हैंహైHaindavamஹிહિં
📍
Font Size:
ಕಾಲಿಕೋಪನಿಷತ್
ಅಥ ಹೈನಂ ಬ್ರಹ್ಮರಂಧ್ರೇ ಬ್ರಹ್ಮಸ್ವರೂಪಿಣೀಮಾಪ್ನೋತಿ । ಸುಭಗಾಂ ತ್ರಿಗುಣಿತಾಂ ಮುಕ್ತಾಸುಭಗಾಂ ಕಾಮರೇಫೇಂದಿರಾಂ ಸಮಸ್ತರೂಪಿಣೀಮೇತಾನಿ ತ್ರಿಗುಣಿತಾನಿ ತದನು ಕೂರ್ಚಬೀಜಂ ವ್ಯೋಮಷಷ್ಠಸ್ವರಾಂ ಬಿಂದುಮೇಲನರೂಪಾಂ ತದ್ದ್ವಯಂ ಮಾಯಾದ್ವಯಂ ದಕ್ಷಿಣೇ ಕಾಲಿಕೇ ಚೇತ್ಯಭಿಮುಖಗತಾಂ ತದನು ಬೀಜಸಪ್ತಕಮುಚ್ಚಾರ್ಯ ಬೃಹದ್ಭಾನುಜಾಯಾಮುಚ್ಚರೇತ್ । ಸ ತು ಶಿವಮಯೋ ಭವೇತ್ । ಸರ್ವಸಿದ್ಧೀಶ್ವರೋ ಭವೇತ್ । ಗತಿಸ್ತಸ್ಯಾಸ್ತೀತಿ । ನಾನ್ಯಸ್ಯ ಗತಿರಸ್ತಾತಿ । ಸ ತು ವಾಗೀಶ್ವರಃ । ಸ ತು ನಾರೀಶ್ವರಃ । ಸ ತು ದೇವೇಶ್ವರಃ । ಸ ತು ಸರ್ವೇಶ್ವರಃ । ಅಭಿನವಜಲದಸಂಕಾಶಾ ಘನಸ್ತನೀ ಕುಟಿಲದಂಷ್ಟ್ರಾ ಶವಾಸನಾ ಕಾಲಿಕಾ ಧ್ಯೇಯಾ । ತ್ರಿಕೋಣಂ ಪಂಚಕೋಣಂ ನವಕೋಣಂ ಪದ್ಮಂ । ತಸ್ಮಿನ್ ದೇವೀ ಸರ್ವಾಂಗೇಽಭ್ಯರ್ಚ್ಯ ತದಿದಂ ಸರ್ವಾಂಗಂ ಓಂ ಕಾಲೀ ಕಪಾಲಿನೀ ಕುಲ್ಲಾ ಕುರುಕುಲ್ಲಾ ವಿರೋಧಿನೀ ವಿಪ್ರಚಿತ್ತಾ ಉಗ್ರಾ ಉಗ್ರಪ್ರಭಾ ದೀಪ್ತಾ ನೀಲಾ ಘನಾ ಬಲಾಕಾ ಮಾತ್ರಾ ಮುದ್ರಾಽಮಿತಾ ಚೈವ ಪಂಚದಶಕೋಣಗಾಃ । ಬ್ರಾಹ್ಮೀ ನಾರಾಯಣೀ ಮಾಹೇಶ್ವರೀ ಕೌಮಾರೀ ಅಪರಾಜಿತಾ ವಾರಾಹೀ ನಾರಸಿಂಹಿಕಾ ಚೇತ್ಯಷ್ಟಪತ್ರಗಾಃ । ಷೋಡಶಸ್ವರಭೇದೇನ ಪ್ರಥಮೇನ ಮಂತ್ರವಿಭಾಗಃ । ತನ್ಮೂಲೇನಾವಾಹನಂ ತೇನೈವ ಪೂಜನಂ । ಯ ಏವಂ ಮಂತ್ರರಾಜಂ ನಿಯಮೇನ ವಾ ಲಕ್ಷಮಾವರ್ತಯತಿ ಸ ಪಾಪ್ಮಾನಂ ಹಂತಿ । ಸ ಬ್ರಹ್ಮತ್ವಂ ಭಜತಿ । ಸಃ ಅಮೃತತ್ವಂ ಭಜತಿ । ಸ ಆಯುರಾರೋಗ್ಯಮೈಶ್ವರ್ಯಂ ಭಜತಿ । ಸದಾ ಪಂಚಮಕಾರೇಣ ಪೂಜಯೇತ್ । ಸದಾ ಗುರುಭಕ್ತೋ ಭವೇತ್ । ಸದಾ ದೇವಭಕ್ತೋ ಭವೇತ್ । ಧರ್ಮಿಷ್ಠತಾಂ ಪುಷ್ಟಿಮಹತವಾಚಂ ವಿಪ್ರಾ ಲಭಂತೇ । ಮಂತ್ರಜಾಪಿನೋ ಹ್ಯಾತ್ಮಾ ವಿದ್ಯಾಪ್ರಪೂರಿತೋ ಭವತಿ । ಸ ಜೀವನ್ಮುಕ್ತೋ ಭವತಿ । ಸ ಸರ್ವಶಾಸ್ತ್ರಂ ಜಾನಾತಿ । ಸ ಸರ್ವಪುಣ್ಯಕಾರೀ ಭವತಿ । ಸ ಸರ್ವಯಜ್ಞಯಾಜೀ ಭವತಿ । ರಾಜಾನೋ ದಾಸತಾಂ ಯಾಂತಿ । ಜಪ್ತ್ವಾ ಸ ಸರ್ವಮೇತಂ ಮಂತ್ರರಾಜಂ ಸ್ವಯಂ ಶಿವ ಏವಾಹಮಿತ್ಯಣಿಮಾದಿವಿಭೂತೀನಾಮೀಶ್ವರಃ ಕಾಲಿಕಾಂ ಲಭೇತ್ ॥
ಆವಯೋಃ ಪಾತ್ರಭೂತಃ ಸನ್ ಸುಕೃತೀ ತ್ಯಕ್ತಕಲ್ಮಷಃ ।
ಜೀವನ್ಮುಕ್ತಃ ಸ ವಿಜ್ಞೇಯೋ ಯಸ್ಮೈ ಲಬ್ಧಾ ಹಿ ದಕ್ಷಿಣಾ ॥
ದಶಾಂಶಂ ಹೋಮಯೇತ್ತದನು ತರ್ಪಯೇತ್ । ಅಥ ಹೈಕೇ ಯಜ್ಞಾನ್ ಕಾಮಾನದ್ವೈತಜ್ಞಾನಾದೀನನಿರುದ್ಧಸರಸ್ವತೀತಿ । ಅಥ ಹೈಷಃ ಕಾಲಿಕಾಮನುಜಾಪೀ ಯಃ ಸದಾ ಶುದ್ಧಾತ್ಮಾ ಜ್ಞಾನವೈರಾಗ್ಯಯುಕ್ತಃ ಶಾಂಭವೀದೀಕ್ಷಾಸು ರಕ್ತಃ ಶಾಕ್ತಾಸು । ಯದಿ ವಾ ಬ್ರಹ್ಮಚಾರೀ ರಾತ್ರೌ ನಗ್ನಃ ಸರ್ವದಾ ಮಧುನಾಽಶಕ್ತೋ ಮನಸಾ ಜಪಪೂಜಾದಿನಿಯಮವಾನ್ । ಯೋಷಿತ್ಪ್ರಿಯಕರೋ ಭಗೋದಕೇನ ತರ್ಪಣಂ ತೇನೈವ ಪೂಜನಂ ಕುರ್ಯಾತ್ । ಸರ್ವದಾ ಕಾಲಿಕಾರೂಪಮಾತ್ಮಾನಂ ವಿಭಾವಯೇತ್ । ಸ ಸರ್ವದಾ ಯೋಷಿದಾಸಕ್ತೋ ಭವೇತ್ । ಸ ಸರ್ವಹತ್ಯಾಂ ತರತಿ ತೇನ ಮಧುದಾನೇನ । ಅಥ ಪಂಚಮಕಾರೇಣ ಸರ್ವಮಾಯಾದಿವಿದ್ಯಾಂ ಪಶುಧನಧಾನ್ಯಂ ಸರ್ವೇಶತ್ವಂ ಚ ಕವಿತ್ವಂ ಚ । ನಾನ್ಯಃ ಪರಮಃ ಪಂಥಾ ವಿದ್ಯತೇ ಮೋಕ್ಷಾಯ ಜ್ಞಾನಾಯ ಧರ್ಮಾಧರ್ಮಾಯ । ತತ್ಸರ್ವಂ ಭೂತಂ ಭವ್ಯಂ ಯತ್ಕಿಂಚಿದ್ದೃಶ್ಯಮಾನಂ ಸ್ಥಾವರಜಂಗಮಂ ತತ್ಸರ್ವಂ ಕಾಲಿಕಾತಂತ್ರೇ ಓತಂ ಪ್ರೋತಂ ವೇದ । ಯ ಏವಂ ಮನುಜಾಪೀ ಸ ಪಾಪ್ಮಾನಂ ತರತಿ । ಸ ಭ್ರೂಣಹತ್ಯಾಂ ತರತಿ । ಸೋಽಗಮ್ಯಾಗಮನಂ ತರತಿ । ಸ ಸರ್ವಸುಖಮಾಪ್ನೋತಿ । ಸ ಸರ್ವಂ ಜಾನಾತಿ । ಸ ಸರ್ವಸಂನ್ಯಾಸೀ ಭವತಿ । ಸ ವಿರಕ್ತೋ ಭವತಿ । ಸ ಸರ್ವವೇದಾಧ್ಯಾಯೀ ಭವತಿ । ಸ ಸರ್ವಮಂತ್ರಜಾಪೀ ಭವತಿ । ಸ ಸರ್ವಶಾಸ್ರವೇತ್ತಾ ಭವತಿ । ಸ ಸರ್ವಜ್ಞಾನಕಾರೀ ಭವತಿ । ಸ ಆವಯೋರ್ಮಿತ್ರಭೂತೋ ಭವತಿ । ಇತ್ಯಾಹ ಭಗವಾನ್ ಶಿವಃ । ನಿರ್ವಿಕಲ್ಪೇನ ಮನಸಾ ಸ ವಂದ್ಯೋ ಭವತಿ ॥
ಅಥ ಹೈನಾಂ ।
ಮೂಲಾಧಾರೇ ಸ್ಮರೇದ್ದಿವ್ಯಂ ತ್ರಿಕೋಣಂ ತೇಜಸಾಂ ನಿಧಿಂ ।
ಶಿಖಾ ಆನೀಯ ತಸ್ಯಾಗ್ನೇರಥ ತೂರ್ಧ್ವಂ ವ್ಯವಸ್ಥಿತಾ ॥
ನೀಲತೋಯದಮಧ್ಯಸ್ಥಾ ವಿದ್ಯುಲ್ಲೇಖೇವ ಭಾಸ್ವರಾ ।
ನೀವಾರಶೂಕವತ್ತನ್ವೀ ಪೀತಾ ಭಾಸ್ವತ್ಯಣೂಪಮಾ ॥
ತಸ್ಯಾಃ ಶಿಖಾಯಾ ಮಧ್ಯೇ ಪರಮಾತ್ಮಾ ವ್ಯವಸ್ಥಿತಃ ।
ಸ ಬ್ರಹ್ಮಾ ಸ ಶಿವಃ ಸೇಂದ್ರಃ ಸೋಽಕ್ಷರಃ ಪರಮಃ ಸ್ವರಾಟ್ ॥
ಸ ಏವ ವಿಷ್ಣುಃ ಸ ಪ್ರಾಣಃ ಸ ಕಾಲೋಽಗ್ನಿಃ ಸ ಚಂದ್ರಮಾಃ ।
ಇತಿ ಕುಂಡಲಿನೀಂ ಧ್ಯಾತ್ವಾ ಸರ್ವಪಾಪೈಃ ಪ್ರಮುಚ್ಯತೇ ॥
ಮಹಾಪಾತಕೇಭ್ಯಃ ಪೂತೋ ಭೂತ್ವಾ ಸರ್ವಮಂತ್ರಸಿದ್ಧಿಂ ಕೃತ್ವಾ ಭೈರವೋ ಭವೇತ್ । ಮಹಾಕಾಲಭೈರವೋಽಸ್ಯ ಋಷಿಃ । ಉಷ್ಣಿಕ್ ಛಂದಃ ಕಾಲಿಕಾ ದೇವತಾ । ಹ್ರೀಂ ಬೀಜಂ ಹ್ರೂಂ ಶಕ್ತಿಃ ಕ್ರೀಂ ಕೀಲಕಂ ಅನಿರುದ್ಧಸರಸ್ವತೀ ದೇವತಾ । ಕವಿತ್ವೇ ಪಾಂಡಿತ್ಯಾರ್ಥೇ ಜಪೇ ವಿನಿಯೋಗಃ । ಇತ್ಯೇವಮೃಷಿಚ್ಛಂದೋದೈವತಂ ಜ್ಞಾತ್ವಾ ಮಂತ್ರ ಸಾಫಲ್ಯಮಶ್ನುತೇ । ಅಥರ್ವವಿದ್ಯಾಂ ಪ್ರಥಮಮೇಕಂ ದ್ವಯಂ ತ್ರಯಂ ವಾ ನಾಮದ್ವಯಸಂಪುಟಿತಂ ಕೃತ್ವಾ ಯೋಜಯೇತ್ । ಗತಿಸ್ತಸ್ಯಾಸ್ತೀತಿ । ನಾನ್ಯಸ್ಯ ಗತಿರಸ್ತೀತಿ । ಓಂ ಸತ್ಯಂ । ಓಂ ತತ್ಸತ್ ॥
ಅಥ ಹೈನಂ ಗುರುಂ ಪರಿತೋಷ್ಯೈನಂ ಮಂತ್ರರಾಜಂ ಗೃಹ್ಣೀಯಾತ್ । ಮಂತ್ರರಾಜಂ ಗುರುಸ್ತಮಪಿ ಶಿಷ್ಯಾಯ ಸತ್ಕುಲೀನಾಯ ವಿದ್ಯಾಭಕ್ತಾಯ ಸುವೇಷಾಂ ಸ್ತ್ರಿಯಂ ಸ್ಪೃಷ್ಟ್ವಾ ಸ್ವಯಂ ನಿಶಾಯಾಂ ನಿರುಪದ್ರವಃ ಪರಿಪೂಜ್ಯ ಏಕಾಕೀ ಶಿವಗೇಹೇ ಲಕ್ಷಂ ತದರ್ಧಂ ವಾ ಜಪಿತ್ವಾ ದದ್ಯಾತ್ । ಓಂ ಓಂ ಓಂ ಸತ್ಯಂ ಸತ್ಯಂ ಸತ್ಯಂ । ನಾನ್ಯಪ್ರಕಾರೇಣ ಸಿದ್ಧಿರ್ಭವತಿ । ಅಥಾಹ ವೈ ಕಾಲಿಕಾಮನೋಸ್ತಾರಾಮನೋಸ್ತ್ರಿಪುರಾಮನೋಃ ಸರ್ವದುರ್ಗಾಮನೋರ್ವಾ ಸ್ವರೂಪಸಿದ್ಧಿರೇವಮಿತಿ ಶಿವಂ ॥
ಇತ್ಯಾಥರ್ವಣೇ ಸೌಭಾಗ್ಯಕಾಂಡೇ ಕಾಲಿಕೋಪನಿಷತ್ ಸಮಾಪ್ತಾ ।
Recite with devotion and pure heart
Regular practice brings spiritual benefits