हैंహైHaindavamஹிહિં
📍
Font Size:
കാലികോപനിഷത്
അഥ ഹൈനം ബ്രഹ്മരന്ധ്രേ ബ്രഹ്മസ്വരൂപിണീമാപ്നോതി । സുഭഗാം ത്രിഗുണിതാം മുക്താസുഭഗാം കാമരേഫേന്ദിരാം സമസ്തരൂപിണീമേതാനി ത്രിഗുണിതാനി തദനു കൂർചബീജം വ്യോമഷഷ്ഠസ്വരാം ബിന്ദുമേലനരൂപാം തദ്ദ്വയം മായാദ്വയം ദക്ഷിണേ കാലികേ ചേത്യഭിമുഖഗതാം തദനു ബീജസപ്തകമുച്ചാര്യ ബൃഹദ്ഭാനുജായാമുച്ചരേത് । സ തു ശിവമയോ ഭവേത് । സർവസിദ്ധീശ്വരോ ഭവേത് । ഗതിസ്തസ്യാസ്തീതി । നാന്യസ്യ ഗതിരസ്താതി । സ തു വാഗീശ്വരഃ । സ തു നാരീശ്വരഃ । സ തു ദേവേശ്വരഃ । സ തു സർവേശ്വരഃ । അഭിനവജലദസങ്കാശാ ഘനസ്തനീ കുടിലദംഷ്ട്രാ ശവാസനാ കാലികാ ധ്യേയാ । ത്രികോണം പഞ്ചകോണം നവകോണം പദ്മം । തസ്മിൻ ദേവീ സർവാംഗേഽഭ്യർച്യ തദിദം സർവാംഗം ഓം കാലീ കപാലിനീ കുല്ലാ കുരുകുല്ലാ വിരോധിനീ വിപ്രചിത്താ ഉഗ്രാ ഉഗ്രപ്രഭാ ദീപ്താ നീലാ ഘനാ ബലാകാ മാത്രാ മുദ്രാഽമിതാ ചൈവ പഞ്ചദശകോണഗാഃ । ബ്രാഹ്മീ നാരായണീ മാഹേശ്വരീ കൗമാരീ അപരാജിതാ വാരാഹീ നാരസിംഹികാ ചേത്യഷ്ടപത്രഗാഃ । ഷോഡശസ്വരഭേദേന പ്രഥമേന മന്ത്രവിഭാഗഃ । തന്മൂലേനാവാഹനം തേനൈവ പൂജനം । യ ഏവം മന്ത്രരാജം നിയമേന വാ ലക്ഷമാവർതയതി സ പാപ്മാനം ഹന്തി । സ ബ്രഹ്മത്വം ഭജതി । സഃ അമൃതത്വം ഭജതി । സ ആയുരാരോഗ്യമൈശ്വര്യം ഭജതി । സദാ പഞ്ചമകാരേണ പൂജയേത് । സദാ ഗുരുഭക്തോ ഭവേത് । സദാ ദേവഭക്തോ ഭവേത് । ധർമിഷ്ഠതാം പുഷ്ടിമഹതവാചം വിപ്രാ ലഭന്തേ । മന്ത്രജാപിനോ ഹ്യാത്മാ വിദ്യാപ്രപൂരിതോ ഭവതി । സ ജീവന്മുക്തോ ഭവതി । സ സർവശാസ്ത്രം ജാനാതി । സ സർവപുണ്യകാരീ ഭവതി । സ സർവയജ്ഞയാജീ ഭവതി । രാജാനോ ദാസതാം യാന്തി । ജപ്ത്വാ സ സർവമേതം മന്ത്രരാജം സ്വയം ശിവ ഏവാഹമിത്യണിമാദിവിഭൂതീനാമീശ്വരഃ കാലികാം ലഭേത് ॥
ആവയോഃ പാത്രഭൂതഃ സൻ സുകൃതീ ത്യക്തകല്മഷഃ ।
ജീവന്മുക്തഃ സ വിജ്ഞേയോ യസ്മൈ ലബ്ധാ ഹി ദക്ഷിണാ ॥
ദശാംശം ഹോമയേത്തദനു തർപയേത് । അഥ ഹൈകേ യജ്ഞാൻ കാമാനദ്വൈതജ്ഞാനാദീനനിരുദ്ധസരസ്വതീതി । അഥ ഹൈഷഃ കാലികാമനുജാപീ യഃ സദാ ശുദ്ധാത്മാ ജ്ഞാനവൈരാഗ്യയുക്തഃ ശാംഭവീദീക്ഷാസു രക്തഃ ശാക്താസു । യദി വാ ബ്രഹ്മചാരീ രാത്രൗ നഗ്നഃ സർവദാ മധുനാഽശക്തോ മനസാ ജപപൂജാദിനിയമവാൻ । യോഷിത്പ്രിയകരോ ഭഗോദകേന തർപണം തേനൈവ പൂജനം കുര്യാത് । സർവദാ കാലികാരൂപമാത്മാനം വിഭാവയേത് । സ സർവദാ യോഷിദാസക്തോ ഭവേത് । സ സർവഹത്യാം തരതി തേന മധുദാനേന । അഥ പഞ്ചമകാരേണ സർവമായാദിവിദ്യാം പശുധനധാന്യം സർവേശത്വം ച കവിത്വം ച । നാന്യഃ പരമഃ പന്ഥാ വിദ്യതേ മോക്ഷായ ജ്ഞാനായ ധർമാധർമായ । തത്സർവം ഭൂതം ഭവ്യം യത്കിഞ്ചിദ്ദൃശ്യമാനം സ്ഥാവരജംഗമം തത്സർവം കാലികാതന്ത്രേ ഓതം പ്രോതം വേദ । യ ഏവം മനുജാപീ സ പാപ്മാനം തരതി । സ ഭ്രൂണഹത്യാം തരതി । സോഽഗമ്യാഗമനം തരതി । സ സർവസുഖമാപ്നോതി । സ സർവം ജാനാതി । സ സർവസംന്യാസീ ഭവതി । സ വിരക്തോ ഭവതി । സ സർവവേദാധ്യായീ ഭവതി । സ സർവമന്ത്രജാപീ ഭവതി । സ സർവശാസ്രവേത്താ ഭവതി । സ സർവജ്ഞാനകാരീ ഭവതി । സ ആവയോർമിത്രഭൂതോ ഭവതി । ഇത്യാഹ ഭഗവാൻ ശിവഃ । നിർവികല്പേന മനസാ സ വന്ദ്യോ ഭവതി ॥
അഥ ഹൈനാം ।
മൂലാധാരേ സ്മരേദ്ദിവ്യം ത്രികോണം തേജസാം നിധിം ।
ശിഖാ ആനീയ തസ്യാഗ്നേരഥ തൂർധ്വം വ്യവസ്ഥിതാ ॥
നീലതോയദമധ്യസ്ഥാ വിദ്യുല്ലേഖേവ ഭാസ്വരാ ।
നീവാരശൂകവത്തന്വീ പീതാ ഭാസ്വത്യണൂപമാ ॥
തസ്യാഃ ശിഖായാ മധ്യേ പരമാത്മാ വ്യവസ്ഥിതഃ ।
സ ബ്രഹ്മാ സ ശിവഃ സേന്ദ്രഃ സോഽക്ഷരഃ പരമഃ സ്വരാട് ॥
സ ഏവ വിഷ്ണുഃ സ പ്രാണഃ സ കാലോഽഗ്നിഃ സ ചന്ദ്രമാഃ ।
ഇതി കുണ്ഡലിനീം ധ്യാത്വാ സർവപാപൈഃ പ്രമുച്യതേ ॥
മഹാപാതകേഭ്യഃ പൂതോ ഭൂത്വാ സർവമന്ത്രസിദ്ധിം കൃത്വാ ഭൈരവോ ഭവേത് । മഹാകാലഭൈരവോഽസ്യ ഋഷിഃ । ഉഷ്ണിക് ഛന്ദഃ കാലികാ ദേവതാ । ഹ്രീം ബീജം ഹ്രൂം ശക്തിഃ ക്രീം കീലകം അനിരുദ്ധസരസ്വതീ ദേവതാ । കവിത്വേ പാണ്ഡിത്യാർഥേ ജപേ വിനിയോഗഃ । ഇത്യേവമൃഷിച്ഛന്ദോദൈവതം ജ്ഞാത്വാ മന്ത്ര സാഫല്യമശ്നുതേ । അഥർവവിദ്യാം പ്രഥമമേകം ദ്വയം ത്രയം വാ നാമദ്വയസമ്പുടിതം കൃത്വാ യോജയേത് । ഗതിസ്തസ്യാസ്തീതി । നാന്യസ്യ ഗതിരസ്തീതി । ഓം സത്യം । ഓം തത്സത് ॥
അഥ ഹൈനം ഗുരും പരിതോഷ്യൈനം മന്ത്രരാജം ഗൃഹ്ണീയാത് । മന്ത്രരാജം ഗുരുസ്തമപി ശിഷ്യായ സത്കുലീനായ വിദ്യാഭക്തായ സുവേഷാം സ്ത്രിയം സ്പൃഷ്ട്വാ സ്വയം നിശായാം നിരുപദ്രവഃ പരിപൂജ്യ ഏകാകീ ശിവഗേഹേ ലക്ഷം തദർധം വാ ജപിത്വാ ദദ്യാത് । ഓം ഓം ഓം സത്യം സത്യം സത്യം । നാന്യപ്രകാരേണ സിദ്ധിർഭവതി । അഥാഹ വൈ കാലികാമനോസ്താരാമനോസ്ത്രിപുരാമനോഃ സർവദുർഗാമനോർവാ സ്വരൂപസിദ്ധിരേവമിതി ശിവം ॥
ഇത്യാഥർവണേ സൗഭാഗ്യകാണ്ഡേ കാലികോപനിഷത് സമാപ്താ ।
Recite with devotion and pure heart
Regular practice brings spiritual benefits