കാലഭൈരവാഷ്ടകം

ദേവരാജസേവ്യമാനപാവനാംഘ്രിപങ്കജം

വ്യാലയജ്ഞസൂത്രമിന്ദുശേഖരം കൃപാകരം ।

നാരദാദിയോഗിബൃന്ദവന്ദിതം ദിഗംബരം

കാശികാപുരാധിനാഥ കാലഭൈരവം ഭജേ ॥ 1 ॥

ഭാനുകോടിഭാസ്വരം ഭവാബ്ധിതാരകം പരം

നീലകണ്ഠമീപ്സിതാർഥദായകം ത്രിലോചനം ।

കാലകാലമംബുജാക്ഷമക്ഷശൂലമക്ഷരം

കാശികാപുരാധിനാഥ കാലഭൈരവം ഭജേ ॥ 2 ॥

ശൂലടങ്കപാശദണ്ഡപാണിമാദികാരണം

ശ്യാമകായമാദിദേവമക്ഷരം നിരാമയം ।

ഭീമവിക്രമം പ്രഭും വിചിത്രതാണ്ഡവപ്രിയം

കാശികാപുരാധിനാഥ കാലഭൈരവം ഭജേ ॥ 3 ॥

ഭുക്തിമുക്തിദായകം പ്രശസ്തചാരുവിഗ്രഹം

ഭക്തവത്സലം സ്ഥിരം സമസ്തലോകവിഗ്രഹം ।

നിക്വണന്മനോജ്ഞഹേമകിങ്കിണീലസത്കടിം

കാശികാപുരാധിനാഥ കാലഭൈരവം ഭജേ ॥ 4 ॥

ധർമസേതുപാലകം ത്വധർമമാർഗനാശകം

കർമപാശമോചകം സുശർമദായകം വിഭും ।

സ്വർണവർണകേശപാശശോഭിതാംഗനിർമലം

കാശികാപുരാധിനാഥ കാലഭൈരവം ഭജേ ॥ 5 ॥

രത്നപാദുകാപ്രഭാഭിരാമപാദയുഗ്മകം

നിത്യമദ്വിതീയമിഷ്ടദൈവതം നിരഞ്ജനം ।

മൃത്യുദർപനാശനം കരാലദംഷ്ട്രഭൂഷണം

കാശികാപുരാധിനാഥ കാലഭൈരവം ഭജേ ॥ 6 ॥

അട്ടഹാസഭിന്നപദ്മജാണ്ഡകോശസന്തതിം

ദൃഷ്ടിപാതനഷ്ടപാപജാലമുഗ്രശാസനം ।

അഷ്ടസിദ്ധിദായകം കപാലമാലികാധരം

കാശികാപുരാധിനാഥ കാലഭൈരവം ഭജേ ॥ 7 ॥

ഭൂതസംഘനായകം വിശാലകീർതിദായകം

കാശിവാസിലോകപുണ്യപാപശോധകം വിഭും ।

നീതിമാർഗകോവിദം പുരാതനം ജഗത്പതിം

കാശികാപുരാധിനാഥ കാലഭൈരവം ഭജേ ॥ 8 ॥

കാലഭൈരവാഷ്ടകം പഠന്തി യേ മനോഹരം

ജ്ഞാനമുക്തിസാധകം വിചിത്രപുണ്യവർധനം ।

ശോകമോഹദൈന്യലോഭകോപതാപനാശനം

തേ പ്രയാന്തി കാലഭൈരവാംഘ്രിസന്നിധിം ധ്രുവം ॥ 9 ॥

ഇതി ശ്രീ കാലഭൈരവാഷ്ടകം സമ്പൂർണം ।

Recite with devotion and pure heart

Regular practice brings spiritual benefits