हैंహైHaindavamஹிહિં
📍
Font Size:
ಬಟುಕ ಭೈರವ ಸ್ತವರಾಜಃ
ಕೈಲಾಸಶಿಖರಾಸೀನಂ ದೇವದೇವಂ ಜಗದ್ಗುರುಂ ।
ಶಂಕರಂ ಪರಿಪಪ್ರಚ್ಛ ಪಾರ್ವತೀ ಪರಮೇಶ್ವರಂ ॥ 1
ಶ್ರೀಪಾರ್ವತ್ಯುವಾಚ –
ಭಗವನ್ ಸರ್ವಧರ್ಮಜ್ಞ ಸರ್ವಶಾಸ್ತ್ರಾಗಮಾದಿಷು ।
ಆಪದುದ್ಧಾರಣಂ ಮಂತ್ರಂ ಸರ್ವಸಿದ್ಧಿಪ್ರದಂ ನೃಣಾಂ ॥ 2
ಸರ್ವೇಷಾಂ ಚೈವ ಭೂತಾನಾಂ ಹಿತಾರ್ಥಂ ವಾಂಛಿತಂ ಮಯಾ ।
ವಿಶೇಷತಸ್ತು ರಾಜ್ಞಾಂ ವೈ ಶಾಂತಿಪುಷ್ಟಿಪ್ರಸಾಧನಂ ॥ 3
ಅಂಗನ್ಯಾಸ ಕರನ್ಯಾಸ ಬೀಜನ್ಯಾಸ ಸಮನ್ವಿತಂ ।
ವಕ್ತುಮರ್ಹಸಿ ದೇವೇಶ ಮಮ ಹರ್ಷವಿವರ್ಧನಂ ॥ 4
ಶ್ರೀಭಗವಾನುವಾಚ –
ಶೃಣು ದೇವಿ ಮಹಾಮಂತ್ರಮಾಪದುದ್ಧಾರಹೇತುಕಂ ।
ಸರ್ವದುಃಖಪ್ರಶಮನಂ ಸರ್ವಶತ್ರುನಿಬರ್ಹಣಂ ॥ 5
ಅಪಸ್ಮಾರಾದಿರೋಗಾಣಾಂ ಜ್ವರಾದೀನಾಂ ವಿಶೇಷತಃ ।
ನಾಶನಂ ಸ್ಮೃತಿಮಾತ್ರೇಣ ಮಂತ್ರರಾಜಮಿಮಂ ಪ್ರಿಯೇ ॥ 6
ಗ್ರಹರಾಜಭಯಾನಾಂ ಚ ನಾಶನಂ ಸುಖವರ್ಧನಂ ।
ಸ್ನೇಹಾದ್ವಕ್ಷ್ಯಾಮಿ ತೇ ಮಂತ್ರಂ ಸರ್ವಸಾರಮಿಮಂ ಪ್ರಿಯೇ ॥ 7
ಸರ್ವಕಾಮಾರ್ಥದಂ ಮಂತ್ರಂ ರಾಜ್ಯಭೋಗಪ್ರದಂ ನೃಣಾಂ ।
ಪ್ರಣವಂ ಪೂರ್ವಮುಚ್ಚಾರ್ಯ ದೇವೀ ಪ್ರಣವಮುದ್ಧರೇತ್ ॥ 8
ಬಟುಕಾಯೇತಿ ವೈ ಪಶ್ಚಾದಾಪದುದ್ಧಾರಣಾಯ ಚ ।
ಕುರು ದ್ವಯಂ ತತಃ ಪಶ್ಚಾದ್ಬಟುಕಾಯ ಪುನಃ ಕ್ಷಿಪೇತ್ ॥ 9
ದೇವೀ ಪ್ರಣವಮುದ್ಧೃತ್ಯ ಮಂತ್ರರಾಜಮಿಮಂ ಪ್ರಿಯೇ ।
ಮಂತ್ರೋದ್ಧಾರಮಿಮಂ ದೇವಿ ತ್ರೈಲೋಕ್ಯಸ್ಯಾಪಿ ದುರ್ಲಭಂ ॥ 10
ಅಪ್ರಕಾಶ್ಯಮಿಮಂ ಮಂತ್ರಂ ಸರ್ವಶಕ್ತಿಸಮನ್ವಿತಂ ।
ಸ್ಮರಣಾದೇವ ಮಂತ್ರಸ್ಯ ಭೂತಪ್ರೇತಪಿಶಾಚಕಾಃ ॥ 11
ವಿದ್ರವಂತಿ ಭಯಾರ್ತಾ ವೈ ಕಾಲರುದ್ರಾದಿವ ಪ್ರಜಾಃ ।
ಪಠೇದ್ವಾ ಪಾಠಯೇದ್ವಾಪಿ ಪೂಜಯೇದ್ವಾಪಿ ಪುಸ್ತಕಂ ॥ 12
ನಾಗ್ನಿಚೌರಭಯಂ ವಾಪಿ ಗ್ರಹರಾಜಭಯಂ ತಥಾ ।
ನ ಚ ಮಾರೀಭಯಂ ತಸ್ಯ ಸರ್ವತ್ರ ಸುಖವಾನ್ ಭವೇತ್ ॥ 13
ಆಯುರಾರೋಗ್ಯಮೈಶ್ವರ್ಯಂ ಪುತ್ರಪೌತ್ರಾದಿಸಂಪದಃ ।
ಭವಂತಿ ಸತತಂ ತಸ್ಯ ಪುಸ್ತಕಸ್ಯಾಪಿ ಪೂಜನಾತ್ ॥ 14
ಶ್ರೀಪಾರ್ವತ್ಯುವಾಚ –
ಯ ಏಷ ಭೈರವೋ ನಾಮ ಆಪದುದ್ಧಾರಕೋ ಮತಃ ।
ತ್ವಯಾ ಚ ಕಥಿತೋ ದೇವ ಭೈರವಃ ಕಲ್ಪ ಉತ್ತಮಃ ॥ 15
ತಸ್ಯ ನಾಮಸಹಸ್ರಾಣಿ ಅಯುತಾನ್ಯರ್ಬುದಾನಿ ಚ ।
ಸಾರಮುದ್ಧೃತ್ಯ ತೇಷಾಂ ವೈ ನಾಮಾಷ್ಟಶತಕಂ ವದ ॥ 16
ಶ್ರೀಭಗವಾನುವಾಚ –
ಯಸ್ತು ಸಂಕೀರ್ತಯೇದೇತತ್ ಸರ್ವದುಷ್ಟನಿಬರ್ಹಣಂ ।
ಸರ್ವಾನ್ ಕಾಮಾನವಾಪ್ನೋತಿ ಸಾಧಕಃ ಸಿದ್ಧಿಮೇವ ಚ ॥ 17
ಶೃಣು ದೇವಿ ಪ್ರವಕ್ಷ್ಯಾಮಿ ಭೈರವಸ್ಯ ಮಹಾತ್ಮನಃ ।
ಆಪದುದ್ಧಾರಕಸ್ಯೇಹ ನಾಮಾಷ್ಟಶತಮುತ್ತಮಂ ॥ 18
ಸರ್ವಪಾಪಹರಂ ಪುಣ್ಯಂ ಸರ್ವಾಪದ್ವಿನಿವಾರಕಂ ।
ಸರ್ವಕಾಮಾರ್ಥದಂ ದೇವಿ ಸಾಧಕಾನಾಂ ಸುಖಾವಹಂ ॥ 19
ದೇಹಾಂಗನ್ಯಸನಂ ಚೈವ ಪೂರ್ವಂ ಕುರ್ಯಾತ್ ಸಮಾಹಿತಃ ।
ಭೈರವಂ ಮೂರ್ಧ್ನಿ ವಿನ್ಯಸ್ಯ ಲಲಾಟೇ ಭೀಮದರ್ಶನಂ ॥ 20
ಅಕ್ಷ್ಣೋರ್ಭೂತಾಶ್ರಯಂ ನ್ಯಸ್ಯ ವದನೇ ತೀಕ್ಷ್ಣದರ್ಶನಂ ।
ಕ್ಷೇತ್ರಪಂ ಕರ್ಣಯೋರ್ಮಧ್ಯೇ ಕ್ಷೇತ್ರಪಾಲಂ ಹೃದಿ ನ್ಯಸೇತ್ ॥ 21
ಕ್ಷೇತ್ರಾಖ್ಯಂ ನಾಭಿದೇಶೇ ಚ ಕಟ್ಯಾಂ ಸರ್ವಾಘನಾಶನಂ ।
ತ್ರಿನೇತ್ರಮೂರ್ವೋರ್ವಿನ್ಯಸ್ಯ ಜಂಘಯೋ ರಕ್ತಪಾಣಿಕಂ ॥ 22
ಪಾದಯೋರ್ದೇವದೇವೇಶಂ ಸರ್ವಾಂಗೇ ವಟುಕಂ ನ್ಯಸೇತ್ ।
ಏವಂ ನ್ಯಾಸವಿಧಿಂ ಕೃತ್ವಾ ತದನಂತರಮುತ್ತಮಂ ॥ 23
ನಾಮಾಷ್ಟಶತಕಸ್ಯಾಪಿ ಛಂದೋಽನುಷ್ಟುಬುದಾಹೃತಂ ।
ಬೃಹದಾರಣ್ಯಕೋ ನಾಮ ಋಷಿಶ್ಚ ಪರಿಕೀರ್ತಿತಃ ॥ 24
ದೇವತಾ ಕಥಿತಾ ಚೇಹ ಸದ್ಭಿರ್ವಟುಕಭೈರವಃ ।
ಧರ್ಮಾರ್ಥಕಾಮಮೋಕ್ಷೇಷು ವಿನಿಯೋಗಃ ಪ್ರಕೀರ್ತಿತಃ ॥ 25
ಅಷ್ಟೋತ್ತರಶತನಾಮ ಸ್ತೋತ್ರಂ –
ಓಂ ಭೈರವೋ ಭೂತನಾಥಶ್ಚ ಭೂತಾತ್ಮಾ ಭೂತಭಾವನಃ ।
ಕ್ಷೇತ್ರದಃ ಕ್ಷೇತ್ರಪಾಲಶ್ಚ ಕ್ಷೇತ್ರಜ್ಞಃ ಕ್ಷತ್ರಿಯೋ ವಿರಾಟ್ ॥ 26
ಶ್ಮಶಾನವಾಸೀ ಮಾಂಸಾಶೀ ಖರ್ಪರಾಶೀ ಮಖಾಂತಕೃತ್ ।
ರಕ್ತಪಃ ಪ್ರಾಣಪಃ ಸಿದ್ಧಃ ಸಿದ್ಧಿದಃ ಸಿದ್ಧಸೇವಿತಃ ॥ 27
ಕರಾಲಃ ಕಾಲಶಮನಃ ಕಲಾಕಾಷ್ಠಾತನುಃ ಕವಿಃ ।
ತ್ರಿನೇತ್ರೋ ಬಹುನೇತ್ರಶ್ಚ ತಥಾ ಪಿಂಗಲಲೋಚನಃ ॥ 28
ಶೂಲಪಾಣಿಃ ಖಡ್ಗಪಾಣಿಃ ಕಂಕಾಲೀ ಧೂಮ್ರಲೋಚನಃ ।
ಅಭೀರುರ್ಭೈರವೋ ಭೀರುರ್ಭೂತಪೋ ಯೋಗಿನೀಪತಿಃ ॥ 29
ಧನದೋ ಧನಹಾರೀ ಚ ಧನಪಃ ಪ್ರತಿಭಾವವಾನ್ ।
ನಾಗಹಾರೋ ನಾಗಕೇಶೋ ವ್ಯೋಮಕೇಶಃ ಕಪಾಲಭೃತ್ ॥ 30
ಕಾಲಃ ಕಪಾಲಮಾಲೀ ಚ ಕಮನೀಯಃ ಕಲಾನಿಧಿಃ ।
ತ್ರಿಲೋಚನೋ ಜ್ವಲನ್ನೇತ್ರಸ್ತ್ರಿಶಿಖೀ ಚ ತ್ರಿಲೋಕಪಾತ್ ॥ 31
ತ್ರಿವೃತ್ತನಯನೋ ಡಿಂಭಃ ಶಾಂತಃ ಶಾಂತಜನಪ್ರಿಯಃ ।
ವಟುಕೋ ವಟುಕೇಶಶ್ಚ ಖಟ್ವಾಂಗವರಧಾರಕಃ ॥ 32
ಭೂತಾಧ್ಯಕ್ಷಃ ಪಶುಪತಿರ್ಭಿಕ್ಷುಕಃ ಪರಿಚಾರಕಃ ।
ಧೂರ್ತೋ ದಿಗಂಬರಃ ಸೌರಿರ್ಹರಿಣಃ ಪಾಂಡುಲೋಚನಃ ॥ 33
ಪ್ರಶಾಂತಃ ಶಾಂತಿದಃ ಶುದ್ಧಃ ಶಂಕರಪ್ರಿಯಬಾಂಧವಃ ।
ಅಷ್ಟಮೂರ್ತಿರ್ನಿಧೀಶಶ್ಚ ಜ್ಞಾನಚಕ್ಷುಸ್ತಮೋಮಯಃ ॥ 34
ಅಷ್ಟಾಧಾರಃ ಕಲಾಧಾರಃ ಸರ್ಪಯುಕ್ತಃ ಶಶೀಶಿಖಃ ।
ಭೂಧರೋ ಭೂಧರಾಧೀಶೋ ಭೂಪತಿರ್ಭೂಧರಾತ್ಮಕಃ ॥ 35
ಕಂಕಾಲಧಾರೀ ಮುಂಡೀ ಚ ವ್ಯಾಲಯಜ್ಞೋಪವೀತವಾನ್ ।
ಜೃಂಭಣೋ ಮೋಹನಃ ಸ್ತಂಭೀ ಮಾರಣಃ ಕ್ಷೋಭಣಸ್ತಥಾ ॥ 36
ಶುದ್ಧನೀಲಾಂಜನಪ್ರಖ್ಯದೇಹೋ ಮುಂಡವಿಭೂಷಿತಃ ।
ಬಲಿಭುಕ್ ಬಲಿಭೂತಾತ್ಮಾ ಕಾಮೀ ಕಾಮಪರಾಕ್ರಮಃ ॥ 37
ಸರ್ವಾಪತ್ತಾರಕೋ ದುರ್ಗೋ ದುಷ್ಟಭೂತನಿಷೇವಿತಃ ।
ಕಾಮೀ ಕಲಾನಿಧಿಃ ಕಾಂತಃ ಕಾಮಿನೀವಶಕೃದ್ವಶೀ ।
ಸರ್ವಸಿದ್ಧಿಪ್ರದೋ ವೈದ್ಯಃ ಪ್ರಭವಿಷ್ಣುಃ ಪ್ರಭಾವವಾನ್ ॥ 38
ಫಲಶ್ರುತಿಃ –
ಅಷ್ಟೋತ್ತರಶತಂ ನಾಮ ಭೈರವಸ್ಯ ಮಹಾತ್ಮನಃ ।
ಮಯಾ ತೇ ಕಥಿತಂ ದೇವಿ ರಹಸ್ಯಂ ಸರ್ವಕಾಮಿಕಂ ॥ 39
ಯ ಇದಂ ಪಠತಿ ಸ್ತೋತ್ರಂ ನಾಮಾಷ್ಟಶತಮುತ್ತಮಂ ।
ನ ತಸ್ಯ ದುರಿತಂ ಕಿಂಚನ್ನ ರೋಗೇಭ್ಯೋ ಭಯಂ ತಥಾ ।
ನ ಶತ್ರುಭ್ಯೋ ಭಯಂ ಕಿಂಚಿತ್ ಪ್ರಾಪ್ನೋತಿ ಮಾನವಃ ಕ್ವಚಿತ್ ॥ 40
ಪಾತಕಾನಾಂ ಭಯಂ ನೈವ ಪಠೇತ್ ಸ್ತೋತ್ರಮನನ್ಯಧೀಃ ।
ಮಾರೀಭಯೇ ರಾಜಭಯೇ ತಥಾ ಚೌರಾಗ್ನಿಜೇ ಭಯೇ ॥ 41
ಔತ್ಪಾತಿಕೇ ಮಹಾಘೋರೇ ಯಥಾ ದುಃಸ್ವಪ್ನದರ್ಶನೇ ।
ಬಂಧನೇ ಚ ತಥಾ ಘೋರೇ ಪಠೇತ್ ಸ್ತೋತ್ರಂ ಸಮಾಹಿತಃ ॥ 42
ಸರ್ವೇ ಪ್ರಶಮನಂ ಯಾಂತಿ ಭಯಾದ್ಭೈರವಕೀರ್ತನಾತ್ ।
ಏಕಾದಶಸಹಸ್ರಂ ತು ಪುರಶ್ಚರಣಮುಚ್ಯತೇ ॥ 43
ತ್ರಿಸಂಧ್ಯಂ ಯಃ ಪಠೇದ್ದೇವಿ ಸಂವತ್ಸರಮತಂದ್ರಿತಃ ।
ಸ ಸಿದ್ಧಿಂ ಪ್ರಾಪ್ನುಯಾದಿಷ್ಟಾಂ ದುರ್ಲಭಮಪಿ ಮಾನುಷಃ ॥ 44
ಷಣ್ಮಾಸಾನ್ ಭೂಮಿಕಾಮಸ್ತು ಸ ಜಪ್ತ್ವಾ ಲಭತೇ ಮಹೀಂ ।
ರಾಜಾ ಶತ್ರುವಿನಾಶಾಯ ಜಪೇನ್ಮಾಸಾಷ್ಟಕಂ ಪುನಃ ॥ 45
ರಾತ್ರೌ ವಾರತ್ರಯಂ ಚೈವ ನಾಶಯತ್ಯೇವ ಶಾತ್ರವಾನ್ ।
ಜಪೇನ್ಮಾಸತ್ರಯಂ ರಾತ್ರೌ ರಾಜಾನಂ ವಶಮಾನಯೇತ್ ॥ 46
ಧನಾರ್ಥೀ ಚ ಸುತಾರ್ಥೀ ಚ ದಾರಾರ್ಥೀ ಯಸ್ತು ಮಾನವಃ ।
ಪಠೇದ್ವಾರತ್ರಯಂ ಯದ್ವಾ ವಾರಮೇಕಂ ತಥಾ ನಿಶಿ ॥ 47
ಧನಂ ಪುತ್ರಾಂಸ್ತಥಾ ದಾರಾನ್ ಪ್ರಾಪ್ನುಯಾನ್ನಾತ್ರ ಸಂಶಯಃ ।
ರೋಗೀ ರೋಗಾತ್ ಪ್ರಮುಚ್ಯೇತ ಬದ್ಧೋ ಮುಚ್ಯೇತ ಬಂಧನಾತ್ ॥ 48
ಭೀತೋ ಭಯಾತ್ ಪ್ರಮುಚ್ಯೇತ ದೇವಿ ಸತ್ಯಂ ನ ಸಂಶಯಃ ।
ಯಾನ್ ಯಾನ್ ಸಮೀ ಹತೇ ಕಾಮಾಂಸ್ತಾಂಸ್ತಾನಾಪ್ನೋತಿ ನಿಶ್ಚಿತಂ ।
ಅಪ್ರಕಾಶ್ಯಮಿದಂ ಗುಹ್ಯಂ ನ ದೇಯಂ ಯಸ್ಯ ಕಸ್ಯಚಿತ್ ॥ 49
ಸತ್ಕುಲೀನಾಯ ಶಾಂತಾಯ ಋಜವೇ ದಂಭವರ್ಜಿತೇ ।
ದದ್ಯಾತ್ ಸ್ತೋತ್ರಮಿದಂ ಪುಣ್ಯಂ ಸರ್ವಕಾಮಫಲಪ್ರದಂ ।
ಧ್ಯಾನಂ ವಕ್ಷ್ಯಾಮಿ ದೇವಸ್ಯ ಯಥಾ ಧ್ಯಾತ್ವಾ ಪಠೇನ್ನರಃ ॥ 50
ಓಂ ಶುದ್ಧಸ್ಫಟಿಕಸಂಕಾಶಂ ಸಹಸ್ರಾದಿತ್ಯವರ್ಚಸಂ ।
ಅಷ್ಟಬಾಹುಂ ತ್ರಿನಯನಂ ಚತುರ್ಬಾಹುಂ ದ್ವಿಬಾಹುಕಂ ॥ 51
ಭುಜಂಗಮೇಖಲಂ ದೇವಮಗ್ನಿವರ್ಣಶಿರೋರುಹಂ ।
ದಿಗಂಬರಂ ಕುಮಾರೀಶಂ ವಟುಕಾಖ್ಯಂ ಮಹಾಬಲಂ ॥ 52
ಖಟ್ವಾಂಗಮಸಿಪಾಶಂ ಚ ಶೂಲಂ ಚೈವ ತಥಾ ಪುನಃ ।
ಡಮರುಂ ಚ ಕಪಾಲಂ ಚ ವರದಂ ಭುಜಗಂ ತಥಾ ॥ 53
ನೀಲಜೀಮೂತಸಂಕಾಶಂ ನೀಲಾಂಜನಚಯಪ್ರಭಂ ।
ದಂಷ್ಟ್ರಾಕರಾಲವದನಂ ನೂಪುರಾಂಗದಭೂಷಿತಂ ॥ 54
ಆತ್ಮವರ್ಣಸಮೋಪೇತಸಾರಮೇಯಸಮನ್ವಿತಂ ।
ಧ್ಯಾತ್ವಾ ಜಪೇತ್ ಸುಸಂಹೃಷ್ಟಃ ಸರ್ವಾನ್ ಕಾಮಾನವಾಪ್ನುಯಾತ್ ॥ 55
ಏತಚ್ಛ್ರುತ್ವಾ ತತೋ ದೇವೀ ನಾಮಾಷ್ಟಶತಮುತ್ತಮಂ ।
ಭೈರವಾಯ ಪ್ರಹೃಷ್ಟಾಭೂತ್ ಸ್ವಯಂ ಚೈವ ಮಹೇಶ್ವರೀ ॥ 56
ಇತಿ ವಿಶ್ವಸಾರೋದ್ಧಾರತಂತ್ರೇ ಆಪದುದ್ಧಾರಕಲ್ಪೇ ಭೈರವ ಸ್ತವರಾಜಃ ಸಮಾಪ್ತಃ ॥
Recite with devotion and pure heart
Regular practice brings spiritual benefits