मातृ पञ्चकम्

आस्तां तावदियं प्रसूतिसमये दुर्वारशूलव्यथा

नैरुज्यं तनुशोषणं मलमयी शय्या च सांवत्सरी ।

एकस्यापि न गर्भभारभरणक्लेशस्य यस्य क्षमः

दातुं निष्कृतिमुन्नतोऽपि तनयस्तस्यै जनन्यै नमः ॥ 1 ॥

गुरुकुलमुपसृत्य स्वप्नकाले तु दृष्ट्वा

यतिसमुचितवेषं प्रारुदो मां त्वमुच्चैः ।

गुरुकुलमथ सर्वं प्रारुदत्ते समक्षं

सपदि चरणयोस्ते मातरस्तु प्रणामः ॥ 2 ॥

न दत्तं मातस्ते मरणसमये तोयमपि वा

स्वधा वा नो दत्ता मरणदिवसे श्राद्धविधिना ।

न जप्तो मातस्ते मरणसमये तारकमनुः

अकाले सम्प्राप्ते मयि कुरु दयां मातरतुलाम् ॥ 3 ॥

मुक्तामणिस्त्वं नयनं ममेति

राजेति जीवेति चिरं सुत त्वम् ।

इत्युक्तवत्यास्तव वाचि मातः

ददाम्यहं तण्डुलमेष शुष्कम् ॥ 4 ॥

अम्बेति तातेति शिवेति तस्मिन्

प्रसूतिकाले यदवोच उच्चैः ।

कृष्णेति गोविन्द हरे मुकुन्दे-

-त्यहो जनन्यै रचितोऽयमञ्जलिः ॥ 5 ॥

इति श्रीमच्छङ्कराचार्य विरचितं मातृ पञ्चकम् ॥

Recite with devotion and pure heart

Regular practice brings spiritual benefits