1. ധാതാ – ധാതാ കൃതസ്ഥലീ ഹേതിർവാസുകീ രഥകൃന്മുനേ । പുലസ്ത്യസ്തുംബുരുരിതി മധുമാസം നയന്ത്യമീ ॥ ധാതാ ശുഭസ്യ മേ ദാതാ ഭൂയോ ഭൂയോഽപി ഭൂയസഃ । രശ്മിജാലസമാശ്ലിഷ്ടഃ തമസ്തോമവിനാശനഃ ॥ 2. അര്യമ – അര്യമാ പുലഹോഽഥൗജാഃ പ്രഹേതി പുഞ്ജികസ്ഥലീ । നാരദഃ കച്ഛനീരശ്ച നയന്ത്യേതേ സ്മ മാധവം ॥ മേരുശൃംഗാന്തരചരഃ കമലാകരബാന്ധവഃ । അര്യമാ തു സദാ ഭൂത്യൈ ഭൂയസ്യൈ പ്രണതസ്യ മേ ॥ 3. മിത്രഃ – മിത്രോഽത്രിഃ പൗരുഷേയോഽഥ തക്ഷകോ മേനകാ ഹഹഃ । രഥസ്വന ഇതി ഹ്യേതേ ശുക്രമാസം നയന്ത്യമീ ॥ നിശാനിവാരണപടുഃ ഉദയാദ്രികൃതാശ്രയഃ । മിത്രോഽസ്തു മമ മോദായ തമസ്തോമവിനാശനഃ ॥ 4. വരുണഃ – വസിഷ്ഠോ ഹ്യരുണോ രംഭാ സഹജന്യസ്തഥാ ഹുഹുഃ । ശുക്രശ്ചിത്രസ്വനശ്ചൈവ ശുചിമാസം നയന്ത്യമീ ॥ സൂര്യസ്യന്ദനമാരൂഢ അർചിർമാലീ പ്രതാപവാൻ । കാലഭൂതഃ കാമരൂപോ ഹ്യരുണഃ സേവ്യതേ മയാ ॥ 5. ഇന്ദ്രഃ – ഇന്ദ്രോ വിശ്വാവസുഃ ശ്രോതാ ഏലാപത്രസ്തഥാഽങ്ഗിരാഃ । പ്രമ്ലോചാ രാക്ഷസോവര്യോ നഭോമാസം നയന്ത്യമീ ॥ സഹസ്രരശ്മിസംവീതം ഇന്ദ്രം വരദമാശ്രയേ । ശിരസാ പ്രണമാമ്യദ്യ ശ്രേയോ വൃദ്ധിപ്രദായകം ॥ 6. വിവസ്വാൻ – വിവസ്വാനുഗ്രസേനശ്ച വ്യാഘ്ര ആസാരണോ ഭൃഗുഃ । അനുമ്ലോചാഃ ശംഖപാലോ നഭസ്യാഖ്യം നയന്ത്യമീ ॥ ജഗന്നിർമാണകർതാരം സർവദിഗ്വ്യാപ്തതേജസം । നഭോഗ്രഹമഹാദീപം വിവസ്വന്തം നമാമ്യഹം ॥ 7. ത്വഷ്ടാ – ത്വഷ്ടാ ഋചീകതനയഃ കംബലാഖ്യസ്തിലോത്തമാ । ബ്രഹ്മാപേതോഽഥ ശതജിത് ധൃതരാഷ്ട്ര ഇഷംഭരാ ॥ ത്വഷ്ടാ ശുഭായ മേ ഭൂയാത് ശിഷ്ടാവലിനിഷേവിതഃ । നാനാശില്പകരോ നാനാധാതുരൂപഃ പ്രഭാകരഃ । 8. വിഷ്ണുഃ – വിഷ്ണുരശ്വതരോ രംഭാ സൂര്യവർചാശ്ച സത്യജിത് । വിശ്വാമിത്രോ മഖാപേത ഊർജമാസം നയന്ത്യമീ ॥ ഭാനുമണ്ഡലമധ്യസ്ഥം വേദത്രയനിഷേവിതം । ഗായത്രീപ്രതിപാദ്യം തം വിഷ്ണും ഭക്ത്യാ നമാമ്യഹം ॥ 9. അംശുമൻ – അഥാംശുഃ കശ്യപസ്താർക്ഷ്യ ഋതസേനസ്തഥോർവശീ । വിദ്യുച്ഛത്രുർമഹാശംഖഃ സഹോമാസം നയന്ത്യമീ ॥ സദാ വിദ്രാവണരതോ ജഗന്മംഗലദീപകഃ । മുനീന്ദ്രനിവഹസ്തുത്യോ ഭൂതിദോഽംശുർഭവേന്മമ ॥ 10. ഭഗഃ – ഭഗഃ സ്ഫൂർജോഽരിഷ്ടനേമിഃ ഊർണ ആയുശ്ച പഞ്ചമഃ । കർകോടകഃ പൂർവചിത്തിഃ പൗഷമാസം നയന്ത്യമീ ॥ തിഥി മാസ ഋതൂനാം ച വത്സരാഽയനയോരപി । ഘടികാനാം ച യഃ കർതാ ഭഗോ ഭാഗ്യപ്രദോഽസ്തു മേ ॥ 11. പൂഷ – പൂഷാ ധനഞ്ജയോ വാതഃ സുഷേണഃ സുരുചിസ്തഥാ । ഘൃതാചീ ഗൗതമശ്ചേതി തപോമാസം നയന്ത്യമീ । പൂഷാ തോഷായ മേ ഭൂയാത് സർവപാപാഽപനോദനാത് । സഹസ്രകരസംവീതഃ സമസ്താശാന്തരാന്തരഃ ॥ 12. പർജന്യഃ – ക്രതുർവാർചാ ഭരദ്വാജഃ പർജന്യഃ സേനജിത് തഥാ । വിശ്വശ്ചൈരാവതശ്ചൈവ തപസ്യാഖ്യം നയന്ത്യമീ ॥ പ്രപഞ്ചം പ്രതപൻ ഭൂയോ വൃഷ്ടിഭിർമാദയൻ പുനഃ । ജഗദാനന്ദജനകഃ പർജന്യഃ പൂജ്യതേ മയാ ॥ ധ്യായേസ്സദാ സവിതൃമണ്ഡലമധ്യവർതീ നാരായണസ്സരസിജാസന സന്നിവിഷ്ടഃ। കേയൂരവാൻ മകരകുണ്ഡലവാൻ കിരീടീ ഹാരീ ഹിരണ്മയവപുഃ ധൃതശംഖചക്രഃ ॥