മാതൃ പഞ്ചകം

ആസ്താം താവദിയം പ്രസൂതിസമയേ ദുർവാരശൂലവ്യഥാ

നൈരുജ്യം തനുശോഷണം മലമയീ ശയ്യാ ച സാംവത്സരീ ।

ഏകസ്യാപി ന ഗർഭഭാരഭരണക്ലേശസ്യ യസ്യ ക്ഷമഃ

ദാതും നിഷ്കൃതിമുന്നതോഽപി തനയസ്തസ്യൈ ജനന്യൈ നമഃ ॥ 1 ॥

ഗുരുകുലമുപസൃത്യ സ്വപ്നകാലേ തു ദൃഷ്ട്വാ

യതിസമുചിതവേഷം പ്രാരുദോ മാം ത്വമുച്ചൈഃ ।

ഗുരുകുലമഥ സർവം പ്രാരുദത്തേ സമക്ഷം

സപദി ചരണയോസ്തേ മാതരസ്തു പ്രണാമഃ ॥ 2 ॥

ന ദത്തം മാതസ്തേ മരണസമയേ തോയമപി വാ

സ്വധാ വാ നോ ദത്താ മരണദിവസേ ശ്രാദ്ധവിധിനാ ।

ന ജപ്തോ മാതസ്തേ മരണസമയേ താരകമനുഃ

അകാലേ സമ്പ്രാപ്തേ മയി കുരു ദയാം മാതരതുലാം ॥ 3 ॥

മുക്താമണിസ്ത്വം നയനം മമേതി

രാജേതി ജീവേതി ചിരം സുത ത്വം ।

ഇത്യുക്തവത്യാസ്തവ വാചി മാതഃ

ദദാമ്യഹം തണ്ഡുലമേഷ ശുഷ്കം ॥ 4 ॥

അംബേതി താതേതി ശിവേതി തസ്മിൻ

പ്രസൂതികാലേ യദവോച ഉച്ചൈഃ ।

കൃഷ്ണേതി ഗോവിന്ദ ഹരേ മുകുന്ദേ-

-ത്യഹോ ജനന്യൈ രചിതോഽയമഞ്ജലിഃ ॥ 5 ॥

ഇതി ശ്രീമച്ഛങ്കരാചാര്യ വിരചിതം മാതൃ പഞ്ചകം ॥

Recite with devotion and pure heart

Regular practice brings spiritual benefits