ಶಾಸ್ತಾ ಪಂಚಾಕ್ಷರ ಸ್ತೋತ್ರಂ

ಓಂಕಾರಮೂರ್ತಿಮಾರ್ತಿಘ್ನಂ ದೇವಂ ಹರಿಹರಾತ್ಮಜಮ್ ।

ಶಬರೀಪೀಠನಿಲಯಂ ಶಾಸ್ತಾರಂ ಪ್ರಣತೋಽಸ್ಮ್ಯಹಮ್ ॥ 1 ॥

ನಕ್ಷತ್ರನಾಥವದನಂ ನಾಥಂ ತ್ರಿಭುವನಾವನಮ್ ।

ನಮಿತಾಶೇಷಭುವನಂ ಶಾಸ್ತಾರಂ ಪ್ರಣತೋಽಸ್ಮ್ಯಹಮ್ ॥ 2 ॥

ಮನ್ಮಥಾಯುತಸೌಂದರ್ಯಂ ಮಹಾಭೂತನಿಷೇವಿತಮ್ ।

ಮೃಗಯಾರಸಿಕಂ ಶೂರಂ ಶಾಸ್ತಾರಂ ಪ್ರಣತೋಽಸ್ಮ್ಯಹಮ್ ॥ 3 ॥

ಶಿವಪ್ರದಾಯಿನಂ ಭಕ್ತದೈವತಂ ಪಾಂಡ್ಯಬಾಲಕಮ್ ।

ಶಾರ್ದೂಲದುಗ್ಧಹರ್ತಾರಂ ಶಾಸ್ತಾರಂ ಪ್ರಣತೋಽಸ್ಮ್ಯಹಮ್ ॥ 4 ॥

ವಾರಣೇಂದ್ರಸಮಾರೂಢಂ ವಿಶ್ವತ್ರಾಣಪರಾಯಣಮ್ ।

ವೇತ್ರೋದ್ಭಾಸಿಕರಾಂಭೋಜಂ ಶಾಸ್ತಾರಂ ಪ್ರಣತೋಽಸ್ಮ್ಯಹಮ್ ॥ 5 ॥

ಯಕ್ಷಿಣ್ಯಭಿಮತಂ ಪೂರ್ಣಾಪುಷ್ಕಲಾಪರಿಸೇವಿತಮ್ ।

ಕ್ಷಿಪ್ರಪ್ರಸಾದಕಂ ನಿತ್ಯಂ ಶಾಸ್ತಾರಂ ಪ್ರಣತೋಽಸ್ಮ್ಯಹಮ್ ॥ 6 ॥

ಇತಿ ಶ್ರೀ ಶಾಸ್ತಾ ಪಂಚಾಕ್ಷರ ಸ್ತೋತ್ರಮ್ ।

Recite with devotion and pure heart

Regular practice brings spiritual benefits