asya śrīkirātaśasturmahāmantrasya rēmanta r̥ṣiḥ dēvī gāyatrī chandaḥ śrī kirāta śāstā dēvatā, hrāṁ bījaṁ, hrīṁ śaktiḥ, hrūṁ kīlakaṁ, śrī kirāta śastu prasāda siddhyarthē japē viniyōgaḥ । karanyāsaḥ – ōṁ hrāṁ aṅguṣṭhābhyāṁ namaḥ । ōṁ hrīṁ tarjanībhyāṁ namaḥ । ōṁ hrūṁ madhyamābhyāṁ namaḥ । ōṁ hraiṁ anāmikābhyāṁ namaḥ । ōṁ hrauṁ kaniṣṭhikābhyāṁ namaḥ । ōṁ hraḥ karatala karapr̥ṣṭhābhyāṁ namaḥ । aṅganyāsaḥ – ōṁ hrāṁ hr̥dayāya namaḥ । ōṁ hrīṁ śirasē svāhā । ōṁ hrūṁ śikhāyai vaṣaṭ । ōṁ hraiṁ kavacāya hum । ōṁ hrauṁ nētratrayāya vauṣaṭ । ōṁ hraḥ astrāya phaṭ । bhūrbhuvassuvarōmiti digbandhaḥ । dhyānam । kōdaṇḍaṁ saśaraṁ bhujēna bhujagēndrabhōgā bhāsāvahan vāmēnacchurikāṁ vibhakṣalanē pakṣēṇa dakṣēṇa ca । kāntyā nirjita nīradaḥ purabhidaḥ krīḍankirātākr̥tē putrōsmākamanalpa nirmalayā ca nirmātu śarmāniśam ॥ stōtram । pratyarthivrātavakṣaḥsthalarudhirasurāpānamattā pr̥ṣatkaṁ cāpē sandhāya tiṣṭhan hr̥dayasarasijē māmakē tāpahaṁ tam । piñchōttaṁsaḥ śaraṇyaḥ paśupatitanayō nīradābhaḥ prasannō dēvaḥ pāyādapāyācchabaravapurasau sāvadhānaḥ sadā naḥ ॥ 1 ॥ ākhēṭāya vanēcarasya girijāsaktasya śambhōḥ sutaḥ trātuṁ yō bhuvanaṁ purā samajani khyātaḥ kirātākr̥tiḥ । kōdaṇḍakṣurikādharō ghanaravaḥ piñchāvataṁsōjjvalaḥ sa tvaṁ māmava sarvadā ripugaṇatrastaṁ dayāvāridhē ॥ 2 ॥ yō māṁ pīḍayati prasahya satataṁ dēhītyananyāśrayaṁ bhitvā tasya ripōruraḥ kṣurikayā śātāgrayā durmatēḥ । dēva tvatkarapaṅkajōllasitayā śrīmatkirātākr̥tēḥ tatprāṇānvitarāntakāya bhagavan kālāriputrāñjasā ॥ 3 ॥ viddhō marmasu durvacōbhirasatāṁ santaptaśalyōpamaiḥ dr̥ptānāṁ dviṣatāmaśāntamanasāṁ khinnō:’smi yāvadbhr̥śam । tāvattvaṁ kṣurikāśarāsanadharaścittē mamāvirbhavan svāmin dēva kirātarūpa śamaya pratyarthigarvaṁ kṣaṇāt ॥ 4 ॥ hartuṁ vittamadharmatō mama ratāścōrāśca yē durjanā- -stēṣāṁ marmasu tāḍayāśu viśikhaistvatkārmukānniḥsr̥taiḥ ॥ śāstāraṁ dviṣatāṁ kirātavapuṣaṁ sarvārthadaṁ tvāmr̥tē paśyāmyatra purāriputra śaraṇaṁ nānyaṁ prapannō:’smyaham ॥ 5 ॥ yakṣaḥ prētapiśācabhūtanivahāḥ duḥkhapradā bhīṣaṇāḥ bādhantē naraśōṇitōtsukadhiyō yē māṁ ripuprēritāḥ । cāpajyāninadaistvamīśa sakalān saṁhr̥tya duṣṭagrahān gaurīśātmaja daivatēśvara kirātākāra saṁrakṣa mām ॥ 6 ॥ dōgdhuṁ yē niratāstvamadya padapadmaikāntabhaktāya mē māyācchannakalēbarāśruviṣadānādyaiḥ sadā karmabhiḥ । vaśyastambhanamāraṇādikuśalaprārambhadakṣānarīn duṣṭān saṁhara dēvadēva śabarākāra trilōkēśvara ॥ 7 ॥ tanvā vā manasā girāpi satataṁ dōṣaṁ cikīrṣatyalaṁ tvatpādapraṇatasya niraparādhasyāpi yē mānavāḥ । sarvān saṁhara tān girīśasuta mē tāpatrayaughānapi tvāmēkaṁ śabarākr̥tē bhayaharaṁ nāthaṁ prapannō:’smyaham ॥ 8 ॥ kliṣṭō rājabhaṭaistadāpi paribhūtō:’haṁ kulairvairibhi- -ścānyairghōratarairvipajjalanidhau magnō:’smi duḥkhāturam । hā hā kiṅkaravai vibhō śabaravēṣaṁ tvāmabhīṣṭārthadaṁ vandē:’haṁ paradaivataṁ kuru kr̥pānāthārtabandhō mayi ॥ 9 ॥ stōtraṁ yaḥ prajapēt praśāntakaraṇairnityaṁ kirātāṣṭakaṁ sa kṣipraṁ vaśagān karōti nr̥patīnābaddhavairānapi । saṁhr̥tyātmavirōdhinaḥ khilajanān duṣṭagrahānapyasau yātyantē yamadūtabhītirahitō divyāṁ gatiṁ śāśvatīm ॥ 10 ॥ iti śrī kirātāṣṭakam ।