ഓം സ॒ഹ നാ॑വവതു । സ॒ഹ നൌ॑ ഭുനക്തു । സ॒ഹ വീ॒ര്യം॑ കരവാവഹൈ । തേ॒ജ॒സ്വിനാ॒വധീ॑തമസ്തു॒ മാ വി॑ദ്വിഷാ॒വഹൈ᳚ ॥ ഓം ശാംതിഃ॒ ശാംതിഃ॒ ശാംതിഃ॑ ॥ ഓം അഥ പുരുഷോ ഹ വൈ നാരായണോഽകാമയത പ്രജാഃ സൃ॑ജേയേ॒തി । നാ॒രാ॒യ॒ണാത്പ്രാ॑ണോ ജാ॒യതേ । മനഃ സർവേംദ്രി॑യാണി॒ ച । ഖം-വാഁയുര്ജ്യോതിരാപഃ പൃഥിവീ വിശ്വ॑സ്യ ധാ॒രിണീ । നാ॒രാ॒യ॒ണാദ്ബ്ര॑ഹ്മാ ജാ॒യതേ । നാ॒രാ॒യ॒ണാദ്രു॑ദ്രോ ജാ॒യതേ । നാ॒രാ॒യ॒ണാദിം॑ദ്രോ ജാ॒യതേ । നാ॒രാ॒യ॒ണാത്പ്രജാപതയഃ പ്ര॑ജായം॒തേ । നാ॒രാ॒യ॒ണാദ്ദ്വാദശാദിത്യാ രുദ്രാ വസവസ്സർവാണി ച ഛം॑ദാഗ്​മ്॒സി । നാ॒രാ॒യ॒ണാദേവ സമു॑ത്പദ്യം॒തേ । നാ॒രാ॒യ॒ണേ പ്ര॑വര്തം॒തേ । നാ॒രാ॒യ॒ണേ പ്ര॑ലീയം॒തേ ॥ ഓമ് । അഥ നിത്യോ നാ॑രായ॒ണഃ । ബ്ര॒ഹ്മാ നാ॑രായ॒ണഃ । ശി॒വശ്ച॑ നാരായ॒ണഃ । ശ॒ക്രശ്ച॑ നാരായ॒ണഃ । ദ്യാ॒വാ॒പൃ॒ഥി॒വ്യൌ ച॑ നാരായ॒ണഃ । കാ॒ലശ്ച॑ നാരായ॒ണഃ । ദി॒ശശ്ച॑ നാരായ॒ണഃ । ഊ॒ര്ധ്വശ്ച॑ നാരായ॒ണഃ । അ॒ധശ്ച॑ നാരായ॒ണഃ । അം॒ത॒ര്ബ॒ഹിശ്ച॑ നാരായ॒ണഃ । നാരായണ ഏവേ॑ദഗ്​മ് സ॒ർവമ് । യദ്ഭൂ॒തം-യഁച്ച॒ ഭവ്യമ്᳚ । നിഷ്കലോ നിരംജനോ നിർവികല്പോ നിരാഖ്യാതഃ ശുദ്ധോ ദേവ ഏകോ॑ നാരായ॒ണഃ । ന ദ്വി॒തീയോ᳚സ്തി॒ കശ്ചി॑ത് । യ ഏ॑വം-വേഁ॒ദ । സ വിഷ്ണുരേവ ഭവതി സ വിഷ്ണുരേ॑വ ഭ॒വതി ॥ ഓമിത്യ॑ഗ്രേ വ്യാ॒ഹരേത് । നമ ഇ॑തി പ॒ശ്ചാത് । നാ॒രാ॒യ॒ണായേത്യു॑പരി॒ഷ്ടാത് । ഓമി॑ത്യേകാ॒ക്ഷരമ് । നമ ഇതി॑ ദ്വേ അ॒ക്ഷരേ । നാ॒രാ॒യ॒ണായേതി പംചാ᳚ക്ഷരാ॒ണി । ഏതദ്വൈ നാരായണസ്യാഷ്ടാക്ഷ॑രം പ॒ദമ് । യോ ഹ വൈ നാരായണസ്യാഷ്ടാക്ഷരം പദ॑മധ്യേ॒തി । അനപബ്രവസ്സർവമാ॑യുരേ॒തി । വിംദതേ പ്രാ॑ജാപ॒ത്യഗ്​മ് രായസ്പോഷം॑ ഗൌപ॒ത്യമ് । തതോഽമൃതത്വമശ്നുതേ തതോഽമൃതത്വമശ്നു॑ത ഇ॒തി । യ ഏ॑വം-വേഁ॒ദ ॥ പ്രത്യഗാനംദം ബ്രഹ്മ പുരുഷം പ്രണവ॑സ്വരൂ॒പമ് । അകാര ഉകാര മകാ॑ര ഇ॒തി । താനേകധാ സമഭരത്തദേത॑ദോമി॒തി । യമുക്ത്വാ॑ മുച്യ॑തേ യോ॒ഗീ॒ ജ॒ന്മ॒സംസാ॑രബം॒ധനാത് । ഓം നമോ നാരായണായേതി മം॑ത്രോപാ॒സകഃ । വൈകുംഠഭുവനലോകം॑ ഗമി॒ഷ്യതി । തദിദം പരം പുംഡരീകം-വിഁ ॑ജ്ഞാന॒ഘനമ് । തസ്മാത്തദിദാ॑വന്മാ॒ത്രമ് । ബ്രഹ്മണ്യോ ദേവ॑കീപു॒ത്രോ॒ ബ്രഹ്മണ്യോ മ॑ധുസൂ॒ദനോമ് । സർവഭൂതസ്ഥമേകം॑ നാരാ॒യണമ് । കാരണരൂപമകാര പ॑രബ്ര॒ഹ്മോമ് । ഏതദഥർവ ശിരോ॑യോഽധീ॒തേ പ്രാ॒തര॑ധീയാ॒നോ॒ രാത്രികൃതം പാപം॑ നാശ॒യതി । സാ॒യമ॑ധീയാ॒നോ॒ ദിവസകൃതം പാപം॑ നാശ॒യതി । മാധ്യംദിനമാദിത്യാഭിമുഖോ॑ഽധീയാ॒നഃ॒ പംചപാതകോപപാതകാ᳚ത്പ്രമു॒ച്യതേ । സർവ വേദ പാരായണ പു॑ണ്യം-ലഁ॒ഭതേ । നാരായണസായുജ്യമ॑വാപ്നോ॒തി॒ നാരായണ സായുജ്യമ॑വാപ്നോ॒തി । യ ഏ॑വം-വേഁ॒ദ । ഇത്യു॑പ॒നിഷ॑ത് ॥ ഓം സ॒ഹ നാ॑വവതു । സ॒ഹ നൌ॑ ഭുനക്തു । സ॒ഹ വീ॒ര്യം॑ കരവാവഹൈ । തേ॒ജ॒സ്വിനാ॒വധീ॑തമസ്തു॒ മാ വി॑ദ്വിഷാ॒വഹൈ᳚ ॥ ഓം ശാംതിഃ॒ ശാംതിഃ॒ ശാംതിഃ॑ ॥