నవగ్రహ స్తోత్రం

జపాకుసుమసంకాశం కాశ్యపేయం మహాద్యుతిం ।

తమోఽరిం సర్వపాపఘ్నం ప్రణతోఽస్మి దివాకరం ॥ 1 ॥

దధిశంఖతుషారాభం క్షీరోదార్ణవసంభవం ।

నమామి శశినం సోమం శంభోర్ముకుటభూషణం ॥ 2 ॥

ధరణీగర్భసంభూతం విద్యుత్కాంతిసమప్రభం ।

కుమారం శక్తిహస్తం తం మంగలం ప్రణమామ్యహం ॥ 3 ॥

ప్రియంగుకలికాశ్యామం రూపేణాప్రతిమం బుధం ।

సౌమ్యం సౌమ్యగుణోపేతం తం బుధం ప్రణమామ్యహం ॥ 4 ॥

దేవానాం చ ఋషీణాం చ గురుం కాంచనసన్నిభం ।

బుద్ధిభూతం త్రిలోకేశం తం నమామి బృహస్పతిం ॥ 5 ॥

హిమకుందమృణాలాభం దైత్యానాం పరమం గురుం ।

సర్వశాస్త్రప్రవక్తారం భార్గవం ప్రణమామ్యహం ॥ 6 ॥

నీలాంజనసమాభాసం రవిపుత్రం యమాగ్రజం ।

ఛాయామార్తాండసంభూతం తం నమామి శనైశ్చరం ॥ 7 ॥

అర్ధకాయం మహావీర్యం చంద్రాదిత్యవిమర్దనం ।

సింహికాగర్భసంభూతం తం రాహుం ప్రణమామ్యహం ॥ 8 ॥

పలాశపుష్పసంకాశం తారకాగ్రహమస్తకం ।

రౌద్రం రౌద్రాత్మకం ఘోరం తం కేతుం ప్రణమామ్యహం ॥ 9 ॥

ఇతి వ్యాసముఖోద్గీతం యః పఠేత్ సుసమాహితః ।

దివా వా యది వా రాత్రౌ విఘ్నశాంతిర్భవిష్యతి ॥ 10 ॥

నరనారీనృపాణాం చ భవేద్దుఃస్వప్ననాశనం ।

ఐశ్వర్యమతులం తేషామారోగ్యం పుష్టివర్ధనం ॥ 11 ॥

గ్రహనక్షత్రజాః పీడాస్తస్కరాగ్నిసముద్భవాః ।

తాః సర్వాః ప్రశమం యాంతి వ్యాసో బ్రూతే న సంశయః ॥ 12 ॥

Recite with devotion and pure heart

Regular practice brings spiritual benefits