oṃ śuklāṃbaradharaṃ-vim̐ṣṇuṃ śaśivarṇaṃ caturbhujam। prasannavadanaṃ dhyāyetsarva vighnopaśāṃtaye ॥ oṃ bhūḥ oṃ bhuva̍ḥ og̱ṃ suva̍ḥ oṃ maha̍ḥ oṃ janaḥ oṃ tapa̍ḥ ogṃ sa̱tyaṃ oṃ tatsa̍vi̱turvare̎ṇya̱ṃ bhargo̍de̱vasya̍ dhīmahi dhiyo̱ yo na̍ḥ praco̱dayā̎t ॥ oṃ āpo̱ jyotī̱raso̱'mṛta̱ṃ brahma̱ bhūrbhuva̱ssuva̱rom ॥ mamopātta-samasta-duritakṣayadvārā śrīparameśvara prītyarthaṃ ādityādi navagraha devatā prasāda siddhyarthaṃ ādityādi navagraha namaskārān kariṣye ॥ oṃ āsa̱tyena̱ raja̍sā̱ varta̍māno nive̱śaya̍nna̱mṛta̱ṃ martya̍ṃca । hi̱ra̱ṇyaye̍na savi̱tā rathe̱nā''de̱vo yā̍ti̱bhuva̍nā vi̱paśyan̍ ॥ a̱gniṃ dū̱taṃ-vṛ̍m̐ṇīmahe̱ hotā̍raṃ-vi̱m̐śvave̍dasam । a̱sya ya̱jñasya̍ su̱kratum̎ ॥ yeṣā̱mīśe̍ paśu̱pati̍ḥ paśū̱nāṃ catu̍ṣpadāmu̱ta ca̍ dvi̱padā̎m । niṣkrī̍to̱'yaṃ-ya̱m̐jñiya̍ṃ bhā̱game̍tu rā̱yaspoṣā̱ yaja̍mānasya saṃtu ॥ oṃ adhidevatā pratyadhidevatā sahitāya ādi̍tyāya̱ nama̍ḥ ॥ 1 ॥ oṃ āpyā̍yasva̱ same̍tu te vi̱śvata̍ssoma̱ vṛṣṇi̍yam । bhavā̱ vāja̍sya saṃga̱the ॥ a̱psume̱ somo̍ abravīda̱ṃtarviśvā̍ni bheṣa̱jā । a̱gniṃca̍ vi̱śvaśa̍ṃbhuva̱māpa̍śca vi̱śvabhe̍ṣajīḥ ॥ gau̱rī mi̍māya sali̱lāni̱ takṣa̱tyeka̍padī dvi̱padī̱ sā catu̍ṣpadī । a̱ṣṭāpa̍dī̱ nava̍padī babhū̱vuṣī̍ sa̱hasrā̎kṣarā para̱me vyo̍mann ॥ oṃ adhidevatā pratyadhidevatā sahitāya somā̍ya̱ nama̍ḥ ॥ 2 ॥ oṃ a̱gnirmū̱rdhā di̱vaḥ ka̱kutpati̍ḥ pṛthi̱vyā a̱yam । a̱pāgṃretāg̍ṃsi jinvati ॥ syo̱nā pṛ̍thivi̱ bhavā̍​'nṛkṣa̱rā ni̱veśa̍nī । yacchā̍na̱śśarma̍ sa̱prathā̎ḥ ॥ kṣetra̍sya̱ pati̍nā va̱yagṃhi̱te ne̍va jayāmasi । gāmaśva̍ṃ poṣayi̱t.ṃvā sa no̍ mṛḍātī̱dṛśe̎ ॥ oṃ adhidevatā pratyadhidevatā sahitāya aṃgā̍rakāya̱ nama̍ḥ ॥ 3 ॥ oṃ udbu̍dhyasvāgne̱ prati̍jāgṛhyenamiṣṭāpū̱rte sagṃsṛ̍jethāma̱yaṃca̍ । puna̍ḥ kṛ̱ṇvaggstvā̍ pi̱tara̱ṃ-yum̐vā̍nama̱nvātāg̍ṃsī̱ttvayi̱ taṃtu̍me̱tam ॥ i̱daṃ-vim̐ṣṇu̱rvica̍krame tre̱dhā nida̍dhe pa̱dam । samū̍ḍhamasyapāgṃ su̱re ॥ viṣṇo̍ ra̱rāṭa̍masi̱ viṣṇo̎ḥ pṛ̱ṣṭhama̍si̱ viṣṇo̱śśnaptre̎stho̱ viṣṇo̱ssyūra̍si̱ viṣṇo̎rdhru̱vama̍si vaiṣṇa̱vama̍si̱ viṣṇa̍ve tvā ॥ oṃ adhidevatā pratyadhidevatā sahitāya budhā̍ya̱ nama̍ḥ ॥ 4 ॥ oṃ bṛha̍spate̱ ati̱yada̱ryo ar​hā̎ddyu̱madvi̱bhāti̱ kratu̍ma̱jjane̍ṣu ।yaddī̱daya̱ccava̍sartaprajāta̱ tada̱smāsu̱ dravi̍ṇaṃdhehi ci̱tram ॥ iṃdra̍marutva i̱ha pā̍hi̱ soma̱ṃ-yam̐thā̍ śāryā̱te api̍bassu̱tasya̍ । tava̱ praṇī̍tī̱ tava̍ śūra̱śarma̱nnāvi̍vāsaṃti ka̱vaya̍ssuya̱jñāḥ ॥ brahma̍jajñā̱naṃ pra̍tha̱maṃ pu̱rastā̱dvisī̍ma̱tassu̱ruco̍ ve̱na ā̍vaḥ । sabu̱dhniyā̍ upa̱mā a̍sya vi̱ṣṭhāssa̱taśca̱ yoni̱masa̍taśca̱ viva̍ḥ ॥ oṃ adhidevatā pratyadhidevatā sahitāya bṛha̱spata̍ye̱ nama̍ḥ ॥ 5 ॥ oṃ prava̍śśu̱krāya̍ bhā̱nave̍ bharadhvam । ha̱vyaṃ ma̱tiṃ cā̱gnaye̱ supū̍tam । yo daivyā̍ni̱ mānu̍ṣā ja̱nūgṃṣi̍ a̱ṃtarviśvā̍ni vi̱dma nā̱ jigā̍ti ॥ i̱ṃdrā̱ṇīmā̱su nāri̍ṣu su̱pat.ṃī̍ma̱hama̍śravam । na hya̍syā apa̱raṃca̱na ja̱rasā̱ mara̍te̱ pati̍ḥ ॥ iṃdra̍ṃ-vom̐ vi̱śvata̱spari̱ havā̍mahe̱ jane̎bhyaḥ । a̱smāka̍mastu̱ keva̍laḥ॥ oṃ adhidevatā pratyadhidevatā sahitāya śukrā̍ya̱ nama̍ḥ ॥ 6 ॥ oṃ śanno̍ de̱vīra̱bhiṣṭa̍ya̱ āpo̍ bhavaṃtu pī̱taye̎ । śaṃ​yom̐ra̱bhisra̍vaṃtu naḥ ॥ prajā̍pate̱ na tvade̱tānya̱nyo viśvā̍ jā̱tāni̱ pari̱tā ba̍bhūva । yatkā̍māste juhu̱mastanno̍ astu va̱yaggsyā̍ma̱ pata̍yo rayī̱ṇām ॥ i̱maṃ-ya̍m̐maprasta̱ramāhi sīdā'ṃgi̍robhiḥ pi̱tṛbhi̍ssaṃ​vim̐dā̱naḥ । ātvā̱ maṃtrā̎ḥ kaviśa̱stā va̍haṃtve̱nā rā̍jan\, ha̱viṣā̍ mādayasva ॥ oṃ adhidevatā pratyadhidevatā sahitāya śanaiśca̍rāya̱ nama̍ḥ ॥ 7 ॥ oṃ kayā̍ naści̱tra ābhu̍vadū̱tī sa̱dāvṛ̍dha̱ssakhā̎ । kayā̱ śaci̍ṣṭhayā vṛ̱tā ॥ ā'yaṃgauḥ pṛśni̍rakramī̱dasa̍nanmā̱tara̱ṃ puna̍ḥ । pi̱tara̍ṃca pra̱yaṃtsuva̍ḥ ॥ yatte̍ de̱vī nirṛ̍tirāba̱baṃdha̱ dāma̍ grī̱vāsva̍vica̱rtyam । i̱daṃte̱ tadviṣyā̱myāyu̍ṣo̱ na madhyā̱dathā̍jī̱vaḥ pi̱tuma̍ddhi̱ pramu̍ktaḥ ॥ oṃ adhidevatā pratyadhidevatā sahitāya rāha̍ve̱ nama̍ḥ ॥ 8 ॥ oṃ ke̱tuṃkṛ̱ṇvanna̍ke̱tave̱ peśo̍ maryā ape̱śase̎ । samu̱ṣadbhi̍rajāyathāḥ ॥ bra̱hmā de̱vānā̎ṃ pada̱vīḥ ka̍vī̱nāmṛṣi̱rviprā̍ṇāṃ mahi̱ṣo mṛ̱gāṇā̎m । śye̱nogṛdhrā̍ṇā̱g̱svadhi̍ti̱rvanā̍nā̱g̱ṃ soma̍ḥ pa̱vitra̱matye̍ti̱ rebhan̍ ॥ saci̍tra ci̱traṃ ci̱tayan̎tama̱sme citra̍kṣatra ci̱trata̍maṃ-vam̐yo̱dhām । ca̱ṃdraṃ ra̱yiṃ pu̍ru̱vīram̎ bṛ̱haṃta̱ṃ caṃdra̍ca̱ṃdrābhi̍rgṛṇa̱te yu̍vasva ॥ oṃ adhidevatā pratyadhidevatā sahitebhyaḥ ketu̍bhyo̱ nama̍ḥ ॥ 9 ॥ ॥ oṃ ādityādi navagraha deva̍tābhyo̱ namo̱ nama̍ḥ ॥ ॥ oṃ śāṃti̱ḥ śāṃti̱ḥ śāṃti̍ḥ ॥