हैंహైHaindavamஹிહિં
📍
Font Size:
കാലഭൈരവ കകാര അഷ്ടോത്തരശതനാമ സ്തോത്രം
അസ്യ ശ്രീശാക്താനന്ദപീയൂഷസ്യ നാമ ശ്രീകാലഭൈരവാഷ്ടോത്തരശതനാമ സ്തോത്ര മഹാമന്ത്രസ്യ ശ്രീ ആനന്ദഭൈരവ ഋഷിഃ അനുഷ്ടുപ് ഛന്ദഃ ശ്രീ കാലഭൈരവോ ദേവതാ ഹ്രീം ബീജം ഹ്സൗഃ ശക്തിഃ ക്ഷ്ഫ്രൗം കീലകം ശ്രീകാലഭൈരവപ്രസാദസിദ്ധ്യർഥേ ജപേ വിനിയോഗഃ ॥
ഋഷ്യാദിന്യാസാഃ –
ശ്രീആനന്ദഭൈരവ ഋഷയേ നമഃ ശിരസി ।
അനുഷ്ടുപ് ഛന്ദസേ നമോ മുഖേ ।
ശ്രീകാലഭൈരവ ദേവതായൈ നമോ ഹൃദയേ ।
ഹ്രീം ബീജായ നമോ ഗുഹ്യേ ।
ഹ്സൗഃ ശക്തയേ നമഃ പാദയോഃ ।
ക്ഷ്ഫ്രൗം കീലകായ നമോ നാഭൗ ।
വിനിയോഗായ നമഃ സർവാംഗേ ॥
കരന്യാസാഃ –
ക്ഷ്ഫ്രാം അംഗുഷ്ഠാഭ്യാം നമഃ ।
ക്ഷ്ഫ്രീം തർജനീഭ്യാം നമഃ ।
ക്ഷ്ഫ്രൂം മധ്യമാഭ്യാം നമഃ ।
ക്ഷ്ഫ്രൈം അനാമികാഭ്യാം നമഃ ।
ക്ഷ്ഫ്രൗം കനിഷ്ഠികാഭ്യാം നമഃ ।
ക്ഷ്ഫ്രഃ കരതലകരപൃഷ്ഠാഭ്യാം നമഃ ॥
ഹൃദയാദിന്യാസാഃ –
ക്ഷ്ഫ്രാം ഹൃദയായ നമഃ ।
ക്ഷ്ഫ്രീം ശിരസേ സ്വാഹാ ।
ക്ഷ്ഫ്രൂം ശിഖായൈ വഷട് ।
ക്ഷ്ഫ്രൈം കവചായ ഹും ।
ക്ഷ്ഫ്രൗം നേത്രത്രയായ വൗഷട് ।
ക്ഷ്ഫ്രഃ അസ്ത്രായ ഫട് ॥
ധ്യാനം –
ശ്വസ്ഥം ത്രീക്ഷണശോഭിതം ശ്രിതജനോദ്ധാരം കൃപാസാഗരം
ആമ്നായാസ്യകരോടിഖർപകരം ദണ്ഡം ധരന്തം സദാ ।
ശ്രീകാശീപുരനായകം സകലമന്ത്രർഷീശ്വരം മോക്ഷദം
ധ്യായേത്തം ഹൃദി കാലഭൈരവഗുരും കാന്താസമേതം പരം ॥
സ്തോത്രം –
കാലഭൈരവദേവഃ കാലകാലഃ കാലദണ്ഡധൃക് ।
കാലാത്മാ കാമമന്ത്രാത്മാ കാശികാപുരനായകഃ ॥ 1 ॥
കരുണാവാരിധിഃ കാന്താമിലിതഃ കാലികാതനുഃ ।
കാലജഃ കുക്കുരാരൂഢഃ കപാലീ കാലനേമിഹാ ॥ 2 ॥
കാലകണ്ഠഃ കടാക്ഷാനുഗൃഹീതാഖിലസേവകഃ ।
കപാലഖർപരോത്കൃഷ്ടഭിക്ഷാപാത്രധരഃ കവിഃ ॥ 3 ॥
കല്പാന്തദഹനാകാരഃ കലാനിധികലാധരഃ ।
കപാലമാലികാഭൂഷഃ കാലീകുലവരപ്രദഃ ॥ 4 ॥
കാലീകലാവതീദീക്ഷാസംസ്കാരോപാസനപ്രിയഃ ।
കാലികാദക്ഷപാർശ്വസ്ഥഃ കാലീവിദ്യാസ്വരൂപവാൻ ॥ 5 ॥
കാലീകൂർചസമായുക്തഭുവനാകൂടഭാസുരഃ ।
കാലീധ്യാനജപാസക്തഹൃദഗാരനിവാസകഃ ॥ 6 ॥
കാലികാവരിവസ്യാദിപ്രദാനകല്പപാദപഃ ।
കാല്യുഗ്രാവാസവബ്രാഹ്മീപ്രമുഖാചാര്യനായകഃ ॥ 7 ॥
കങ്കാലമാലികാധാരീ കമനീയജടാധരഃ ।
കോണരേഖാഷ്ടപത്രസ്ഥപ്രദേശബിന്ദുപീഠഗഃ ॥ 8 ॥
കദലീകരവീരാർകകഞ്ജഹോമാർചനപ്രിയഃ ।
കൂർമപീഠാദിശക്തീശഃ കലാകാഷ്ഠാദിപാലകഃ ॥ 9 ॥
കടപ്രൂഃ കാമസഞ്ചാരീ കാമാരിഃ കാമരൂപവാൻ ।
കണ്ഠാദിസർവചക്രസ്ഥഃ ക്രിയാദികോടിദീപകഃ ॥ 10 ॥
കർണഹീനോപവീതാഭഃ കനകാചലദേഹവാൻ ।
കന്ദരാകാരദഹരാകാശഭാസുരമൂർതിമാൻ ॥ 11 ॥
കപാലമോചനാനന്ദഃ കാലരാജഃ ക്രിയാപ്രദഃ ।
കരണാധിപതിഃ കർമകാരകഃ കർതൃനായകഃ ॥ 12 ॥
കണ്ഠാദ്യഖിലദേശാഹിഭൂഷണാഢ്യഃ കലാത്മകഃ ।
കർമകാണ്ഡാധിപഃ കിൽബിഷമോചീ കാമകോഷ്ഠകഃ ॥ 13 ॥
കലകണ്ഠാരവാനന്ദീ കർമശ്രദ്ധവരപ്രദഃ ।
കുണപാകീർണകാന്താരസഞ്ചാരീ കൗമുദീസ്മിതഃ ॥ 14 ॥
കിങ്കിണീമഞ്ജുനിക്വാണകടീസൂത്രവിരാജിതഃ ।
കല്യാണകൃത്കലിധ്വംസീ കർമസാക്ഷീ കൃതജ്ഞപഃ ॥ 15 ॥
കരാലദംഷ്ട്രഃ കന്ദർപദർപഘ്നഃ കാമഭേദനഃ ।
കാലാഗുരുവിലിപ്താംഗഃ കാതരാർതാഭയപ്രദഃ ॥ 16 ॥
കലന്ദികാപ്രദഃ കാലീഭക്തലോകവരപ്രദഃ ।
കാമിനീകാഞ്ചനാബദ്ധമോചകഃ കമലേക്ഷണഃ ॥ 17 ॥
കാദംബരീരസാസ്വാദലോലുപഃ കാങ്ക്ഷിതാർഥദഃ ।
കബന്ധനാവഃ കാമാഖ്യാകാഞ്ച്യാദിക്ഷേത്രപാലകഃ ॥ 18 ॥
കൈവല്യപ്രദമന്ദാരഃ കോടിസൂര്യസമപ്രഭഃ ।
ക്രിയേച്ഛാജ്ഞാനശക്തിപ്രദീപകാനലലോചനഃ ॥ 19 ॥
കാമ്യാദികർമസർവസ്വഫലദഃ കർമപോഷകഃ ।
കാര്യകാരണനിർമാതാ കാരാഗൃഹവിമോചകഃ ॥ 20 ॥
കാലപര്യായമൂലസ്ഥഃ കാര്യസിദ്ധിപ്രദായകഃ ।
കാലാനുരൂപകർമാംഗമോഷണഭ്രാന്തിനാശനഃ ॥ 21 ॥
കാലചക്രപ്രഭേദീ കാലിമ്മന്യയോഗിനീപ്രിയഃ ।
കാഹലാദിമഹാവാദ്യതാലതാണ്ഡവലാലസഃ ॥ 22 ॥
കുലകുണ്ഡലിനീശാക്തയോഗസിദ്ധിപ്രദായകഃ ।
കാലരാത്രിമഹാരാത്രിശിവാരാത്ര്യാദികാരകഃ ॥ 23 ॥
കോലാഹലധ്വനിഃ കോപീ കൗലമാർഗപ്രവർതകഃ ।
കർമകൗശല്യസന്തോഷീ കേലിഭാഷണലാലസഃ ॥ 24 ॥
കൃത്സ്നപ്രവൃത്തിവിശ്വാണ്ഡപഞ്ചകൃത്യവിധായകഃ ।
കാലനാഥപരഃ കാരഃ കാലധർമപ്രവർതകഃ ॥ 25 ॥
കുലാചാര്യഃ കുലാചാരരതഃ കുഹ്വഷ്ടമീപ്രിയഃ ।
കർമബന്ധാഖിലച്ഛേദീ കോഷ്ഠസ്ഥഭൈരവാഗ്രണീഃ ॥ 26 ॥
കഠോരൗജസ്യഭീഷ്മാജ്ഞാപാലകിങ്കരസേവിതഃ ।
കാലരുദ്രഃ കാലവേലാഹോരാംശമൂർതിമാൻ കരഃ ॥ 27 ॥
ഇത്യുക്തം ഗുരുനാഥസ്യ നാമ്നാമഷ്ടോത്തരം ശതം ।
ശ്രീകാലഭൈരവസ്യേദം രഹസ്യമതിപാവനം ॥ 28 ॥
ശ്രീശാക്താനന്ദപീയുഷം മോക്ഷസാധനമുത്തമം ।
വിദ്യാസർവസ്വസാരാഢ്യം യോഗിനീഹൃദയംഗമം ॥ 29 ॥
പുണ്യം സുദുർലഭം ഗോപ്യം ശമഥപ്രദമൗഷധം ।
കകാരമാതൃകാബൃംഹം ഗുർവനുഗ്രഹസിദ്ധിദം ॥ 30 ॥
യോ ജപേത്പരയാ ഭക്ത്യാ പ്രേമധ്യാനപരഃ സദാ ।
ഗുരുപ്രസാദാല്ലഭതേ വരം സർവമഭീപ്സിതം ॥ 31 ॥
ഇതി ശ്രീ കാലഭൈരവ കകാര അഷ്ടോത്തരശതനാമ സ്തോത്രം ।
Recite with devotion and pure heart
Regular practice brings spiritual benefits