ಓಂ ಹಿರ॑ಣ್ಯವರ್ಣಾಂ॒ ಹರಿ॑ಣೀಂ ಸು॒ವರ್ಣ॑ರಜ॒ತಸ್ರ॑ಜಾಮ್ । ಚಂ॒ದ್ರಾಂ ಹಿ॒ರಣ್ಮ॑ಯೀಂ-ಲಁ॒ಕ್ಷ್ಮೀಂ ಜಾತ॑ವೇದೋ ಮ॒ಮಾವ॑ಹ ॥ ತಾಂ ಮ॒ ಆವ॑ಹ॒ ಜಾತ॑ವೇದೋ ಲ॒ಕ್ಷ್ಮೀಮನ॑ಪಗಾ॒ಮಿನೀ᳚ಮ್ । ಯಸ್ಯಾಂ॒ ಹಿರ॑ಣ್ಯಂ-ವಿಁಂ॒ದೇಯಂ॒ ಗಾಮಶ್ವಂ॒ ಪುರು॑ಷಾನ॒ಹಮ್ ॥ ಅ॒ಶ್ವ॒ಪೂ॒ರ್ವಾಂ ರ॑ಥಮ॒ಧ್ಯಾಂ ಹ॒ಸ್ತಿನಾ॑ದ-ಪ್ರ॒ಬೋಧಿ॑ನೀಮ್ । ಶ್ರಿಯಂ॑ ದೇ॒ವೀಮುಪ॑ಹ್ವಯೇ॒ ಶ್ರೀರ್ಮಾ॑ ದೇ॒ವೀರ್ಜು॑ಷತಾಮ್ ॥ ಕಾಂ॒ಸೋ᳚ಸ್ಮಿ॒ ತಾಂ ಹಿರ॑ಣ್ಯಪ್ರಾ॒ಕಾರಾ॑ಮಾ॒ರ್ದ್ರಾಂ ಜ್ವಲಂ॑ತೀಂ ತೃ॒ಪ್ತಾಂ ತ॒ರ್ಪಯಂ॑ತೀಮ್ । ಪ॒ದ್ಮೇ॒ ಸ್ಥಿ॒ತಾಂ ಪ॒ದ್ಮವ॑ರ್ಣಾಂ॒ ತಾಮಿ॒ಹೋಪ॑ಹ್ವಯೇ॒ ಶ್ರಿಯಮ್ ॥ ಚಂ॒ದ್ರಾಂ ಪ್ರ॑ಭಾ॒ಸಾಂ-ಯಁ॒ಶಸಾ॒ ಜ್ವಲಂ॑ತೀಂ॒ ಶ್ರಿಯಂ॑-ಲೋಁ॒ಕೇ ದೇ॒ವಜು॑ಷ್ಟಾಮುದಾ॒ರಾಮ್ । ತಾಂ ಪ॒ದ್ಮಿನೀ॑ಮೀಂ॒ ಶರ॑ಣಮ॒ಹಂ ಪ್ರಪ॑ದ್ಯೇಽಲ॒ಕ್ಷ್ಮೀರ್ಮೇ॑ ನಶ್ಯತಾಂ॒ ತ್ವಾಂ-ವೃಁ॑ಣೇ ॥ ಆ॒ದಿ॒ತ್ಯವ॑ರ್ಣೇ॒ ತಪ॒ಸೋಽಧಿ॑ಜಾ॒ತೋ ವನ॒ಸ್ಪತಿ॒ಸ್ತವ॑ ವೃ॒ಕ್ಷೋಽಥ॑ ಬಿ॒ಲ್ವಃ । ತಸ್ಯ॒ ಫಲಾ॑ನಿ॒ ತಪ॒ಸಾನು॑ದಂತು ಮಾ॒ಯಾಂತ॑ರಾ॒ಯಾಶ್ಚ॑ ಬಾ॒ಹ್ಯಾ ಅ॑ಲ॒ಕ್ಷ್ಮೀಃ ॥ ಉಪೈ॑ತು॒ ಮಾಂ ದೇ॑ವಸ॒ಖಃ ಕೀ॒ರ್ತಿಶ್ಚ॒ ಮಣಿ॑ನಾ ಸ॒ಹ । ಪ್ರಾ॒ದು॒ರ್ಭೂ॒ತೋಽಸ್ಮಿ॑ ರಾಷ್ಟ್ರೇ॒ಽಸ್ಮಿನ್ ಕೀ॒ರ್ತಿ॒ಮೃ॑ದ್ಧಿಂ ದ॒ದಾತು॑ ಮೇ ॥ ಕ್ಷು॒ತ್ಪಿ॒ಪಾ॒ಸಾಮ॑ಲಾಂ ಜ್ಯೇ॒ಷ್ಠಾಮ॒ಲ॒ಕ್ಷೀ-ರ್ನಾ॑ಶಯಾ॒ಮ್ಯಹಮ್ । ಅಭೂ॑ತಿ॒ಮಸ॑ಮೃದ್ಧಿಂ॒ ಚ ಸ॒ರ್ವಾಂ॒ ನಿರ್ಣು॑ದ ಮೇ॒ ಗೃಹಾತ್ ॥ ಗಂ॒ಧ॒ದ್ವಾ॒ರಾಂ ದು॑ರಾಧ॒ರ್​ಷಾಂ॒ ನಿ॒ತ್ಯಪು॑ಷ್ಟಾಂ ಕರೀ॒ಷಿಣೀ᳚ಮ್ । ಈ॒ಶ್ವರೀಗ್ಂ॑ ಸರ್ವ॑ಭೂತಾ॒ನಾಂ॒ ತಾಮಿ॒ಹೋಪ॑ಹ್ವಯೇ॒ ಶ್ರಿಯಮ್ ॥ ಶ್ರೀ᳚ರ್ಮೇ ಭ॒ಜತು । ಅಲ॒ಕ್ಷೀ᳚ರ್ಮೇ ನ॒ಶ್ಯತು । ಮನ॑ಸಃ॒ ಕಾಮ॒ಮಾಕೂ॑ತಿಂ-ವಾಁ॒ಚಃ ಸ॒ತ್ಯಮ॑ಶೀಮಹಿ । ಪ॒ಶೂ॒ನಾಗ್ಂ ರೂ॒ಪಮನ್ಯ॑ಸ್ಯ॒ ಮಯಿ॒ ಶ್ರೀಃ ಶ್ರ॑ಯತಾಂ॒-ಯಁಶಃ॑ ॥ ಕ॒ರ್ದಮೇ॑ನ ಪ್ರ॑ಜಾಭೂ॒ತಾ॒ ಮ॒ಯಿ॒ ಸಂಭ॑ವ ಕ॒ರ್ದಮ । ಶ್ರಿಯಂ॑-ವಾಁ॒ಸಯ॑ ಮೇ ಕು॒ಲೇ॒ ಮಾ॒ತರಂ॑ ಪದ್ಮ॒ಮಾಲಿ॑ನೀಮ್ ॥ ಆಪಃ॑ ಸೃ॒ಜಂತು॑ ಸ್ನಿ॒ಗ್ಧಾ॒ನಿ॒ ಚಿ॒ಕ್ಲೀ॒ತ ವ॑ಸ ಮೇ॒ ಗೃಹೇ । ನಿ ಚ॑ ದೇ॒ವೀಂ ಮಾ॒ತರಂ॒ ಶ್ರಿಯಂ॑-ವಾಁ॒ಸಯ॑ ಮೇ ಕು॒ಲೇ ॥ ಆ॒ರ್ದ್ರಾಂ ಪು॒ಷ್ಕರಿ॑ಣೀಂ ಪು॒ಷ್ಟಿಂ॒ ಪಿಂ॒ಗ॒ಳಾಂ ಪ॑ದ್ಮಮಾ॒ಲಿನೀಮ್ । ಚಂ॒ದ್ರಾಂ ಹಿ॒ರಣ್ಮ॑ಯೀಂ-ಲಁ॒ಕ್ಷ್ಮೀಂ ಜಾತ॑ವೇದೋ ಮ॒ಮಾವ॑ಹ ॥ ಆ॒ರ್ದ್ರಾಂ-ಯಁಃ॒ ಕರಿ॑ಣೀಂ-ಯಁ॒ಷ್ಟಿಂ॒ ಸು॒ವ॒ರ್ಣಾಂ ಹೇ॑ಮಮಾ॒ಲಿನೀಮ್ । ಸೂ॒ರ್ಯಾಂ ಹಿ॒ರಣ್ಮ॑ಯೀಂ-ಲಁ॒ಕ್ಷ್ಮೀಂ॒ ಜಾತ॑ವೇದೋ ಮ॒ಮಾವ॑ಹ ॥ ತಾಂ ಮ॒ ಆವ॑ಹ॒ ಜಾತ॑ವೇದೋ ಲ॒ಕ್ಷೀಮನ॑ಪಗಾ॒ಮಿನೀ᳚ಮ್ । ಯಸ್ಯಾಂ॒ ಹಿರ॑ಣ್ಯಂ॒ ಪ್ರಭೂ॑ತಂ॒ ಗಾವೋ॑ ದಾ॒ಸ್ಯೋಽಶ್ವಾ᳚ನ್, ವಿಂ॒ದೇಯಂ॒ ಪುರು॑ಷಾನ॒ಹಮ್ ॥ ಯಶ್ಶುಚಿಃ॑ ಪ್ರಯತೋ ಭೂ॒ತ್ವಾ॒ ಜು॒ಹುಯಾ॑-ದಾಜ್ಯ॒-ಮನ್ವ॑ಹಮ್ । ಶ್ರಿಯಃ॑ ಪಂ॒ಚದ॑ಶರ್ಚಂ ಚ ಶ್ರೀ॒ಕಾಮ॑ಸ್ಸತ॒ತಂ॒ ಜ॑ಪೇತ್ ॥ ಆನಂದಃ ಕರ್ದ॑ಮಶ್ಚೈ॒ವ ಚಿಕ್ಲೀ॒ತ ಇ॑ತಿ ವಿ॒ಶ್ರುತಾಃ । ಋಷ॑ಯ॒ಸ್ತೇ ತ್ರ॑ಯಃ ಪುತ್ರಾಃ ಸ್ವ॒ಯಂ॒ ಶ್ರೀರೇ॑ವ ದೇ॒ವತಾ ॥ ಪದ್ಮಾನನೇ ಪ॑ದ್ಮ ಊ॒ರೂ॒ ಪ॒ದ್ಮಾಕ್ಷೀ ಪ॑ದ್ಮಸಂ॒ಭವೇ । ತ್ವಂ ಮಾಂ᳚ ಭ॒ಜಸ್ವ॑ ಪದ್ಮಾ॒ಕ್ಷೀ ಯೇ॒ನ ಸೌಖ್ಯಂ॑-ಲಁಭಾ॒ಮ್ಯಹಮ್ ॥ ಅ॒ಶ್ವದಾ॑ಯೀ ಚ ಗೋದಾ॒ಯೀ॒ ಧ॒ನದಾ॑ಯೀ ಮ॒ಹಾಧ॑ನೇ । ಧನಂ॑ ಮೇ॒ ಜುಷ॑ತಾಂ ದೇ॒ವೀ ಸ॒ರ್ವಕಾ॑ಮಾರ್ಥ॒ ಸಿದ್ಧ॑ಯೇ ॥ ಪುತ್ರಪೌತ್ರ ಧನಂ ಧಾನ್ಯಂ ಹಸ್ತ್ಯಶ್ವಾಜಾವಿಗೋ ರಥಮ್ । ಪ್ರಜಾನಾಂ ಭವಸಿ ಮಾತಾ ಆಯುಷ್ಮಂತಂ ಕರೋತು ಮಾಮ್ ॥ ಚಂದ್ರಾಭಾಂ-ಲಁಕ್ಷ್ಮೀಮೀಶಾನಾಂ ಸೂರ್ಯಾಭಾಂ᳚ ಶ್ರಿಯಮೀಶ್ವರೀಮ್ । ಚಂದ್ರ ಸೂರ್ಯಾಗ್ನಿ ಸರ್ವಾಭಾಂ ಶ್ರೀ ಮಹಾಲಕ್ಷ್ಮೀ-ಮುಪಾಸ್ಮಹೇ ॥ ಧನ-ಮಗ್ನಿ-ರ್ಧನಂ-ವಾಁಯು-ರ್ಧನಂ ಸೂರ್ಯೋ॑ ಧನಂ-ವಁಸುಃ । ಧನಮಿಂದ್ರೋ ಬೃಹಸ್ಪತಿ-ರ್ವರು॑ಣಂ ಧನಮ॑ಶ್ನುತೇ ॥ ವೈನತೇಯ ಸೋಮಂ ಪಿಬ ಸೋಮಂ॑ ಪಿಬತು ವೃತ್ರಹಾ । ಸೋಮಂ॒ ಧನಸ್ಯ ಸೋಮಿನೋ॒ ಮಹ್ಯಂ॑ ದದಾತು ಸೋಮಿನೀ॑ ॥ ನ ಕ್ರೋಧೋ ನ ಚ ಮಾತ್ಸ॒ರ್ಯಂ ನ ಲೋಭೋ॑ ನಾಶುಭಾ ಮತಿಃ । ಭವಂತಿ ಕೃತ ಪುಣ್ಯಾನಾಂ ಭ॒ಕ್ತಾನಾಂ ಶ್ರೀ ಸೂ᳚ಕ್ತಂ ಜಪೇತ್ಸದಾ ॥ ವರ್​ಷಂ᳚ತು॒ ತೇ ವಿ॑ಭಾವ॒ರಿ॒ ದಿ॒ವೋ ಅಭ್ರಸ್ಯ ವಿದ್ಯು॑ತಃ । ರೋಹಂ᳚ತು ಸರ್ವ॑ಬೀಜಾನ್ಯವ ಬ್ರಹ್ಮ ದ್ವಿ॒ಷೋ᳚ ಜ॑ಹಿ ॥ ಪದ್ಮಪ್ರಿಯೇ ಪದ್ಮಿನಿ ಪದ್ಮಹಸ್ತೇ ಪದ್ಮಾಲಯೇ ಪದ್ಮ-ದಳಾಯತಾಕ್ಷೀ । ವಿಶ್ವಪ್ರಿಯೇ ವಿಷ್ಣು ಮನೋನುಕೂಲೇ ತ್ವತ್ಪಾದಪದ್ಮಂ ಮಯಿ ಸನ್ನಿಧತ್ಸ್ವ ॥ ಯಾ ಸಾ ಪದ್ಮಾಸನಸ್ಥಾ ವಿಪುಲಕಟಿತಟೀ ಪದ್ಮಪತ್ರಾಯತಾಕ್ಷೀ । ಗಂಭೀರಾ ವರ್ತನಾಭಿಃ ಸ್ತನಭರನಮಿತಾ ಶುಭ್ರ ವಸ್ತೋತ್ತರೀಯಾ ॥ ಲಕ್ಷ್ಮೀ-ರ್ದಿವ್ಯೈ-ರ್ಗಜೇಂದ್ರೈ-ರ್ಮಣಿಗಣ ಖಚಿತೈ-ಸ್ಸ್ನಾಪಿತಾ ಹೇಮಕುಂಭೈಃ । ನಿತ್ಯಂ ಸಾ ಪದ್ಮಹಸ್ತಾ ಮಮ ವಸತು ಗೃಹೇ ಸರ್ವ ಮಾಂಗಳ್ಯಯುಕ್ತಾ ॥ ಲಕ್ಷ್ಮೀಂ ಕ್ಷೀರ ಸಮುದ್ರ ರಾಜತನಯಾಂ ಶ್ರೀರಂಗ ಧಾಮೇಶ್ವರೀಮ್ । ದಾಸೀಭೂತ ಸಮಸ್ತ ದೇವ ವನಿತಾಂ-ಲೋಁಕೈಕ ದೀಪಾಂಕುರಾಮ್ । ಶ್ರೀಮನ್ಮಂದ ಕಟಾಕ್ಷ ಲಬ್ಧ ವಿಭವ ಬ್ರಹ್ಮೇಂದ್ರ ಗಂಗಾಧರಾಮ್ । ತ್ವಾಂ ತ್ರೈಲೋಕ್ಯ ಕುಟುಂಬಿನೀಂ ಸರಸಿಜಾಂ-ವಂಁದೇ ಮುಕುಂದಪ್ರಿಯಾಮ್ ॥ ಸಿದ್ಧಲಕ್ಷ್ಮೀ-ರ್ಮೋಕ್ಷಲಕ್ಷ್ಮೀ-ರ್ಜಯಲಕ್ಷ್ಮೀ-ಸ್ಸರಸ್ವತೀ । ಶ್ರೀಲಕ್ಷ್ಮೀ-ರ್ವರಲಕ್ಷ್ಮೀಶ್ಚ ಪ್ರಸನ್ನಾ ಮಮ ಸರ್ವದಾ ॥ ವರಾಂಕುಶೌ ಪಾಶಮಭೀತಿ ಮುದ್ರಾಮ್ । ಕರೈರ್ವಹಂತೀಂ ಕಮಲಾಸನಸ್ಥಾಮ್ । ಬಾಲಾರ್ಕಕೋಟಿ ಪ್ರತಿಭಾಂ ತ್ರಿನೇತ್ರಾಮ್ । ಭಜೇಽಹಮಂಬಾಂ ಜಗದೀಶ್ವರೀಂ ತಾಮ್ ॥ ಸರ್ವಮಂಗಳ ಮಾಂಗಳ್ಯೇ ಶಿವೇ ಸರ್ವಾರ್ಥ ಸಾಧಿಕೇ । ಶರಣ್ಯೇ ತ್ಯ್ರಂಬಕೇ ದೇವೀ ನಾರಾಯಣಿ ನಮೋಸ್ತುತೇ ॥ ಓಂ ಮ॒ಹಾ॒ದೇ॒ವ್ಯೈ ಚ॑ ವಿ॒ದ್ಮಹೇ॑ ವಿಷ್ಣುಪ॒ತ್ನೀ ಚ॑ ಧೀಮಹಿ । ತನ್ನೋ॑ ಲಕ್ಷ್ಮೀಃ ಪ್ರಚೋ॒ದಯಾ᳚ತ್ ॥ ಶ್ರೀ-ರ್ವರ್ಚ॑ಸ್ವ॒-ಮಾಯು॑ಷ್ಯ॒-ಮಾರೋ᳚ಗ್ಯ॒-ಮಾವೀ॑ಧಾ॒ತ್-ಶೋಭ॑ಮಾನಂ ಮಹೀ॒ಯತೇ᳚ । ಧಾ॒ನ್ಯಂ ಧ॒ನಂ ಪ॒ಶುಂ ಬ॒ಹುಪು॑ತ್ರಲಾ॒ಭಂ ಶ॒ತಸಂ᳚​ವಁತ್ಸ॒ರಂ ದೀ॒ರ್ಘಮಾಯುಃ॑ ॥ ಓಂ ಶಾಂತಿಃ॒ ಶಾಂತಿಃ॒ ಶಾಂತಿಃ॑ ॥