Haindavam

📍

Font Size:

Natesha Stava

hrīmatyā śivayā virāṇmayamajaṃ hṛtpaṅkajasthaṃ sadā hrīṇānā śivakīrtane hitakaraṃ helāhṛdā māninām । hoberādisugandhavasturuciraṃ hemādribāṇāsanaṃ hrīṅkārādikapādapīṭhamamalaṃ hṛdyaṃ naṭeśaṃ bhaje ॥ 1 ॥ śrīmajjñānasabhāntare pravilasacchrīpañcavarṇākṛtiṃ śrīvāṇīvinutāpadānanicayaṃ śrīvallabhenārcitam । śrīvidyāmanumodinaṃ śritajanaśrīdāyakaṃ śrīdharaṃ śrīcakrāntaravāsinaṃ śivamahaṃ śrīmannaṭeśaṃ bhaje ॥ 2 ॥ navyāmbhojamukhaṃ namajjananidhiṃ nārāyaṇenārcitaṃ nākaukonagarīnaṭīlasitakaṃ nāgādinālaṅkṛtam । nānārūpakanartanādicaturaṃ nālīkajānveṣitaṃ nādātmānamahaṃ nagendratanayānāthaṃ naṭeśaṃ bhaje ॥ 3 ॥ madhyasthaṃ madhuvairimārgitapadaṃ madvaṃśanāthaṃ prabhuṃ mārātītamatīva mañjuvapuṣaṃ mandāragauraprabham । māyātītamaśeṣamaṅgalanidhiṃ madbhāvanābhāvitaṃ madhyevyomasabhāguhāntamakhilākāśaṃ naṭeśaṃ bhaje ॥ 4 ॥ śiṣṭaiḥ pūjitapādukaṃ śivakaraṃ śītāṃśurekhādharaṃ śilpaṃ bhaktajanāvane śithilitāghaughaṃ śivāyāḥ priyam । śikṣārakṣaṇamambujāsanaśiraḥ saṃhāraśīlaprabhuṃ śītāpāṅgavilocanaṃ śivamahaṃ śrīmannaṭeśaṃ bhaje ॥ 5 ॥ vāṇīvallabhavandyavaibhavayutaṃ vandārucintāmaṇiṃ vātāśādhipabhūṣaṇaṃ parakṛpāvārānnidhiṃ yoginām । vāñchāpūrtikaraṃ valārivinutaṃ vāhīkṛtāmnāyakaṃ vāmaṅgāttavarāṅganaṃ mama hṛdāvāsaṃ naṭeśaṃ bhaje ॥ 6 ॥ yakṣādhīśasakhaṃ yamapramathanaṃ yāminyadhīśāsanaṃ yajñadhvaṃsakaraṃ yatīndravinutaṃ yajñakriyādīśvaram । yājyaṃ yājakarūpiṇaṃ yamadhanairyatnopalabhyāṅghrikaṃ vājībhūtavṛṣaṃ sadā hṛdi mamāyattaṃ naṭeśaṃ bhaje ॥ 7 ॥ māyāśrīvilasaccidambaramahāpañcākṣarairaṅkitān ślokān sapta paṭhanti ye'nudivasaṃ cintāmaṇīnāmakān । teṣāṃ bhāgyamanekamāyuradhikān vidvadvarān satsutān sarvābhīṣṭamasau dadāti sahasā śrīmatsabhādhīśvaraḥ ॥ 8 ॥ iti śrī naṭeśa stavaḥ ।

Recite with devotion and pure heart

Regular practice brings spiritual benefits