హ॒రి॒: ఓం ॥ శం నో॑ మి॒త్రః శం వరు॑ణః । శం నో॑ భవత్వర్య॒మా । శం న॒ ఇంద్రో॒ బృహ॒స్పతి॑: । శం నో॒ విష్ణు॑రురుక్ర॒మః ॥ నమో॒ బ్రహ్మ॑ణే । నమ॑స్తే వాయో । త్వమే॒వ ప్ర॒త్యక్షం॒ బ్రహ్మా॑సి । త్వామే॒వ ప్ర॒త్యక్షం॒ బ్రహ్మ॑ వదిష్యామి । ఋ॒తం వ॑దిష్యామి । స॒త్యం వ॑దిష్యామి । తన్మామ॑వతు । తద్వక్తార॑మవతు॒ । అవ॑తు॒ మాం । అవ॑తు వ॒క్తారం᳚ ॥ ఓం శాంతి॒: శాంతి॒: శాంతి॑: ॥ ఓం స॒హ నా॑వవతు । స॒హ నౌ॑ భunక్తు । స॒హ వీ॒ర్యం॑ కరవావహై । తే॒జ॒స్వి నా॒వధీ॑తమస్తు॒ । మా వి॑ద్విషా॒వహై᳚ । ఓం శాంతి॒: శాంతి॒: శాంతి॑: ॥ ప్రథమోఽనువాకః । అంభ॑స్యపా॒రే భువ॑నస్య॒ మధ్యే॒ నాక॑స్య పృ॒ష్ఠే మ॑హ॒తో మహీ॑యాన్ । శు॒క్రేణ॒ జ్యోతీగ్ం॑షి సమను॒ప్రవి॑ష్టః ప్ర॒జాప॑తిశ్చరతి॒ గర్భే॑ అం॒తః ॥ 1 ॥ యస్మి॑న్ని॒దగ్ం సం చ॒ వి చైతి॒ సర్వం॒ యస్మి॑న్ దే॒వా అధి॒ విశ్వే॑ నిషే॒దుః । తదే॒వ భూ॒తం తదు॒ భవ్య॑మా ఇ॒దం తద॒క్షరే॑ పర॒మే వ్యో॑మన్ ॥ 2 ॥ యేనా॑వృ॒తం ఖం చ॒ దివం॑ మ॒హీం చ॒ యేనా॑ది॒త్యస్తప॑తి॒ తేజ॑సా॒ భ్రాజ॑సా చ । యమం॒తః స॑ము॒ద్రే క॒వయో॒ వయం॑తి॒ యద॒క్షరే॑ పర॒మే ప్ర॒జాః ॥ 3 ॥ యత॑: ప్రసూ॒తా జ॒గత॑: ప్రసూతీ॒ తోయే॑న జీ॒వాన్ వ్యచ॑సర్జ॒ భూమ్యాం॑ । యదోష॑ధీభిః పు॒రుషా᳚న్ ప॒శూగ్ంశ్చ॒ వివేశ॑ భూ॒తాని॑ చరాచ॒రాణి॑ ॥ 4 ॥ అతః పరం॒ నాన్య॒దణీ॑యసగ్ం హి॒ పరా॑త్పరం॒ యన్మహ॑తో మ॒హాంతం॑ । యదే॑కమ॒వ్యక్త॒మనం॑తరూపం॒ విశ్వం॑ పురా॒ణం తమ॑స॒: పర॑స్తాత్ ॥ 5 ॥ తదే॒వర్తం తదు॑ స॒త్యమా॑హు॒స్తదే॒వ బ్రహ్మ॑ పర॒మం క॑వీ॒నాం । ఇ॒ష్టా॒పూ॒ర్తం బ॑హు॒ధా జా॒తం జాయ॑మానం వి॒శ్వం బి॑భర్తి॒ భువ॑నస్య॒ నాభి॑: ॥ 6 ॥ తదే॒వాగ్నిస్తద్వా॒యుస్తత్సూర్య॒స్తదు॑ చంద్రమా᳚: । తదే॒వ శు॒క్రమ॒మృతం॒ తద్బ్రహ్మ॒ తదాప॒: స॒ ప్ర॒జాప॑తిః ॥ 7 ॥ సర్వే॑ నిమే॒షా జ॒జ్ఞిరే॑ వి॒ద్యుత॒: పురు॑షా॒దధి॑ । క॒లా ము॑హూ॒ర్తాః కాష్ఠా᳚శ్చాహోరా॒త్రాశ్చ॑ సర్వ॒శః ॥ 8 ॥ అ॒ర్ధ॒మా॒సా మాసా॑ ఋ॒తవ॑: సంవత్స॒రశ్చ॑ కల్పంతాం । స ఆప॑: ప్రదు॒ఘే ఉ॒భే ఇ॒మే అం॒తరి॑క్ష॒మథో॒ సువ॑: ॥ 9 ॥ నైన॑మూ॒ర్ధ్వం న తి॒ర్యంచం॒ న మధ్యే॒ పరి॑జగ్రభత్ । న తస్యే॑శే॒ కశ్చ॒న తస్య నామ మ॒హదయశ॑: ॥ 10 ॥ న సం॒దృశే॑ తిష్ఠతి॒ రూప॑మస్య॒ న చక్షు॑షా పశ్యతి॒ కశ్చ॒నైనం᳚ । హృ॒దా మ॑నీ॒షా మన॑సా॒భిక్లృ॑ప్తో॒ య ఏ॑నం వి॒దురమృ॑తా॒స్తే భ॑వంతి ॥ 11 ॥ (హిరణ్యగర్భ సూక్త) అ॒ద్భ్యః సంభూ॑తో హిరణ్యగ॒ర్భ ఇత్య॒ష్టౌ ॥ అ॒ద్భ్యః సంభూ॑తః పృథి॒వ్యై రసా॑చ్చ । వి॒శ్వక॑ర్మణ॒: సమ॑వ॒ర్తతాధి॑ । తస్య॒ త్వష్టా॑ వి॒దధ॑ద్రూ॒పమే॑తి । తత్పురు॑షస్య॒ విశ్వ॒మాజా॑న॒మగ్రే᳚ । 1 వేదా॒హమే॒తం పురు॑షం మ॒హాంతం॑ । ఆ॒ది॒త్యవ॑ర్ణం॒ తమ॑స॒: పర॑స్తాత్ । తమే॒వం వి॒ద్వాన॒మృత॑ ఇ॒హ భ॑వతి । 2 నాన్యః పంథా॑ విద్య॒తేయ॑ఽనాయ । ప్ర॒జాప॑తిశ్చరతి॒ గర్భే॑ అం॒తః । అ॒జాయ॑మానో బహు॒థా విజాయతే । తస్య॒ ధీరా॒: పరి॑జానంతి॒ యోనిం॑ । మరీ॑చీనాం ప॒దమి॑చ్ఛంతి వే॒ధస॑: । 3 యో దే॒వేభ్య॒ ఆత॑పతి । యో దే॒వానాం᳚ పు॒రోహి॑తః । పూర్వో॒ యో దే॒వేభ్యో॑ జా॒తః । నమో॑ రు॒చాయ॒ బ్రాహ్మ॑యే । 4 రుచం॑ బ్రా॒హ్మం జ॒నయం॑తః । దే॒వా అగ్రే॒ తద॑బ్రువన్ । యస్త్వై॒వం బ్రా॑హ్మ॒ణో వి॒ద్యాత్ । తస్య॑ దే॒వా అస॒న్ వశే॑ । హ్రీశ్చ॑ తే ల॒క్ష్మీశ్చ॒ పత్న్యౌ॑ । అ॒హో॒రా॒త్రే పా॒ర్శ్వే । నక్ష॑త్రాణి రూ॒పం । అ॒శ్వినౌ॒ వ్యాత్తం॑ । ఇ॒ష్టం మ॑నిషాణ । అ॒ముం మ॑నిషాణ । సర్వం॑ మనిషాణ । (ఇతి ఉత్తరనారాయణానువాకః) హి॒ర॒ణ్య॒గ॒ర్భః సమ॑వర్త॒తాగ్రే॑ భూ॒తస్య॑ జా॒తః పతి॒రేక॑ ఆసీత్ । స దా॑ధార పృథి॒వీం ద్యాము॒తేమాం కస్మై॑ దే॒వాయ॑ హ॒విషా॑ విధేమ ॥ 1 ॥ యః ప్రా॑ణ॒తో ని॑మిష॒తో మ॑హి॒త్వైక॒ ఇద్రాజా॒ జగ॑తో బ॒భూవ॑ । య ఈశే అ॒స్య ద్వి॒పద॒శ్చతు॑ష్పద॒: కస్మై॑ దే॒వాయ॑ హ॒విషా॑ విధేమ ॥ 2 ॥ య ఆ॑త్మ॒దా బ॑లం॒దా యస్య॒ విశ్వ॑ ఉ॒పాస॑తే ప్ర॒శిషం॒ యస్య॑ దే॒వాః । యస్య॑ ఛా॒యామృతం॒ యస్య॑ మృ॒త్యుః కస్మై॑ దే॒వాయ॑ హ॒విషా॑ విధేమ ॥ 3 ॥ యస్యే॒మే హి॒మవం॑తో మహి॒త్వా యస్య॑ సము॒ద్రగ్ం రసయా॑ స॒హాహుః । యస్యే॒మాః ప్ర॒దిశో॒ యస్య॑ బా॒హూ కస్మై॑ దే॒వాయ॑ హ॒విషా॑ విధేమ ॥ 4 ॥ యం క్రంద॑సీ॒ అవ॑సా తస్తభా॒నే అ॒స్యైక్షే॑తాం॒ మన॑సా॒ రేజ॑మానే । యత్రాధి॒ సూర॒ ఉది॑తౌ॒ వ్యేతి॒ కస్మై॑ దే॒వాయ॑ హ॒విషా॑ విధేమ ॥ 5 ॥ యేన॒ ద్యౌరు॒గ్రా పృ॑థి॒వీ చ॑ దృఢే॒ యేన॒ సువ॑: స్తభి॒తం యేన॒ నాక॑: । యో అం॒తరి॑క్షే॒ రజ॑సో వి॒మాన॒: కస్మై॑ దే॒వాయ హ॒విషా॑ విధేమ ॥ 6 ॥ ఆపో॑ హ॒ యన్మ॑హ॒తీర్విశ్వ॒మాయం॒ దక్షం॒ దధానా జ॒నయం॑తీర॒గ్నిం । తతో॑ దే॒వానాం॒ నిర॑వర్త॒తాసు॒రేక॒: కస్మై॑ దే॒వాయ॑ హ॒విషా॑ విధేమ ॥ 7 ॥ యశ్చి॒దాపో॑ మహి॒నా ప॒ర్యప॑శ్య॒ద్దక్షం॒ దధా॑నా జ॒నయం॑తీర॒గ్నిం । యో దే॒వేష్వధి॑ దే॒వ ఏ॒క ఆసీ॒త్ కస్మై॑ దే॒వాయ॑ హ॒విషా॑ విధేమ ॥ 8 ॥ ఏ॒ష హి దే॒వః ప్ర॒దిశోఽను॒ సర్వా॒: పూర్వో॑ హి జా॒తః స ఉ॒ గర్భే॑ అం॒తః । స వి॒జాయ॑మానః స జని॒ష్యమా॑ణః ప్ర॒త్యఙ్ముఖా᳚స్తిష్ఠతి వి॒శ్వతో॑ముఖః ॥ 12 ॥ వి॒శ్వత॑శ్చక్షురు॒త వి॒శ్వతో॑ ముఖో వి॒శ్వతో॑ హస్త ఉ॒త వి॒శ్వత॑స్పాత్ । సం బా॒హుభ్యాం నమ॑తి॒ సం పత॑త్రైర్ద్యావా॑పృథి॒వీ జ॒నయ॑న్ దే॒వ ఏక॑: ॥ 13 ॥ వే॒నస్తత్ పశ్య॒న్ విశ్వా॒ భువ॑నాని వి॒ద్వాన్ యత్ర॒ విశ్వం॒ భవ॒త్యేక॑నీడం । యస్మి॑న్ని॒దగ్ంసం చ॒ వి చైక॒గ్ంస ఓతః ప్రోత॑శ్చ వి॒భుః ప్ర॒జాసు॑ ॥ 14 ॥ ప్ర తద్వో॑చే అ॒మృతం॒ ను వి॒ద్వాన్ గం॑ధ॒ర్వో నామ॒ నిహి॑తం॒ గుహా॑సు । త్రీణి॑ ప॒దా నిహి॑తా॒ గుహా॑సు॒ యస్తద్వేద॑ సవి॒తుః పి॒తా స॑త్ ॥ 15 ॥ స నో॒ బంధు॑ర్జని॒తా స వి॑ధా॒తా ధామా॑ని॒ వేద॒ భువ॑నాని॒ విశ్వా᳚ । యత్ర॑ దే॒వా అ॒మృత॑మానశా॒నాస్తృ॒తీయే॒ ధామా᳚న్య॒భ్యైర॑యంత ॥ 16 ॥ పరి॒ ద్యావా॑పృథి॒వీ యం॑తి స॒ద్యః పరి॑ లో॒కాన్ పరి॒ దిశ॒: పరి॒ సువ॑: । ఋ॒తస్య॒ తంతుం॑ వితతం వి॒చృత్య॒ తద॑పశ్య॒త్ తద॑భవత్ ప్ర॒జాసు॑ ॥ 17 ॥ ప॒రీత్య॑ లో॒కాన్ ప॒రీత్య॑ భూ॒తాని॑ ప॒రీత్య॒ సర్వా᳚: ప్ర॒దిశో॒ దిశ॑శ్చ । ప్ర॒జాప॑తిః ప్రథమ॒జా ఋ॒తస్యా॒త్మనా॒త్మాన॑మ॒భిసంబభూవ ॥ 18 ॥ సద॑స॒స్పతి॒మద్భు॑తం ప్రి॒యమింద్ర॑స్య॒ కామ్యం᳚ । సనిం॑ మే॒ధామ॑యాసిషం ॥ 19 ॥ ఉద్దీ᳚ప్యస్వ జాతవేదోఽప॒ఘ్నన్నిరృ॑తిం॒ మమ॑ । ప॒శూగ్ంశ్చ॒ మహ్య॒మావ॑హ॒ జీవ॑నం చ॒ దిశో॑ దిశ ॥ 20 ॥ మా నో॑ హిగ్ంసీజ్జాతవేదో॒ గామశ్వం॒ పురు॑షం॒ జగ॑త్ । అబి॑భ్ర॒దగ్న॒ ఆగ॑హి శ్రి॒యా మా॒ పరి॑పాతయ ॥ 21 ॥ పురు॑షస్య విద్మ సహస్రా॒క్షస్య॑ మహాదే॒వస్య॑ ధీమహి । తన్నో॑ రుద్రః ప్రచో॒దయా᳚త్ ॥ 22 ॥ గాయత్ర్యాః । తత్పురు॑షాయ వి॒ద్మహే॑ మహాదే॒వాయ॑ ధీమహి । తన్నో॑ రుద్రః ప్రచో॒దయా᳚త్ ॥ 23 ॥ తత్పురు॑షాయ వి॒ద్మహే॑ వక్రతుం॒డాయ॑ ధీమహి । తన్నో॑ దంతిః ప్రచో॒దయా᳚త్ ॥ 24 ॥ తత్పురు॑షాయ వి॒ద్మహే॑ చక్రతుం॒డాయ॑ ధీమహి । తన్నో॑ నందిః ప్రచో॒దయా᳚త్ ॥ 25 ॥ తత్పురు॑షాయ వి॒ద్మహే॑ మహాసే॒నాయ॑ ధీమహి । తన్నః షణ్ముఖః ప్రచో॒దయా᳚త్ ॥ 26 ॥ తత్పురు॑షాయ వి॒ద్మహే॑ సువర్ణప॒క్షాయ॑ ధీమహి । తన్నో॑ గరుడః ప్రచో॒దయా᳚త్ ॥ 27 ॥ వే॒దా॒త్మ॒నాయ॑ వి॒ద్మహే॑ హిరణ్యగ॒ర్భాయ॑ ధీమహి । తన్నో॑ బ్రహ్మ ప్రచో॒దయా᳚త్ ॥ 28 ॥ నా॒రా॒య॒ణాయ॑ వి॒ద్మహే॑ వాసుదే॒వాయ॑ ధీమహి । తన్నో॑ విష్ణుః ప్రచో॒దయా᳚త్ ॥ 29 ॥ వ॒జ్ర॒న॒ఖాయ॑ వి॒ద్మహే॑ తీక్ష్ణద॒గ్ంష్ట్రాయ॑ ధీమహి । తన్నో॑ నారసిగ్ంహః ప్రచో॒దయా᳚త్ ॥ 30 ॥ భా॒స్క॒రాయ॑ వి॒ద్మహే॑ మహద్ద్యుతిక॒రాయ॑ ధీమహి । తన్నో॑ ఆదిత్యః ప్రచో॒దయా᳚త్ ॥ 31 ॥ వై॒శ్వా॒న॒రాయ॑ వి॒ద్మహే॑ లాలీ॒లాయ ధీమహి । తన్నో॑ అగ్నిః ప్రచో॒దయా᳚త్ ॥ 32 ॥ కా॒త్యా॒య॒నాయ॑ వి॒ద్మహే॑ కన్యకు॒మారి॑ ధీమహి । తన్నో॑ దుర్గిః ప్రచో॒దయా᳚త్ ॥ 33 ॥ స॒హ॒స్ర॒పర॑మా దే॒వీ॒ శ॒తమూ॑లా శ॒తాంకు॑రా । స॒ర్వగ్ంహరతు॑ మే పా॒పం॒ దూ॒ర్వా దు॑:స్వప్న॒నాశి॑నీ ॥ 34 ॥ కాండా᳚త్ కాండాత్ ప్ర॒రోహం॑తీ॒ పరు॑షః పరుష॒: పరి॑ । ఏ॒వా నో॑ దూర్వే॒ ప్రత॑ను స॒హస్రే॑ణ శ॒తేన॑ చ ॥ 35 ॥ యా శ॒తేన॑ ప్రత॒నోషి॑ స॒హస్రే॑ణ వి॒రోహ॑సి । తస్యా॑స్తే దేవీష్టకే వి॒ధేమ॑ హ॒విషా॑ వ॒యం ॥ 36 ॥ అశ్వక్రాం॒తే ర॑థక్రాం॒తే॒ వి॒ష్ణుక్రాం᳚తే వ॒సుంధ॑రా । శిరసా॑ ధార॑యిష్యా॒మి॒ ర॒క్ష॒స్వ మాం᳚ పదే॒ పదే ॥ 37 ॥ భూమిర్ధేనుర్ధరణీ లోక॑ధా॒రిణీ । ఉ॒ద్ధృతా॑సి వ॑రాహే॒ణ॒ కృ॒ష్ణే॒న శ॑తబా॒హునా ॥ 38 ॥ మృ॒త్తికే॑ హన॑ పా॒పం॒ య॒న్మ॒యా దు॑ష్కృతం॒ కృతం । మృత్తికే᳚ బ్రహ్మ॑దత్తా॒సి॒ కా॒శ్యపే॑నాభి॒మంత్రి॑తా । మృ॒త్తికే॑ దేహి॑ మే పు॒ష్టిం॒ త్వ॒యి సర్వం॑ ప్ర॒తిష్ఠి॑తం ॥ 39 ॥ మృ॒త్తికే᳚ ప్రతిష్ఠి॑తే స॒ర్వం॒ త॒న్మే ని॑ర్ణుద॒ మృత్తి॑కే । త్వయా॑ హ॒తేన॑ పాపే॒న॒ గ॒చ్ఛా॒మి ప॑రమాం॒ గతిం ॥ 40 ॥ యత॑ ఇంద్ర॒ భయా॑మహే॒ తతో॑ నో॒ అభ॑యం కృధి । మఘ॑వంఛ॒గ్ధి తవ॒ తన్న॑ ఊ॒తయే॒ విద్విషో॒ విమృధో᳚ జహి ॥ 41 ॥ స్వ॒స్తి॒దా వి॒శస్పతి॑ర్వృత్ర॒హా విమృధో॑ వ॒శీ । వృషేంద్ర॑: పు॒ర ఏ॑తు నః స్వస్తి॒దా అ॑భయంక॒రః ॥ 42 ॥ స్వ॒స్తి న॒ ఇంద్రో॑ వృ॒ద్ధశ్ర॑వాః స్వ॒స్తి న॑: పూ॒షా వి॒శ్వవే॑దాః । స్వ॒స్తి న॒స్తార్క్ష్యో॒ అరి॑ష్టనేమిః స్వ॒స్తి నో॒ బృహస్పతి॑ర్దధాతు ॥ 43 ॥ ఆపాం᳚తమన్యుస్తృ॒పల॑ప్రభర్మా॒ ధుని॒: శిమీ॑వాం॒ఛరుమా॑గ్ంఋజీ॒షీ । సోమో॒ విశ్వా᳚న్యత॒సావనా॑ని॒ నార్వాగింద్రం॑ ప్రతి॒మానా॑ని దేభుః ॥ 44 ॥ బ్రహ్మ॑జజ్ఞా॒నం ప్ర॑థ॒మం పు॒రస్తా॒ద్వి సీ॑మ॒తః సు॒రుచో॑ వే॒న ఆ॑వః । స బు॒ధ్నియా॑ ఉప॒మా అ॑స్య వి॒ష్ఠాః స॒తశ్చ॒ యోని॒మస॑తశ్చ॒ వివ॑: ॥ 45 ॥ స్యో॒నా పృ॑థివి॒ భవా॑ నృక్ష॒రా ని॒వేశ॑నీ । యచ్ఛా॑ న॒: శర్మ॑ స॒ప్రథా᳚: ॥ 46 ॥ గం॒ధ॒ద్వా॒రాం దు॑రాధ॒ర్షాం॒ ని॒త్యపు॑ష్టాం కరీ॒షిణీం᳚ । ఈ॒శ్వరీగ్ం॑ సర్వ॑భూతా॒నాం॒ తామి॒హోప॑హ్వయే॒ శ్రియం ॥ 47 ॥ శ్రీ᳚ర్మే భ॒జతు అలక్ష్మీ᳚ర్మే న॒శ్యతు । విష్ణు॑ముఖా॒ వై దే॒వాశ్ఛందో॑భిరి॒మాం॑ల్లో॒కాన॑నపజ॒య్యమ॒భ్య॑జయన్ । మ॒హాగ్ం ఇంద్రో॒ వజ్ర॑బాహుః షోడ॒శీ శర్మ॑ యచ్ఛతు ॥ 48 ॥ స్వ॒స్తి నో॑ మ॒ఘవా॑ కరోతు॒ । హంతు॑ పా॒ప్మానం॒ యో᳚ఽస్మాన్ ద్వేష్టి॑ ॥ 49 ॥ సో॒మాన॒గ్ం స్వర॑ణం కృణు॒హి బ్ర॑హ్మణస్పతే క॒క్షీవం॑తం॒ య ఔ॑శి॒జం । శరీ॑రం యజ్ఞశమ॒లం కుసీ॑దం తస్మిం᳚త్సీదతు॒ యో᳚ఽస్మాన్ ద్వేష్టి॑ ॥ 50 ॥ చర॑ణం ప॒విత్రం॒ విత॑తం పురా॒ణం యేన॑ పూ॒తస్తర॑తి దుష్కృ॒తాని॑ । తేన॑ ప॒విత్రే॑ణ శు॒ద్ధేన॑ పూ॒తా అతి॑ పా॒ప్మాన॒మరా॑తిం తరేమ ॥ 51 ॥ స॒జోషా॑ ఇంద్ర సగ॑ణో మ॒రుద్భి॒: సోమం॑ పిబ వృత్రహంఛూర వి॒ద్వాన్ । జ॒హి శ॒త్రూ॒గ్ంరప॒ మృధో॑ నుద॒స్వాథాభ॑యం కృణుహి వి॒శ్వతో॑ నః ॥ 52 ॥ సు॒మి॒త్రా న॒ ఆప॒ ఓష॑ధయః సంతు । దుర్మి॒త్రాస్తస్మై॑ భూయాసు᳚ర్యోఽస్మాన్ ద్వేష్టి॒ యం చ॑ వయం ద్వి॒ష్మః ॥ 53 ॥ ఆపో॒ హిష్ఠా మ॑యో॒భువ॒స్తా న॑ ఊ॒ర్జే ద॑ధాతన । మ॒హేరణా॑య॒ చక్ష॑సే । యో వ॑: శి॒వత॑మో రస॒స్తస్య॑ భాజయతే॒ఽహ న॑: । ఉ॒శ॒తీరి॑వ మా॒త॑రః । తస్మా॒ అరం॑గమామవో॒ యస్య॒ క్షయా॑య॒ జిన్వ॑థ । ఆపో॑ జ॒నయ॑థా చ నః ॥ 54 ॥ హిర॑ణ్యశృంగం॒ వరు॑ణం॒ ప్రప॑ద్యే తీ॒ర్థ మే॑ దేహి॒ యాచి॑తః । య॒న్మయా॑ భు॒క్తమ॒సాధూ॑నాం పా॒పేభ్య॑శ్చ ప్ర॒తిగ్ర॑హః ॥ 55 ॥ యన్మే॒ మన॑సా వా॒చా॒ క॒ర్మ॒ణా వా దు॑ష్కృతం॒ కృతం । తన్న॒ ఇంద్రో॒ వరు॑ణో॒ బృహ॒స్పతి॑: సవి॒తా చ॑ పునంతు॒ పున॑: పునః ॥ 56 ॥ నమో॒ఽగ్నయే᳚ఽప్సు॒మతే॒ నమ॒ ఇంద్రా॑య॒ నమో॒ వరు॑ణాయ॒ నమో వారుణ్యై᳚ నమో॒ఽద్భ్యః ॥ 57 ॥ యద॒పాం క్రూ॒రం యద॑మే॒ధ్యం యద॑శాం॒తం తదప॑గచ్ఛతాత్ ॥ 58 ॥ అ॒త్యా॒శ॒నాద॑తీపా॒నా॒ద్ య॒చ్చ ఉ॒గ్రాత్ ప్ర॑తి॒గ్రహా᳚త్ । తన్మే॒ వరు॑ణో రా॒జా॒ పా॒ణినా᳚ హ్యవ॒మర్శ॑తు ॥ 59 ॥ సో॑ఽహమ॑పా॒పో వి॒రజో॒ నిర్ము॒క్తో ము॑క్తకిల్బిషః । నాక॑స్య పృ॒ష్ఠమారు॑హ్య॒ గచ్ఛే॒ద్బ్రహ్మ॑సలో॒కతాం ॥ 60 ॥ యశ్చా॒ప్సు వరు॑ణ॒: స పు॒నాత్వ॑ఘమర్ష॒ణః ॥ 61 ॥ ఇ॒మం మే॑ గంగే యమునే సరస్వతి॒ శుతు॑ద్రి॒ స్తోమగ్ం॑ సచతా॒ పరు॒ష్ణియా । అ॒సి॒క్ని॒యా మ॑రుద్వృధే వి॒తస్త॒యార్జీ॑కీయే శృణు॒హ్యా సు॒షోమ॑యా ॥ 62 ॥ ఋ॒తం చ॑ స॒త్యం చా॒భీ᳚ద్ధా॒త్తప॒సోఽధ్య॑జాయత । తతో॒ రాత్రి॑రజాయత॒ తత॑: సము॒ద్రో అ॑ర్ణ॒వః ॥ 63 ॥ స॒ము॒ద్రాద॑ర్ణ॒వాదధి॑ సంవత్స॒రో అజాయత । అ॒హో॒రా॒త్రాణి॑ వి॒దధ॒ద్విశ్వ॑స్య మిష॒తో వ॒శీ ॥ 64 ॥ సూ॒ర్యా॒చం॒ద్ర॒మసౌ॑ ధా॒తా య॑థాపూ॒ర్వమ॑కల్పయత్ । దివం॑ చ పృథి॒వీం చాం॒తరి॑క్ష॒మథో॒ సువ॑: ॥ 65 ॥ యత్పృ॑థి॒వ్యాగ్ం రజ॑: స్వ॒మాంతరి॑క్షే వి॒రోద॑సీ । ఇ॒మాగ్ంస్తదా॒పో వ॑రుణః పు॒నాత్వ॑ఘమర్ష॒ణః ॥ పు॒నంతు॒ వస॑వః పు॒నాతు॒ వరు॑ణః పు॒నాత్వ॑ఘమర్ష॒ణః । ఏ॒ష భూ॒తస్య॑ మ॒ధ్యే భువ॑నస్య గో॒ప్తా ॥ ఏ॒ష పు॒ణ్యకృ॑తాం లో॒కా॒నే॒ష మృ॒త్యోర్హి॑ర॒ణ్మయం᳚ । ద్యావా॑పృథి॒వ్యోర్హిర॒ణ్మయ॒గ్ం సగ్ం శ్రి॑త॒గ్ం సువ॑: । స న॒: సువ॒: సగ్ం శి॑శాధి ॥ 66 ॥ ఆర్ద్రం॒ జ్వల॑తి॒జ్యోతి॑ర॒హమ॑స్మి । జ్యోతి॒ర్జ్వల॑తి॒ బ్రహ్మా॒హమస్మి । యో॑ఽహమ॑స్మి॒ బ్రహ్మా॒హమ॑స్మి । అ॒హమ॑స్మి॒ బ్రహ్మా॒హమ॑స్మి । అ॒హమే॒వాహం మాం జు॑హోమి॒ స్వాహా᳚ ॥ 67 ॥ అ॒కా॒ర్య॒కా॒ర్య॑వకీ॒ర్ణీ స్తే॒నో భ్రూ॑ణ॒హా గు॑రుత॒ల్పగః । వరు॑ణో॒ఽపామ॑ఘమర్ష॒ణస్తస్మా॑త్ పా॒పాత్ ప్రము॑చ్యతే ॥ 68 ॥ ర॒జోభూమి॑స్త్వ॒ మాగ్ం రోద॑యస్వ॒ ప్రవ॑దంతి॒ ధీరా᳚: ॥ 69 ॥ ఆక్రాం᳚త్సము॒ద్రః ప్రథ॒మే విధ॑ర్మంజ॒నయ॑న్ప్ర॒జా భువ॑నస్య॒ రాజా॑ । వృషా॑ ప॒విత్రే అధి॒ సానో॒ అవ్యే॑ బృ॒హత్సోమో॑ వావృధే సువా॒న ఇందు॑: ॥ 70 ॥ ద్వితీయోఽవానుకః । ఓం జా॒తవే॑దసే సునవామ॒ సోమ॑ మరాతీయ॒తో నిద॑హాతి॒ వేద॑: । స న॑: పర్ష॒దతి॑ దు॒ర్గాణి॒ విశ్వా॑ నా॒వేవ॒ సింధుం॑ దురి॒తాఽత్య॒గ్నిః ॥ 1 తామ॒గ్నివ॑ర్ణాం॒ తప॑సా జ్వలం॒తీం వై॑రోచ॒నీం క॑ర్మఫ॒లేషు॒ జుష్టాం᳚ । దు॒ర్గాం దే॒వీగ్ం శర॑ణమ॒హం ప్రప॑ద్యే సు॒తర॑సి తరసే॒ నమ॑: ॥ 2 అగ్నే॒ త్వం॑ పా॑రయా॒ నవ్యో॑ అ॒స్మాన్ స్వ॒స్తిభి॒రతి॑ దు॒ర్గాణి॒ విశ్వా᳚ । పూశ్చ॑ పృ॒థ్వీ బ॑హు॒లా న॑ ఉ॒ర్వీ భవా॑ తో॒కాయ॒ తన॑యాయ॒ శమ్యోః ॥ 3 విశ్వా॑ని నో దు॒ర్గహా॑ జాతవేద॒: సింధుం॒ న నా॒వా దురి॒తాఽతి॑పర్షి । అగ్నే॑ అత్రి॒వన్మన॑సా గృణా॒నో᳚ఽస్మాకం॑ బోధ్యవి॒తా త॒నూనాం᳚ ॥ 4 పృ॒తనా॒జిత॒గ్ం సహ॑మానము॒గ్రమ॒గ్నిగ్ం హు॑వేమ పర॒మాథ్స॒ధస్థా᳚త్ । స న॑: పర్ష॒దతి॑ దు॒ర్గాణి॒ విశ్వా॒ క్షామ॑ద్దేవో॒ అతి॑ దురి॒తాఽత్య॒గ్నిః ॥ 5 ప్ర॒త్నోషి॑ క॒మీడ్యో॑ అధ్వ॒రేషు॑ సనాచ్చ॒ హోతా॒ నవ్య॑శ్చ॒ సత్సి॑ । స్వాం చా᳚ఽగ్నే త॒నువం॑ పి॒ప్రయ॑స్వా॒స్మభ్యం॑ చ॒ సౌభ॑గ॒మాయ॑జస్వ ॥ 6 గోభి॒ర్జుష్ట॑మ॒యుజో॒ నిషి॑క్తం॒ తవేం᳚ద్ర విష్ణో॒రను॒సంచ॑రేమ । నాక॑స్య పృ॒ష్ఠమభి సం॒వసా॑నో॒ వైష్ణ॑వీం లో॒క ఇ॒హ మా॑దయంతాం ॥ 7 ॥ తృతీయోఽనువాకః । భూరన్న॑మ॒గ్నయే॑ పృథి॒వ్యై స్వాహా॒ భువోఽన్నం॑ వా॒యవే॒ఽన్తరి॑క్షాయ॒ స్వాహా॒ సువ॒రన్న॑మాది॒త్యాయ॑ ది॒వే స్వాహా॒ భూర్భువ॒స్సువ॒రన్నం॑ చం॒ద్రమ॑సే ది॒గ్భ్యః స్వాహా॒ నమో॑ దే॒వేభ్య॑: స్వ॒ధా పి॒తృభ్యో॒ భూర్భువ॒: సువరన్న॒మోం ॥ 1 ॥ చతుర్థోఽనువాకః । భూర॒గ్నయే॑ పృథి॒వ్యై స్వాహా॒ భువో॑ వా॒యవే॒ఽన్తరి॑క్షాయ॒ స్వాహా॒ సువ॑రాది॒త్యాయ॑ ది॒వే స్వాహా॒ భుర్భువ॒స్సువ॑శ్చం॒ద్రమ॑సే ది॒గ్భ్యః స్వాహా॒ నమో॑ దే॒వేభ్య॑: స్వ॒ధా పి॒తృభ్యో॒ భూర్భువ॒:సువ॒రగ్న॒ ఓం ॥ 1 ॥ పంచమోఽనువాకః । భూర॒గ్నయే॑ చ పృథి॒వ్యై చ॑ మహ॒తే చ॒ స్వాహా॒ భువో॑ వా॒యవే॑ చాం॒తరి॑క్షాయ చ మహ॒తే చ॒ స్వాహా॒ సువ॑రాది॒త్యాయ॑ చ ది॒వే చ॑ మహ॒తే చ॒ స్వాహా॒ భూర్భువ॒స్సువశ్చం॒ద్రమ॑సే చ॒ నక్ష॑త్రేభ్యశ్చ ది॒గ్భ్యశ్చ॑ మహ॒తే చ॒ స్వాహా॒ నమో॑ దేవేభ్య॑: స్వ॒ధా పి॒తృభ్యో॒ భుర్భువ॒: సువ॒ర్మహ॒రోం ॥ 1 ॥ షష్ఠోఽనువాకః । పాహి నో అగ్న ఏన॑సే॒ స్వా॒హా పాహి నో విశ్వవేద॑సే స్వా॒హా యజ్ఞం పాహి విభావ॑సో స్వా॒హా సర్వం పాహి శతక్ర॑తో స్వా॒హా ॥ 1 ॥ సప్తమోఽనువాకః । పా॒హి నో॑ అగ్న॒ ఏక॑యా పా॒హ్యు॑త ద్వితీయ॑యా పా॒హ్యూర్జ॑ తృ॒తీయ॑యా పా॒హి గీ॒ర్భిశ్చ॑తసృభి॑ర్వసో॒ స్వాహా᳚ ॥ 1 ॥ అష్టమోఽనువాకః । యశ్ఛంద॑సామృష॒భో వి॒శ్వరూ॑ప॒శ్ఛందో᳚భ్య॒శ్చందా॑గ్ంస్యావి॒వేశ॑ । సతాగ్ంశిక్యః ప్రోవాచో॑పని॒షదింద్రో᳚ జ్యే॒ష్ఠ ఇం॑ద్రి॒యాయ॒ ఋషి॑భ్యో॒ నమో॑ దే॒వేభ్య॑: స్వ॒ధా పి॒తృభ్యో॒ భూర్భువ॒స్సువ॒శ్ఛంద॒ ఓం ॥ 1 ॥ నవమోఽనువాకః । నమో॒ బ్రహ్మ॑ణే ధారణం॑ మే అ॒స్త్వని॑రాకరణం ధా॒రయి॑తా భూయాసం॒ కర్ణ॑యోః శ్రు॒తం మా చ్యో᳚ఢం మమా॒ముష్య॒ ఓం ॥ 1 ॥ దశమోఽనువాకః । ఋ॒తం తప॑: స॒త్యం తప॑: శ్రుతం॒ తప॑: శాం॒తం తపో॒ దమ॒స్తప॒: శమ॒స్తపో॒ దానం॒ తపో॒ యజ్ఞం॒ తపో॒ భూర్భువ॒: సువ॒ర్బ్రహ్మై॒తదుపా᳚స్వై॒తత్తప॑: ॥ 1 ॥ ఏకాదశోఽనువాకః । యథా॑ వృ॒క్షస్య॑ సం॒పుష్పి॑తస్య దూ॒రాద్గం॒ధో వా᳚త్యేవం పుణ్య॑స్య క॒ర్మణో॑ దూ॒రా॒ద్గం॒ధో వా॑తి॒ యథా॑సిధా॒రాం క॒ర్తేఽవ॑హితమవ॒క్రామే॒ యద్యువే॒ యువే॒ హవా॑ వి॒హ్వయి॑ష్యామి క॒ర్తం ప॑తిష్యా॒మీత్యే॒వమ॒మృతా॑దా॒త్మానం॑ జు॒గుప్సే᳚త్ ॥ 1 ॥ ద్వాదశోఽనువాకః । అ॒ణోరణీ॑యాన్ మహ॒తో మహీ॑యానా॒త్మా గుహా॑యాం॒ నిహి॑తోఽస్య జం॒తోః । తమ॑క్రతుం పశ్యతి వీతశో॒కో ధా॒తుః ప్ర॒సాదా᳚న్మహి॒మాన॑మీశం ॥ 1 ॥ స॒ప్త ప్రా॒ణా ప్ర॒భ॑వంతి॒ తస్మా᳚త్ స॒ప్తార్చిష॑: స॒మిధ॑: స॒ప్త జి॒హ్వాః । స॒ప్త ఇ॒మే లో॒కా యేషు॒ చరం॑తి ప్రా॒ణా గు॒హాశ॑యా॒న్నిహి॑తాః స॒ప్త స॑ప్త ॥ 2 ॥ అత॑: సము॒ద్రా గి॒రయశ్చ॒ సర్వే॒ఽస్మాత్స్యందం॑తే॒ సింధ॑వ॒: సర్వ॑రూపాః । అత॑శ్చ॒ విశ్వా॒ ఓష॑ధయో॒ రసా᳚శ్చ॒ యేనై॑ష భూ॒తస్తి॑ష్ఠత్యంతరా॒త్మా ॥ 3 ॥ బ్ర॒హ్మా దేవానాం᳚ పద॒వీః క॑వీ॒నామృషి॒ర్విప్రా॑ణాం మహిషో మృ॒గాణాం᳚ । శ్యే॒నో గృధ్రా॑ణా॒గ్ంస్వధి॑తి॒ర్వనా॑నాగ్ంసోమ॑: ప॒విత్ర॒మత్యే॑తి॒ రేభన్॑ ॥ 4 ॥ అ॒జామేకాం॒ లోహి॑తశుక్లకృ॒ష్ణాం బ॒హ్వీం ప్ర॒జాం జ॒నయం॑తీ॒గ్ం సరూ॑పాం । అ॒జో హ్యేకో॑ జు॒షమా॑ణోఽను॒శేతే॒ జహా᳚త్యే॒నాం భు॒క్తభో॑గా॒మజో᳚ఽన్యః ॥ 5 ॥ హం॒సః శు॑చి॒షద్వసు॑రంతరిక్ష॒సద్ధోతా॑ వేది॒షదతి॑థిర్దురోణ॒సత్ । నృ॒షద్వ॑ర॒సదృ॑త॒సద్వ్యో॑మ॒సద॒బ్జా గో॒జా ఋ॑త॒జా అ॑ద్రి॒జా ఋ॒తం బృ॒హత్ ॥ 6 ॥ యస్మా᳚జ్జా॒తా న ప॒రా నైవ॒ కించ॒నాస॒ య ఆ॑వి॒వేశ॒ భువ॑నాని॒ విశ్వా᳚ । ప్ర॒జాప॑తిః ప్ర॒జయా॑ సంవిదా॒నస్త్రీణి॒ జ్యోతీ॑గ్ంషి సచతే॒ స షోడ॑శీ ॥ 6.1 ॥ వి॒ధ॒ర్తారగ్ం॑ హవామహే॒ వసో᳚: కు॒విద్వ॒నాతి॑ నః । స॒వి॒తారం॑ నృ॒చక్ష॑సం ॥ 6.2 ॥ ఘృ॒తం మి॑మిక్షిరే ఘృ॒తమ॑స్య॒ యోని॑ర్ఘృ॒తే శ్రి॒తో ఘృ॒తము॑వస్య॒ ధామ॑ । అ॒ను॒ష్వ॒ధమావ॑హ మా॒దయ॑స్వ॒ స్వాహా॑కృతం వృషభ వక్షి హ॒వ్యం ॥ 7 ॥ స॒ము॒ద్రాదూ॒ర్మిర్మధు॑మా॒గ్ం ఉదా॑రదుపా॒గ్ంశునా॒ సమ॑మృత॒త్వమా॑నట్ । ఘృ॒తస్య॒ నామ॒ గుహ్యం॒ యదస్తి॑ జి॒హ్వా దే॒వానా॑మ॒మృత॑స్య॒ నాభి॑: ॥ 8 ॥ వ॒యం నామ॒ ప్రబ్ర॑వామా ఘృ॒తేనా॒స్మిన్ య॒జ్ఞే ధా॑రయామా॒ నమో॑భిః । ఉప॑ బ్ర॒హ్మా శృ॑ణవచ్ఛ॒స్యమా॑న॒ చతు॑:శృంగోఽవమీద్గౌ॒ర ఏ॒తత్ ॥ 9 ॥ చ॒త్వారి॒ శృంగా॒ త్రయో॑ అస్య॒ పాదా॒ ద్వేశీ॒ర్షే స॒ప్త హస్తా॑సో అ॒స్య । త్రిధా॑ బ॒ద్ధో వృ॑ష॒భో రో॑రవీతి మ॒హో దే॒వో మర్త్యా॒గ్ం ఆవి॑వేశ ॥ 10 ॥ త్రిధా॑ హి॒తం ప॒ణిభి॑ర్గు॒హ్యమా॑నం॒ గవి॑ దే॒వాసో॑ ఘృ॒తమన్వ॑విందన్ । ఇంద్ర॒ ఏక॒గ్ం సూర్య॒ ఏకం॑ జజాన వే॒నాదేకగ్ం॑ స్వ॒ధయా॒ నిష్ట॑తక్షుః ॥ 11 ॥ యో దే॒వానాం᳚ ప్రథ॒మం పు॒రస్తా॒ద్విశ్వా॒ధికో॑ రు॒ద్రో మ॒హర్షి॑: । హి॒ర॒ణ్య॒గ॒ర్భం ప॑శ్యత॒ జాయ॑మాన॒గ్ం స నో॑ దే॒వః శు॒భయా॒స్మృత్యా॒ సమ్యు॑నక్తు ॥ 12 ॥ యస్మా॒త్పరం నాప॑ర॒మస్తి॒ కించి॒త్ యస్మా॒న్నాణీ॑యో॒ న జ్యాయో॑ఽస్తి॒ కశ్చి॑త్ । వృ॒క్ష ఇ॑వ స్త॒బ్ధో ది॒వి తి॑ష్ఠ॒త్యేక॒స్తేనే॒దం పూ॒ర్ణం పురు॑షేణ॒ సర్వం᳚ ॥ 13 ॥ న కర్మ॑ణా న ప్ర॒జయా॒ ధనే॑న॒ త్యాగే॑నైకే అమృత॒త్వమా॑న॒శుః । పరే॑ణ॒ నాకం॒ నిహి॑తం॒ గుహా॑యాం బి॒భ్రాజ॑తే॒ యద్యత॑యో వి॒శంతి॑ ॥ 14 ॥ వే॒దాం॒త॒వి॒జ్ఞాన॒విని॑శ్చితా॒ర్థాః సంన్యా॑సయో॒గాద్యత॑యః శుద్ధ॒సత్త్వా॑: । తే బ్ర॑హ్మలో॒కే తు॒ పరాంతకాలే॒ పరా॑మృతా॒: పరి॑ముచ్యంతి॒ సర్వే॑ ॥ 15 ॥ ద॒హ్రం॒ వి॒పా॒పం వ॒రవే᳚శ్మభూత॒ యత్ పుం॑డరీ॒కం పు॒రమ॑ధ్యస॒గ్ంస్థం । తత్రా॑పి దహ్రే గ॒గనం॑ విశోకం తస్మి॑న్ యదం॒తస్తదుపా॑సిత॒వ్యం ॥ 16 ॥ యో వేదాదౌ స్వ॑రః ప్రో॒క్తో॒ వేదాంతే॑ చ ప్ర॒తిష్ఠి॑తః । తస్య॑ ప్ర॒కృతి॑లీన॒స్య॒ య॒: పర॑: స మ॒హేశ్వ॑రః ॥ 17 ॥ త్రయోదశోఽనువాకః । స॒హ॒స్ర॒శీ॑ర్షం దే॒వం॒ వి॒శ్వాక్షం॑ వి॒శ్వశం॑భువం । విశ్వం॑ నా॒రాయ॑ణం దే॒వ॒మ॒క్షరం॑ పర॒మం ప్ర॒భుం ॥ 1 వి॒శ్వత॒: పర॑మం ని॒త్య॒ వి॒శ్వం నా॑రాయ॒ణగ్ం హ॑రిం । విశ్వ॑మే॒వేదం పురు॑ష॒స్తద్విశ్వ॒ముప॑జీవతి ॥ 2 పతిం॒ విశ్వ॑స్యా॒త్మేశ్వ॑ర॒గ్ం శాశ్వ॑తగ్ం శి॒వమ॑చ్యుతం । నా॒రాయ॒ణం మ॑హాజ్ఞే॒యం॒ వి॒శ్వాత్మా॑నం ప॒రాయ॑ణం ॥ 3 నారా॑య॒ణః ప॑రం బ్ర॒హ్మ॒ త॒త్త్వం నా॑రాయ॒ణః ప॑రః । నారా॑య॒ణః ప॑రో జ్యో॒తి॒రా॒త్మా నా॑రాయ॒ణః ప॑రః ॥ 4 (నా॒రాయ॒ణః ప॑రో ధ్యా॒తా॒ ధ్యా॒నం నా॑రాయ॒ణః ప॑రః ।) యచ్చ॑ కిం॒చిజ్జ॑గత్య॒స్మి॒న్ దృ॒శ్యతే᳚ శ్రూయ॒తేఽపి॑ వా । అంత॑ర్బ॒హిశ్చ॑ తత్స॒ర్వం॒ వ్యా॒ప్య నా॑రాయ॒ణః స్థి॑తః ॥ 5 అనం॑త॒మవ్య॑యం క॒విగ్ం స॑ము॒ద్రేఽన్తం॑ వి॒శ్వశం॑భువం । ప॒ద్మ॒కో॒శప్ర॑తీకా॒శ॒గ్ం హృ॒దయం॑ చాప్య॒ధోము॑ఖం ॥ 6 అధో॑ ని॒ష్ట్యా వి॑తస్త్యాం॒తే॒ నా॒భ్యాము॑పరి॒ తిష్ఠ॑తి । హృ॒దయం॑ తద్వి॑జానీ॒యా॒ద్వి॒శ్వస్యా॑యత॒నం మ॑హత్ ॥ 7 సంత॑తగ్ం సి॒రాభి॑స్తు॒ లంబ॑త్యాకోశ॒సన్ని॑భం । తస్యాంతే॑ సుషి॒రగ్ం సూ॒క్ష్మం తస్మిన్᳚ స॒ర్వం ప్రతి॑ష్ఠితం ॥ 8 తస్య॒ మధ్యే॑ మ॒హాన॑గ్నిర్వి॒శ్వార్చి॑ర్వి॒శ్వతో॑ముఖః । సోఽగ్ర॑భు॒గ్విభ॑జంతి॒ష్ఠ॒న్నాహా॑రమజ॒రః క॒విః ॥ 9 (తి॒ర్య॒గూ॒ర్ధ్వమ॑ధఃశా॒యీ ర॒శ్మయ॑స్తస్య॒ సంత॑తా ।) సం॒తా॒పయ॑తి స్వం దే॒హమాపా॑దతల॒మస్త॑కం । తస్య॒ మధ్యే॒ వహ్ని॑శిఖా అ॒ణీయో᳚ర్ధ్వా వ్య॒వస్థి॑తా ॥ 10 నీ॒లతో॑యద॑మధ్య॒స్థా॒ వి॒ద్యుల్లే॑ఖేవ॒ భాస్వ॑రా । నీ॒వార॒శూక॑వత్త॒న్వీ॒ పీ॒తా భా᳚స్వత్య॒ణూప॑మా ॥ 11 తస్యా᳚: శిఖా॒యా మ॑ధ్యే ప॒రమా᳚త్మా వ్య॒వస్థి॑తః । స బ్రహ్మ॒ స శివ॒: (స హరి॒:) సేంద్ర॒: సోఽక్ష॑రః పర॒మః స్వ॒రాట్ ॥ 12 ॥ చతుర్దశోఽనువాకః । ఆ॒ది॒త్యో వా ఏ॒ష ఏ॒తన్మం॒డలం తప॑తి॒ తత్ర॒ తా ఋచ॒స్తదృ॒చా మం॑డల॒గ్ం స ఋ॒చాం లో॒కోఽథ॒ య ఏ॒ష ఏతస్మి॑న్మం॒డలేఽర్చిర్దీ॒ప్యతే॒ తాని॒ సామా॑ని॒ స సా॒మ్నాం లో॒కోఽథ॒ య ఏ॒ష ఏ॒తస్మి॑న్మం॒డలే॒ఽర్చిషి॒ పురు॑ష॒స్తాని॒ యజూ॑గ్ంషి॒ స యజు॑షా మండల॒గ్ం స యజు॑షాం లో॒కః సైషా త్ర॒య్యేవ॑ వి॒ద్యా త॑పతి॒ య॑ ఏ॒షో᳚ఽన్తరా॑ది॒త్యే హి॑ర॒ణ్మయ॒: పురు॑షః ॥ 1 ॥ పంచదశోఽనువాకః । ఆ॒ది॒త్యో వై తేజ॒ ఓజో॒ బలం యశ॒శ్చక్షు॒: శ్రోత్ర॑మా॒త్మా మనో మ॒న్యుర్మ॒ను॑ర్మృ॒త్యుః స॒త్యో మి॒త్రో వా॒యురా॑కా॒శః ప్రా॒ణో లో॑కపా॒లః కః కిం కం తత్స॒త్యమన్న॑మ॒మృతో॑ జీ॒వో విశ్వ॑: కత॒మః స్వయం॒భు బ్రహ్మై॒తదమృ॑త ఏ॒ష పురు॑ష ఏ॒ష భూ॒తానా॒మధి॑పతి॒ర్బ్రహ్మ॑ణ॒: సాయు॑జ్యగ్ం సలో॒కతా॑మాప్నోత్యే॒తాసా॑మే॒వ దే॒వతా॑నా॒గ్ం సాయు॑జ్యగ్ం సా॒ర్ష్టితా॑గ్ం సమానలో॒కతా॑మాప్నోతి॒ య ఏ॒వం వేదే᳚త్యుప॒నిషత్ ॥ 1 ॥ ఘృణి॒: సూర్య॑ ఆది॒త్యోమ॑ర్చయంతి॒ తప॑: స॒త్యం మధు॑ క్షరంతి॒ తద్బ్రహ్మ॒ తదాప॒ ఆపో॒ జ్యోతీ॒ రసో॒ఽమృతం॒ బ్రహ్మ॒ భూర్భువ॒: సువ॒రోం ॥ 2 ॥ షోడశోఽనువాకః । నిధ॑నపతయే॒ నమః । నిధ॑నపతాంతికాయ॒ నమః । ఊర్ధ్వాయ॒ నమః । ఊర్ధ్వలింగాయ॒ నమః । హిరణ్యాయ॒ నమః । హిరణ్యలింగాయ॒ నమః । సువర్ణాయ॒ నమః । సువర్ణలింగాయ॒ నమః । దివ్యాయ॒ నమః । దివ్యలింగాయ॒ నమః । భవాయ॒ నమః । భవలింగాయ॒ నమః । శర్వాయ॒ నమః । శర్వలింగాయ॒ నమః । శివాయ॒ నమః । శివలింగాయ॒ నమః । జ్వలాయ॒ నమః । జ్వలలింగాయ॒ నమః । ఆత్మాయ॒ నమః । ఆత్మలింగాయ॒ నమః । పరమాయ॒ నమః । పరమలింగాయ॒ నమః । ఏతత్సోమస్య॑ సూర్య॒స్య॒ సర్వలింగ॑గ్ం స్థాప॒య॒తి॒ పాణిమంత్రం॑ పవి॒త్రం ॥ 1 ॥ సప్తదశోఽనువాకః । స॒ద్యోజా॒తం ప్ర॑పద్యా॒మి॒ స॒ద్యోజా॒తాయ॒ వై నమో॒ నమ॑: । భ॒వే భ॑వే॒ నాతి॑భవే భవస్వ॒ మాం । భ॒వోద్భ॑వాయ॒ నమ॑: ॥ 1 ॥ అష్టదశోఽనువాకః । వా॒మ॒దే॒వాయ॒ నమో॑ జ్యే॒ష్ఠాయ॒ నమ॑: శ్రే॒ష్ఠాయ॒ నమో॑ రు॒ద్రాయ॒ నమ॒: కాలా॑య॒ నమ॒: కల॑వికరణాయ॒ నమో॒ బల॑వికరణాయ॒ నమో॒ బలా॑య॒ నమో॒ బల॑ప్రమథనాయ॒ నమ॒: సర్వ॑భూతదమనాయ॒ నమో॑ మ॒నోన్మ॑నాయ॒ నమ॑: ॥ 1 ॥ ఏకోనవింశోఽనువాకః । అ॒ఘోరే᳚భ్యోఽథ॒ ఘోరే᳚భ్యో॒ ఘోర॒ఘోర॑తరేభ్యః । స॒ర్వత॑: శర్వ॒ సర్వే᳚భ్యో॒ నమ॑స్తే అస్తు రు॒ద్రరూ॑పేభ్యః ॥ 1 ॥ వింశోఽనువాకః । తత్పురు॑షాయ వి॒ద్మహే॑ మహాదే॒వాయ॑ ధీమహి । తన్నో॑ రుద్రః ప్రచో॒దయా᳚త్ ॥ 1 ॥ ఏకవింశోఽనువాకః । ఈశానః సర్వ॑విద్యా॒నా॒మీశ్వరః సర్వ॑భూతా॒నాం॒ బ్రహ్మాఽధి॑పతి॒ర్బ్రహ్మ॒ణోఽధి॑పతి॒ర్బ్రహ్మా॑ శి॒వో మే॑ అస్తు సదాశి॒వోం ॥ 1 ॥ ద్వావింశోఽనువాకః । నమో హిరణ్యబాహవే హిరణ్యవర్ణాయ హిరణ్యరూపాయ హిరణ్యపతయేఽమ్బికాపతయ ఉమాపతయే పశుపతయే॑ నమో॒ నమః ॥ 1 ॥ త్రయోవింశోఽనువాకః । ఋ॒తగ్ం స॒త్యం ప॑రం బ్ర॒హ్మ॒ పు॒రుషం॑ కృష్ణ॒పింగ॑లం । ఊ॒ర్ధ్వరే॑తం వి॑రూపా॒క్షం॒ వి॒శ్వరూ॑పాయ॒ వై నమో॒ నమ॑: ॥ 1 ॥ చతుర్వింశోఽనువాకః । సర్వో॒ వై రు॒ద్రస్తస్మై॑ రు॒ద్రాయ॒ నమో॑ అస్తు । పురు॑షో॒ వై రు॒ద్రః సన్మ॒హో నమో॒ నమ॑: । విశ్వం॑ భూ॒తం భువ॑నం చి॒త్రం బ॑హు॒ధా జా॒తం జాయ॑మానం చ॒ యత్ । సర్వో॒ హ్యే॑ష రు॒ద్రస్తస్మై॑ రు॒ద్రాయ॒ నమో॑ అస్తు ॥ 1 ॥ పంచవింశోఽనువాకః । కద్రు॒ద్రాయ॒ ప్రచే॑తసే మీ॒ఢుష్ట॑మాయ॒ తవ్య॑సే। వో॒చేమ॒ శంత॑మగ్ం హృ॒దే ॥ సర్వో॒హ్యే॑ష రు॒ద్రస్తస్మై॑ రు॒ద్రాయ॒ నమో॑ అస్తు ॥ 1 ॥ షడ్వింశోఽనువాకః । యస్య॒ వైకం॑కత్యగ్నిహోత్ర॒హవ॑ణీ భవతి॒ (ప్రతి॑ష్ఠితా॒:) ప్రత్యే॒వాస్యాహు॑తయస్తిష్ఠం॒త్యథో॒ ప్రతి॑ష్ఠిత్యై ॥ 1 ॥ సప్తవింశోఽనువాకః । కృ॒ణు॒ష్వ పాజ॒ ఇతి॒ పంచ॑ । కృ॒ణు॒ష్వ పాజ॒: ప్రసి॑తిం॒ న పృ॒థ్వీం యా॒హి రాజే॒వామ॑వా॒ఀ ఇభే॑న । తృ॒ష్వీమను॒ ప్రసి॑తిం ద్రూణా॒నోఽస్తా॑సి॒ విధ్య॑ ర॒క్షస॒స్తపి॑ష్ఠైః ॥ 1 ॥ తవ॑ భ్ర॒మాస॑ ఆశు॒యా ప॑తం॒త్యను॑ స్పృశ ధృష॒తా శోశు॑చానః । తపూం॑ష్యగ్నే జు॒హ్వా॑ పతం॒గానసం॑దితో॒ వి సృ॑జ॒ విష్వ॑గు॒ల్కాః ॥ 2 ॥ ప్రతి॒ స్పశో॒ విసృ॑జ॒ తూర్ణి॑తమో॒ భవా॑ పా॒యుర్వి॒శీ అ॒స్యా అద॑బ్ధః । యో నో॑ దూ॒రే అ॒ఘశం॑ సో॒ యో అంత్యగ్నే॒ మాకి॑ష్టే॒ వ్యథి॒రాద॑ధర్షీత్ ॥ 3 ॥ ఉద॑గ్నే తిష్ఠ॒ ప్రత్యా త॑నుష్వ॒ న్య॑మిత్రా॑ఀ ఓషతాత్తిగ్మహేతే । యో నో॒ అరా॑తిం సమిధాన చ॒క్రే నీ॒చాతం ధ॑క్ష్యత॒సం న శుష్కం॑ ॥ 4 ॥ ఊ॒ర్ధ్వో భ॑వ॒ ప్రతిం॑ వి॒ధ్యాధ్య॒స్మదా॒విష్కృ॑ణుష్వ॒ దైవ్యా॑న్యగ్నే । అవ॑స్థి॒రా త॑నుహి యాతు॒జూనాం॑ జా॒మిమజా॑మిం॒ ప్రమృ॑ణీహి॒ శత్రూ॑న్ ॥ 5 ॥ అష్టావింశోఽనువాకః । అది॑తిర్దే॒వా గం॑ధ॒ర్వా మ॑ను॒ష్యా॑: పి॒తరోఽసు॑రా॒స్తేషాగ్ం॑ సర్వభూ॒తానాం᳚ మా॒తా మే॒దినీ॑ మహ॒తీ మ॒హీ సా॑వి॒త్రీ గా॑య॒త్రీ జగ॑త్యు॒ర్వీ పృ॒థ్వీ బ॑హు॒లా విశ్వా॑ భూ॒తా క॑త॒మా కాయా సా స॒త్యేత్య॒మృతేతి॑ వాసి॒ష్ఠః ॥ 1 ॥ ఏకోనత్రింశోఽనువాకః । ఆపో॒ వా ఇ॒దగ్ం సర్వం॒ విశ్వా॑ భూ॒తాన్యాప॑: ప్రా॒ణా వా ఆప॑: ప॒శవ॒ ఆపోఽన్న॒మాపోఽమృ॑త॒మాప॑: స॒మ్రాడాపో॑ వి॒రాడాప॑: స్వ॒రాడాప॒శ్ఛందా॒గ్॒స్యాపో॒ జ్యోతీ॒గ్॒ష్యాపో॒ యజూ॒గ్॒ష్యాప॑: స॒త్యమాప॒: సర్వా॑ దే॒వతా॒ ఆపో॒ భూర్భువ॒: సువ॒రాప॒ ఓం ॥ 1 ॥ త్రింశోఽనువాకః । ఆప॑: పునంతు పృథి॒వీం పృథి॒వీ పూ॒తా పు॑నాతు॒ మాం । పు॒నంతు॒ బ్రహ్మ॑ణ॒స్పతి॒ర్బ్రహ్మ॑పూ॒తా పు॑నాతు మాం ॥ 1 ॥ యదుచ్ఛి॑ష్టమభో᳚జ్యం॒ యద్వా॑ దు॒శ్చరి॑తం॒ మమ॑ । సర్వం॑ పునంతు॒ మామాపో॑ఽస॒తాం చ॑ ప్రతి॒గ్రహ॒గ్ం స్వాహా᳚ ॥ 2 ॥ ఏకత్రింశోఽనువాకః । అగ్నిశ్చ మా మన్యుశ్చ మన్యుపతయశ్చ మన్యు॑కృతే॒భ్యః । పాపేభ్యో॑ రక్షం॒తాం । యదహ్నా పాప॑మకా॒ర్షం । మనసా వాచా॑ హస్తా॒భ్యాం । పద్భ్యాముదరే॑ణ శి॒శ్నా । అహ॒స్తద॑వలుం॒పతు । యత్కించ॑ దురి॒తం మయి॑ । ఇ॒దమ॒హం మామమృత॑యో॒నౌ । సత్యే జ్యోతిషి జుహో॑మి స్వా॒హా ॥ 1 ॥ ద్వాత్రింశోఽనువాకః । సూర్యశ్చ మా మన్యుశ్చ మన్యుపతయశ్చ మన్యు॑కృతే॒భ్యః । పాపేభ్యో॑ రక్షం॒తాం । యద్రాత్రియా పాప॑మకా॒ర్షం । మనసా వాచా॑ హస్తా॒భ్యాం । పద్భ్యాముదరే॑ణ శి॒శ్నా । రాత్రి॒స్తద॑వలుం॒పతు । యత్కించ॑ దురి॒తం మయి॑ । ఇ॒దమ॒హం మామమృత॑యో॒నౌ । సూర్యే జ్యోతిషి జుహో॑మి స్వా॒హా ॥ 1 ॥ త్రయస్త్రింశోఽనువాకః । ఓమిత్యేకాక్ష॑రం బ్ర॒హ్మ । అగ్నిర్దేవతా బ్రహ్మ॑ ఇత్యా॒ర్షం । గాయత్రం ఛందం । పరమాత్మం॑ సరూ॒పం । సాయుజ్యం వి॑నియో॒గం ॥ 1 ॥ చతుస్త్రింశోఽనువాకః । ఆయా॑తు॒ వర॑దా దే॒వీ॒ అ॒క్షరం॑ బ్రహ్మ॒ సంమి॑తం । గా॒య॒త్రీం᳚ ఛంద॑సాం మా॒తే॒దం బ్ర॑హ్మ జు॒షస్వ॑ నః ॥ 1 యదహ్నా᳚త్కురు॑తే పా॒పం॒ తదహ్నా᳚త్ప్రతి॒ముచ్య॑తే । యద్రాత్రియా᳚త్కురు॑తే పా॒పం॒ తద్రాత్రియా᳚త్ప్రతి॒ముచ్య॑తే । సర్వ॑వ॒ర్ణే మ॑హాదే॒వి॒ సం॒ధ్యావి॑ద్యే స॒రస్వ॑తి ॥ 2 పంచత్రింశోఽనువాకః । ఓజో॑ఽసి॒ సహో॑ఽసి॒ బలమ॑సి॒ భ్రాజో॑ఽసి దే॒వానాం॒ ధామ॒నామా॑సి విశ్వ॑మసి వి॒శ్వాయు॒: సర్వ॑మసి స॒ర్వాయురభిభూరోం । గాయత్రీమావా॑హయా॒మి॒ । సావిత్రీమావా॑హయా॒మి॒ । సరస్వతీమావా॑హయా॒మి॒ । ఛందర్షీనావా॑హయా॒మి॒ । శ్రియమావా॑హయా॒మి॒ ॥ గా॒యత్రియా గాయత్రీ ఛందో విశ్వామిత్ర ఋషిః సవితా దేవతా అగ్నిర్ముఖం బ్రహ్మాశిరో విష్ణుర్హృదయగ్ం రుద్రః శిఖా పృథివీ యోనిః ప్రాణాపానవ్యానోదాన సమానా సప్రాణా శ్వేతవర్ణా సాంఖ్యాయన సగోత్రా గాయత్రీ చతుర్వింశత్యక్షరా త్రిపదా॑ షట్కు॒క్షి॒: పంచశీర్షోపనయనే వి॑నియో॒గ॒: ॥ ఓం భూః । ఓం భువః । ఓగ్ం సువః । ఓం మహః । ఓం జనః । ఓం తపః । ఓగ్ం సత్యం । ఓం తత్స॑వి॒తుర్వరే᳚ణ్యం॒ । భర్గో॑ దే॒వస్య॑ ధీమహి । ధియో॒ యో న॑: ప్రచో॒దయా᳚త్ । ఓమాపో॒ జ్యోతీ॒ రసో॒ఽమృతం॒ బ్రహ్మ॒ భూర్భువ॒: సువ॒రోం ॥ 2 ॥ షట్త్రింశోఽనువాకః । ఉ॒త్తమే॑ శిఖ॑రే జా॒తే॒ భూ॒మ్యాం ప॑ర్వత॒మూర్ధ॑ని బ్రాహ్మణే᳚భ్యోఽభ్య॑నుజ్ఞా॒తా॒ గ॒చ్ఛ దే॑వి య॒థాసు॑ఖం ॥ 1 స్తుతో మయా వరదా వే॑దమా॒తా॒ ప్రచోదయంతీ పవనే᳚ ద్విజా॒తా । ఆయుః పృథివ్యాం ద్రవిణం బ్ర॑హ్మవ॒ర్చ॒సం॒ మహ్యం దత్వా ప్రజాతుం బ్ర॑హ్మలో॒కం ॥ 2 స్తు॒తా మయా॑ వర॒దా వే॑దమా॒తా ప్రచో॑దయంతాం పావమా॒నీ ద్వి॒జానాం॑ । ఆయు॑: ప్రా॒ణం ప్ర॒జాం ప॒శుం కీ॒ర్తిం ద్రవి॑ణం బ్రహ్మవర్చ॒సం మహ్యం॑ ద॒త్వా వ్ర॑జత బ్రహ్మలో॒కం ॥ సప్తత్రింశోఽనువాకః । ఘృణి॒: సూర్య॑ ఆది॒త్యో న ప్రభా॑ వా॒త్యక్ష॑రం । మధు॑ క్షరంతి॒ తద్ర॑సం । స॒త్యం వై తద్రస॒మాపో॒ జ్యోతీ॒ రసో॒ఽమృతం॒ బ్రహ్మ॒ భూర్భువః సువ॒రోం ॥ 1 ॥ అష్టత్రింశోఽనువాకః । బ్రహ్మ॑మేతు॒ మాం । మధు॑మేతు॒ మాం । బ్రహ్మ॑మే॒వ మధు॑మేతు॒ మాం । యాస్తే సో॑మ ప్ర॒జా వ॒త్సోఽభి॒ సో అ॒హం । దుఃష్వప్న॒హన్ దు॑రుష్షహ । యాస్తే॑ సోమ ప్రా॒ణాగ్ం స్తాంజు॑హోమి ॥ 1 ॥ త్రిసు॑పర్ణ॒మయా॑చితం బ్రాహ్మ॒ణాయ॑ దద్యాత్ । బ్ర॒హ్మ॒హ॒త్యాం వా ఏ॒తే ఘ్నం॑తి । యే బ్రా᳚హ్మ॒ణాస్త్రిసు॑పర్ణం॒ పఠం॑తి । తే సోమం॒ ప్రాప్ను॑వంతి । ఆ॒ స॒హ॒స్రాత్ పం॒క్తిం పునం॑తి । ఓం ॥ 2 ॥ ఏకోనచత్వారింశోఽనువాకః । బ్రహ్మ॑ మే॒ధయా᳚ । మధు॑ మే॒ధయా᳚ । బ్రహ్మ॑మే॒వ మధు॑ మే॒ధయా᳚ ॥ 1 ॥ అ॒ద్యానో॑ దేవ సవితః ప్ర॒జావ॑త్సావీ॒: సౌభ॑గం । పరా᳚ దుఃష్వప్ని॑యగ్ం సువ ॥ 2 ॥ విశ్వా॑ని దేవ సవితర్దురి॒తాని॒ పరా॑సువ । యద్భ॒ద్రం తన్మ॒ ఆసు॑వ ॥ మధు॒వాతా॑ ఋతాయ॒తే మధు॑క్షరంతి॒ సింధ॑వః । మాధ్వీ᳚ర్నః సం॒త్వౌష॑ధీః ॥ మధు॒ నక్త॑ము॒తోష॑సి॒ మధు॑మ॒త్పార్థి॑వగ్ం రజ॑: । మధు॒ద్యౌర॑స్తు నః పి॒తా ॥ మధు॑మాన్నో॒ వన॒స్పతి॒ర్మధు॑మాగ్ం అస్తు॒ సూర్య॑: । మాధ్వీ॒ర్గావో॑ భవంతు నః ॥ యాం మే॒ధాం దే॑వగ॒ణాః పి॒తర॑శ్చో॒పాస॑తే । తయా॒ మామ॒ద్య మే॒ధయాగ్నే॑ మే॒ధావి॑నం కురు॒ స్వాహా॑ ॥ 1 మే॒ధాం మే॒ వరు॑ణో దదాతు మే॒ధామ॒గ్నిః ప్ర॒జాప॑తిః । మే॒ధామింద్ర॑శ్చ వా॒యుశ్చ॑ మే॒ధాం ధా॒తా ద॑దాతు మే॒ స్వాహా॑ ॥ 2 త్వం నో॑ మేధే ప్రథ॒మా గోభి॒రశ్వే॑భి॒రాగ॑హి । త్వం సూర్య॑స్య ర॒ష్మిభి॒స్త్వం నో॑ అసి య॒జ్ఞియా॑ ॥ 3 మే॒ధామ॒హం ప్ర॑థ॒మం బ్రహ్మ॑ణ్వతీం॒ బ్రహ్మ॑జూతా॒మృషి॑ష్టుతాం । ప్రపీ॑తాం బ్రహ్మచా॒రిభి॑ర్దే॒వానా॒మవ॑సే హువే ॥ 4 యాం మే॒ధామృ॒భవో॑ వి॒దుర్యా మే॒ధామసు॑రా వి॒దుః । ఋష॑యో భ॒ద్రాం మే॒ధాం యాం వి॒దుస్తాం మయ్యావే॑శయామసి ॥ 5 యామృష॑యో భూత॒కృతో॑ మే॒ధాం మే॑ధా॒వినో॑వి॒దుః । తయా॒ మామ॒ద్య మే॒ధయాగ్నే॑ మేధా॒వినం॑ కృణు ॥ 6 మే॒ధాం సా॒యం మే॒ధాం ప్రా॒తర్మే॒ధాం మ॒ధ్యంది॑నం॒ పరి॑ । మే॒ధాం సూర్య॑స్య ర॒ష్మిభి॒ర్వచ॒సావే॑శయామహే ॥ 7 య ఇ॒మం త్రిసు॑పర్ణ॒మయా॑చితం బ్రాహ్మ॒ణాయ॑ దద్యాత్ । భ్రూణ॒హ॒త్యాం వా ఏ॒తే ఘ్నం॑తి । యే బ్రా᳚హ్మ॒ణాస్త్రిసు॑పర్ణం॒ పఠం॑తి । తే సోమం॒ ప్రాప్ను॑వంతి । ఆ॒ స॒హ॒స్రా॒త్పం॒క్తిం పునం॑తి । ఓం ॥ 7 ॥ చత్వారింశోఽనువాకః । బ్రహ్మ॑ మే॒ధవా᳚ । మధు॑ మే॒ధవా᳚ । బ్రహ్మ॑మే॒వ మధు॑ మే॒ధవా॑ ॥ 1 ॥ బ్ర॒హ్మా దే॒వానాం᳚ పద॒వీః క॑వీ॒నామృషి॒ర్విప్రా॑ణాం మహి॒షో మృ॒గాణాం॑ । శ్యే॒నో గృద్ధ్రా॑ణా॒గ్ం స్వధి॑తి॒ర్వనా॑నా॒గ్ం సోమ॑: ప॒విత్ర॒మత్యే॑తి॒ రేభన్॑ ॥ 2 ॥ హ॒గ్ంసః శు॑చి॒షద్వసు॑రంతరిక్ష॒సద్ధోతా॑ వేది॒షదతి॑థిర్దురోణ॒సత్ । నృ॒షద్వ॑ర॒సదృ॑తసద్వ్యో॑మ॒సద॒బ్జా గో॒జా ఋ॑త॒జా అ॑ద్రి॒జా ఋ॒తం బృ॒హత్ ॥ 3 ॥ ఋ॒చే త్వా॑ రు॒చే త్వా॒ సమిత్స్ర॑వంతి స॒రితో॒ న ధేనా᳚: । అం॒తర్హృ॒దా మన॒సా పూ॒యమా॑నాః । ఘృ॒తస్య॒ ధారా॑ అ॒భిచా॑కశీమి ॥ 4 ॥ హి॒ర॒ణ్యయో॑ వేత॒సో మధ్య॑ ఆసాం । తస్మిం᳚త్సుప॒ర్ణో మ॑ధు॒కృత్ కు॑లా॒యీ భజ॑న్నాస్తే॒ మధు॑ దే॒వతా᳚భ్యః । తస్యా॑సతే॒ హ॑రయః స॒ప్త తీరే᳚ స్వ॒ధాం దుహా॑నా అ॒మృత॑స్య॒ ధారాం᳚ ॥ 5 ॥ య ఇ॒దం త్రిసు॑పర్ణ॒మయా॑చితం బ్రాహ్మ॒ణాయ॑ దద్యాత్ । వీ॒ర॒హ॒త్యాం వా ఏ॒తే ఘ్నం॑తి । యే బ్రా᳚హ్మ॒ణాస్త్రిసు॑పర్ణం॒ పఠం॑తి । తే సోమం॒ ప్రాప్ను॑వంతి । ఆ॒స॒హస్రాత్ పం॒క్తిం పునం॑తి । ఓం ॥ 6 ॥ ఏకచత్వారింశోఽనువాకః । మే॒ధాదే॒వీ జు॒షమాణా న॒ ఆగా᳚ద్వి॒శ్వాచీ॑ భ॒ద్రా సు॑మన॒స్యమా॑నా । త్వయా॒ జుష్టా॑ ను॒దమా॑ణా దు॒రుక్తా᳚న్బృ॒హద్వ॑దేమ వి॒దథే॑ సు॒వీరా᳚: ॥ 1 త్వయా॒ జుష్ట॑ ఋ॒షిర్భ॑వతి దేవి॒ త్వయా॒ బ్రహ్మా॑ఽఽగ॒తశ్రీ॑రు॒త త్వయా᳚ । త్వయా॒ జుష్ట॑శ్చి॒త్రం విం॑దతే॒ వసు॒ సా నో॑ జుషస్వ॒ ద్రవి॑ణో న మేధే ॥ 2 ద్విచత్వారింశోఽనువాకః । మే॒ధాం మ॒ ఇంద్రో॑ దదాతు మే॒ధాం దే॒వీ సర॑స్వతీ । మే॒ధాం మే॑ అ॒శ్వినా॑వు॒భావాధ॑త్తాం॒ పుష్క॑రస్రజౌ ॥ 1 అ॒ప్స॒రాసు॑ చ॒ యా మే॒ధా గం॑ధ॒ర్వేషు॑ చ॒ యన్మన॑: । దైవీ᳚ మే॒ధా సర॑స్వతీ॒ సా మాం᳚ మే॒ధా సు॒రభి॑ర్జుషతా॒గ్॒ స్వాహా᳚ ॥ 2 త్రిచత్వారింశోఽనువాకః । ఆ మాం᳚ మే॒ధా సు॒రభి॑ర్వి॒శ్వరూ॑పా॒ హిర॑ణ్యవర్ణా॒ జగ॑తీ జగ॒మ్యా । ఊర్జ॑స్వతీ॒ పయ॑సా॒ పిన్వ॑మానా॒ సా మాం᳚ మే॒ధా సు॒ప్రతీ॑కా జుషంతాం ॥ 1 చతుశ్చత్వారింశోఽనువాకః । మయి॑ మే॒ధాం మయి॑ ప్ర॒జాం మయ్య॒గ్నిస్తేజో॑ దధాతు॒ మయి॑ మే॒ధాం మయి॑ ప్ర॒జాం మయీంద్ర॑ ఇంద్రి॒యం ద॑ధాతు॒ మయి॑ మే॒ధాం మయి॑ ప్ర॒జాం మయి॒ సూర్యో॒ భ్రాజో॑ దధాతు ॥ 1 ॥ పంచచత్వారింశోఽనువాకః । అపై॑తు మృ॒త్యుర॒మృతం॑ న॒ ఆగ॑న్వైవస్వ॒తో నో॒ అభ॑యం కృణోతు । ప॒ర్ణం వన॒స్పతే॑రివా॒భి న॑: శీయతాగ్ంర॒యిః సచ॑తాం న॒: శచీ॒పతి॑: ॥ 1 ॥ షట్చత్వారింశోఽనువాకః । పరం॑ మృత్యో॒ అను॒పరే॑హి పంథాం॒ యస్తే॒ స్వ ఇత॑రో దేవ॒యానా᳚త్ । చక్షు॑ష్మతే శృణ్వ॒తే తే᳚ బ్రవీమి॒ మా న॑: ప్ర॒జాగ్ం రీ॑రిషో॒ మోత వీ॒రాన్ ॥ 1 ॥ సప్తచత్వారింశోఽనువాకః । వాతం॑ ప్రా॒ణం మన॑సా॒న్వార॑భామహే ప్రజాప॑తిం॒ యో భువ॑నస్య గో॒పాః । స నో॑ మృత్యోస్త్రా॑యతాం॒ పాత్వగ్ంహ॑సో॒ జ్యోగ్జీ॒వా జ॒రామ॑ శీమహి ॥ 1 ॥ అష్టచత్వారింశోఽనువాకః । అ॒ము॒త్ర॒భూయా॒దధ॒ యద్య॒మస్య॒ బృహ॑స్పతే అ॒భిశ॑స్తే॒రముం॑చః । ప్రత్యౌ॑హతామ॒శ్వినా॑ మృత్యుమ॑స్మద్దే॒వానా॑మగ్నే భి॒షజా॒ శచీ॑భిః ॥ 1 ॥ ఏకోనపంచాశోఽనువాకః । హరి॒గ్ం హరం॑త॒మను॑యంతి దే॒వా విశ్వ॒స్యేశా॑నం వృష॒భం మ॑తీ॒నాం । బ్రహ్మ॒సరూ॑ప॒మను॑ మే॒దమాగా॒దయ॑నం॒ మా వివ॑ధీ॒ర్విక్ర॑మస్వ ॥ 1 ॥ పంచాశోఽనువాకః । శల్కై॑ర॒గ్నిమిం॑ధా॒న ఉ॒భౌ లో॒కౌ స॑నేమ॒హం । ఉ॒భయో᳚ర్లో॒కయో॑రృ॒ధ్వాతి॑ మృ॒త్యుం త॑రామ్య॒హం ॥ 1 ॥ ఏకపంచాశోఽనువాకః । మా ఛి॑దో మృత్యో॒ మా వ॑ధీ॒ర్మా మే॒ బలం॒ వివృ॑హో॒ మా ప్రమో॑షీః । ప్ర॒జాం మా మే॑ రీరిష॒ ఆయురుగ్ర నృచక్ష॑సం త్వా హ॒విషా॑ విధేమ ॥ 1 ॥ ద్విపంచాశోఽనువాకః । మా నో॑ మ॒హాంత॑ము॒త మా నో॑ అర్భ॒కం మా న॒ ఉక్షం॑తము॒త మా న॑ ఉక్షి॒తం । మా నో॑ఽవధీః పి॒తరం॒ మోత మా॒తరం॑ ప్రి॒యా మా న॑స్త॒నువో॑ రుద్ర రీరిషః ॥ 1 ॥ త్రిపంచాశోఽనువాకః । మా న॑స్తో॒కే తన॑యే॒ మా న॒ ఆయు॑షి॒ మా నో॒ గోషు॒ మా నో॒ అశ్వే॑షు రీరిషః । వీ॒రాన్మా నో॑ రుద్ర భామి॒తోఽవ॑ధీర్హ॒విష్మం॑తో॒ నమ॑సా విధేమ తే ॥ 1 ॥ చతుష్పంచాశోఽనువాకః । ప్రజా॑పతే॒ న త్వదే॒తాన్య॒న్యో విశ్వా॑ జా॒తాని॒ పరి॒ తా బ॑భూవ । యత్కా॑మస్తే జుహు॒మస్తన్నో॑ అస్తు వ॒యగ్ం స్యా॑మ॒ పత॑యో రయీ॒ణాం ॥ 1 ॥ పంచపంచాశోఽనువాకః । స్వ॒స్తి॒దా వి॒శస్పతి॑ర్వృత్ర॒హా విమృధో॑ వ॒శీ । వృషేంద్ర॑: పు॒ర ఏ॑తు నః స్వస్తి॒దా అ॑భయంక॒రః ॥ 1 ॥ షట్పంచాశోఽనువాకః । త్ర్యం॑బకం యజామహే సుగం॒ధిం పు॑ష్టి॒వర్ధ॑నం । ఉ॒ర్వా॒రు॒కమి॑వ॒ బంధ॑నాన్మృ॒త్యోర్ము॑క్షీయ॒ మాఽమృతా᳚త్ ॥ 1 ॥ సప్తపంచాశోఽనువాకః । యే తే॑ స॒హస్ర॑మ॒యుతం॒ పాశా॒ మృత్యో॒ మర్త్యా॑య॒ హంత॑వే । తాన్ య॒జ్ఞస్య॑ మాయయా॒ సర్వా॒నవ॑యజామహే ॥ 1 ॥ అష్టపంచాశోఽనువాకః । మృత్యవే॒ స్వాహా॑ మృత్యవే॒ స్వాహా᳚ ॥ 1 ॥ ఏకోనషష్టితమోఽనువాకః । దే॒వకృ॑త॒స్యైన॑సోఽవ॒యజ॑నమసి॒ స్వాహా᳚ । మ॒ను॒ష్య॑కృత॒స్యైన॑సోఽవ॒యజ॑నమసి॒ స్వాహా᳚ । పి॒తృకృ॑త॒స్యైన॑సోఽవ॒యజ॑నమసి॒ స్వాహా᳚ । ఆ॒త్మకృ॑త॒స్యైన॑సోఽవ॒యజ॑నమసి॒ స్వాహా᳚ । అ॒న్యకృ॑త॒స్యైన॑సోఽవ॒యజ॑నమసి॒ స్వాహా᳚ । అ॒స్మత్కృ॑త॒స్యైన॑సోఽవ॒యజ॑నమసి॒ స్వాహా᳚ । యద్ది॒వా చ॒ నక్తం॒ చైన॑శ్చకృ॒మ తస్యా॑వ॒యజ॑నమసి॒ స్వాహా᳚ । యత్స్వ॒పం॑తశ్చ॒ జాగ్ర॑త॒శ్చైన॑శ్చకృ॒మ తస్యా॑వ॒యజ॑నమసి॒ స్వాహా᳚ । యత్సు॒షుప్త॑శ్చ॒ జాగ్ర॑త॒శ్చైన॑శ్చకృ॒మ తస్యా॑వ॒యజ॑నమసి॒ స్వాహా᳚ । యద్వి॒ద్వాగ్ంసశ్చావి॑ద్వాగ్ంసశ్చైన॑శ్చకృ॒మ తస్యా॑వ॒యజ॑నమసి॒ స్వాహా᳚ । ఏనస ఏనసోఽవయజనమ॑సి స్వా॒హా ॥ 1 ॥ షష్టితమోఽనువాకః । యద్వో॑ దేవాశ్చకృ॒మ జి॒హ్వయా॑ గు॒రు మన॑సో వా॒ ప్రయు॑తీ దేవ॒హేడ॑నం । అరా॑వా॒ యో నో॑ అ॒భి దు॑చ్ఛునా॒యతే॒ తస్మి॒న్ తదేనో॑ వసవో॒ నిధే॑తన॒ స్వాహా᳚ ॥ 1 ॥ ఏకషష్టితమోఽనువాకః । కామోఽకార్షీ᳚న్నమో॒ నమః । కామోఽకార్షీత్కామః కరోతి నాహం కరోమి కామః కర్తా నాహం కర్తా కామ॑: కార॒యితా నాహం॑ కార॒యితా ఏష తే కామ కామా॑య స్వా॒హా ॥ 1 ॥ ద్విషష్టితమోఽనువాకః । మన్యురకార్షీ᳚న్నమో॒ నమః । మన్యురకార్షీన్మన్యుః కరోతి నాహం కరోమి మన్యుః కర్తా నాహం కర్తా మన్యు॑: కార॒యితా నాహం॑ కార॒యితా ఏష తే మన్యో మన్య॑వే స్వా॒హా ॥ 1 ॥ త్రిషష్టితమోఽనువాకః । తిలాంజుహోమి సరసాన్ సపిష్టాన్ గంధార మమ చిత్తే రమం॑తు స్వా॒హా ॥ 1 ॥ గావో హిరణ్యం ధనమన్నపానగ్ం సర్వేషాగ్ం శ్రి॑యై స్వా॒హా ॥ 2 ॥ శ్రియం చ లక్ష్మిం చ పుష్టిం చ కీర్తిం॑ చానృ॒ణ్యతాం । బ్రాహ్మణ్యం బ॑హుపు॒త్రతాం । శ్రద్ధామేధే ప్రజాః సందదా॑తు స్వా॒హా ॥ 3 ॥ చతుఃషష్టితమోఽనువాకః । తిలాః కృష్ణాస్తి॑లాః శ్వే॒తా॒స్తిలాః సౌమ్యా వ॑శాను॒గాః । తిలాః పునంతు॑ మే పా॒పం॒ యత్కించిద్ దురితం మ॑యి స్వా॒హా ॥ 1 ॥ చోర॒స్యాన్నం న॑వశ్రా॒ద్ధం॒ బ్ర॒హ్మ॒హా గు॑రుత॒ల్పగః । గోస్తేయగ్ం సు॑రాపా॒నం॒ భ్రూణహత్యా తిలా శాంతిగ్ం శమయం॑తు స్వా॒హా ॥ 2 ॥ శ్రీశ్చ లక్ష్మీశ్చ పుష్టీశ్చ కీర్తిం॑ చానృ॒ణ్యతాం । బ్రహ్మణ్యం బ॑హుపు॒త్రతాం । శ్రద్ధామేధే ప్రజ్ఞా తు జాతవేదః సందదా॑తు స్వా॒హా ॥ 3 ॥ పంచషష్టితమోఽనువాకః । ప్రాణాపానవ్యానోదానసమానా మే॑ శుధ్యం॒తాం॒ జ్యోతి॑ర॒హం వి॒రజా॑ విపా॒ప్మా భూ॑యాస॒గ్ం స్వాహా᳚ ॥ 1 ॥ వాఙ్మనశ్చక్షుఃశ్రోత్రజిహ్వాఘ్రాణరేతోబుద్ధ్యాకూతిఃసంకల్పా మే॑ శుధ్యం॒తాం॒ జ్యోతి॑ర॒హం వి॒రజా॑ విపా॒ప్మా భూ॑యాస॒గ్ం స్వాహా᳚ ॥ 2 ॥ త్వక్చర్మమాంసరుధిరమేదోమజ్జాస్నాయవోఽస్థీని మే॑ శుధ్యం॒తాం॒ జ్యోతి॑ర॒హం వి॒రజా॑ విపా॒ప్మా భూ॑యాస॒గ్ం స్వాహా᳚ ॥ 3 ॥ శిరఃపాణిపాదపార్శ్వపృష్ఠోరూధరజంఘాశిశ్నోపస్థపాయవో మే॑ శుధ్యం॒తాం॒ జ్యోతి॑ర॒హం వి॒రజా॑ విపా॒ప్మా భూ॑యాస॒గ్ం స్వాహా᳚ ॥ 4 ॥ ఉత్తిష్ఠ పురుష హరిత పింగల లోహితాక్షి దేహి దేహి దదాపయితా మే॑ శుధ్యం॒తాం॒ జ్యోతి॑ర॒హం వి॒రజా॑ విపా॒ప్మా భూ॑యాస॒గ్ం స్వాహా᳚ ॥ 5 ॥ షట్షష్టితమోఽనువాకః । పృథివ్యప్తేజోవాయురాకాశా మే॑ శుధ్యం॒తాం॒ జ్యోతి॑ర॒హం వి॒రజా॑ విపా॒ప్మా భూ॑యాస॒గ్ం స్వాహా᳚ ॥ 1 ॥ శబ్దస్పర్శరూపరసగంధా మే॑ శుధ్యం॒తాం॒ జ్యోతి॑ర॒హం వి॒రజా॑ విపా॒ప్మా భూ॑యాస॒గ్ం స్వాహా᳚ ॥ 2 ॥ మనోవాక్కాయకర్మాణి మే॑ శుధ్యం॒తాం॒ జ్యోతి॑ర॒హం వి॒రజా॑ విపా॒ప్మా భూ॑యాస॒గ్ం స్వాహా᳚ ॥ 3 ॥ అవ్యక్తభావైర॑హంకా॒రై॒- ర్జ్యోతి॑ర॒హం వి॒రజా॑ విపా॒ప్మా భూ॑యాస॒గ్ం స్వాహా᳚ ॥ 4 ॥ ఆత్మా మే॑ శుధ్యం॒తాం॒ జ్యోతి॑ర॒హం వి॒రజా॑ విపా॒ప్మా భూ॑యాస॒గ్ం స్వాహా᳚ ॥ 5 ॥ అంతరాత్మా మే॑ శుధ్యం॒తాం॒ జ్యోతి॑ర॒హం వి॒రజా॑ విపా॒ప్మా భూ॑యాస॒గ్ం స్వాహా᳚ ॥ 6 ॥ పరమాత్మా మే॑ శుధ్యం॒తాం॒ జ్యోతి॑ర॒హం వి॒రజా॑ విపా॒ప్మా భూ॑యాస॒గ్ం స్వాహా᳚ ॥ 7 ॥ క్షు॒ధే స్వాహా᳚ । క్షుత్పి॑పాసాయ॒ స్వాహా᳚ । వివి॑ట్యై॒ స్వాహా᳚ । ఋగ్వి॑ధానాయ॒ స్వాహా᳚ । క॒షో᳚త్కాయ॒ స్వాహా᳚ । ఓం స్వాహా᳚ ॥ 8 ॥ క్షు॒త్పి॒పా॒సామ॑లాం జ్యే॒ష్ఠా॒మలక్ష్మీర్నాశ॑యా॒మ్యహం । అభూ॑తిమస॑మృద్ధిం॒ చ॒ సర్వాన్ని॑ర్ణుద మే పాప్మా॑నగ్ం స్వా॒హా ॥ 9 ॥ అన్నమయప్రాణమయమనోమయవిజ్ఞానమయమానందమయమాత్మా మే॑ శుధ్యం॒తాం॒ జ్యోతి॑ర॒హం వి॒రజా॑ విపా॒ప్మా భూ॑యాస॒గ్ం స్వాహా᳚ ॥ 10 ॥ సప్తషష్టితమోఽనువాకః । అ॒గ్నయే॒ స్వాహా᳚ । విశ్వే᳚భ్యో దే॒వేభ్య॒: స్వాహా᳚ । ధ్రు॒వాయ॑ భూ॒మాయ॒ స్వాహా᳚ । ధ్రు॒వ॒క్షిత॑యే స్వాహా᳚ । అ॒చ్యు॒త॒క్షిత॑యే॒ స్వాహా᳚ । అ॒గ్నయే᳚ స్విష్ట॒కృతే॒ స్వాహా᳚ ॥ ధర్మా॑య॒ స్వాహా᳚ । అధ॑ర్మాయ॒ స్వాహా᳚ । అ॒ద్భ్యః స్వాహా᳚ । ఓ॒ష॒ధి॒వ॒న॒స్ప॒తిభ్య॒: స్వాహా᳚ । ర॒క్షో॒దే॒వ॒జ॒నేభ్య॒: స్వాహా᳚ । గృహ్యాభ్య॒: స్వాహా᳚ । అ॒వ॒సానే᳚భ్య॒: స్వాహా᳚ । అ॒వ॒సాన॑పతిభ్య॒: స్వాహా᳚ । స॒ర్వ॒భూ॒తేభ్య॒: స్వాహా᳚ । కామా॑య॒ స్వాహా᳚ । అం॒తరి॑క్షాయ॒ స్వాహా᳚ । యదేజ॑తి॒ జగ॑తి॒ యచ్చ॒ చేష్ట॑తి॒ నామ్నో॑ భా॒గోఽయం నామ్నే॒ స్వాహా᳚ । పృ॒థి॒వ్యై స్వాహా᳚ । అం॒తరి॑క్షాయ॒ స్వాహా᳚ । ది॒వే స్వాహా᳚ । సూర్యా॑య॒ స్వాహా᳚ । చం॒ద్రమ॑సే॒ స్వాహా᳚ । నక్ష॑త్రేభ్య॒: స్వాహా᳚ । ఇంద్రా॑య॒ స్వాహా᳚ । బృహ॒స్పత॑యే॒ స్వాహా᳚ । ప్ర॒జాప॑తయే॒ స్వాహా᳚ । బ్రహ్మ॑ణే॒ స్వాహా᳚ । స్వ॒ధా పి॒తృభ్యః స్వాహా᳚ । నమో॑ రు॒ద్రాయ॑ పశుపత॑యే॒ స్వాహా᳚ । దే॒వేభ్య॒: స్వాహా᳚ । పి॒తృభ్య॑: స్వ॒ధాస్తు॑ । భూ॒తేభ్యో॒ నమ॑: । మ॒ను॒ష్యే᳚భ్యో॒ హంతా᳚ । ప్ర॒జాప॑తయే॒ స్వాహా᳚ । పరమేష్ఠినే॒ స్వాహా᳚ ॥ 1 ॥ యథా కూ॑పః శ॒తధా॑రః స॒హస్ర॑ధారో॒ అక్షి॑తః । ఏ॒వా మే॑ అస్తు ధా॒న్యగ్ం స॒హస్ర॑ధార॒మక్షి॑తం ॥ ధన॑ధాన్యై॒ స్వాహా᳚ ॥ 2 ॥ యే భూ॒తాః ప్ర॒చరం॑తి॒ దివా॒నక్తం॒ బలి॑మి॒చ్ఛంతో॑ వి॒తుద॑స్య॒ ప్రేష్యా᳚: । తేభ్యో॑ బ॒లిం పు॑ష్టి॒కామో॑ హరామి॒ మయి॒ పుష్టిం॒ పుష్టి॑పతిర్దధాతు॒ స్వాహా᳚ ॥ 3 ॥ అష్టషష్టితమోఽనువాకః । ఓం᳚ తద్బ్ర॒హ్మ ఓం᳚ తద్వా॒యుః ఓం᳚ తదా॒త్మా ఓం᳚ తత్స॒త్యం ఓం᳚ తత్సర్వం᳚ ఓం᳚ తత్పురో॒ర్నమ॑: ॥ 1 ఓం అంతశ్చరతి॑ భూతే॒షు॒ గు॒హాయాం వి॑శ్వమూ॒ర్తిషు । త్వం యజ్ఞస్త్వం వషట్కారస్త్వమింద్రస్త్వగ్ం రుద్రస్త్వం విష్ణుస్త్వం బ్రహ్మ త్వం॑ ప్రజా॒పతిః । త్వం త॑దాప॒ ఆపో॒ జ్యోతీ॒ రసో॒ఽమృతం॒ బ్రహ్మ॒ భూర్భువ॒స్సువ॒రోం ॥ 2 ఏకోనసప్తతితమోఽనువాకః । శ్ర॒ద్ధాయాం᳚ ప్రా॒ణే నివి॑ష్టో॒ఽమృతం॑ జుహోమి । శ్రద్ధాయా॑మపా॒నే నివి॑ష్టో॒ఽమృతం॑ జుహోమి । శ్ర॒ద్ధాయాం᳚ వ్యా॒నే నివి॑ష్టో॒ఽమృతం॑ జుహోమి । శ్ర॒ద్ధాయా॑ముదా॒నే నివి॑ష్టో॒ఽమృతం॑ జుహోమి । శ్ర॒ద్ధాయా॑గ్ం సమా॒నే నివి॑ష్టో॒ఽమృతం॑ జుహోమి । బ్రహ్మ॑ణి మ ఆ॒త్మామృ॑త॒త్వాయ॑ ॥ 1 ॥ అ॒మృ॒తో॒ప॒స్తర॑ణమసి ॥ 2 ॥ శ్ర॒ద్ధాయాం᳚ ప్రా॒ణే నివి॑ష్టో॒ఽమృతం॑ జుహోమి । శి॒వో మా॑ వి॒శాప్ర॑దాహాయ । ప్రా॒ణాయ॒ స్వాహా᳚ ॥ శ్ర॒ద్ధాయా॑మపా॒నే నివి॑ష్టో॒ఽమృతం॑ జుహోమి । శి॒వో మా॑ వి॒శాప్ర॑దాహాయ । అ॒పా॒నాయ॒ స్వాహా᳚ ॥ శ్ర॒ద్ధాయాం᳚ వ్యా॒నే నివి॑ష్టో॒ఽమృతం॑ జుహోమి । శి॒వో మా॑ వి॒శాప్ర॑దాహాయ । వ్యా॒నాయ॒ స్వాహా᳚ ॥ శ్ర॒ద్ధా॑యాముదా॒నే నివి॑ష్టో॒ఽమృతం॑ జుహోమి । శి॒వో మా॑ వి॒శాప్ర॑దాహాయ । ఉ॒దా॒నాయ॒ స్వాహా᳚ ॥ శ్ర॒ద్ధాయా॑గ్ం సమా॒నే నివి॑ష్టో॒ఽమృతం॑ జుహోమి । శి॒వో మా॑ వి॒శాప్ర॑దాహాయ । స॒మా॒నాయ॒ స్వాహా᳚ ॥ బ్రహ్మ॑ణి మ ఆ॒త్మామృ॑త॒త్వాయ॑ ॥ 3 ॥ అ॒మృ॒తా॒పి॒ధా॒నమ॑సి ॥ 4 ॥ సప్తతితమోఽనువాకః । శ్ర॒ద్ధాయాం᳚ ప్రా॒ణే నివి॑శ్యా॒మృత॑గ్ం హు॒తం । ప్రా॒ణమన్నే॑నాప్యాయస్వ ॥ శ్ర॒ద్ధాయా॑మపా॒నే నివి॑శ్యా॒మృత॑గ్ం హు॒తం । అ॒పా॒నమన్నే॑నాప్యాయస్వ ॥ శ్ర॒ద్ధాయాం᳚ వ్యా॒నే నివి॑శ్యా॒మృత॑గ్ం హు॒తం । వ్యా॒నమన్నే॑నాప్యాయస్వ ॥ శ్ర॒ద్ధాయా॑ముదా॒నే నివి॑శ్యా॒మృత॑గ్ం హు॒తం । ఉ॒దా॒నమన్నే॑నాప్యాయస్వ ॥ శ్ర॒ద్ధాయా॑గ్ం సమా॒నే నివి॑శ్యా॒మృత॑గ్ం హు॒తం । స॒మా॒నమన్నే॑నాప్యాయస్వ ॥ ఏకసప్తతితమోఽనువాకః । అంగుష్ఠమాత్రః పురుషోఽఙ్గుష్ఠం చ॑ సమా॒శ్రితః । ఈశః సర్వస్య జగతః ప్రభుః ప్రీణాతు॑ విశ్వ॒భుక్ ॥ 1 ॥ ద్విసప్తతితమోఽనువాకః । వాఙ్ మ॑ ఆ॒సన్ । న॒సోః ప్రా॒ణః । అ॒క్ష్యోశ్చక్షు॑: । కర్ణ॑యో॒: శ్రోత్రం᳚ । బా॒హు॒వోర్బలం᳚ । ఉ॒రు॒వోరోజ᳚: । అరి॑ష్టా॒ విశ్వా॒న్యంగా॑ని త॒నూః । త॒నువా॑ మే స॒హ నమ॑స్తే అస్తు॒ మా మా॑ హిగ్ంసీః ॥ 1 ॥ త్రిసప్తతితమోఽనువాకః । వయ॑: సుప॒ర్ణా ఉప॑సేదు॒రింద్రం॑ ప్రి॒యమే॑ధా॒ ఋష॑యో॒ నాధ॑మానాః । అప॑ ధ్వాం॒తమూ॑ర్ణు॒హి పూ॒ర్ధి చక్షు॑ర్ముము॒గ్ధ్య॑స్మాన్ని॒ధయే॑వ బ॒ద్ధాన్ ॥ 1 ॥ చతుఃసప్తతితమోఽనువాకః । ప్రాణానాం గ్రంథిరసి రుద్రో మా॑ విశాం॒తకః । తేనాన్నేనా᳚ప్యాయస్వ ॥ 1 ॥ పంచసప్తతితమోఽనువాకః । నమో రుద్రాయ విష్ణవే మృత్యు॑ర్మే పా॒హి ॥ 1 ॥ షట్సప్తతితమోఽనువాకః । త్వమగ్నే ద్యుభి॒స్త్వమా॑శుశుక్షణి॒స్త్వమ॒ద్భ్యస్త్వమశ్మ॑న॒స్పరి॑ । త్వం వనే᳚భ్య॒స్త్వమోష॑ధీభ్య॒స్త్వం నృ॒ణాం నృ॑పతే జాయసే॒ శుచి॑: ॥ 1 ॥ సప్తసప్తతితమోఽనువాకః । శి॒వేన॑ మే॒ సంతి॑ష్ఠస్వ స్యో॒నేన॑ మే॒ సంతి॑ష్ఠస్వ సుభూ॒తేన॑ మే॒ సంతి॑ష్ఠస్వ బ్రహ్మవర్చ॒సేన॑ మే॒ సంతి॑ష్ఠస్వ య॒జ్ఞస్యర్ద్ధి॒మను॒సంతి॑ష్ఠ॒స్వోప॑ తే యజ్ఞ॒ నమ॒ ఉప॑ తే॒ నమ॒ ఉప॑ తే॒ నమ॑: ॥ 1 ॥ అష్టసప్తతితమోఽనువాకః । స॒త్యం పరం॒ పరగ్ం॑ స॒త్యగ్ం స॒త్యేన॒ న సు॑వ॒ర్గాల్లో॒కాచ్చ్య॑వంతే క॒దాచ॒న స॒తాగ్ం హి స॒త్యం తస్మా᳚త్స॒త్యే ర॑మంతే ॥ 1 ॥ తప॒ ఇతి॒ తపో॒ నానశ॑నా॒త్పరం॒ యద్ధి॒ పరం తప॒స్తద్॑ దుర్ధర్షం తద్ దురా॑ధష॒ తస్మా॒త్తప॑సి రమంతే॒ ॥ 2 ॥ దమ॒ ఇతి॒ నియ॑తం బ్రహ్మచా॒రిణ॒స్తస్మా॒ద్దమే॑ రమంతే॒ ॥ 3 ॥ శమ॒ ఇత్యర॑ణ్యే ము॒నయ॒స్తమా॒చ్ఛమే॑ రమంతే ॥ 4 ॥ దా॒నమితి॒ సర్వా॑ణి భూ॒తాని॑ ప్రశగ్ంసం॑తి దా॒నాన్నాతి॑దు॒ష్కరం॒ తస్మా᳚ద్దా॒నే ర॑మంతే ॥ 5 ॥ ధ॒ర్మ ఇతి॒ ధర్మే॑ణ సర్వ॑మి॒దం పరిగృ॑హీతం ధ॒ర్మాన్నాతి॑దుశ్చరం॒ తస్మా᳚ద్ధ॒ర్మే ర॑మంతే ॥ 6 ॥ ప్ర॒జన॒ ఇతి॒ భూయా॑గ్ంస॒స్తస్మా॒త్ భూయి॑ష్ఠాః ప్రజా॑యంతే॒ తస్మా॒త్ భూయి॑ష్ఠాః ప్ర॒జన॑నే రమంతే॒ ॥ 7 ॥ అగ్నయ॒ ఇత్యా॑హ॒ తస్మా॑ద॒గ్నయ॒ ఆధా॑తవ్యాః ॥ 8 ॥ అగ్నిహో॒త్రమిత్యా॑హ॒ తస్మా॑దగ్నిహో॒త్రే ర॑మంతే ॥ 9 ॥ య॒జ్ఞ ఇతి॑ య॒జ్ఞేన॒ హి దే॒వా దివం॑ గ॒తాస్తస్మా᳚ద్య॒జ్ఞే ర॑మంతే ॥ 10 ॥ మాన॒సమితి॑ వి॒ద్వాగ్ంస॒స్తస్మా᳚ద్వి॒ద్వాగ్ంస॑ ఏ॒వ మా॑న॒సే ర॑మంతే ॥ 11 ॥ న్యా॒స ఇతి॑ బ్ర॒హ్మా బ్ర॒హ్మా హి పర॒: పరో॑ హి బ్ర॒హ్మా తాని॒ వా ఏ॒తాన్యవ॑రాణి॒ తపాగ్ంసి న్యా॒స ఏ॒వాత్య॑రేచయ॒త్ య ఏ॒వం వేదే᳚త్యుప॒నిష॑త్ ॥ 12 ॥ ఏకోనాశీతితమోఽనువాకః । ప్రా॒జా॒ప॒త్యో హారు॑ణిః సుప॒ర్ణేయ॑: ప్ర॒జాప॑తిం పి॒తర॒ముప॑ససార॒ కిం భ॑గవం॒తః ప॑ర॒మం వ॑దం॒తీతి॒ తస్మై॒ ప్రో॑వాచ ॥ 1 ॥ స॒త్యేన॑ వా॒యురావా॑తి స॒త్యేనా॑ది॒త్యో రో॑చతే ది॒వి స॒త్యం వా॒చః ప్ర॑తి॒ష్ఠా స॒త్యే స॒ర్వం ప్రతి॑ష్ఠితం॒ తస్మా᳚త్స॒త్యం ప॑రమం॒ వదం॑తి॒ ॥ 2 ॥ తప॑సా దే॒వా దే॒వతా॒మగ్ర॑ ఆయ॒న్ తప॒సార్ష॑య॒: సువ॒రన్వ॑వింద॒న్ తప॑సా స॒పత్నా॒న్ప్రణు॑దా॒మారాతీ॒స్తప॑సి స॒ర్వం ప్రతి॑ష్ఠితం॒ తస్మా॒త్తప॑: పర॒మం వదం॑తి॒ ॥ 3 ॥ దమే॑న దాం॒తాః కి॒ల్బిష॑మవధూ॒న్వంతి॒ దమే॑న బ్రహ్మచా॒రిణ॒: సువ॑రగచ్ఛ॒న్ దమో॑ భూ॒తానాం᳚ దురా॒ధర్షం॒ దమే॑ స॒ర్వం ప్రతి॑ష్ఠితం॒ తస్మా॒ద్దమ॑: ప॒రమం వదం॑తి॒ ॥ 4 ॥ శమే॑న శాం॒తాః శి॒వమా॒చరం॑తి॒ శమే॑న నా॒కం ము॒నయో॒ఽన్వవిం॑ద॒న్ శమో॑ భూ॒తానాం᳚ దురా॒ధర్షం॒ శమే॑ స॒ర్వం ప్రతి॑ష్ఠితం తస్మా॒చ్ఛమ॑: పర॒మం వదం॑తి ॥ 5 ॥ దా॒నం య॒జ్ఞానాం॒ వరూ॑థం॒ దక్షి॑ణా లో॒కే దా॒తారగ్ం॑ సర్వభూ॒తాన్యు॑పజీ॒వంతి॑ దా॒నేనారా॑తీ॒రపా॑నుదంత దా॒నేన॑ ద్విషం॒తో మి॒త్రా భ॑వంతి దా॒నే స॒ర్వం ప్రతి॑ష్ఠితం॒ తస్మా᳚ద్దా॒నం ప॑ర॒మం వదం॑తి ॥ 6 ॥ ధ॒ర్మో విశ్వ॑స్య॒ జగ॑తః ప్రతి॒ష్ఠా లో॒కే ధ॒ర్మిష్ఠ ప్ర॒జా ఉ॑పస॒ర్పంతి॑ ధ॒ర్మేణ॑ పా॒పమ॑ప॒నుద॑తి ధ॒ర్మే స॒ర్వం ప్రతి॑ష్ఠితం॒ తస్మా᳚ద్ధ॒ర్మం ప॑ర॒మం వదం॑తి ॥ 7 ॥ ప్ర॒జన॑నం॒ వై ప్ర॑తి॒ష్ఠా లో॒కే సా॒ధు ప్ర॒జాయా᳚స్తం॒తుం త॑న్వా॒నః పి॑తృ॒ణామ॑ను॒ణో భవ॑తి॒ తదే॑వ త॒స్యానృ॑ణం॒ తస్మా᳚త్ ప్ర॒జన॑నం పర॒మం వదం॑తి ॥ 8 ॥ అ॒గ్నయో॒ వై త్రయీ॑ వి॒ద్యా దే॑వ॒యాన॒: పంథా॑ గార్హప॒త్య ఋక్ పృ॑థి॒వీ ర॑థంత॒రమ॑న్వాహార్య॒పచ॑న॒: యజు॑రం॒తరి॑క్షం వామదే॒వ్యమా॑హవ॒నీయ॒: సామ॑ సువ॒ర్గో లో॒కో బృ॒హత్తస్మా॑ద॒గ్నీన్ ప॑ర॒మం వదం॑తి ॥ 9 ॥ అగ్నిహో॒త్రగ్ం సా॑యం ప్రా॒తర్గృ॒హాణాం॒ నిష్కృ॑తి॒: స్వి॑ష్టగ్ం సుహు॒తం య॑జ్ఞక్రతూ॒నాం ప్రాయ॑ణగ్ం సువ॒ర్గస్య॑ లో॒కస్య॒ జ్యోతి॒స్తస్మా॑దగ్నిహో॒త్రం ప॑ర॒మం వదం॑తి ॥ 10 ॥ య॒జ్ఞ ఇతి॑ య॒జ్ఞో హి దే॒వానాం᳚ య॒జ్ఞేన॒ హి దే॒వా దివం॑ గ॒తా య॒జ్ఞేనాసు॑రా॒నపా॑నుదంత య॒జ్ఞేన॑ ద్విషం॒తో మి॒త్రా భ॑వంతి య॒జ్ఞే స॒ర్వం ప్ర॑తిష్ఠితం॒ తస్మా᳚ద్య॒జ్ఞం ప॑ర॒మం వదం॑తి ॥ 11 ॥ మాన॒సం వై ప్రా॑జాప॒త్యం ప॒విత్రం॑ మాన॒సేన॒ మన॑సా సా॒ధు ప॑శ్యతి మన॒సా ఋష॑యః ప్ర॒జా అ॑సృజంత మాన॒సే స॒ర్వం ప్రతి॑ష్ఠితం॒ తస్మా᳚న్మాన॒సం ప॑ర॒మం వదం॑తి ॥ 12 ॥ న్యా॒స ఇ॒త్యాహు॑ర్మనీ॒షిణో॑ బ్ర॒హ్మాణం॑ బ్ర॒హ్మా విశ్వ॑: కత॒మః స్వ॑యంభూః ప్ర॒జాప॑తిః సంవత్స॒ర ఇతి॑ ॥ 13 ॥ సంవత్స॒రోఽసావా॑ది॒త్యో య ఏ॒ష ఆ॑ది॒త్యే పురు॑ష॒: స ప॑రమే॒ష్ఠీ బ్రహ్మా॒త్మా ॥ 14 ॥ యాభి॑రాది॒త్యస్తప॑తి ర॒శ్మిభి॒స్తాభి॑: ప॒ర్జన్యో॑ వర్షతి ప॒ర్జన్యే॑నౌషధివనస్ప॒తయ॒: ప్రజా॑యంత ఓషధివనస్ప॒తిభి॒రన్నం॑ భవ॒త్యన్నే॑న ప్రా॒ణాః ప్రా॒ణైర్బలం॒ బలే॑న॒ తప॒స్తప॑సా శ్ర॒ద్ధా శ్ర॒ద్ధయా॑ మే॒ధా మే॒ధయా॑ మనీ॒షా మ॑నీ॒షయా॒ మనో॒ మన॑సా॒ శాంతి॒: శాంత్యా॑ చి॒త్తం చి॒త్తేన॒ స్మృతి॒: స్మృత్యా॒ స్మార॒గ్ం స్మారే॑ణ వి॒జ్ఞానం॑ వి॒జ్ఞానే॑నా॒త్మానం॑ వేదయతి॒ తస్మా॑ద॒న్నం దద॒న్సర్వా᳚ణ్యే॒తాని॑ దదా॒త్యన్నా᳚త్ప్రా॒ణా భ॑వంతి భూ॒తా॑నాం ప్రా॒ణైర్మనో॒ మన॑సశ్చ వి॒జ్ఞానం॑ వి॒జ్ఞానా॑దానం॒దో బ్ర॑హ్మ యో॒నిః ॥ 15 ॥ స వా ఏ॒ష పురు॑షః పంచ॒ధా పం॑చా॒త్మా యేన॒ సర్వ॑మి॒దం ప్రోతం॑ పృథి॒వీ చాం॒తరి॑క్షం చ॒ ద్యౌ॑శ్చ॒ దిశ॑శ్చావాంతరది॒శాశ్చ॒ స వై సర్వ॑మి॒దం జగ॒త్స స॒భూతగ్ం॑ స భ॒వ్యం జి॑జ్ఞాసక్లృ॒ప్త ఋ॑త॒జా రయిష్ఠా॑: శ్ర॒ద్ధా స॒త్యో పహ॑స్వాంత॒మసో॒పరి॑ష్టా॒త్ । జ్ఞాత్వా॑ తమే॒వం మన॑సా హృ॒దా చ॒ భూయో॑ న మృ॒త్యుముప॑యాహి వి॒ద్వాన్ । తస్మా᳚న్న్యా॒సమే॒షాం తప॑సామతిరిక్త॒మాహు॑: ॥ 16 ॥ వసుర॒ణ్వో॑ వి॒భూర॑సి ప్రా॒ణే త్వమసి॑ సంధా॒తా బ్రహ్మ॑న్ త్వమసి॑ విశ్వ॒సృత్తే॑జో॒దాస్త్వమ॑స్య॒గ్నేర॑సి వర్చో॒దాస్త్వమ॑సి॒ సూర్య॑స్య ద్యుమ్నో॒దాస్త్వమ॑సి చం॒ద్రమ॑స ఉపయా॒మగృ॑హీతోఽసి బ్ర॒హ్మణే᳚ త్వా॒ మహసే॒ ॥ 17 ॥ ఓమిత్యా॒త్మానం॑ యుంజీత । ఏతద్వై మ॑హోప॒నిష॑దం దే॒వానాం॒ గుహ్యం॒ । య ఏ॒వం వేద॑ బ్ర॒హ్మణో॑ మహి॒మాన॑మాప్నోతి॒ తస్మా᳚ద్బ్రహ్మణో॑ మహి॒మాన॑మిత్యుప॒నిషత్ ॥ 18 ॥ అశీతితమోఽనువాకః । తస్యై॒వం వి॒దుషో॑ య॒జ్ఞస్యా॒త్మా యజ॑మానః శ్ర॒ద్ధా పత్నీ॒ శరీ॑రమి॒ధ్మమురో॒ వేది॒ర్లోమా॑ని బ॒ర్హిర్వే॒ద॒: శిఖా॒ హృద॑యం॒ యూప॒: కామ ఆజ్యం॑ మ॒న్యుః ప॒శుస్తపో॒ఽగ్నిర్దమ॑: శమయి॒తా దానం దక్షి॑ణా॒ వాగ్ఘోతా᳚ ప్రా॒ణ ఉ॑ద్గా॒తా చక్షు॑రధ్వ॒ర్యుర్మనో॒ బ్రహ్మా॒ శ్రోత్ర॑మ॒గ్నీత్ యావ॒ద్ధ్రియ॑తే॒ సా దీ॒క్షా యదశ్నా॑తి॒ తద్ధవి॒ర్యత్పిబ॑తి॒ తద॑స్య సోమపా॒నం యద్రమ॑తే॒ తదు॑ప॒సదో॒ యత్సం॒చర॑త్యుప॒విశ॑త్యు॒త్తిష్ఠ॑తే చ॒ స ప్ర॑వ॒ర్గ్యో॑ యన్ముఖం॒ తదా॑హవ॒నీయో॒ యా వ్యాహృ॑తిరహు॒తిర్యద॑స్య వి॒జ్ఞానం॒ తజ్జు॒హోతి॒ యత్సా॒యం ప్రా॒తర॑త్తి॒ తత్స॒మిధం॒ యత్ప్రా॒తర్మ॒ధ్యంది॑నగ్ం సా॒యం చ॒ తాని॒ సవ॑నాని॒ యే అ॑హోరా॒త్రే తే ద॑ర్శపూర్ణమా॒సౌ యే᳚ఽర్ధమా॒సాశ్చ॒ మాసా᳚శ్చ॒ తే చా॑తుర్మా॒స్యాని॒ య ఋ॒తవ॒స్తే ప॑శుబం॒ధా యే సం॑వత్స॒రాశ్చ॒ పరివత్స॒రాశ్చ॒ తేఽహ॑ర్గ॒ణాః స॑ర్వవేద॒సం వా ఏ॒తత్స॒త్రం యన్మర॑ణం॒ తద॑వ॒భృథ॑ ఏ॒తద్వై జ॑రామర్యమగ్నిహో॒త్రగ్ంస॒త్రం య ఏ॒వం వి॒ద్వాను॑ద॒గయ॑నే ప్ర॒మీయ॑తే దే॒వానా॑మే॒వ మ॑హి॒మానం॑ గ॒త్వాది॒త్యస్య॒ సాయు॑జ్యం గచ్ఛ॒త్యథ॒ యో ద॑క్షి॒ణే ప్ర॒మీయ॑తే పితృ॒ణామే॒వ మ॑హి॒మానం॑ గ॒త్వా చం॒ద్రమ॑స॒: సాయు॑జ్యం గచ్ఛత్యే॒తౌ వై సూ᳚ర్యాచంద్ర॒మసో᳚ర్మహి॒మానౌ᳚ బ్రాహ్మ॒ణో వి॒ద్వాన॒భిజ॑యతి॒ తస్మా᳚ద్ బ్రహ్మణో॑ మహి॒మాన॑మాప్నోతి॒ తస్మా᳚ద్ బ్ర॒హ్మణో॑ మహి॒మాన॑మిత్యుప॒నిష॑త్ ॥ 1 ॥ ఓం శం నో॑ మి॒త్రః శం వరు॑ణః । శం నో॑ భవత్యర్య॒మా । శం న॒ ఇంద్రో॒ బృహ॒స్పతి॑: । శం నో॒ విష్ణు॑రురుక్ర॒మః । నమో॒ బ్రహ్మ॑ణే । నమ॑స్తే వాయో । త్వమే॒వ ప్ర॒త్యక్షం॒ బ్రహ్మా॑సి । త్వామే॒వ ప్ర॒త్యక్షం॒ బ్రహ్మావా॑దిషం । ఋ॒తమ॑వాదిషం । స॒త్యమ॑వాదిషం । తన్మామా॑వీత్ । తద్వ॒క్తార॑మావీత్ । ఆవీ॒న్మాం । ఆవీ॑ద్వ॒క్తారం᳚ ॥ ఓం స॒హ నా॑వవతు । స॒హ నౌ॑ భునక్తు । స॒హ వీ॒ర్యం॑ కరవావహై । తే॒జ॒స్వి నా॒వధీ॑తమస్తు॒ । మా వి॑ద్విషా॒వహై᳚ । ఓం శాంతి॒: శాంతి॒: శాంతి॑: ॥ ఇతి మహానారాయణోపనిషత్ ॥