నీలాంబరో నీలవపుః కిరీటీ గృధ్రస్థితాస్త్రకరో ధనుష్మాన్ । చతుర్భుజః సూర్యసుతః ప్రసన్నః సదా మమస్యాద్వరదః ప్రశాంతః ॥ బ్రహ్మా ఉవాచ । శృణుధ్వం ఋషయః సర్వే శని పీడాహరం మహత్ । కవచం శనిరాజస్య సౌరైరిదమనుత్తమం ॥ కవచం దేవతావాసం వజ్ర పంజర సంంగకం । శనైశ్చర ప్రీతికరం సర్వసౌభాగ్యదాయకం ॥ అథ శ్రీ శని వజ్ర పంజర కవచం । ఓం శ్రీ శనైశ్చరః పాతు ఫాలం మే సూర్యనందనః । [భాలం] నేత్రే ఛాయాత్మజః పాతు పాతు కర్ణౌ యమానుజః ॥ 1 ॥ నాసాం వైవస్వతః పాతు ముఖం మే భాస్కరః సదా । స్నిగ్ధకంఠశ్చ మే కంఠం భుజౌ పాతు మహాభుజః ॥ 2 ॥ స్కంధౌ పాతు శనిశ్చైవ కరౌ పాతు శుభప్రదః । వక్షః పాతు యమభ్రాతా కుక్షిం పాత్వసితస్తథా ॥ 3 ॥ నాభిం గ్రహపతిః పాతు మందః పాతు కటిం తథా । ఊరూ మమాంతకః పాతు యమో జానుయుగం తథా ॥ 4 ॥ పాదౌ మందగతిః పాతు సర్వాంగం పాతు పిప్పలః । అంగోపాంగాని సర్వాణి రక్షేన్ మే సూర్యనందనః ॥ 5 ॥ ఫలశ్రుతిః ఇత్యేతత్కవచం దివ్యం పఠేత్సూర్యసుతస్య యః । న తస్య జాయతే పీడా ప్రీతో భవతి సూర్యజః ॥ వ్యయజన్మద్వితీయస్థో మృత్యుస్థానగతోపివా । కలత్రస్థో గతోవాపి సుప్రీతస్తు సదా శనిః ॥ అష్టమస్థో సూర్యసుతే వ్యయే జన్మద్వితీయగే । కవచం పఠతే నిత్యం న పీడా జాయతే క్వచిత్ ॥ ఇత్యేతత్కవచం దివ్యం సౌరేర్యన్నిర్మితం పురా । ద్వాదశాష్టమజన్మస్థదోషాన్నాశయతే సదా । జన్మలగ్నస్థితాన్ దోషాన్ సర్వాన్నాశయతే ప్రభుః ॥ ఇతి శ్రీ బ్రహ్మాండపురాణే బ్రహ్మనారదసంవాదే శనివజ్రపంజర కవచం సంపూర్ణం ॥