nāmasmaraṇādanyōpāyaṃ na hi paśyāmō bhavataraṇē । rāma harē kṛṣṇa harē tava nāma vadāmi sadā nṛharē ॥ vēdōddhāravichāramatē sōmakadānavasaṃharaṇē । mīnākāraśarīra namō bhaktaṃ tē paripālaya mām ॥ 1 ॥ manthānāchaladhāraṇahētō dēvāsura paripāla vibhō । kūrmākāraśarīra namō bhaktaṃ tē paripālaya mām ॥ 2 ॥ bhūchōrakahara puṇyamatē krīḍōddhṛtabhūdēvaharē । krōḍākāraśarīra namō bhaktaṃ tē paripālaya mām ॥ 3 ॥ hiraṇyakaśipuchChēdanahētō prahlādā'bhayadhāraṇahētō । narasiṃhāchyutarūpa namō bhaktaṃ tē paripālaya mām ॥ 4 ॥ bhavabandhanahara vitatamatē pādōdakavihatāghatatē । vaṭupaṭuvēṣamanōjña namō bhaktaṃ tē paripālaya mām ॥ 5 ॥ kṣitipativaṃśakṣayakaramūrtē kṣitipatikartāharamūrtē । bhṛgukularāma parēśa namō bhaktaṃ tē paripālaya mām ॥ 6 ॥ sītāvallabha dāśarathē daśarathanandana lōkagurō । rāvaṇamardana rāma namō bhaktaṃ tē paripālaya mām ॥ 7 ॥ kṛṣṇānanta kṛpājaladhē kaṃsārē kamalēśa harē । kāḻiyamardana lōkagurō bhaktaṃ tē paripālaya mām ॥ 8 ॥ dānavasatimānāpahara tripuravijayamardanarūpa । buddhajñāya cha bauddha namō bhaktaṃ tē paripālaya mām ॥ 9 ॥ śiṣṭajanāvana duṣṭahara khagaturagōttamavāhana tē । kalkirūpaparipāla namō bhaktaṃ tē paripālaya mām ॥ 10 ॥ nāmasmaraṇādanyōpāyaṃ na hi paśyāmō bhavataraṇē । rāma harē kṛṣṇa harē tava nāma vadāmi sadā nṛharē ॥ iti daśāvatāra stutiḥ ।