śritānanda chintāmaṇi śrīnivāsaṃ sadā sachchidānanda pūrṇaprakāśam । udāraṃ sudāraṃ surādhāramīśaṃ paraṃ jyōtirūpaṃ bhajē bhūtanātham ॥ 1 vibhuṃ vēdavēdāntavēdyaṃ variṣṭhaṃ vibhūtipradaṃ viśrutaṃ brahmaniṣṭham । vibhāsvatprabhāvaprabhaṃ puṣkalēṣṭaṃ paraṃ jyōtirūpaṃ bhajē bhūtanātham ॥ 2 paritrāṇadakṣaṃ parabrahmasūtraṃ sphurachchārugātraṃ bhavadhvāntamitram । paraṃ prēmapātraṃ pavitraṃ vichitraṃ paraṃ jyōtirūpaṃ bhajē bhūtanātham ॥ 3 parēśaṃ prabhuṃ pūrṇakāruṇyarūpaṃ girīśādhipīṭhōjjvalachchārudīpam । surēśādisaṃsēvitaṃ supratāpaṃ paraṃ jyōtirūpaṃ bhajē bhūtanātham ॥ 4 harīśānasaṃyuktaśaktyēkavīraṃ kirātāvatāraṃ kṛpāpāṅgapūram । kirīṭāvataṃsōjjvalat piñChabhāraṃ paraṃ jyōtirūpaṃ bhajē bhūtanātham ॥ 5 guruṃ pūrṇalāvaṇyapādādikēśaṃ garīyaṃ mahākōṭisūryaprakāśam । karāmbhōruhanyastavētraṃ surēśaṃ paraṃ jyōtirūpaṃ bhajē bhūtanātham ॥ 6 mahāyōgapīṭhē jvalantaṃ mahāntaṃ mahāvākyasārōpadēśaṃ suśāntam । maharṣipraharṣapradaṃ jñānakandaṃ paraṃ jyōtirūpaṃ bhajē bhūtanātham ॥ 7 mahāraṇyamanmānasāntarnivāsān ahaṅkāradurvārahiṃ‍srā mṛgādīn । harantaṃ kirātāvatāraṃ charantaṃ paraṃ jyōtirūpaṃ bhajē bhūtanātham ॥ 8 pṛthivyādibhūta prapañchāntarasthaṃ pṛthagbhūtachaitanyajanyaṃ praśastam । pradhānaṃ pramāṇaṃ purāṇaprasiddhaṃ paraṃ jyōtirūpaṃ bhajē bhūtanātham ॥ 9 jagajjīvanaṃ pāvanaṃ bhāvanīyaṃ jagadvyāpakaṃ dīpakaṃ mōhanīyam । sukhādhāramādhārabhūtaṃ turīyaṃ paraṃ jyōtirūpaṃ bhajē bhūtanātham ॥ 10 ihāmutra satsaukhyasampannidhānaṃ mahadyōnimavyāhatātmābhidhānam । ahaḥ puṇḍarīkānanaṃ dīpyamānaṃ paraṃ jyōtirūpaṃ bhajē bhūtanātham ॥ 11 trikālasthitaṃ susthiraṃ jñānasaṃsthaṃ tridhāma trimūrtyātmakaṃ brahmasaṃstham । trayīmūrtimārtichChidaṃ śaktiyuktaṃ paraṃ jyōtirūpaṃ bhajē bhūtanātham ॥ 12 iḍāṃ piṅgaḻāṃ satsuṣumnāṃ viśantaṃ sphuṭaṃ brahmarandhra svatantraṃ suśāntam । dṛḍhaṃ nitya nirvāṇamudbhāsayantaṃ paraṃ jyōtirūpaṃ bhajē bhūtanātham ॥ 13 aṇubrahmaparyanta jīvaikyabimbaṃ guṇākāramatyantabhaktānukampam । anarghaṃ śubhōdarkamātmāvalambaṃ paraṃ jyōtirūpaṃ bhajē bhūtanātham ॥ 14 iti dharmaśāstā bhujaṅga stōtram ।