namo̍ astu sa̱rpebhyo̱ ye ke ca̍ pṛthi̱vī manu̍ । ye a̱ṃtari̍kṣe̱ ye di̱vi tebhya̍ḥ sa̱rpebhyo̱ nama̍ḥ । ye̍​'do ro̍ca̱ne di̱vo ye vā̱ sūrya̍sya ra̱śmiṣu̍ । yeṣā̍ma̱psu sada̍ḥ kṛ̱taṃ tebhya̍ḥ sa̱rpebhyo̱ nama̍ḥ । yā iṣa̍vo yātu̱dhānā̍nā̱ṃ-yem̐ vā̱ vana̱spatī̱g̱ṃ ranu̍ । ye vā̍​'va̱ṭeṣu̱ śera̍te̱ tebhya̍ḥ sa̱rpebhyo̱ nama̍ḥ । i̱dagṃ sa̱rpebhyo̍ ha̱vira̍stu̱ juṣṭam̎ । ā̱śre̱ṣā yeṣā̍manu̱yaṃti̱ ceta̍ḥ । ye a̱ṃtari̍kṣaṃ pṛthi̱vīṃ kṣi̱yaṃti̍ । te na̍ssa̱rpāso̱ hava̱māga̍miṣṭhāḥ । ye ro̍ca̱ne sūrya̱syāpi̍ sa̱rpāḥ । ye diva̍ṃ de̱vīmanu̍sa̱ncara̍ṃti । yeṣā̍māśre̱ṣā a̍nu̱yaṃti̱ kāmam̎ । tebhya̍ssa̱rpebhyo̱ madhu̍majjuhomi ॥ 2 ॥ ni̱ghṛṣvai̍rasa̱māyu̍taiḥ । kālair​haritva̍māpa̱nnaiḥ । iṃdrāyā̍hi sa̱hasra̍yuk । a̱gnirvi̱bhrāṣṭi̍vasanaḥ । vā̱yuśveta̍sikadru̱kaḥ । sa̱ṃ​va̱m̐thsa̱ro vi̍ṣū̱varṇai̎ḥ । nityā̱ste'nuca̍rāsta̱va । subrahmaṇyogṃ subrahmaṇyogṃ su̍brahmaṇyogm ॥ 3 ॥ oṃ śāṃtiḥ śāṃtiḥ śāṃtiḥ ॥