ಅಸ್ಯ ಶ್ರೀ ಶಿವಕವಚ ಸ್ತೋತ್ರ ಮಹಾಮಂತ್ರಸ್ಯ । ಋಷಭ-ಯೋಗೀಶ್ವರ ಋಷಿಃ । ಅನುಷ್ಟುಪ್ ಛಂದಃ । ಶ್ರೀ-ಸಾಂಬಸದಾಶಿವೋ ದೇವತಾ । ಓಂ ಬೀಜಂ । ನಮಃ ಶಕ್ತಿಃ । ಶಿವಾಯೇತಿ ಕೀಲಕಂ । ಸಾಂಬಸದಾಶಿವಪ್ರೀತ್ಯರ್ಥೇ ಜಪೇ ವಿನಿಯೋಗಃ ॥ ಕರನ್ಯಾಸಃ – ಓಂ ಸದಾಶಿವಾಯ ಅಂಗುಷ್ಠಾಭ್ಯಾಂ ನಮಃ । ನಂ ಗಂಗಾಧರಾಯ ತರ್ಜನೀಭ್ಯಾಂ ನಮಃ । ಮಂ ಮೃತ್ಯುಂಜಯಾಯ ಮಧ್ಯಮಾಭ್ಯಾಂ ನಮಃ । ಶಿಂ ಶೂಲಪಾಣಯೇ ಅನಾಮಿಕಾಭ್ಯಾಂ ನಮಃ । ವಾಂ ಪಿನಾಕಪಾಣಯೇ ಕನಿಷ್ಠಿಕಾಭ್ಯಾಂ ನಮಃ । ಯಂ ಉಮಾಪತಯೇ ಕರತಲಕರಪೃಷ್ಠಾಭ್ಯಾಂ ನಮಃ । ಹೃದಯಾದಿ ಅಂಗನ್ಯಾಸಃ – ಓಂ ಸದಾಶಿವಾಯ ಹೃದಯಾಯ ನಮಃ । ನಂ ಗಂಗಾಧರಾಯ ಶಿರಸೇ ಸ್ವಾಹಾ । ಮಂ ಮೃತ್ಯುಂಜಯಾಯ ಶಿಖಾಯೈ ವಷಟ್ । ಶಿಂ ಶೂಲಪಾಣಯೇ ಕವಚಾಯ ಹುಂ । ವಾಂ ಪಿನಾಕಪಾಣಯೇ ನೇತ್ರತ್ರಯಾಯ ವೌಷಟ್ । ಯಂ ಉಮಾಪತಯೇ ಅಸ್ತ್ರಾಯ ಫಟ್ । ಭೂರ್ಭುವಸ್ಸುವರೋಮಿತಿ ದಿಗ್ಬಂಧಃ ॥ ಧ್ಯಾನಂ – ವಜ್ರದಂಷ್ಟ್ರಂ ತ್ರಿನಯನಂ ಕಾಲಕಂಠ ಮರಿಂದಮಂ । ಸಹಸ್ರಕರ-ಮತ್ಯುಗ್ರಂ ವಂದೇ ಶಂಭುಂ ಉಮಾಪತಿಂ ॥ ರುದ್ರಾಕ್ಷ-ಕಂಕಣ-ಲಸತ್ಕರ-ದಂಡಯುಗ್ಮಃ ಪಾಲಾಂತರಾ-ಲಸಿತ-ಭಸ್ಮಧೃತ-ತ್ರಿಪುಂಡ್ರಃ । ಪಂಚಾಕ್ಷರಂ ಪರಿಪಠನ್ ವರಮಂತ್ರರಾಜಂ ಧ್ಯಾಯನ್ ಸದಾ ಪಶುಪತಿಂ ಶರಣಂ ವ್ರಜೇಥಾಃ ॥ ಅತಃ ಪರಂ ಸರ್ವಪುರಾಣ-ಗುಹ್ಯಂ ನಿಃಶೇಷ-ಪಾಪೌಘಹರಂ ಪವಿತ್ರಂ । ಜಯಪ್ರದಂ ಸರ್ವ-ವಿಪತ್ಪ್ರಮೋಚನಂ ವಕ್ಷ್ಯಾಮಿ ಶೈವಂ ಕವಚಂ ಹಿತಾಯ ತೇ ॥ ಪಂಚಪೂಜಾ – ಲಂ ಪೃಥಿವ್ಯಾತ್ಮನೇ ಗಂಧಂ ಸಮರ್ಪಯಾಮಿ । ಹಂ ಆಕಾಶಾತ್ಮನೇ ಪುಷ್ಪೈಃ ಪೂಜಯಾಮಿ । ಯಂ ವಾಯ್ವಾತ್ಮನೇ ಧೂಪಂ ಆಘ್ರಾಪಯಾಮಿ । ರಂ ಅಗ್ನ್ಯಾತ್ಮನೇ ದೀಪಂ ದರ್ಶಯಾಮಿ । ವಂ ಅಮೃತಾತ್ಮನೇ ಅಮೃತಂ ಮಹಾ-ನೈವೇದ್ಯಂ ನಿವೇದಯಾಮಿ । ಸಂ ಸರ್ವಾತ್ಮನೇ ಸರ್ವೋಪಚಾರ-ಪೂಜಾಂ ಸಮರ್ಪಯಾಮಿ ॥ ಮಂತ್ರಃ ॥ ಋಷಭ ಉವಾಚ – ನಮಸ್ಕೃತ್ಯ ಮಹಾದೇವಂ ವಿಶ್ವ-ವ್ಯಾಪಿನ-ಮೀಶ್ವರಂ । ವಕ್ಷ್ಯೇ ಶಿವಮಯಂ ವರ್ಮ ಸರ್ವರಕ್ಷಾಕರಂ ನೃಣಾಂ ॥ 1 ॥ ಶುಚೌ ದೇಶೇ ಸಮಾಸೀನೋ ಯಥಾವತ್ಕಲ್ಪಿತಾಸನಃ । ಜಿತೇಂದ್ರಿಯೋ ಜಿತಪ್ರಾಣ-ಶ್ಚಿಂತಯೇಚ್ಛಿವಮವ್ಯಯಂ ॥ 2 ॥ ಹೃತ್ಪುಂಡರೀಕಾಂತರಸನ್ನಿವಿಷ್ಟಂ ಸ್ವತೇಜಸಾ ವ್ಯಾಪ್ತ-ನಭೋಽವಕಾಶಂ । ಅತೀಂದ್ರಿಯಂ ಸೂಕ್ಷ್ಮಮನಂತಮಾದ್ಯಂ ಧ್ಯಾಯೇತ್ಪರಾನಂದಮಯಂ ಮಹೇಶಂ ॥ 3 ॥ ಧ್ಯಾನಾವಧೂತಾಖಿಲಕರ್ಮಬಂಧ- -ಶ್ಚಿರಂ ಚಿದಾನಂದನಿಮಗ್ನಚೇತಾಃ । ಷಡಕ್ಷರನ್ಯಾಸಸಮಾಹಿತಾತ್ಮಾ ಶೈವೇನ ಕುರ್ಯಾತ್ಕವಚೇನ ರಕ್ಷಾಂ ॥ 4 ॥ ಮಾಂ ಪಾತು ದೇವೋಽಖಿಲದೇವತಾತ್ಮಾ ಸಂಸಾರಕೂಪೇ ಪತಿತಂ ಗಭೀರೇ । ತನ್ನಾಮ ದಿವ್ಯಂ ವರಮಂತ್ರಮೂಲಂ ಧುನೋತು ಮೇ ಸರ್ವಮಘಂ ಹೃದಿಸ್ಥಂ ॥ 5 ॥ ಸರ್ವತ್ರ ಮಾಂ ರಕ್ಷತು ವಿಶ್ವಮೂರ್ತಿ- -ರ್ಜ್ಯೋತಿ-ರ್ಮಯಾನಂದಘನಶ್ಚಿದಾತ್ಮಾ । ಅಣೋರಣೀಯಾನುರುಶಕ್ತಿರೇಕಃ ಸ ಈಶ್ವರಃ ಪಾತು ಭಯಾದಶೇಷಾತ್ ॥ 6 ॥ ಯೋ ಭೂಸ್ವರೂಪೇಣ ಬಿಭರ್ತಿ ವಿಶ್ವಂ ಪಾಯಾತ್ಸ ಭೂಮೇರ್ಗಿರಿಶೋಽಷ್ಟಮೂರ್ತಿಃ । ಯೋಽಪಾಂ ಸ್ವರೂಪೇಣ ನೃಣಾಂ ಕರೋತಿ ಸಂಜೀವನಂ ಸೋಽವತು ಮಾಂ ಜಲೇಭ್ಯಃ ॥ 7 ॥ ಕಲ್ಪಾವಸಾನೇ ಭುವನಾನಿ ದಗ್ಧ್ವಾ ಸರ್ವಾಣಿ ಯೋ ನೃತ್ಯತಿ ಭೂರಿಲೀಲಃ । ಸ ಕಾಲರುದ್ರೋಽವತು ಮಾಂ ದವಾಗ್ನೇ- -ರ್ವಾತ್ಯಾದಿಭೀತೇ-ರಖಿಲಾಚ್ಚ ತಾಪಾತ್ ॥ 8 ॥ ಪ್ರದೀಪ್ತ-ವಿದ್ಯುತ್ಕನಕಾವಭಾಸೋ ವಿದ್ಯಾವರಾಭೀತಿ-ಕುಠಾರಪಾಣಿಃ । ಚತುರ್ಮುಖಸ್ತತ್ಪುರುಷಸ್ತ್ರಿನೇತ್ರಃ ಪ್ರಾಚ್ಯಾಂ ಸ್ಥಿತೋ ರಕ್ಷತು ಮಾಮಜಸ್ರಂ ॥ 9 ॥ ಕುಠಾರ ಖೇಟಾಂಕುಶಪಾಶಶೂಲ ಕಪಾಲಪಾಶಾಕ್ಷ ಗುಣಾಂದಧಾನಃ । ಚತುರ್ಮುಖೋ ನೀಲ-ರುಚಿಸ್ತ್ರಿನೇತ್ರಃ ಪಾಯಾದಘೋರೋ ದಿಶಿ ದಕ್ಷಿಣಸ್ಯಾಂ ॥ 10 ॥ ಕುಂದೇಂದು-ಶಂಖ-ಸ್ಫಟಿಕಾವಭಾಸೋ ವೇದಾಕ್ಷಮಾಲಾ-ವರದಾಭಯಾಂಕಃ । ತ್ರ್ಯಕ್ಷಶ್ಚತುರ್ವಕ್ತ್ರ ಉರುಪ್ರಭಾವಃ ಸದ್ಯೋಽಧಿಜಾತೋಽವತು ಮಾಂ ಪ್ರತೀಚ್ಯಾಂ ॥ 11 ॥ ವರಾಕ್ಷ-ಮಾಲಾಭಯಟಂಕ-ಹಸ್ತಃ ಸರೋಜ-ಕಿಂಜಲ್ಕಸಮಾನವರ್ಣಃ । ತ್ರಿಲೋಚನ-ಶ್ಚಾರುಚತುರ್ಮುಖೋ ಮಾಂ ಪಾಯಾದುದೀಚ್ಯಾಂ ದಿಶಿ ವಾಮದೇವಃ ॥ 12 ॥ ವೇದಾಭಯೇಷ್ಟಾಂಕುಶಟಂಕಪಾಶ- -ಕಪಾಲಢಕ್ಕಾಕ್ಷರ-ಶೂಲಪಾಣಿಃ । ಸಿತದ್ಯುತಿಃ ಪಂಚಮುಖೋಽವತಾನ್ಮಾ- -ಮೀಶಾನ ಊರ್ಧ್ವಂ ಪರಮಪ್ರಕಾಶಃ ॥ 13 ॥ ಮೂರ್ಧಾನಮವ್ಯಾನ್ಮಮ ಚಂದ್ರಮೌಲಿಃ ಫಾಲಂ ಮಮಾವ್ಯಾದಥ ಫಾಲನೇತ್ರಃ । ನೇತ್ರೇ ಮಮಾವ್ಯಾದ್ಭಗನೇತ್ರಹಾರೀ ನಾಸಾಂ ಸದಾ ರಕ್ಷತು ವಿಶ್ವನಾಥಃ ॥ 14 ॥ ಪಾಯಾಚ್ಛ್ರುತೀ ಮೇ ಶ್ರುತಿಗೀತಕೀರ್ತಿಃ ಕಪೋಲಮವ್ಯಾತ್ಸತತಂ ಕಪಾಲೀ । ವಕ್ತ್ರಂ ಸದಾ ರಕ್ಷತು ಪಂಚವಕ್ತ್ರೋ ಜಿಹ್ವಾಂ ಸದಾ ರಕ್ಷತು ವೇದಜಿಹ್ವಃ ॥ 15 ॥ ಕಂಠಂ ಗಿರೀಶೋಽವತು ನೀಲಕಂಠಃ ಪಾಣಿದ್ವಯಂ ಪಾತು ಪಿನಾಕಪಾಣಿಃ । ದೋರ್ಮೂಲಮವ್ಯಾನ್ಮಮ ಧರ್ಮಬಾಹುಃ ವಕ್ಷಃಸ್ಥಲಂ ದಕ್ಷಮಖಾಂತಕೋಽವ್ಯಾತ್ ॥ 16 ॥ ಮಮೋದರಂ ಪಾತು ಗಿರೀಂದ್ರಧನ್ವಾ ಮಧ್ಯಂ ಮಮಾವ್ಯಾನ್ಮದನಾಂತಕಾರೀ । ಹೇರಂಬತಾತೋ ಮಮ ಪಾತು ನಾಭಿಂ ಪಾಯಾತ್ಕಟಿಂ ಧೂರ್ಜಟಿರೀಶ್ವರೋ ಮೇ ॥ 17 ॥ ಊರುದ್ವಯಂ ಪಾತು ಕುಬೇರಮಿತ್ರೋ ಜಾನುದ್ವಯಂ ಮೇ ಜಗದೀಶ್ವರೋಽವ್ಯಾತ್ । ಜಂಘಾಯುಗಂ ಪುಂಗವಕೇತುರವ್ಯಾ- -ತ್ಪಾದೌ ಮಮಾವ್ಯಾತ್ಸುರವಂದ್ಯಪಾದಃ ॥ 18 ॥ ಮಹೇಶ್ವರಃ ಪಾತು ದಿನಾದಿಯಾಮೇ ಮಾಂ ಮಧ್ಯಯಾಮೇಽವತು ವಾಮದೇವಃ । ತ್ರಿಲೋಚನಃ ಪಾತು ತೃತೀಯಯಾಮೇ ವೃಷಧ್ವಜಃ ಪಾತು ದಿನಾಂತ್ಯಯಾಮೇ ॥ 19 ॥ ಪಾಯಾನ್ನಿಶಾದೌ ಶಶಿಶೇಖರೋ ಮಾಂ ಗಂಗಾಧರೋ ರಕ್ಷತು ಮಾಂ ನಿಶೀಥೇ । ಗೌರೀಪತಿಃ ಪಾತು ನಿಶಾವಸಾನೇ ಮೃತ್ಯುಂಜಯೋ ರಕ್ಷತು ಸರ್ವಕಾಲಂ ॥ 20 ॥ ಅಂತಃಸ್ಥಿತಂ ರಕ್ಷತು ಶಂಕರೋ ಮಾಂ ಸ್ಥಾಣುಃ ಸದಾ ಪಾತು ಬಹಿಃಸ್ಥಿತಂ ಮಾಂ । ತದಂತರೇ ಪಾತು ಪತಿಃ ಪಶೂನಾಂ ಸದಾಶಿವೋ ರಕ್ಷತು ಮಾಂ ಸಮಂತಾತ್ ॥ 21 ॥ ತಿಷ್ಠಂತ-ಮವ್ಯಾದ್ಭುವನೈಕನಾಥಃ ಪಾಯಾದ್ವ್ರಜಂತಂ ಪ್ರಮಥಾಧಿನಾಥಃ । ವೇದಾಂತವೇದ್ಯೋಽವತು ಮಾಂ ನಿಷಣ್ಣಂ ಮಾಮವ್ಯಯಃ ಪಾತು ಶಿವಃ ಶಯಾನಂ ॥ 22 ॥ ಮಾರ್ಗೇಷು ಮಾಂ ರಕ್ಷತು ನೀಲಕಂಠಃ ಶೈಲಾದಿ-ದುರ್ಗೇಷು ಪುರತ್ರಯಾರಿಃ । ಅರಣ್ಯವಾಸಾದಿ-ಮಹಾಪ್ರವಾಸೇ ಪಾಯಾನ್ಮೃಗವ್ಯಾಧ ಉದಾರಶಕ್ತಿಃ ॥ 23 ॥ ಕಲ್ಪಾಂತ-ಕಾಲೋಗ್ರ-ಪಟುಪ್ರಕೋಪಃ ಸ್ಫುಟಾಟ್ಟ-ಹಾಸೋಚ್ಚಲಿತಾಂಡ-ಕೋಶಃ । ಘೋರಾರಿ-ಸೇನಾರ್ಣವದುರ್ನಿವಾರ- -ಮಹಾಭಯಾದ್ರಕ್ಷತು ವೀರಭದ್ರಃ ॥ 24 ॥ ಪತ್ತ್ಯಶ್ವಮಾತಂಗ-ರಥಾವರೂಧಿನೀ- -ಸಹಸ್ರ-ಲಕ್ಷಾಯುತ-ಕೋಟಿಭೀಷಣಂ । ಅಕ್ಷೌಹಿಣೀನಾಂ ಶತಮಾತತಾಯಿನಾಂ ಛಿಂದ್ಯಾನ್ಮೃಡೋ ಘೋರಕುಠಾರಧಾರಯಾ ॥ 25 ॥ ನಿಹಂತು ದಸ್ಯೂನ್ಪ್ರಲಯಾನಲಾರ್ಚಿ- -ರ್ಜ್ವಲತ್ತ್ರಿಶೂಲಂ ತ್ರಿಪುರಾಂತಕಸ್ಯ । ಶಾರ್ದೂಲ-ಸಿಂಹರ್ಕ್ಷವೃಕಾದಿ-ಹಿಂಸ್ರಾನ್ ಸಂತ್ರಾಸಯತ್ವೀಶ-ಧನುಃ ಪಿನಾಕಃ ॥ 26 ॥ ದುಸ್ಸ್ವಪ್ನ ದುಶ್ಶಕುನ ದುರ್ಗತಿ ದೌರ್ಮನಸ್ಯ ದುರ್ಭಿಕ್ಷ ದುರ್ವ್ಯಸನ ದುಸ್ಸಹ ದುರ್ಯಶಾಂಸಿ । ಉತ್ಪಾತ-ತಾಪ-ವಿಷಭೀತಿ-ಮಸದ್ಗ್ರಹಾರ್ತಿಂ ವ್ಯಾಧೀಂಶ್ಚ ನಾಶಯತು ಮೇ ಜಗತಾಮಧೀಶಃ ॥ 27 ॥ ಓಂ ನಮೋ ಭಗವತೇ ಸದಾಶಿವಾಯ ಸಕಲ-ತತ್ತ್ವಾತ್ಮಕಾಯ ಸರ್ವ-ಮಂತ್ರ-ಸ್ವರೂಪಾಯ ಸರ್ವ-ಯಂತ್ರಾಧಿಷ್ಠಿತಾಯ ಸರ್ವ-ತಂತ್ರ-ಸ್ವರೂಪಾಯ ಸರ್ವ-ತತ್ತ್ವ-ವಿದೂರಾಯ ಬ್ರಹ್ಮ-ರುದ್ರಾವತಾರಿಣೇ-ನೀಲಕಂಠಾಯ ಪಾರ್ವತೀ-ಮನೋಹರಪ್ರಿಯಾಯ ಸೋಮ-ಸೂರ್ಯಾಗ್ನಿ-ಲೋಚನಾಯ ಭಸ್ಮೋದ್ಧೂಲಿತ-ವಿಗ್ರಹಾಯ ಮಹಾಮಣಿ-ಮುಕುಟ-ಧಾರಣಾಯ ಮಾಣಿಕ್ಯ-ಭೂಷಣಾಯ ಸೃಷ್ಟಿಸ್ಥಿತಿ-ಪ್ರಲಯಕಾಲ-ರೌದ್ರಾವತಾರಾಯ ದಕ್ಷಾಧ್ವರ-ಧ್ವಂಸಕಾಯ ಮಹಾಕಾಲ-ಭೇದನಾಯ ಮೂಲಧಾರೈಕ-ನಿಲಯಾಯ ತತ್ವಾತೀತಾಯ ಗಂಗಾಧರಾಯ ಸರ್ವ-ದೇವಾದಿ-ದೇವಾಯ ಷಡಾಶ್ರಯಾಯ ವೇದಾಂತ-ಸಾರಾಯ ತ್ರಿವರ್ಗ-ಸಾಧನಾಯ ಅನಂತಕೋಟಿ-ಬ್ರಹ್ಮಾಂಡ-ನಾಯಕಾಯ ಅನಂತ-ವಾಸುಕಿ-ತಕ್ಷಕ-ಕರ್ಕೋಟಕ-ಶಂಖ-ಕುಲಿಕ-ಪದ್ಮ-ಮಹಾಪದ್ಮೇತಿ-ಅಷ್ಟ-ಮಹಾ-ನಾಗ-ಕುಲಭೂಷಣಾಯ ಪ್ರಣವಸ್ವರೂಪಾಯ ಚಿದಾಕಾಶಾಯ ಆಕಾಶ-ದಿಕ್-ಸ್ವರೂಪಾಯ ಗ್ರಹ-ನಕ್ಷತ್ರ-ಮಾಲಿನೇ ಸಕಲಾಯ ಕಲಂಕ-ರಹಿತಾಯ ಸಕಲ-ಲೋಕೈಕ-ಕರ್ತ್ರೇ ಸಕಲ-ಲೋಕೈಕ-ಭರ್ತ್ರೇ ಸಕಲ-ಲೋಕೈಕ-ಸಂಹರ್ತ್ರೇ ಸಕಲ-ಲೋಕೈಕ-ಗುರವೇ ಸಕಲ-ಲೋಕೈಕ-ಸಾಕ್ಷಿಣೇ ಸಕಲ-ನಿಗಮಗುಹ್ಯಾಯ ಸಕಲ-ವೇದಾಂತ-ಪಾರಗಾಯ ಸಕಲ-ಲೋಕೈಕ-ವರಪ್ರದಾಯ ಸಕಲ-ಲೋಕೈಕ-ಶಂಕರಾಯ ಸಕಲ-ದುರಿತಾರ್ತಿ-ಭಂಜನಾಯ ಸಕಲ-ಜಗದಭಯಂಕರಾಯ ಶಶಾಂಕ-ಶೇಖರಾಯ ಶಾಶ್ವತ-ನಿಜಾವಾಸಾಯ ನಿರಾಕಾರಾಯ ನಿರಾಭಾಸಾಯ ನಿರಾಮಯಾಯ ನಿರ್ಮಲಾಯ ನಿರ್ಲೋಭಾಯ ನಿರ್ಮದಾಯ ನಿಶ್ಚಿಂತಾಯ ನಿರಹಂಕಾರಾಯ ನಿರಂಕುಶಾಯ ನಿಷ್ಕಲಂಕಾಯ ನಿರ್ಗುಣಾಯ ನಿಷ್ಕಾಮಾಯ ನಿರೂಪಪ್ಲವಾಯ ನಿರವಧ್ಯಾಯ ನಿರಂತರಾಯ ನಿರುಪದ್ರವಾಯ ನಿರವದ್ಯಾಯ ನಿರಂತರಾಯ ನಿಷ್ಕಾರಣಾಯ ನಿರಾತಂಕಾಯ ನಿಷ್ಪ್ರಪಂಚಾಯ ನಿಸ್ಸಂಗಾಯ ನಿರ್ದ್ವಂದ್ವಾಯ ನಿರಾಧಾರಾಯ ನೀರಾಗಾಯ ನಿಶ್ಕ್ರೋಧಾಯ ನಿರ್ಲೋಭಾಯ ನಿಷ್ಪಾಪಾಯ ನಿರ್ವಿಕಲ್ಪಾಯ ನಿರ್ಭೇದಾಯ ನಿಷ್ಕ್ರಿಯಾಯ ನಿಸ್ತುಲಾಯ ನಿಶ್ಶಂಶಯಾಯ ನಿರಂಜನಾಯ ನಿರುಪಮ-ವಿಭವಾಯ ನಿತ್ಯ-ಶುದ್ಧ-ಬುದ್ಧ-ಮುಕ್ತ-ಪರಿಪೂರ್ಣ-ಸಚ್ಚಿದಾನಂದಾದ್ವಯಾಯ ಪರಮ-ಶಾಂತ-ಸ್ವರೂಪಾಯ ಪರಮ-ಶಾಂತ-ಪ್ರಕಾಶಾಯ ತೇಜೋರೂಪಾಯ ತೇಜೋಮಯಾಯ ತೇಜೋಽಧಿಪತಯೇ ಜಯ ಜಯ ರುದ್ರ ಮಹಾರುದ್ರ ಮಹಾ-ರೌದ್ರ ಭದ್ರಾವತಾರ ಮಹಾ-ಭೈರವ ಕಾಲ-ಭೈರವ ಕಲ್ಪಾಂತ-ಭೈರವ ಕಪಾಲ-ಮಾಲಾಧರ ಖಟ್ವಾಂಗ-ಚರ್ಮ-ಖಡ್ಗ-ಧರ ಪಾಶಾಂಕುಶ-ಡಮರೂಶೂಲ-ಚಾಪ-ಬಾಣ-ಗದಾ-ಶಕ್ತಿ-ಭಿಂದಿ- ಪಾಲ-ತೋಮರ-ಮುಸಲ-ಭುಶುಂಡೀ-ಮುದ್ಗರ-ಪಾಶ-ಪರಿಘ-ಶತಘ್ನೀ-ಚಕ್ರಾದ್ಯಾಯುಧ-ಭೀಷಣಾಕಾರ ಸಹಸ್ರ-ಮುಖ ದಂಷ್ಟ್ರಾಕರಾಲ-ವದನ ವಿಕಟಾಟ್ಟಹಾಸ ವಿಸ್ಫಾತಿತ-ಬ್ರಹ್ಮಾಂಡ-ಮಂಡಲ-ನಾಗೇಂದ್ರಕುಂಡಲ ನಾಗೇಂದ್ರಹಾರ ನಾಗೇಂದ್ರವಲಯ ನಾಗೇಂದ್ರಚರ್ಮಧರ ನಾಗೇಂದ್ರನಿಕೇತನ ಮೃತ್ಯುಂಜಯ ತ್ರ್ಯಂಬಕ ತ್ರಿಪುರಾಂತಕ ವಿಶ್ವರೂಪ ವಿರೂಪಾಕ್ಷ ವಿಶ್ವೇಶ್ವರ ವೃಷಭವಾಹನ ವಿಷವಿಭೂಷಣ ವಿಶ್ವತೋಮುಖ ಸರ್ವತೋಮುಖ ಮಾಂ ರಕ್ಷ ರಕ್ಷ ಜ್ವಲ ಜ್ವಲ ಪ್ರಜ್ವಲ ಪ್ರಜ್ವಲ ಮಹಾಮೃತ್ಯುಭಯಂ ಶಮಯ ಶಮಯ ಅಪಮೃತ್ಯುಭಯಂ ನಾಶಯ ನಾಶಯ ರೋಗಭಯಂ ಉತ್ಸಾದಯ ಉತ್ಸಾದಯ ವಿಷಸರ್ಪಭಯಂ ಶಮಯ ಶಮಯ ಚೋರಾನ್ ಮಾರಯ ಮಾರಯ ಮಮ ಶತ್ರೂನ್ ಉಚ್ಚಾಟಯ ಉಚ್ಚಾಟಯ ತ್ರಿಶೂಲೇನ ವಿದಾರಯ ವಿದಾರಯ ಕುಠಾರೇಣ ಭಿಂಧಿ ಭಿಂಧಿ ಖಡ್ಗೇನ ಛಿಂದ್ದಿ ಛಿಂದ್ದಿ ಖಟ್ವಾಂಗೇನ ವಿಪೋಧಯ ವಿಪೋಧಯ ಮಮ ಪಾಪಂ ಶೋಧಯ ಶೋಧಯ ಮುಸಲೇನ ನಿಷ್ಪೇಷಯ ನಿಷ್ಪೇಷಯ ಬಾಣೈಃ ಸಂತಾಡಯ ಸಂತಾಡಯ ಯಕ್ಷ ರಕ್ಷಾಂಸಿ ಭೀಷಯ ಭೀಷಯ ಅಶೇಷ ಭೂತಾನ್ ವಿದ್ರಾವಯ ವಿದ್ರಾವಯ ಕೂಷ್ಮಾಂಡ-ಭೂತ-ಬೇತಾಲ-ಮಾರೀಗಣ-ಬ್ರಹ್ಮರಾಕ್ಷಸ-ಗಣಾನ್ ಸಂತ್ರಾಸಯ ಸಂತ್ರಾಸಯ ಮಮ ಅಭಯಂ ಕುರು ಕುರು ನರಕ-ಮಹಾಭಯಾನ್ ಮಾಂ ಉದ್ಧರ ಉದ್ಧರ ವಿತ್ರಸ್ತಂ ಮಾಂ ಆಶ್ವಾಸಯ ಆಶ್ವಾಸಯ ಅಮೃತ-ಕಟಾಕ್ಷ-ವೀಕ್ಷಣೇನ ಮಾಂ ಆಲೋಕಯ ಆಲೋಕಯ ಸಂಜೀವಯ ಸಂಜೀವಯ ಕ್ಷುತ್ತೃಷ್ಣಾರ್ತಂ ಮಾಂ ಆಪ್ಯಾಯಯ ಆಪ್ಯಾಯಯ ದುಃಖಾತುರಂ ಮಾಂ ಆನಂದಯ ಆನಂದಯ ಶಿವಕವಚೇನ ಮಾಂ ಆಚ್ಛಾದಯ ಆಚ್ಛಾದಯ ಹರ ಹರ ಹರ ಹರ ಮೃತ್ಯುಂಜಯ ತ್ರ್ಯಂಬಕ ಸದಾಶಿವ ಪರಮಶಿವ ನಮಸ್ತೇ ನಮಸ್ತೇ ನಮಸ್ತೇ ನಮಃ ॥ ಹೃದಯಾದಿ ನ್ಯಾಸಃ – ಓಂ ಸದಾಶಿವಾಯ ಹೃದಯಾಯ ನಮಃ । ನಂ ಗಂಗಾಧರಾಯ ಶಿರಸೇ ಸ್ವಾಹಾ । ಮಂ ಮೃತ್ಯುಂಜಯಾಯ ಶಿಖಾಯೈ ವಷಟ್ । ಶಿಂ ಶೂಲಪಾಣಯೇ ಕವಚಾಯ ಹುಂ । ವಾಂ ಪಿನಾಕಪಾಣಯೇ ನೇತ್ರತ್ರಯಾಯ ವೌಷಟ್ । ಯಂ ಉಮಾಪತಯೇ ಅಸ್ತ್ರಾಯ ಫಟ್ । ಭೂರ್ಭುವಸ್ಸುವರೋಮಿತಿ ದಿಗ್ವಿಮೋಕಃ ॥ ಧ್ಯಾನಂ – ವಜ್ರದಂಷ್ಟ್ರಂ ತ್ರಿನಯನಂ ಕಾಲಕಂಠ ಮರಿಂದಮಂ । ಸಹಸ್ರಕರ-ಮತ್ಯುಗ್ರಂ ವಂದೇ ಶಂಭುಂ ಉಮಾಪತಿಂ ॥ ರುದ್ರಾಕ್ಷ-ಕಂಕಣ-ಲಸತ್ಕರ-ದಂಡಯುಗ್ಮಃ ಪಾಲಾಂತರಾ-ಲಸಿತ-ಭಸ್ಮಧೃತ-ತ್ರಿಪುಂಡ್ರಃ । ಪಂಚಾಕ್ಷರಂ ಪರಿಪಠನ್ ವರಮಂತ್ರರಾಜಂ ಧ್ಯಾಯನ್ ಸದಾ ಪಶುಪತಿಂ ಶರಣಂ ವ್ರಜೇಥಾಃ ॥ ಅತಃ ಪರಂ ಸರ್ವಪುರಾಣ-ಗುಹ್ಯಂ ನಿಃಶೇಷ-ಪಾಪೌಘಹರಂ ಪವಿತ್ರಂ । ಜಯಪ್ರದಂ ಸರ್ವ-ವಿಪತ್ಪ್ರಮೋಚನಂ ವಕ್ಷ್ಯಾಮಿ ಶೈವಂ ಕವಚಂ ಹಿತಾಯ ತೇ ॥ ಪಂಚಪೂಜಾ – ಲಂ ಪೃಥಿವ್ಯಾತ್ಮನೇ ಗಂಧಂ ಸಮರ್ಪಯಾಮಿ । ಹಂ ಆಕಾಶಾತ್ಮನೇ ಪುಷ್ಪೈಃ ಪೂಜಯಾಮಿ । ಯಂ ವಾಯ್ವಾತ್ಮನೇ ಧೂಪಂ ಆಘ್ರಾಪಯಾಮಿ । ರಂ ಅಗ್ನ್ಯಾತ್ಮನೇ ದೀಪಂ ದರ್ಶಯಾಮಿ । ವಂ ಅಮೃತಾತ್ಮನೇ ಅಮೃತಂ ಮಹಾ-ನೈವೇದ್ಯಂ ನಿವೇದಯಾಮಿ । ಸಂ ಸರ್ವಾತ್ಮನೇ ಸರ್ವೋಪಚಾರ-ಪೂಜಾಂ ಸಮರ್ಪಯಾಮಿ ॥ ಫಲಶ್ರುತಿಃ ॥ ಋಷಭ ಉವಾಚ – ಇತ್ಯೇತತ್ಕವಚಂ ಶೈವಂ ವರದಂ ವ್ಯಾಹೃತಂ ಮಯಾ । ಸರ್ವ-ಬಾಧಾ-ಪ್ರಶಮನಂ ರಹಸ್ಯಂ ಸರ್ವದೇಹಿನಾಂ ॥ 1 ॥ ಯಃ ಸದಾ ಧಾರಯೇನ್ಮರ್ತ್ಯಃ ಶೈವಂ ಕವಚಮುತ್ತಮಂ । ನ ತಸ್ಯ ಜಾಯತೇ ಕ್ವಾಪಿ ಭಯಂ ಶಂಭೋರನುಗ್ರಹಾತ್ ॥ 2 ॥ ಕ್ಷೀಣಾಯು-ರ್ಮೃತ್ಯುಮಾಪನ್ನೋ ಮಹಾರೋಗಹತೋಽಪಿ ವಾ । ಸದ್ಯಃ ಸುಖಮವಾಪ್ನೋತಿ ದೀರ್ಘಮಾಯುಶ್ಚ ವಿಂದತಿ ॥ 3 ॥ ಸರ್ವದಾರಿದ್ರ್ಯಶಮನಂ ಸೌಮಾಂಗಲ್ಯ-ವಿವರ್ಧನಂ । ಯೋ ಧತ್ತೇ ಕವಚಂ ಶೈವಂ ಸ ದೇವೈರಪಿ ಪೂಜ್ಯತೇ ॥ 4 ॥ ಮಹಾಪಾತಕ-ಸಂಘಾತೈರ್ಮುಚ್ಯತೇ ಚೋಪಪಾತಕೈಃ । ದೇಹಾಂತೇ ಶಿವಮಾಪ್ನೋತಿ ಶಿವ-ವರ್ಮಾನುಭಾವತಃ ॥ 5 ॥ ತ್ವಮಪಿ ಶ್ರದ್ಧಯಾ ವತ್ಸ ಶೈವಂ ಕವಚಮುತ್ತಮಂ । ಧಾರಯಸ್ವ ಮಯಾ ದತ್ತಂ ಸದ್ಯಃ ಶ್ರೇಯೋ ಹ್ಯವಾಪ್ಸ್ಯಸಿ ॥ 6 ॥ ಸೂತ ಉವಾಚ – ಇತ್ಯುಕ್ತ್ವಾ ಋಷಭೋ ಯೋಗೀ ತಸ್ಮೈ ಪಾರ್ಥಿವ-ಸೂನವೇ । ದದೌ ಶಂಖಂ ಮಹಾರಾವಂ ಖಡ್ಗಂ ಚಾರಿನಿಷೂದನಂ ॥ 7 ॥ ಪುನಶ್ಚ ಭಸ್ಮ ಸಮ್ಮಂತ್ರ್ಯ ತದಂಗಂ ಸರ್ವತೋಽಸ್ಪೃಶತ್ । ಗಜಾನಾಂ ಷಟ್ಸಹಸ್ರಸ್ಯ ದ್ವಿಗುಣಂ ಚ ಬಲಂ ದದೌ ॥ 8 ॥ ಭಸ್ಮಪ್ರಭಾವಾತ್ಸಂಪ್ರಾಪ್ಯ ಬಲೈಶ್ವರ್ಯಧೃತಿಸ್ಮೃತಿಃ । ಸ ರಾಜಪುತ್ರಃ ಶುಶುಭೇ ಶರದರ್ಕ ಇವ ಶ್ರಿಯಾ ॥ 9 ॥ ತಮಾಹ ಪ್ರಾಂಜಲಿಂ ಭೂಯಃ ಸ ಯೋಗೀ ರಾಜನಂದನಂ । ಏಷ ಖಡ್ಗೋ ಮಯಾ ದತ್ತಸ್ತಪೋಮಂತ್ರಾನುಭಾವತಃ ॥ 10 ॥ ಶಿತಧಾರಮಿಮಂ ಖಡ್ಗಂ ಯಸ್ಮೈ ದರ್ಶಯಸಿ ಸ್ಫುಟಂ । ಸ ಸದ್ಯೋ ಮ್ರಿಯತೇ ಶತ್ರುಃ ಸಾಕ್ಷಾನ್ಮೃತ್ಯುರಪಿ ಸ್ವಯಂ ॥ 11 ॥ ಅಸ್ಯ ಶಂಖಸ್ಯ ನಿಹ್ರಾದಂ ಯೇ ಶೃಣ್ವಂತಿ ತವಾಹಿತಾಃ । ತೇ ಮೂರ್ಛಿತಾಃ ಪತಿಷ್ಯಂತಿ ನ್ಯಸ್ತಶಸ್ತ್ರಾ ವಿಚೇತನಾಃ ॥ 12 ॥ ಖಡ್ಗಶಂಖಾವಿಮೌ ದಿವ್ಯೌ ಪರಸೈನ್ಯವಿನಾಶಿನೌ । ಆತ್ಮಸೈನ್ಯಸ್ವಪಕ್ಷಾಣಾಂ ಶೌರ್ಯತೇಜೋವಿವರ್ಧನೌ ॥ 13 ॥ ಏತಯೋಶ್ಚ ಪ್ರಭಾವೇನ ಶೈವೇನ ಕವಚೇನ ಚ । ದ್ವಿಷಟ್ಸಹಸ್ರನಾಗಾನಾಂ ಬಲೇನ ಮಹತಾಪಿ ಚ ॥ 14 ॥ ಭಸ್ಮಧಾರಣಸಾಮರ್ಥ್ಯಾಚ್ಛತ್ರುಸೈನ್ಯಂ ವಿಜೇಷ್ಯಸಿ । ಪ್ರಾಪ್ಯ ಸಿಂಹಾಸನಂ ಪೈತ್ರ್ಯಂ ಗೋಪ್ತಾಸಿ ಪೃಥಿವೀಮಿಮಾಂ ॥ 15 ॥ ಇತಿ ಭದ್ರಾಯುಷಂ ಸಮ್ಯಗನುಶಾಸ್ಯ ಸಮಾತೃಕಂ । ತಾಭ್ಯಾಂ ಸಂಪೂಜಿತಃ ಸೋಽಥ ಯೋಗೀ ಸ್ವೈರಗತಿರ್ಯಯೌ ॥ 16 ॥ ಇತಿ ಶ್ರೀ ಸ್ಕಾಂದಪುರಾಣೇ ತೃತೀಯೇ ಬ್ರಹ್ಮೋತ್ತರಖಂಡೇ ಶಿವಕವಚಕಥನಂ ನಾಮ ದ್ವಾದಶೋಽಧ್ಯಾಯಃ ॥