हैंహైHaindavamஹிહિં
📍
Font Size:
మన్యు సూక్తం
(ఋ।వే।10।83,84)
యస్తే᳚ మ॒న్యోఽవి॑ధద్వజ్ర సాయక॒ సహ॒ ఓజ॑: పుష్యతి॒ విశ్వ॑మాను॒షక్ ।
సా॒హ్యామ॒ దాస॒మార్యం॒ త్వయా᳚ యు॒జా సహ॑స్కృతేన॒ సహ॑సా॒ సహ॑స్వతా ॥ 01
మ॒న్యురింద్రో᳚ మ॒న్యురే॒వాస॑ దే॒వో మ॒న్యుర్హోతా॒ వరు॑ణో జా॒తవే᳚దాః ।
మ॒న్యుం విశ॑ ఈలతే॒ మాను॑షీ॒ర్యాః పా॒హి నో᳚ మన్యో॒ తప॑సా స॒జోషా᳚: ॥ 02
అ॒భీ᳚హి మన్యో త॒వస॒స్తవీ᳚యాం॒తప॑సా యు॒జా వి జ॑హి॒ శత్రూ॑న్ ।
అ॒మి॒త్ర॒హా వృ॑త్ర॒హా ద॑స్యు॒హా చ॒ విశ్వా॒ వసూ॒న్యా భ॑రా॒ త్వం న॑: ॥ 03
త్వం హి మ᳚న్యో అ॒భిభూ᳚త్యోజాః స్వయం॒భూర్భామో᳚ అభిమాతిషా॒హః ।
వి॒శ్వచ॑ర్షణి॒: సహు॑రి॒: సహా᳚వాన॒స్మాస్వోజ॒: పృత॑నాసు ధేహి ॥ 04
అ॒భా॒గః సన్నప॒ పరే᳚తో అస్మి॒ తవ॒ క్రత్వా᳚ తవి॒షస్య॑ ప్రచేతః ।
తం త్వా᳚ మన్యో అక్ర॒తుర్జి॑హీలా॒హం స్వా త॒నూర్బ॑ల॒దేయా᳚య॒ మేహి॑ ॥ 05
అ॒యం తే᳚ అ॒స్మ్యుప॒ మేహ్య॒ర్వాఙ్ప్ర॑తీచీ॒నః స॑హురే విశ్వధాయః ।
మన్యో᳚ వజ్రిన్న॒భి మామా వ॑వృత్స్వ॒ హనా᳚వ॒ దస్యూ᳚।ణృ॒త బో᳚ధ్యా॒పేః ॥ 06
అ॒భి ప్రేహి॑ దక్షిణ॒తో భ॑వా॒ మేఽధా᳚ వృ॒త్రాణి॑ జంఘనావ॒ భూరి॑ ।
జు॒హోమి॑ తే ధ॒రుణం॒ మధ్వో॒ అగ్ర॑ము॒భా ఉ॑పాం॒శు ప్ర॑థ॒మా పి॑బావ ॥ 07
త్వయా᳚ మన్యో స॒రథ॑మారు॒జంతో॒ హర్ష॑మాణాసో ధృషి॒తా మ॑రుత్వః ।
తి॒గ్మేష॑వ॒ ఆయు॑ధా సం॒శిశా᳚నా అ॒భి ప్ర యం᳚తు॒ నరో᳚ అ॒గ్నిరూ᳚పాః ॥ 01
అ॒గ్నిరి॑వ మన్యో త్విషి॒తః స॑హస్వ సేనా॒నీర్న॑: సహురే హూ॒త ఏ᳚ధి ।
హ॒త్వాయ॒ శత్రూ॒న్వి భ॑జస్వ॒ వేద॒ ఓజో॒ మిమా᳚నో॒ వి మృధో᳚ నుదస్వ ॥ 02
సహ॑స్వ మన్యో అ॒భిమా᳚తిమ॒స్మే రు॒జన్మృ॒ణన్ప్ర॑మృ॒ణన్ప్రేహి॒ శత్రూ॑న్ ।
ఉ॒గ్రం తే॒ పాజో᳚ న॒న్వా రు॑రుధ్రే వ॒శీ వశం᳚ నయస ఏకజ॒ త్వం ॥ 03
ఏకో᳚ బహూ॒నామ॑సి మన్యవీలి॒తో విశం᳚విశం యు॒ధయే॒ సం శి॑శాధి ।
అకృ॑త్తరు॒క్త్వయా᳚ యు॒జా వ॒యం ద్యు॒మంతం॒ ఘోషం᳚ విజ॒యాయ॑ కృణ్మహే ॥ 04
వి॒జే॒ష॒కృదింద్ర॑ ఇవానవబ్ర॒వో॒3॒॑ఽస్మాకం᳚ మన్యో అధి॒పా భ॑వే॒హ ।
ప్రి॒యం తే॒ నామ॑ సహురే గృణీమసి వి॒ద్మా తముత్సం॒ యత॑ ఆబ॒భూథ॑ ॥ 05
ఆభూ᳚త్యా సహ॒జా వ॑జ్ర సాయక॒ సహో᳚ బిభర్ష్యభిభూత॒ ఉత్త॑రం ।
క్రత్వా᳚ నో మన్యో స॒హ మే॒ద్యే॑ధి మహాధ॒నస్య॑ పురుహూత సం॒సృజి॑ ॥ 06
సంసృ॑ష్టం॒ ధన॑ము॒భయం᳚ స॒మాకృ॑తమ॒స్మభ్యం᳚ దత్తాం॒ వరు॑ణశ్చ మ॒న్యుః ।
భియం॒ దధా᳚నా॒ హృద॑యేషు॒ శత్ర॑వ॒: పరా᳚జితాసో॒ అప॒ ని ల॑యంతాం ॥ 07
ధన్వ॑నా॒గాధన్వ॑నా॒జింజ॑యేమ॒ ధన్వ॑నా తీ॒వ్రాః స॒మదో᳚ జయేమ ।
ధనుః శత్రో᳚రపకా॒మం కృ॑ణోతి॒ ధన్వ॑ నా॒సర్వా᳚: ప్ర॒దిశో᳚ జయేమ ॥
శాంతా॑ పృథివీ శి॑వమం॒తరిక్షం॒ ద్యౌర్నో॒᳚దేవ్యఽభ॑యన్నో అస్తు ।
శి॒వా॒ దిశ॑: ప్ర॒దిశ॑ ఉ॒ద్దిశో᳚ న॒ఽఆపో᳚ వి॒శ్వత॒: పరి॑పాంతు స॒ర్వత॒: శాం॒తి॒: శాం॒తి॒: శాంతి॑: ।
Recite with devotion and pure heart
Regular practice brings spiritual benefits