മുഖേ ചാരുഹാസം കരേ ശംഖചക്രം ഗലേ രത്നമാലാം സ്വയം മേഘവർണം । തഥാ ദിവ്യശസ്ത്രം പ്രിയം പീതവസ്ത്രം ധരന്തം മുരാരിം ഭജേ വേങ്കടേശം ॥ 1 ॥ സദാഭീതിഹസ്തം മുദാജാനുപാണിം ലസന്മേഖലം രത്നശോഭാപ്രകാശം । ജഗത്പാദപദ്മം മഹത്പദ്മനാഭം ധരന്തം മുരാരിം ഭജേ വേങ്കടേശം ॥ 2 ॥ അഹോ നിർമലം നിത്യമാകാശരൂപം ജഗത്കാരണം സർവവേദാന്തവേദ്യം । വിഭും താപസം സച്ചിദാനന്ദരൂപം ധരന്തം മുരാരിം ഭജേ വേങ്കടേശം ॥ 3 ॥ ശ്രിയാ വിഷ്ടിതം വാമപക്ഷപ്രകാശം സുരൈർവന്ദിതം ബ്രഹ്മരുദ്രസ്തുതം തം । ശിവം ശങ്കരം സ്വസ്തിനിർവാണരൂപം ധരന്തം മുരാരിം ഭജേ വേങ്കടേശം ॥ 4 ॥ മഹായോഗസാദ്ധ്യം പരിഭ്രാജമാനം ചിരം വിശ്വരൂപം സുരേശം മഹേശം । അഹോ ശാന്തരൂപം സദാധ്യാനഗമ്യം ധരന്തം മുരാരിം ഭജേ വേങ്കടേശം ॥ 5 ॥ അഹോ മത്സ്യരൂപം തഥാ കൂർമരൂപം മഹാക്രോഡരൂപം തഥാ നാരസിംഹം । ഭജേ കുബ്ജരൂപം വിഭും ജാമദഗ്ന്യം ധരന്തം മുരാരിം ഭജേ വേങ്കടേശം ॥ 6 ॥ അഹോ ബുദ്ധരൂപം തഥാ കൽകിരൂപം പ്രഭും ശാശ്വതം ലോകരക്ഷാമഹന്തം । പൃഥക്കാലലബ്ധാത്മലീലാവതാരം ധരന്തം മുരാരിം ഭജേ വേങ്കടേശം ॥ 7 ॥ ഇതി ശ്രീവേങ്കടേശഭുജംഗം സമ്പൂർണം ।