అస్య శ్రీ శివకవచ స్తోత్ర మహామంత్రస్య । ఋషభ-యోగీశ్వర ఋషిః । అనుష్టుప్ ఛందః । శ్రీ-సాంబసదాశివో దేవతా । ఓం బీజం । నమః శక్తిః । శివాయేతి కీలకం । సాంబసదాశివప్రీత్యర్థే జపే వినియోగః ॥ కరన్యాసః – ఓం సదాశివాయ అంగుష్ఠాభ్యాం నమః । నం గంగాధరాయ తర్జనీభ్యాం నమః । మం మృత్యుంజయాయ మధ్యమాభ్యాం నమః । శిం శూలపాణయే అనామికాభ్యాం నమః । వాం పినాకపాణయే కనిష్ఠికాభ్యాం నమః । యం ఉమాపతయే కరతలకరపృష్ఠాభ్యాం నమః । హృదయాది అంగన్యాసః – ఓం సదాశివాయ హృదయాయ నమః । నం గంగాధరాయ శిరసే స్వాహా । మం మృత్యుంజయాయ శిఖాయై వషట్ । శిం శూలపాణయే కవచాయ హుం । వాం పినాకపాణయే నేత్రత్రయాయ వౌషట్ । యం ఉమాపతయే అస్త్రాయ ఫట్ । భూర్భువస్సువరోమితి దిగ్బంధః ॥ ధ్యానం – వజ్రదంష్ట్రం త్రినయనం కాలకంఠ మరిందమం । సహస్రకర-మత్యుగ్రం వందే శంభుం ఉమాపతిం ॥ రుద్రాక్ష-కంకణ-లసత్కర-దండయుగ్మః పాలాంతరా-లసిత-భస్మధృత-త్రిపుండ్రః । పంచాక్షరం పరిపఠన్ వరమంత్రరాజం ధ్యాయన్ సదా పశుపతిం శరణం వ్రజేథాః ॥ అతః పరం సర్వపురాణ-గుహ్యం నిఃశేష-పాపౌఘహరం పవిత్రం । జయప్రదం సర్వ-విపత్ప్రమోచనం వక్ష్యామి శైవం కవచం హితాయ తే ॥ పంచపూజా – లం పృథివ్యాత్మనే గంధం సమర్పయామి । హం ఆకాశాత్మనే పుష్పైః పూజయామి । యం వాయ్వాత్మనే ధూపం ఆఘ్రాపయామి । రం అగ్న్యాత్మనే దీపం దర్శయామి । వం అమృతాత్మనే అమృతం మహా-నైవేద్యం నివేదయామి । సం సర్వాత్మనే సర్వోపచార-పూజాం సమర్పయామి ॥ మంత్రః ॥ ఋషభ ఉవాచ – నమస్కృత్య మహాదేవం విశ్వ-వ్యాపిన-మీశ్వరం । వక్ష్యే శివమయం వర్మ సర్వరక్షాకరం నృణాం ॥ 1 ॥ శుచౌ దేశే సమాసీనో యథావత్కల్పితాసనః । జితేంద్రియో జితప్రాణ-శ్చింతయేచ్ఛివమవ్యయం ॥ 2 ॥ హృత్పుండరీకాంతరసన్నివిష్టం స్వతేజసా వ్యాప్త-నభోఽవకాశం । అతీంద్రియం సూక్ష్మమనంతమాద్యం ధ్యాయేత్పరానందమయం మహేశం ॥ 3 ॥ ధ్యానావధూతాఖిలకర్మబంధ- -శ్చిరం చిదానందనిమగ్నచేతాః । షడక్షరన్యాససమాహితాత్మా శైవేన కుర్యాత్కవచేన రక్షాం ॥ 4 ॥ మాం పాతు దేవోఽఖిలదేవతాత్మా సంసారకూపే పతితం గభీరే । తన్నామ దివ్యం వరమంత్రమూలం ధునోతు మే సర్వమఘం హృదిస్థం ॥ 5 ॥ సర్వత్ర మాం రక్షతు విశ్వమూర్తి- -ర్జ్యోతి-ర్మయానందఘనశ్చిదాత్మా । అణోరణీయానురుశక్తిరేకః స ఈశ్వరః పాతు భయాదశేషాత్ ॥ 6 ॥ యో భూస్వరూపేణ బిభర్తి విశ్వం పాయాత్స భూమేర్గిరిశోఽష్టమూర్తిః । యోఽపాం స్వరూపేణ నృణాం కరోతి సంజీవనం సోఽవతు మాం జలేభ్యః ॥ 7 ॥ కల్పావసానే భువనాని దగ్ధ్వా సర్వాణి యో నృత్యతి భూరిలీలః । స కాలరుద్రోఽవతు మాం దవాగ్నే- -ర్వాత్యాదిభీతే-రఖిలాచ్చ తాపాత్ ॥ 8 ॥ ప్రదీప్త-విద్యుత్కనకావభాసో విద్యావరాభీతి-కుఠారపాణిః । చతుర్ముఖస్తత్పురుషస్త్రినేత్రః ప్రాచ్యాం స్థితో రక్షతు మామజస్రం ॥ 9 ॥ కుఠార ఖేటాంకుశపాశశూల కపాలపాశాక్ష గుణాందధానః । చతుర్ముఖో నీల-రుచిస్త్రినేత్రః పాయాదఘోరో దిశి దక్షిణస్యాం ॥ 10 ॥ కుందేందు-శంఖ-స్ఫటికావభాసో వేదాక్షమాలా-వరదాభయాంకః । త్ర్యక్షశ్చతుర్వక్త్ర ఉరుప్రభావః సద్యోఽధిజాతోఽవతు మాం ప్రతీచ్యాం ॥ 11 ॥ వరాక్ష-మాలాభయటంక-హస్తః సరోజ-కింజల్కసమానవర్ణః । త్రిలోచన-శ్చారుచతుర్ముఖో మాం పాయాదుదీచ్యాం దిశి వామదేవః ॥ 12 ॥ వేదాభయేష్టాంకుశటంకపాశ- -కపాలఢక్కాక్షర-శూలపాణిః । సితద్యుతిః పంచముఖోఽవతాన్మా- -మీశాన ఊర్ధ్వం పరమప్రకాశః ॥ 13 ॥ మూర్ధానమవ్యాన్మమ చంద్రమౌలిః ఫాలం మమావ్యాదథ ఫాలనేత్రః । నేత్రే మమావ్యాద్భగనేత్రహారీ నాసాం సదా రక్షతు విశ్వనాథః ॥ 14 ॥ పాయాచ్ఛ్రుతీ మే శ్రుతిగీతకీర్తిః కపోలమవ్యాత్సతతం కపాలీ । వక్త్రం సదా రక్షతు పంచవక్త్రో జిహ్వాం సదా రక్షతు వేదజిహ్వః ॥ 15 ॥ కంఠం గిరీశోఽవతు నీలకంఠః పాణిద్వయం పాతు పినాకపాణిః । దోర్మూలమవ్యాన్మమ ధర్మబాహుః వక్షఃస్థలం దక్షమఖాంతకోఽవ్యాత్ ॥ 16 ॥ మమోదరం పాతు గిరీంద్రధన్వా మధ్యం మమావ్యాన్మదనాంతకారీ । హేరంబతాతో మమ పాతు నాభిం పాయాత్కటిం ధూర్జటిరీశ్వరో మే ॥ 17 ॥ ఊరుద్వయం పాతు కుబేరమిత్రో జానుద్వయం మే జగదీశ్వరోఽవ్యాత్ । జంఘాయుగం పుంగవకేతురవ్యా- -త్పాదౌ మమావ్యాత్సురవంద్యపాదః ॥ 18 ॥ మహేశ్వరః పాతు దినాదియామే మాం మధ్యయామేఽవతు వామదేవః । త్రిలోచనః పాతు తృతీయయామే వృషధ్వజః పాతు దినాంత్యయామే ॥ 19 ॥ పాయాన్నిశాదౌ శశిశేఖరో మాం గంగాధరో రక్షతు మాం నిశీథే । గౌరీపతిః పాతు నిశావసానే మృత్యుంజయో రక్షతు సర్వకాలం ॥ 20 ॥ అంతఃస్థితం రక్షతు శంకరో మాం స్థాణుః సదా పాతు బహిఃస్థితం మాం । తదంతరే పాతు పతిః పశూనాం సదాశివో రక్షతు మాం సమంతాత్ ॥ 21 ॥ తిష్ఠంత-మవ్యాద్భువనైకనాథః పాయాద్వ్రజంతం ప్రమథాధినాథః । వేదాంతవేద్యోఽవతు మాం నిషణ్ణం మామవ్యయః పాతు శివః శయానం ॥ 22 ॥ మార్గేషు మాం రక్షతు నీలకంఠః శైలాది-దుర్గేషు పురత్రయారిః । అరణ్యవాసాది-మహాప్రవాసే పాయాన్మృగవ్యాధ ఉదారశక్తిః ॥ 23 ॥ కల్పాంత-కాలోగ్ర-పటుప్రకోపః స్ఫుటాట్ట-హాసోచ్చలితాండ-కోశః । ఘోరారి-సేనార్ణవదుర్నివార- -మహాభయాద్రక్షతు వీరభద్రః ॥ 24 ॥ పత్త్యశ్వమాతంగ-రథావరూధినీ- -సహస్ర-లక్షాయుత-కోటిభీషణం । అక్షౌహిణీనాం శతమాతతాయినాం ఛింద్యాన్మృడో ఘోరకుఠారధారయా ॥ 25 ॥ నిహంతు దస్యూన్ప్రలయానలార్చి- -ర్జ్వలత్త్రిశూలం త్రిపురాంతకస్య । శార్దూల-సింహర్క్షవృకాది-హింస్రాన్ సంత్రాసయత్వీశ-ధనుః పినాకః ॥ 26 ॥ దుస్స్వప్న దుశ్శకున దుర్గతి దౌర్మనస్య దుర్భిక్ష దుర్వ్యసన దుస్సహ దుర్యశాంసి । ఉత్పాత-తాప-విషభీతి-మసద్గ్రహార్తిం వ్యాధీంశ్చ నాశయతు మే జగతామధీశః ॥ 27 ॥ ఓం నమో భగవతే సదాశివాయ సకల-తత్త్వాత్మకాయ సర్వ-మంత్ర-స్వరూపాయ సర్వ-యంత్రాధిష్ఠితాయ సర్వ-తంత్ర-స్వరూపాయ సర్వ-తత్త్వ-విదూరాయ బ్రహ్మ-రుద్రావతారిణే-నీలకంఠాయ పార్వతీ-మనోహరప్రియాయ సోమ-సూర్యాగ్ని-లోచనాయ భస్మోద్ధూలిత-విగ్రహాయ మహామణి-ముకుట-ధారణాయ మాణిక్య-భూషణాయ సృష్టిస్థితి-ప్రలయకాల-రౌద్రావతారాయ దక్షాధ్వర-ధ్వంసకాయ మహాకాల-భేదనాయ మూలధారైక-నిలయాయ తత్వాతీతాయ గంగాధరాయ సర్వ-దేవాది-దేవాయ షడాశ్రయాయ వేదాంత-సారాయ త్రివర్గ-సాధనాయ అనంతకోటి-బ్రహ్మాండ-నాయకాయ అనంత-వాసుకి-తక్షక-కర్కోటక-శంఖ-కులిక-పద్మ-మహాపద్మేతి-అష్ట-మహా-నాగ-కులభూషణాయ ప్రణవస్వరూపాయ చిదాకాశాయ ఆకాశ-దిక్-స్వరూపాయ గ్రహ-నక్షత్ర-మాలినే సకలాయ కలంక-రహితాయ సకల-లోకైక-కర్త్రే సకల-లోకైక-భర్త్రే సకల-లోకైక-సంహర్త్రే సకల-లోకైక-గురవే సకల-లోకైక-సాక్షిణే సకల-నిగమగుహ్యాయ సకల-వేదాంత-పారగాయ సకల-లోకైక-వరప్రదాయ సకల-లోకైక-శంకరాయ సకల-దురితార్తి-భంజనాయ సకల-జగదభయంకరాయ శశాంక-శేఖరాయ శాశ్వత-నిజావాసాయ నిరాకారాయ నిరాభాసాయ నిరామయాయ నిర్మలాయ నిర్లోభాయ నిర్మదాయ నిశ్చింతాయ నిరహంకారాయ నిరంకుశాయ నిష్కలంకాయ నిర్గుణాయ నిష్కామాయ నిరూపప్లవాయ నిరవధ్యాయ నిరంతరాయ నిరుపద్రవాయ నిరవద్యాయ నిరంతరాయ నిష్కారణాయ నిరాతంకాయ నిష్ప్రపంచాయ నిస్సంగాయ నిర్ద్వంద్వాయ నిరాధారాయ నీరాగాయ నిశ్క్రోధాయ నిర్లోభాయ నిష్పాపాయ నిర్వికల్పాయ నిర్భేదాయ నిష్క్రియాయ నిస్తులాయ నిశ్శంశయాయ నిరంజనాయ నిరుపమ-విభవాయ నిత్య-శుద్ధ-బుద్ధ-ముక్త-పరిపూర్ణ-సచ్చిదానందాద్వయాయ పరమ-శాంత-స్వరూపాయ పరమ-శాంత-ప్రకాశాయ తేజోరూపాయ తేజోమయాయ తేజోఽధిపతయే జయ జయ రుద్ర మహారుద్ర మహా-రౌద్ర భద్రావతార మహా-భైరవ కాల-భైరవ కల్పాంత-భైరవ కపాల-మాలాధర ఖట్వాంగ-చర్మ-ఖడ్గ-ధర పాశాంకుశ-డమరూశూల-చాప-బాణ-గదా-శక్తి-భింది- పాల-తోమర-ముసల-భుశుండీ-ముద్గర-పాశ-పరిఘ-శతఘ్నీ-చక్రాద్యాయుధ-భీషణాకార సహస్ర-ముఖ దంష్ట్రాకరాల-వదన వికటాట్టహాస విస్ఫాతిత-బ్రహ్మాండ-మండల-నాగేంద్రకుండల నాగేంద్రహార నాగేంద్రవలయ నాగేంద్రచర్మధర నాగేంద్రనికేతన మృత్యుంజయ త్ర్యంబక త్రిపురాంతక విశ్వరూప విరూపాక్ష విశ్వేశ్వర వృషభవాహన విషవిభూషణ విశ్వతోముఖ సర్వతోముఖ మాం రక్ష రక్ష జ్వల జ్వల ప్రజ్వల ప్రజ్వల మహామృత్యుభయం శమయ శమయ అపమృత్యుభయం నాశయ నాశయ రోగభయం ఉత్సాదయ ఉత్సాదయ విషసర్పభయం శమయ శమయ చోరాన్ మారయ మారయ మమ శత్రూన్ ఉచ్చాటయ ఉచ్చాటయ త్రిశూలేన విదారయ విదారయ కుఠారేణ భింధి భింధి ఖడ్గేన ఛింద్ది ఛింద్ది ఖట్వాంగేన విపోధయ విపోధయ మమ పాపం శోధయ శోధయ ముసలేన నిష్పేషయ నిష్పేషయ బాణైః సంతాడయ సంతాడయ యక్ష రక్షాంసి భీషయ భీషయ అశేష భూతాన్ విద్రావయ విద్రావయ కూష్మాండ-భూత-బేతాల-మారీగణ-బ్రహ్మరాక్షస-గణాన్ సంత్రాసయ సంత్రాసయ మమ అభయం కురు కురు నరక-మహాభయాన్ మాం ఉద్ధర ఉద్ధర విత్రస్తం మాం ఆశ్వాసయ ఆశ్వాసయ అమృత-కటాక్ష-వీక్షణేన మాం ఆలోకయ ఆలోకయ సంజీవయ సంజీవయ క్షుత్తృష్ణార్తం మాం ఆప్యాయయ ఆప్యాయయ దుఃఖాతురం మాం ఆనందయ ఆనందయ శివకవచేన మాం ఆచ్ఛాదయ ఆచ్ఛాదయ హర హర హర హర మృత్యుంజయ త్ర్యంబక సదాశివ పరమశివ నమస్తే నమస్తే నమస్తే నమః ॥ హృదయాది న్యాసః – ఓం సదాశివాయ హృదయాయ నమః । నం గంగాధరాయ శిరసే స్వాహా । మం మృత్యుంజయాయ శిఖాయై వషట్ । శిం శూలపాణయే కవచాయ హుం । వాం పినాకపాణయే నేత్రత్రయాయ వౌషట్ । యం ఉమాపతయే అస్త్రాయ ఫట్ । భూర్భువస్సువరోమితి దిగ్విమోకః ॥ ధ్యానం – వజ్రదంష్ట్రం త్రినయనం కాలకంఠ మరిందమం । సహస్రకర-మత్యుగ్రం వందే శంభుం ఉమాపతిం ॥ రుద్రాక్ష-కంకణ-లసత్కర-దండయుగ్మః పాలాంతరా-లసిత-భస్మధృత-త్రిపుండ్రః । పంచాక్షరం పరిపఠన్ వరమంత్రరాజం ధ్యాయన్ సదా పశుపతిం శరణం వ్రజేథాః ॥ అతః పరం సర్వపురాణ-గుహ్యం నిఃశేష-పాపౌఘహరం పవిత్రం । జయప్రదం సర్వ-విపత్ప్రమోచనం వక్ష్యామి శైవం కవచం హితాయ తే ॥ పంచపూజా – లం పృథివ్యాత్మనే గంధం సమర్పయామి । హం ఆకాశాత్మనే పుష్పైః పూజయామి । యం వాయ్వాత్మనే ధూపం ఆఘ్రాపయామి । రం అగ్న్యాత్మనే దీపం దర్శయామి । వం అమృతాత్మనే అమృతం మహా-నైవేద్యం నివేదయామి । సం సర్వాత్మనే సర్వోపచార-పూజాం సమర్పయామి ॥ ఫలశ్రుతిః ॥ ఋషభ ఉవాచ – ఇత్యేతత్కవచం శైవం వరదం వ్యాహృతం మయా । సర్వ-బాధా-ప్రశమనం రహస్యం సర్వదేహినాం ॥ 1 ॥ యః సదా ధారయేన్మర్త్యః శైవం కవచముత్తమం । న తస్య జాయతే క్వాపి భయం శంభోరనుగ్రహాత్ ॥ 2 ॥ క్షీణాయు-ర్మృత్యుమాపన్నో మహారోగహతోఽపి వా । సద్యః సుఖమవాప్నోతి దీర్ఘమాయుశ్చ విందతి ॥ 3 ॥ సర్వదారిద్ర్యశమనం సౌమాంగల్య-వివర్ధనం । యో ధత్తే కవచం శైవం స దేవైరపి పూజ్యతే ॥ 4 ॥ మహాపాతక-సంఘాతైర్ముచ్యతే చోపపాతకైః । దేహాంతే శివమాప్నోతి శివ-వర్మానుభావతః ॥ 5 ॥ త్వమపి శ్రద్ధయా వత్స శైవం కవచముత్తమం । ధారయస్వ మయా దత్తం సద్యః శ్రేయో హ్యవాప్స్యసి ॥ 6 ॥ సూత ఉవాచ – ఇత్యుక్త్వా ఋషభో యోగీ తస్మై పార్థివ-సూనవే । దదౌ శంఖం మహారావం ఖడ్గం చారినిషూదనం ॥ 7 ॥ పునశ్చ భస్మ సమ్మంత్ర్య తదంగం సర్వతోఽస్పృశత్ । గజానాం షట్సహస్రస్య ద్విగుణం చ బలం దదౌ ॥ 8 ॥ భస్మప్రభావాత్సంప్రాప్య బలైశ్వర్యధృతిస్మృతిః । స రాజపుత్రః శుశుభే శరదర్క ఇవ శ్రియా ॥ 9 ॥ తమాహ ప్రాంజలిం భూయః స యోగీ రాజనందనం । ఏష ఖడ్గో మయా దత్తస్తపోమంత్రానుభావతః ॥ 10 ॥ శితధారమిమం ఖడ్గం యస్మై దర్శయసి స్ఫుటం । స సద్యో మ్రియతే శత్రుః సాక్షాన్మృత్యురపి స్వయం ॥ 11 ॥ అస్య శంఖస్య నిహ్రాదం యే శృణ్వంతి తవాహితాః । తే మూర్ఛితాః పతిష్యంతి న్యస్తశస్త్రా విచేతనాః ॥ 12 ॥ ఖడ్గశంఖావిమౌ దివ్యౌ పరసైన్యవినాశినౌ । ఆత్మసైన్యస్వపక్షాణాం శౌర్యతేజోవివర్ధనౌ ॥ 13 ॥ ఏతయోశ్చ ప్రభావేన శైవేన కవచేన చ । ద్విషట్సహస్రనాగానాం బలేన మహతాపి చ ॥ 14 ॥ భస్మధారణసామర్థ్యాచ్ఛత్రుసైన్యం విజేష్యసి । ప్రాప్య సింహాసనం పైత్ర్యం గోప్తాసి పృథివీమిమాం ॥ 15 ॥ ఇతి భద్రాయుషం సమ్యగనుశాస్య సమాతృకం । తాభ్యాం సంపూజితః సోఽథ యోగీ స్వైరగతిర్యయౌ ॥ 16 ॥ ఇతి శ్రీ స్కాందపురాణే తృతీయే బ్రహ్మోత్తరఖండే శివకవచకథనం నామ ద్వాదశోఽధ్యాయః ॥