ruciruvāca । arcitānāmamūrtānāṃ pitṝṇāṃ dīptatejasām । namasyāmi sadā teṣāṃ dhyānināṃ divyacakṣuṣām ॥ 1 ॥ indrādīnāṃ ca netāro dakṣamārīcayostathā । saptarṣīṇāṃ tathānyeṣāṃ tānnamasyāmi kāmadān ॥ 2 ॥ manvādīnāṃ ca netāraḥ sūryācandramasostathā । tānnamasyāmyahaṃ sarvān pitṝnapyudadhāvapi ॥ 3 ॥ nakṣatrāṇāṃ grahāṇāṃ ca vāyvagnyornabhasastathā । dyāvāpṛthivyośca tathā namasyāmi kṛtāñjaliḥ ॥ 4 ॥ devarṣīṇāṃ janitṝṃśca sarvaloka namaskṛtān । akṣayyasya sadā dātṝn namasyehaṃ kṛtāñjaliḥ ॥ 5 ॥ prajāpateḥ kaśyapāya somāya varuṇāya ca । yogeśvarebhyaśca sadā namasyāmi kṛtāñjaliḥ ॥ 6 ॥ namo gaṇebhyaḥ saptabhyastathā lokeṣu saptasu । svayambhuve namasyāmi brahmaṇe yogacakṣuṣe ॥ 7 ॥ somādhārān pitṛgaṇān yogamūrtidharāṃstathā । namasyāmi tathā somaṃ pitaraṃ jagatāmaham ॥ 8 ॥ agnirūpāṃstathaivānyān namasyāmi pitṝnaham । agnisomamayaṃ viśvaṃ yata etadaśeṣataḥ ॥ 9 ॥ ye ca tejasi ye caite somasūryāgnimūrtayaḥ । jagatsvarūpiṇaścaiva tathā brahmasvarūpiṇaḥ ॥ 10 ॥ tebhyo'khilebhyo yogibhyaḥ pitṛbhyo yatamānasaḥ । namo namo namaste'stu prasīdantu svadhābhujaḥ ॥ 11 ॥ iti śrī garuḍapurāṇe ūnanavatitamo'dhyāye rucikṛta dvitīya pitṛ stotram ।