మాతృ పంచకం

ఆస్తాం తావదియం ప్రసూతిసమయే దుర్వారశూలవ్యథా

నైరుజ్యం తనుశోషణం మలమయీ శయ్యా చ సాంవత్సరీ ।

ఏకస్యాపి న గర్భభారభరణక్లేశస్య యస్య క్షమః

దాతుం నిష్కృతిమున్నతోఽపి తనయస్తస్యై జనన్యై నమః ॥ 1 ॥

గురుకులముపసృత్య స్వప్నకాలే తు దృష్ట్వా

యతిసముచితవేషం ప్రారుదో మాం త్వముచ్చైః ।

గురుకులమథ సర్వం ప్రారుదత్తే సమక్షం

సపది చరణయోస్తే మాతరస్తు ప్రణామః ॥ 2 ॥

న దత్తం మాతస్తే మరణసమయే తోయమపి వా

స్వధా వా నో దత్తా మరణదివసే శ్రాద్ధవిధినా ।

న జప్తో మాతస్తే మరణసమయే తారకమనుః

అకాలే సంప్రాప్తే మయి కురు దయాం మాతరతులాం ॥ 3 ॥

ముక్తామణిస్త్వం నయనం మమేతి

రాజేతి జీవేతి చిరం సుత త్వం ।

ఇత్యుక్తవత్యాస్తవ వాచి మాతః

దదామ్యహం తండులమేష శుష్కం ॥ 4 ॥

అంబేతి తాతేతి శివేతి తస్మిన్

ప్రసూతికాలే యదవోచ ఉచ్చైః ।

కృష్ణేతి గోవింద హరే ముకుందే-

-త్యహో జనన్యై రచితోఽయమంజలిః ॥ 5 ॥

ఇతి శ్రీమచ్ఛంకరాచార్య విరచితం మాతృ పంచకం ॥

Recite with devotion and pure heart

Regular practice brings spiritual benefits