप्तरूपेण गोप्ता ध्यानसमाधितः ।

ब्रह्मबृन्दं ब्रह्मसुखं ददाति समदृष्टितः ॥ 5 ॥

कृष्णा तृष्णाहरा यत्र सुखदा भुवनेश्वरी ।

यत्र मोक्षदराड्दत्तपादुका तां नमाम्यहम् ॥ 6 ॥

पादुकारूपियतिराट् श्रीनृसिंहसरस्वती ।

राजते राजराजश्रीदत्तश्रीपादवल्लभः ॥ 7 ॥

नमामि गुरुमूर्ते तं तापत्रयहरं हरिम् ।

आनन्दमयमात्मानं नवभक्त्या सुखप्रदम् ॥ 8 ॥

करवीरस्थविदुषमूढपुत्रं विनिन्दितम् ।

छिन्नजिह्वं बुधं चक्रे तद्वन्मयि कृपां कुरु ॥ 9 ॥

इति श्री औदुम्बर पादुका स्तोत्रम् ।

Recite with devotion and pure heart

Regular practice brings spiritual benefits