हैंహైHaindavamஹிહિં
📍
Font Size:
ದಕ್ಷಿಣಾಮೂರ್ತಿ ಮಂತ್ರಾರ್ಣಾಷ್ಟೋತ್ತರಶತನಾಮ ಸ್ತೋತ್ರಂ
ಶ್ರೀದೇವ್ಯುವಾಚ ।
ಭಗವನ್ ದೇವದೇವೇಶ ಮಂತ್ರಾರ್ಣಸ್ತವಮುತ್ತಮಂ ।
ದಕ್ಷಿಣಾಮೂರ್ತಿದೇವಸ್ಯ ಕೃಪಯಾ ವದ ಮೇ ಪ್ರಭೋ ॥ 1 ॥
ಶ್ರೀಮಹಾದೇವ ಉವಾಚ ।
ಸಾಧು ಪೃಷ್ಟಂ ಮಹಾದೇವಿ ಸರ್ವಲೋಕಹಿತಾಯ ತೇ ।
ವಕ್ಷ್ಯಾಮಿ ಪರಮಂ ಗುಹ್ಯಂ ಮಂತ್ರಾರ್ಣಸ್ತವಮುತ್ತಮಂ ॥ 2 ॥
ಋಷಿಶ್ಛಂದೋ ದೇವತಾಂಗನ್ಯಾಸಾದಿಕಮನುತ್ತಮಂ ।
ಮೂಲಮಂತ್ರಪದಸ್ಯಾಪಿ ದ್ರಷ್ಟವ್ಯಂ ಸಕಲಂ ಹಿ ತತ್ ॥ 3 ॥
ಧ್ಯಾನಂ –
ಭಸ್ಮವ್ಯಾಪಾಂಡುರಾಂಗಃ ಶಶಿಶಕಲಧರೋ ಜ್ಞಾನಮುದ್ರಾಕ್ಷಮಾಲಾ-
-ವೀಣಾಪುಸ್ತೈರ್ವಿರಾಜತ್ಕರಕಮಲಧರೋ ಯೋಗಪಟ್ಟಾಭಿರಾಮಃ ।
ವ್ಯಾಖ್ಯಾಪೀಠೇ ನಿಷಣ್ಣೇ ಮುನಿವರನಿಕರೈಃ ಸೇವ್ಯಮಾನಃ ಪ್ರಸನ್ನಃ
ಸವ್ಯಾಲಃ ಕೃತ್ತಿವಾಸಾಃ ಸತತಮವತು ನೋ ದಕ್ಷಿಣಾಮೂರ್ತಿರೀಶಃ ॥ 4 ॥
ಇತಿ ಧ್ಯಾತ್ವಾ ಮಹಾದೇವಂ ಮಂತ್ರಾರ್ಣಸ್ತವಮುತ್ತಮಂ ।
ಜಪೇತ್ ತ್ರಿಸಂಧ್ಯಂ ನಿಯತೋ ಭಸ್ಮರುದ್ರಾಕ್ಷಭೂಷಿತಃ ॥ 5 ॥
ಸ್ತೋತ್ರಂ –
ಓಂ । ಓಂಕಾರಾಚಲಸಿಂಹೇಂದ್ರಃ ಓಂಕಾರೋದ್ಯಾನಕೋಕಿಲಃ ।
ಓಂಕಾರನೀಡಶುಕರಾಡೋಂಕಾರಾರಣ್ಯಕುಂಜರಃ ॥ 6 ॥
ನಗರಾಜಸುತಾಜಾನಿರ್ನಗರಾಜನಿಜಾಲಯಃ ।
ನವಮಾಣಿಕ್ಯಮಾಲಾಢ್ಯೋ ನವಚಂದ್ರಶಿಖಾಮಣಿಃ ॥ 7 ॥
ನಂದಿತಾಶೇಷಮೌನೀಂದ್ರೋ ನಂದೀಶಾದಿಮದೇಶಿಕಃ ।
ಮೋಹಾನಲಸುಧಾಧಾರೋ ಮೋಹಾಂಬುಜಸುಧಾಕರಃ ॥ 8 ॥
ಮೋಹಾಂಧಕಾರತರಣಿರ್ಮೋಹೋತ್ಪಲನಭೋಮಣಿಃ ।
ಭಕ್ತಜ್ಞಾನಾಬ್ಧಿಶೀತಾಂಶುಃ ಭಕ್ತಾಜ್ಞಾನತೃಣಾನಲಃ ॥ 9 ॥
ಭಕ್ತಾಂಭೋಜಸಹಸ್ರಾಂಶುಃ ಭಕ್ತಕೇಕಿಘನಾಘನಃ ।
ಭಕ್ತಕೈರವರಾಕೇಂದುಃ ಭಕ್ತಕೋಕದಿವಾಕರಃ ॥ 10 ॥
ಗಜಾನನಾದಿಸಂಪೂಜ್ಯೋ ಗಜಚರ್ಮೋಜ್ಜ್ವಲಾಕೃತಿಃ ।
ಗಂಗಾಧವಲದಿವ್ಯಾಂಗೋ ಗಂಗಾಭಂಗಲಸಜ್ಜಟಃ ॥ 11 ॥
ಗಗನಾಂಬರಸಂವೀತೋ ಗಗನಾಮುಕ್ತಮೂರ್ಧಜಃ ।
ವದನಾಬ್ಜಜಿತಶ್ರೀಶ್ಚ ವದನೇಂದುಸ್ಫುರದ್ದಿಶಃ ॥ 12 ॥
ವರದಾನೈಕನಿಪುಣೋ ವರವೀಣೋಜ್ಜ್ವಲತ್ಕರಃ ।
ವನವಾಸಸಮುಲ್ಲಾಸೀ ವನಲೀಲೈಕಲೋಲುಪಃ ॥ 13 ॥
ತೇಜಃಪುಂಜಘನಾಕಾರೋ ತೇಜಸಾಮವಿಭಾಸಕಃ ।
ತೇಜಃಪ್ರದೋ ವಿಧೇಯಾನಾಂ ತೇಜೋಮಯನಿಜಾಶ್ರಮಃ ॥ 14 ॥
ದಮಿತಾನಂಗಸಂಗ್ರಾಮೋ ದರಹಾಸೋಜ್ಜ್ವಲನ್ಮುಖಃ ।
ದಯಾರಸಸುಧಾಸಿಂಧುಃ ದರಿದ್ರಧನಶೇವಧಿಃ ॥ 15 ॥
ಕ್ಷೀರೇಂದುಸ್ಫಟಿಕಾಕಾರಃ ಕ್ಷಿತೀಂದ್ರಮಕುಟೋಜ್ಜ್ವಲಃ ।
ಕ್ಷೀರೋಪಹಾರರಸಿಕಃ ಕ್ಷಿಪ್ರೈಶ್ವರ್ಯಫಲಪ್ರದಃ ॥ 16 ॥
ನಾನಾಭರಣಮುಕ್ತಾಂಗೋ ನಾರೀಸಮ್ಮೋಹನಾಕೃತಿಃ ।
ನಾದಬ್ರಹ್ಮರಸಾಸ್ವಾದೀ ನಾಗಭೂಷಣಭೂಷಿತಃ ॥ 17 ॥
ಮೂರ್ತಿನಿಂದಿತಕಂದರ್ಪೋ ಮೂರ್ತಾಮೂರ್ತಜಗದ್ವಪುಃ ।
ಮೂಕಾಜ್ಞಾನತಮೋಭಾನುಃ ಮೂರ್ತಿಮತ್ಕಲ್ಪಪಾದಪಃ ॥ 18 ॥
ತರುಣಾದಿತ್ಯಸಂಕಾಶಃ ತಂತ್ರೀವಾದನತತ್ಪರಃ ।
ತರುಮೂಲೈಕನಿಲಯಃ ತಪ್ತಜಾಂಬೂನದಪ್ರಭಃ ॥ 19 ॥
ತತ್ತ್ವಪುಸ್ತೋಲ್ಲಸತ್ಪಾಣಿಃ ತಪನೋಡುಪಲೋಚನಃ ।
ಯಮಸನ್ನುತಸತ್ಕೀರ್ತಿಃ ಯಮಸಮ್ಯಮಸಮ್ಯುತಃ ॥ 20 ॥
ಯತಿರೂಪಧರೋ ಮೌನಮುನೀಂದ್ರೋಪಾಸ್ಯವಿಗ್ರಹಃ ।
ಮಂದಾರಹಾರರುಚಿರೋ ಮದನಾಯುತಸುಂದರಃ ॥ 21 ॥
ಮಂದಸ್ಮಿತಲಸದ್ವಕ್ತ್ರೋ ಮಧುರಾಧರಪಲ್ಲವಃ ।
ಮಂಜೀರಮಂಜುಪಾದಾಬ್ಜೋ ಮಣಿಪಟ್ಟೋಲಸತ್ಕಟಿಃ ॥ 22 ॥
ಹಸ್ತಾಂಕುರಿತಚಿನ್ಮುದ್ರೋ ಹಂಸಯೋಗಪಟೂತ್ತಮಃ ।
ಹಂಸಜಪ್ಯಾಕ್ಷಮಾಲಾಢ್ಯೋ ಹಂಸೇಂದ್ರಾರಾಧ್ಯಪಾದುಕಃ ॥ 23 ॥
ಮೇರುಶೃಂಗಸಮುಲ್ಲಾಸೀ ಮೇಘಶ್ಯಾಮಮನೋಹರಃ ।
ಮೇಘಾಂಕುರಾಲವಾಲಾಗ್ರ್ಯೋ ಮೇಧಾಪಕ್ವಫಲದ್ರುಮಃ ॥ 24 ॥
ಧಾರ್ಮಿಕಾಂತಕೃತಾವಾಸೋ ಧರ್ಮಮಾರ್ಗಪ್ರವರ್ತಕಃ ।
ಧಾಮತ್ರಯನಿಜಾರಾಮೋ ಧರೋತ್ತಮಮಹಾರಥಃ ॥ 25 ॥
ಪ್ರಬೋಧೋದಾರದೀಪಶ್ರೀಃ ಪ್ರಕಾಶಿತಜಗತ್ತ್ರಯಃ ।
ಪ್ರಜ್ಞಾಚಂದ್ರಶಿಲಾಚಂದ್ರಃ ಪ್ರಜ್ಞಾಮಣಿಲಸತ್ಕರಃ ॥ 26 ॥
ಜ್ಞಾನಿಹೃದ್ಭಾಸಮಾನಾತ್ಮಾ ಜ್ಞಾತೄಣಾಮವಿದೂರಗಃ ।
ಜ್ಞಾನಾಯಾದೃತದಿವ್ಯಾಂಗೋ ಜ್ಞಾತಿಜಾತಿಕುಲಾತಿಗಃ ॥ 27 ॥
ಪ್ರಪನ್ನಪಾರಿಜಾತಾಗ್ರ್ಯಃ ಪ್ರಣತಾರ್ತ್ಯಬ್ಧಿಬಾಡಬಃ ।
ಪ್ರಮಾಣಭೂತೋ ಭೂತಾನಾಂ ಪ್ರಪಂಚಹಿತಕಾರಕಃ ॥ 28 ॥
ಯಮಿಸತ್ತಮಸಂಸೇವ್ಯೋ ಯಕ್ಷಗೇಯಾತ್ಮವೈಭವಃ ।
ಯಜ್ಞಾಧಿದೇವತಾಮೂರ್ತಿಃ ಯಜಮಾನವಪುರ್ಧರಃ ॥ 29 ॥
ಛತ್ರಾಧಿಪದಿಗೀಶಶ್ಚ ಛತ್ರಚಾಮರಸೇವಿತಃ ।
ಛಂದಃ ಶಾಸ್ತ್ರಾದಿನಿಪುಣಶ್ಛಲಜಾತ್ಯಾದಿದೂರಗಃ ॥ 30 ॥
ಸ್ವಾಭಾವಿಕಸುಖೈಕಾತ್ಮಾ ಸ್ವಾನುಭೂತಿರಸೋದಧಿಃ ।
ಸ್ವಾರಾಜ್ಯಸಂಪದಧ್ಯಕ್ಷಃ ಸ್ವಾತ್ಮಾರಾಮಮಹಾಮತಿಃ ॥ 31 ॥
ಹಾಟಕಾಭಜಟಾಜೂಟೋ ಹಾಸೋದಸ್ತಾರಿಮಂಡಲಃ ।
ಹಾಲಾಹಲೋಜ್ಜ್ವಲಗಲೋ ಹಾರಾಯಿತಭುಜಂಗಮಃ ॥ 32 ॥
ಇತಿ ಶ್ರೀ ದಕ್ಷಿಣಾಮೂರ್ತಿ ಮಂತ್ರಾರ್ಣಾಷ್ಟೋತ್ತರಶತನಾಮ ಸ್ತೋತ್ರಂ ।
Recite with devotion and pure heart
Regular practice brings spiritual benefits