हैंహైHaindavamஹிહિં
📍
Font Size:
ദക്ഷിണാമൂർതി മന്ത്രാർണാഷ്ടോത്തരശതനാമ സ്തോത്രം
ശ്രീദേവ്യുവാച ।
ഭഗവൻ ദേവദേവേശ മന്ത്രാർണസ്തവമുത്തമം ।
ദക്ഷിണാമൂർതിദേവസ്യ കൃപയാ വദ മേ പ്രഭോ ॥ 1 ॥
ശ്രീമഹാദേവ ഉവാച ।
സാധു പൃഷ്ടം മഹാദേവി സർവലോകഹിതായ തേ ।
വക്ഷ്യാമി പരമം ഗുഹ്യം മന്ത്രാർണസ്തവമുത്തമം ॥ 2 ॥
ഋഷിശ്ഛന്ദോ ദേവതാംഗന്യാസാദികമനുത്തമം ।
മൂലമന്ത്രപദസ്യാപി ദ്രഷ്ടവ്യം സകലം ഹി തത് ॥ 3 ॥
ധ്യാനം –
ഭസ്മവ്യാപാണ്ഡുരാംഗഃ ശശിശകലധരോ ജ്ഞാനമുദ്രാക്ഷമാലാ-
-വീണാപുസ്തൈർവിരാജത്കരകമലധരോ യോഗപട്ടാഭിരാമഃ ।
വ്യാഖ്യാപീഠേ നിഷണ്ണേ മുനിവരനികരൈഃ സേവ്യമാനഃ പ്രസന്നഃ
സവ്യാലഃ കൃത്തിവാസാഃ സതതമവതു നോ ദക്ഷിണാമൂർതിരീശഃ ॥ 4 ॥
ഇതി ധ്യാത്വാ മഹാദേവം മന്ത്രാർണസ്തവമുത്തമം ।
ജപേത് ത്രിസന്ധ്യം നിയതോ ഭസ്മരുദ്രാക്ഷഭൂഷിതഃ ॥ 5 ॥
സ്തോത്രം –
ഓം । ഓങ്കാരാചലസിംഹേന്ദ്രഃ ഓങ്കാരോദ്യാനകോകിലഃ ।
ഓങ്കാരനീഡശുകരാഡോങ്കാരാരണ്യകുഞ്ജരഃ ॥ 6 ॥
നഗരാജസുതാജാനിർനഗരാജനിജാലയഃ ।
നവമാണിക്യമാലാഢ്യോ നവചന്ദ്രശിഖാമണിഃ ॥ 7 ॥
നന്ദിതാശേഷമൗനീന്ദ്രോ നന്ദീശാദിമദേശികഃ ।
മോഹാനലസുധാധാരോ മോഹാംബുജസുധാകരഃ ॥ 8 ॥
മോഹാന്ധകാരതരണിർമോഹോത്പലനഭോമണിഃ ।
ഭക്തജ്ഞാനാബ്ധിശീതാംശുഃ ഭക്താജ്ഞാനതൃണാനലഃ ॥ 9 ॥
ഭക്താംഭോജസഹസ്രാംശുഃ ഭക്തകേകിഘനാഘനഃ ।
ഭക്തകൈരവരാകേന്ദുഃ ഭക്തകോകദിവാകരഃ ॥ 10 ॥
ഗജാനനാദിസമ്പൂജ്യോ ഗജചർമോജ്ജ്വലാകൃതിഃ ।
ഗംഗാധവലദിവ്യാംഗോ ഗംഗാഭംഗലസജ്ജടഃ ॥ 11 ॥
ഗഗനാംബരസംവീതോ ഗഗനാമുക്തമൂർധജഃ ।
വദനാബ്ജജിതശ്രീശ്ച വദനേന്ദുസ്ഫുരദ്ദിശഃ ॥ 12 ॥
വരദാനൈകനിപുണോ വരവീണോജ്ജ്വലത്കരഃ ।
വനവാസസമുല്ലാസീ വനലീലൈകലോലുപഃ ॥ 13 ॥
തേജഃപുഞ്ജഘനാകാരോ തേജസാമവിഭാസകഃ ।
തേജഃപ്രദോ വിധേയാനാം തേജോമയനിജാശ്രമഃ ॥ 14 ॥
ദമിതാനംഗസംഗ്രാമോ ദരഹാസോജ്ജ്വലന്മുഖഃ ।
ദയാരസസുധാസിന്ധുഃ ദരിദ്രധനശേവധിഃ ॥ 15 ॥
ക്ഷീരേന്ദുസ്ഫടികാകാരഃ ക്ഷിതീന്ദ്രമകുടോജ്ജ്വലഃ ।
ക്ഷീരോപഹാരരസികഃ ക്ഷിപ്രൈശ്വര്യഫലപ്രദഃ ॥ 16 ॥
നാനാഭരണമുക്താംഗോ നാരീസമ്മോഹനാകൃതിഃ ।
നാദബ്രഹ്മരസാസ്വാദീ നാഗഭൂഷണഭൂഷിതഃ ॥ 17 ॥
മൂർതിനിന്ദിതകന്ദർപോ മൂർതാമൂർതജഗദ്വപുഃ ।
മൂകാജ്ഞാനതമോഭാനുഃ മൂർതിമത്കല്പപാദപഃ ॥ 18 ॥
തരുണാദിത്യസങ്കാശഃ തന്ത്രീവാദനതത്പരഃ ।
തരുമൂലൈകനിലയഃ തപ്തജാംബൂനദപ്രഭഃ ॥ 19 ॥
തത്ത്വപുസ്തോല്ലസത്പാണിഃ തപനോഡുപലോചനഃ ।
യമസന്നുതസത്കീർതിഃ യമസമ്യമസമ്യുതഃ ॥ 20 ॥
യതിരൂപധരോ മൗനമുനീന്ദ്രോപാസ്യവിഗ്രഹഃ ।
മന്ദാരഹാരരുചിരോ മദനായുതസുന്ദരഃ ॥ 21 ॥
മന്ദസ്മിതലസദ്വക്ത്രോ മധുരാധരപല്ലവഃ ।
മഞ്ജീരമഞ്ജുപാദാബ്ജോ മണിപട്ടോലസത്കടിഃ ॥ 22 ॥
ഹസ്താങ്കുരിതചിന്മുദ്രോ ഹംസയോഗപടൂത്തമഃ ।
ഹംസജപ്യാക്ഷമാലാഢ്യോ ഹംസേന്ദ്രാരാധ്യപാദുകഃ ॥ 23 ॥
മേരുശൃംഗസമുല്ലാസീ മേഘശ്യാമമനോഹരഃ ।
മേഘാങ്കുരാലവാലാഗ്ര്യോ മേധാപക്വഫലദ്രുമഃ ॥ 24 ॥
ധാർമികാന്തകൃതാവാസോ ധർമമാർഗപ്രവർതകഃ ।
ധാമത്രയനിജാരാമോ ധരോത്തമമഹാരഥഃ ॥ 25 ॥
പ്രബോധോദാരദീപശ്രീഃ പ്രകാശിതജഗത്ത്രയഃ ।
പ്രജ്ഞാചന്ദ്രശിലാചന്ദ്രഃ പ്രജ്ഞാമണിലസത്കരഃ ॥ 26 ॥
ജ്ഞാനിഹൃദ്ഭാസമാനാത്മാ ജ്ഞാതൄണാമവിദൂരഗഃ ।
ജ്ഞാനായാദൃതദിവ്യാംഗോ ജ്ഞാതിജാതികുലാതിഗഃ ॥ 27 ॥
പ്രപന്നപാരിജാതാഗ്ര്യഃ പ്രണതാർത്യബ്ധിബാഡബഃ ।
പ്രമാണഭൂതോ ഭൂതാനാം പ്രപഞ്ചഹിതകാരകഃ ॥ 28 ॥
യമിസത്തമസംസേവ്യോ യക്ഷഗേയാത്മവൈഭവഃ ।
യജ്ഞാധിദേവതാമൂർതിഃ യജമാനവപുർധരഃ ॥ 29 ॥
ഛത്രാധിപദിഗീശശ്ച ഛത്രചാമരസേവിതഃ ।
ഛന്ദഃ ശാസ്ത്രാദിനിപുണശ്ഛലജാത്യാദിദൂരഗഃ ॥ 30 ॥
സ്വാഭാവികസുഖൈകാത്മാ സ്വാനുഭൂതിരസോദധിഃ ।
സ്വാരാജ്യസമ്പദധ്യക്ഷഃ സ്വാത്മാരാമമഹാമതിഃ ॥ 31 ॥
ഹാടകാഭജടാജൂടോ ഹാസോദസ്താരിമണ്ഡലഃ ।
ഹാലാഹലോജ്ജ്വലഗലോ ഹാരായിതഭുജംഗമഃ ॥ 32 ॥
ഇതി ശ്രീ ദക്ഷിണാമൂർതി മന്ത്രാർണാഷ്ടോത്തരശതനാമ സ്തോത്രം ।
Recite with devotion and pure heart
Regular practice brings spiritual benefits