யத்ராஸம்பி⁴ந்நதாம் யாதி ஸ்வாதிரிக்தபி⁴தா³ததி꞉ । ஸம்விந்மாத்ரம் பரம் ப்³ரஹ்ம தத்ஸ்வமாத்ரம் விஜ்ரும்ப⁴தே ॥ ஓம் ஸஹ நாவவது । ஸஹ நௌ பு⁴நக்து । ஸஹ வீர்யம் கரவாவஹை । தேஜஸ்வி நாவதீ⁴தமஸ்து மா வித்³விஷாவஹை । ஓம் ஶாந்தி꞉ ஶாந்தி꞉ ஶாந்தி꞉ ॥ அச்யுதோ(அ)ஸ்மி மஹாதே³வ தவ காருண்யலேஶத꞉ । விஜ்ஞாநக⁴ந ஏவாஸ்மி ஶிவோ(அ)ஸ்மி கிமத꞉ பரம் ॥ 1 ॥ ந நிஜம் நிஜவத்³பா⁴த்யந்த꞉கரணஜ்ரும்ப⁴ணாத் । அந்த꞉கரணநாஶேந ஸம்விந்மாத்ரஸ்தி²தோ ஹரி꞉ ॥ 2 ॥ ஸம்விந்மாத்ரஸ்தி²தஶ்சாஹமஜோ(அ)ஸ்மி கிமத꞉ பரம் । வ்யதிரிக்தம் ஜட³ம் ஸர்வம் ஸ்வப்நவச்ச விநஶ்யதி ॥ 3 ॥ சிஜ்ஜடா³நாம் து யோ த்³ரஷ்டா ஸோ(அ)ச்யுதோ ஜ்ஞாநவிக்³ரஹ꞉ । ஸ ஏவ ஹி மஹாதே³வ꞉ ஸ ஏவ ஹி மஹாஹரி꞉ ॥ 4 ॥ ஸ ஏவ ஹி ஜ்யோதிஷாம் ஜ்யோதி꞉ ஸ ஏவ பரமேஶ்வர꞉ । ஸ ஏவ ஹி பரம் ப்³ரஹ்ம தத்³ப்³ரஹ்மாஹம் ந ஸம்ஶய꞉ ॥ 5 ॥ ஜீவ꞉ ஶிவ꞉ ஶிவோ ஜீவ꞉ ஸ ஜீவ꞉ கேவல꞉ ஶிவ꞉ । துஷேண ப³த்³தோ⁴ வ்ரீஹி꞉ ஸ்யாத்துஷாபா⁴வேந தண்டு³ல꞉ ॥ 6 ॥ ஏவம் ப³த்³த⁴ஸ்ததா² ஜீவ꞉ கர்மநாஶே ஸதா³ஶிவ꞉ । பாஶப³த்³த⁴ஸ்ததா² ஜீவ꞉ பாஶமுக்த꞉ ஸதா³ஶிவ꞉ ॥ 7 ॥ ஶிவாய விஷ்ணுரூபாய ஶிவரூபாய விஷ்ணவே । ஶிவஸ்ய ஹ்ருத³யம் விஷ்ணுர்விஷ்ணோஶ்ச ஹ்ருத³யம் ஶிவ꞉ ॥ 8 ॥ யதா² ஶிவமயோ விஷ்ணுரேவம் விஷ்ணுமய꞉ ஶிவ꞉ । யதா²ந்தரம் ந பஶ்யாமி ததா² மே ஸ்வஸ்திராயுஷி ॥ 9 ॥ யதா²ந்தரம் ந பே⁴தா³꞉ ஸ்யு꞉ ஶிவகேஶவயோஸ்ததா² । தே³ஹோ தே³வாலய꞉ ப்ரோக்த꞉ ஸ ஜீவ꞉ கேவல꞉ ஶிவ꞉ । த்யஜேத³ஜ்ஞாநநிர்மால்யம் ஸோ(அ)ஹம்பா⁴வேந பூஜயேத் ॥ 10 ॥ அபே⁴த³த³ர்ஶநம் ஜ்ஞாநம் த்⁴யாநம் நிர்விஷயம் மந꞉ । ஸ்நாநம் மநோமலத்யாக³꞉ ஶௌசமிந்த்³ரியநிக்³ரஹ꞉ ॥ 11 ॥ ப்³ரஹ்மாம்ருதம் பிபே³த்³பை⁴க்ஷ்யமாசரேத்³தே³ஹரக்ஷணே । வஸேதே³காந்திகோ பூ⁴த்வா சைகாந்தே த்³வைதவர்ஜிதே ॥ 12 ॥ இத்யேவமாசரேத்³தீ⁴மாந்ஸ ஏவம் முக்திமாப்நுயாத் । ஶ்ரீபரமதா⁴ம்நே ஸ்வஸ்தி சிராயுஷ்யோந்நம இதி ॥ 13 ॥ விரிஞ்சிநாராயணஶங்கராத்மகம் ந்ருஸிம்ஹ தே³வேஶ தவ ப்ரஸாத³த꞉ । அசிந்த்யமவ்யக்தமநந்தமவ்யயம் வேதா³த்மகம் ப்³ரஹ்ம நிஜம் விஜாநதே ॥ 14 ॥ தத்³விஷ்ணோ꞉ பரமம் பத³ம் ஸதா³ பஶ்யந்தி ஸூரய꞉ । தி³வீவ சக்ஷுராததம் । தத்³விப்ராஸோ விபந்யவோ ஜாக்³ருவாம்ஸ꞉ ஸமிந்த⁴தே । விஷ்ணோர்யத்பரமம் பத³ம் । இத்யேதந்நிர்வாணாநுஶாஸநமிதி வேதா³நுஶாஸநமிதி வேதா³நுஶாஸநமித்யுபநிஷத் ॥ 15 ॥ ஓம் ஸஹ நாவவது । ஸஹ நௌ பு⁴நக்து । ஸஹ வீர்யம் கரவாவஹை । தேஜஸ்வி நாவதீ⁴தமஸ்து மா வித்³விஷாவஹை । ஓம் ஶாந்தி꞉ ஶாந்தி꞉ ஶாந்தி꞉ ॥ இதி ஸ்கந்தோ³பநிஷத்ஸமாப்தா ।