ഓം വിഷ്ണോ॒ർനുകം॑ വീ॒ര്യാ॑ണി॒ പ്രവോ॑ചം॒ യഃ പാർഥി॑വാനി വിമ॒മേ രജാഗ്ം॑സി॒ യോ അസ്ക॑ഭായ॒ദുത്ത॑രഗ്ം സ॒ധസ്ഥം॑ വിചക്രമാ॒ണസ്ത്രേ॒ധോരു॑ഗാ॒യോ വിഷ്ണോ॑ര॒രാട॑മസി॒ വിഷ്ണോ᳚: പൃ॒ഷ്ഠമ॑സി॒ വിഷ്ണോ॒: ശ്നപ്ത്രേ᳚സ്ഥോ॒ വിഷ്ണോ॒സ്സ്യൂര॑സി॒ വിഷ്ണോ᳚ർധ്രു॒വമ॑സി വൈഷ്ണ॒വമ॑സി॒ വിഷ്ണ॑വേ ത്വാ ॥ തദ॑സ്യ പ്രി॒യമ॒ഭിപാഥോ॑ അശ്യാം । നരോ॒ യത്ര॑ ദേവ॒യവോ॒ മദ॑ന്തി । ഉ॒രു॒ക്ര॒മസ്യ॒ സ ഹി ബന്ധു॑രി॒ത്ഥാ । വിഷ്ണോ᳚: പ॒ദേ പ॑ര॒മേ മധ്വ॒ ഉഥ്സ॑: । പ്രതദ്വിഷ്ണു॑സ്സ്തവതേ വീ॒ര്യാ॑യ । മൃ॒ഗോ ന ഭീ॒മഃ കു॑ച॒രോ ഗി॑രി॒ഷ്ഠാഃ । യസ്യോ॒രുഷു॑ ത്രി॒ഷു വി॒ക്രമ॑ണേഷു । അധി॑ക്ഷി॒യന്തി॒ ഭുവ॑നാനി॒ വിശ്വാ᳚ । പ॒രോ മാത്ര॑യാ ത॒നുവാ॑ വൃധാന । ന തേ॑ മഹി॒ത്വമന്വ॑ശ്നുവന്തി ॥ ഉ॒ഭേ തേ॑ വിദ്മ॒ രജ॑സീ പൃഥി॒വ്യാ വിഷ്ണോ॑ ദേവ॒ത്വം । പ॒ര॒മസ്യ॑ വിഥ്സേ । വിച॑ക്രമേ പൃഥി॒വീമേ॒ഷ ഏ॒താം । ക്ഷേത്രാ॑യ॒ വിഷ്ണു॒ർമനു॑ഷേ ദശ॒സ്യൻ । ധ്രു॒വാസോ॑ അസ്യ കീ॒രയോ॒ ജനാ॑സഃ । ഊ॒രു॒ക്ഷി॒തിഗ്ം സു॒ജനി॑മാചകാര । ത്രിർദേ॒വഃ പൃ॑ഥി॒വീമേ॒ഷ ഏ॒താം । വിച॑ക്രമേ ശ॒തർച॑സം മഹി॒ത്വാ । പ്രവിഷ്ണു॑രസ്തു ത॒വസ॒സ്തവീ॑യാൻ । ത്വേ॒ഷഗ്ഗ്ഹ്യ॑സ്യ॒ സ്ഥവി॑രസ്യ॒ നാമ॑ ॥ അതോ᳚ ദേ॒വാ അ॑വന്തുനോ॒ യതോ॒ വിഷ്ണുർ᳚വിചക്ര॒മേ । പൃ॒ഥി॒വ്യാസ്സ॒പ്ത ധാമ॑ഭിഃ । ഇ॒ദം വിഷ്ണു॒ർവിച॑ക്രമേ ത്രേ॒ധാ നിദ॑ധേ പ॒ദം । സമൂ॑ഢമസ്യ പാഗ്ംസു॒രേ । ത്രീണി॑ പ॒ദാ വിച॑ക്രമേ॒ വിഷ്ണു॑ർഗോ॒പാ അദാ᳚ഭ്യഃ । തതോ॒ ധർമാ॑ണി ധാ॒രയൻ॑ । വിഷ്ണോ॒: കർമാ॑ണി പശ്യത॒ യതോ᳚ വ്ര॒താനി॑ പസ്പ॒ശേ । ഇന്ദ്ര॑സ്യ॒ യുജ്യ॒സ്സഖാ᳚ ॥ തദ്വിഷ്ണോ᳚: പര॒മം പ॒ദഗ്ം സദാ॑ പശ്യന്തി സൂ॒രയ॑: । ദി॒വീവ॒ ചക്ഷു॒രാത॑തം । തദ്വിപ്രാ॑സോ വിപ॒ന്യവോ॑ ജാഗൃ॒വാം സ॒സ്സമി॑ന്ധതേ । വിഷ്ണോ॒ര്യത്പ॑ര॒മം പ॒ദം । പര്യാ᳚പ്ത്യാ॒ അന॑ന്തരായായ॒ സർവ॑സ്തോമോഽതി രാ॒ത്ര ഉ॑ത്ത॒മ മഹ॑ർഭവതി॒ സർവ॒സ്യാപ്ത്യൈ॒ സർവ॑സ്യ॒ ജിത്ത്യൈ॒ സർവ॑മേ॒വ തേനാ᳚പ്നോതി॒ സർവം॑ ജയതി ॥ ഓം ശാന്തി॒: ശാന്തി॒: ശാന്തി॑: ॥