om ॥ oṃ bhūmi̍rbhū̱mnā dyaurva̍ri̱ṇā'ṃtari̍kṣaṃ mahi̱tvā । u̱pasthe̍ te devyadite̱'gnima̍nnā̱da-ma̱nnādyā̱yāda̍dhe ॥ ā'yaṃgauḥ pṛśñi̍rakramī̱-dasa̍nanmā̱tara̱ṃ puna̍ḥ । pi̱tara̍ṃ ca pra̱yaṃth-suva̍ḥ ॥ tri̱g̱ṃśaddhāma̱ virā̍jati̱ vākpa̍ta̱ṅgāya̍ śiśriye । pratya̍sya vaha̱dyubhi̍ḥ ॥ a̱sya prā̱ṇāda̍pāna̱tya̍ṃtaśca̍rati roca̱nā । vya̍khyan-mahi̱ṣaḥ suva̍ḥ ॥ yattvā̎ kru̱ddhaḥ pa̍ro̱vapa̍ma̱nyunā̱ yadava̍rtyā । su̱kalpa̍magne̱ tattava̱ puna̱stvoddī̍payāmasi ॥ yatte̍ ma̱nyupa̍roptasya pṛthi̱vī-manu̍dadhva̱se । ā̱di̱tyā viśve̱ tadde̱vā vasa̍vaśca sa̱mābha̍rann ॥ me̱dinī̍ de̱vī va̱suṃdha̍rā syā̱dvasu̍dhā de̱vī vā̱savī̎ । bra̱hma̱va̱rca̱saḥ pi̍tṛ̱ṇāṃ śrotra̱ṃ cakṣu̱rmana̍ḥ ॥ de̱vī hi̍raṇyaga̱rbhiṇī̍ de̱vī pra̍so̱darī̎ । sada̍ne sa̱tyāya̍ne sīda । sa̱mu̱drava̍tī sāvi̱trī āha̱no de̱vī ma̱hya̍ṃgī̎ । ma̱ho dhara̍ṇī ma̱ho'tya̍tiṣṭhat ॥ śṛ̱ṅge śṛ̍ṃge ya̱jñe ya̍jñe vibhī̱ṣaṇī̎ iṃdra̍patnī vyā̱pinī̱ sara̍sija i̱ha । vā̱yu̱matī̍ ja̱laśaya̍nī sva̱yaṃ dhā̱rājā̍ sa̱tyaṃto̱ pari̍medinī so̱pari̍dhattaṃgāya ॥ vi̱ṣṇu̱pa̱tnīṃ ma̍hīṃ de̱vī̎ṃ mā̱dha̱vīṃ mā̍dhava̱priyām । lakṣmī̎ṃ priyasa̍khīṃ de̱vī̱ṃ na̱mā̱myacyu̍tava̱llabhām ॥ oṃ dha̱nu̱rdha̱rāyai̍ vi̱dmahe̍ sarvasi̱ddhyai ca̍ dhīmahi । tanno̍ dharā praco̱dayā̎t । śṛ̱ṇvaṃti̍ śro̱ṇāmamṛta̍sya go̱pāṃ puṇyā̍masyā̱ upa̍śṛṇomi̱ vāca̎m । ma̱hīṃde̱vīṃ-vim̐ṣṇu̍patnī majū̱ryāṃ pratī̱cī̍menāgṃ ha̱viṣā̍ yajāmaḥ ॥ tre̱dhā viṣṇu̍-rurugā̱yo vica̍krame ma̱hīṃ diva̍ṃ pṛthi̱vī-ma̱ṃtari̍kṣam । tacchro̱ṇaitriśava̍ i̱cchamā̍nā puṇya̱gg̱ śloka̱ṃ-yam̐ja̍mānāya kṛṇva̱tī ॥ syo̱nāpṛ̍thivi̱bhavā̍nṛkṣa̱rāni̱veśa̍nī yacchā̍na̱śśarma̍ sa̱prathā̎ḥ ॥ adi̍tirde̱vā ga̍ṃdha̱rvā ma̍nu̱ṣyā̎ḥ pi̱taro su̍rāsteṣāgṃ sa̱rva bhū̱tā̱nā̎ṃ mā̱tā me̱dinī̍ mahatā ma̱hī । sāvi̱trī gā̍ya̱trī jaga̍tyu̱rvī pṛ̱thvī ba̍hulā̱ viśvā̍ bhū̱tāka̱tamākāyāsā sa̱tyetya̱mṛte̍ti vasi̱ṣṭhaḥ ॥ ikṣuśāliyavasasyaphalāḍhye pārijāta taruśobhitamūle । svarṇa ratna maṇi maṃṭapa madhye ciṃtayet sakala lokadharitrīm ॥ śyāmāṃ-vim̐citrāṃ navaratna bhūṣitāṃ caturbhujāṃ tuṃgapayodharānvitām । iṃdīvarākṣīṃ navaśāli maṃjarīṃ śukaṃ dadhānāṃ śaraṇaṃ bhajāmahe ॥ saktu̍miva̱ tita̍unā punaṃto̱ yatra̱ dhīrā̱ mana̍sā̱ vāca̱ makra̍ta । atrā̱ sakhā̎ssa̱khyāni̍ jānate bha̱draiṣā̎ṃ-la̱m̐kṣmīrni̍hi̱tādhi̍vā̱ci ॥ oṃ śāṃti̱ḥ śāṃti̱ḥ śāṃti̍ḥ ॥