స్కంద ఉవాచ । ఋణగ్రస్తనరాణాం తు ఋణముక్తిః కథం భవేత్ । బ్రహ్మోవాచ । వక్ష్యేఽహం సర్వలోకానాం హితార్థం హితకామదం ॥ అస్య శ్రీ అంగారక స్తోత్ర మహామంత్రస్య గౌతమ ఋషిః, అనుష్టుప్ ఛందః, అంగారకో దేవతా మమ ఋణ విమోచనార్థే జపే వినియోగః । ధ్యానం – ధరణీ గర్భ సంభూతం విద్యుత్కాంతి సమప్రభం । కుమారం శక్తిహస్తం తం కుజం ప్రణమామ్యహం ॥ 1 ॥ రక్తమాల్యాంబరధరః శూలశక్తిగదాధరః । చతుర్భుజో మేషగతో వరదశ్చ ధరాసుతః ॥ 2 ॥ అథ స్తోత్రం – మంగలో భూమిపుత్రశ్చ ఋణహర్తా ధనప్రదః । స్థిరాసనో మహాకాయః సర్వకర్మావబోధకః ॥ 3 ॥ లోహితో లోహితాంగశ్చ సామగాయీ కృపాకరః । ధర్మరాజః కుజో భౌమో భూమిజో భూమినందనః ॥ 4 ॥ అంగారకో యమశ్చైవ సర్వరోగాపహారకః । సృష్టికర్తాఽపహర్తా చ సర్వకామఫలప్రదః ॥ 5 ॥ భూతిదో గ్రహపూజ్యశ్చ వక్త్రో రక్తవపుః ప్రభుః । ఏతాని కుజనామాని యో నిత్యం ప్రయతః పఠేత్ । ఋణం న జాయతే తస్య ధనం ప్రాప్నోత్యసంశయం ॥ 6 ॥ రక్తపుష్పైశ్చ గంధైశ్చ దీపధూపాదిభిస్తథా । మంగలం పూజయిత్వా తు మంగలేఽహని సర్వదా ॥ 7 ॥ ఋణరేఖాః ప్రకర్తవ్యాః దగ్ధాంగారైస్తదగ్రతః । సప్తవింశతినామాని పఠిత్వా తు తదంతికే ॥ 8 ॥ తాశ్చ ప్రమార్జయేత్పశ్చాద్వామపాదేన సంస్పృశన్ । ఏవం కృత్వా న సందేహో ఋణహీనో ధనీ భవేత్ ॥ 9 ॥ భూమిజస్య ప్రసాదేన గ్రహపీడా వినశ్యతి । యేనార్జితా జగత్కీర్తిర్భూమిపుత్రేణ శాశ్వతీ ॥ 10 ॥ శత్రవశ్చ హతా యేన భౌమేన మహితాత్మనా । స ప్రీయతాం తు భౌమోఽద్య తుష్టో భూయాత్ సదా మమ ॥ 11 ॥ మూలమంత్రః – అంగారక మహీపుత్ర భగవన్ భక్తవత్సల । నమోఽస్తు తే మమాశేష ఋణమాశు విమోచయ ॥ 12 ॥ అర్ఘ్యం – భూమిపుత్ర మహాతేజః స్వేదోద్భవ పినాకినః । ఋణార్తస్త్వాం ప్రపన్నోఽస్మి గృహాణార్ఘ్యం నమోఽస్తు తే ॥ 13 ॥ ఇతి ఋణ విమోచన అంగారక స్తోత్రం ॥