प्रथमं श्रीधरं विद्याद्द्वितीयं रघुनायकम् । तृतीयं रामचन्द्रं च चतुर्थं रावणान्तकम् ॥ 1 ॥ पञ्चमं लोकपूज्यं च षष्ठमं जानकीपतिम् । सप्तमं वासुदेवं च श्रीरामं चाऽष्टमं तथा ॥ 2 ॥ नवमं जलदश्यामं दशमं लक्ष्मणाग्रजम् । एकादशं च गोविन्दं द्वादशं सेतुबन्धनम् ॥ 3 ॥ द्वादशैतानि नामानि यः पठेच्छ्रद्धयान्वितः । अर्धरात्रे तु द्वादश्यां कुष्ठदारिद्र्यनाशनम् ॥ 4 ॥ अरण्ये चैव सङ्ग्रामे अग्नौ भयनिवारणम् । ब्रह्महत्या सुरापानं गोहत्यादि निवारणम् ॥ 5 ॥ सप्तवारं पठेन्नित्यं सर्वारिष्टनिवारणम् । ग्रहणे च जले स्थित्वा नदीतीरे विशेषतः । अश्वमेधशतं पुण्यं ब्रह्मलोकं गमिष्यति ॥ 6 ॥ इति श्री स्कान्दपुराणे उत्तरखण्डे श्री उमामहेश्वरसंवादे श्री राम द्वादशनामस्तोत्रम् ।