हैंహైHaindavamஹிહિં
📍
Font Size:
സ്കന്ദോപനിഷത്ത്
യത്രാസമ്ഭിന്നതാം യാതി സ്വാതിരിക്തഭിദാതതിഃ ।
സംവിന്മാത്രം പരം ബ്രഹ്മ തത്സ്വമാത്രം വിജൃമ്ഭതേ ॥
ഓം സഹ നാവവതു । സഹ നൗ ഭുനക്തു । സഹ വീര്യം കരവാവഹൈ ।
തേജസ്വി നാവധീതമസ്തു മാ വിദ്വിഷാവഹൈ । ഓം ശാന്തിഃ ശാന്തിഃ ശാന്തിഃ ॥
അച്യുതോഽസ്മി മഹാദേവ തവ കാരുണ്യലേശതഃ ।
വിജ്ഞാനഘന ഏവാസ്മി ശിവോഽസ്മി കിമതഃ പരം ॥ 1 ॥
ന നിജം നിജവദ്ഭാത്യന്തഃകരണജൃമ്ഭണാത് ।
അന്തഃകരണനാശേന സംവിന്മാത്രസ്ഥിതോ ഹരിഃ ॥ 2 ॥
സംവിന്മാത്രസ്ഥിതശ്ചാഹമജോഽസ്മി കിമതഃ പരം ।
വ്യതിരിക്തം ജഡം സർവം സ്വപ്നവച്ച വിനശ്യതി ॥ 3 ॥
ചിജ്ജഡാനാം തു യോ ദ്രഷ്ടാ സോഽച്യുതോ ജ്ഞാനവിഗ്രഹഃ ।
സ ഏവ ഹി മഹാദേവഃ സ ഏവ ഹി മഹാഹരിഃ ॥ 4 ॥
സ ഏവ ഹി ജ്യോതിഷാം ജ്യോതിഃ സ ഏവ പരമേശ്വരഃ ।
സ ഏവ ഹി പരം ബ്രഹ്മ തദ്ബ്രഹ്മാഹം ന സംശയഃ ॥ 5 ॥
ജീവഃ ശിവഃ ശിവോ ജീവഃ സ ജീവഃ കേവലഃ ശിവഃ ।
തുഷേണ ബദ്ധോ വ്രീഹിഃ സ്യാത്തുഷാഭാവേന തണ്ഡുലഃ ॥ 6 ॥
ഏവം ബദ്ധസ്തഥാ ജീവഃ കർമനാശേ സദാശിവഃ ।
പാശബദ്ധസ്തഥാ ജീവഃ പാശമുക്തഃ സദാശിവഃ ॥ 7 ॥
ശിവായ വിഷ്ണുരൂപായ ശിവരൂപായ വിഷ്ണവേ ।
ശിവസ്യ ഹൃദയം വിഷ്ണുര്വിഷ്ണോശ്ച ഹൃദയം ശിവഃ ॥ 8 ॥
യഥാ ശിവമയോ വിഷ്ണുരേവം വിഷ്ണുമയഃ ശിവഃ ।
യഥാന്തരം ന പശ്യാമി തഥാ മേ സ്വസ്തിരായുഷി ॥ 9 ॥
യഥാന്തരം ന ഭേദാഃ സ്യുഃ ശിവകേശവയോസ്തഥാ ।
ദേഹോ ദേവാലയഃ പ്രോക്തഃ സ ജീവഃ കേവലഃ ശിവഃ ।
ത്യജേദജ്ഞാനനിർമാല്യം സോഽഹംഭാവേന പൂജയേത് ॥ 10 ॥
അഭേദദർശനം ജ്ഞാനം ധ്യാനം നിർവിഷയം മനഃ ।
സ്നാനം മനോമലത്യാഗഃ ശൗചമിന്ദ്രിയനിഗ്രഹഃ ॥ 11 ॥
ബ്രഹ്മാമൃതം പിബേദ്ഭൈക്ഷ്യമാചരേദ്ദേഹരക്ഷണേ ।
വസേദേകാന്തികോ ഭൂത്വാ ചൈകാന്തേ ദ്വൈതവർജിതേ ॥ 12 ॥
ഇത്യേവമാചരേദ്ധീമാന്സ ഏവം മുക്തിമാപ്നുയാത് ।
ശ്രീപരമധാമ്നേ സ്വസ്തി ചിരായുഷ്യോന്നമ ഇതി ॥ 13 ॥
വിരിഞ്ചിനാരായണശങ്കരാത്മകം
നൃസിംഹ ദേവേശ തവ പ്രസാദതഃ ।
അചിന്ത്യമവ്യക്തമനന്തമവ്യയം
വേദാത്മകം ബ്രഹ്മ നിജം വിജാനതേ ॥ 14 ॥
തദ്വിഷ്ണോഃ പരമം പദം സദാ പശ്യന്തി സൂരയഃ । ദിവീവ ചക്ഷുരാതതം । തദ്വിപ്രാസോ വിപന്യവോ ജാഗൃവാംസഃ സമിന്ധതേ । വിഷ്ണോര്യത്പരമം പദം । ഇത്യേതന്നിർവാണാനുശാസനമിതി വേദാനുശാസനമിതി വേദാനുശാസനമിത്യുപനിഷത് ॥ 15 ॥
ഓം സഹ നാവവതു । സഹ നൗ ഭുനക്തു । സഹ വീര്യം കരവാവഹൈ ।
തേജസ്വി നാവധീതമസ്തു മാ വിദ്വിഷാവഹൈ । ഓം ശാന്തിഃ ശാന്തിഃ ശാന്തിഃ ॥
ഇതി സ്കന്ദോപനിഷത്സമാപ്താ ॥
Recite with devotion and pure heart
Regular practice brings spiritual benefits