అస్య శ్రీ చంద్ర కవచస్య । గౌతమ ఋషిః । అనుష్టుప్ ఛందః । శ్రీ చంద్రో దేవతా । చంద్ర ప్రీత్యర్థే జపే వినియోగః ॥ ధ్యానం: సమం చతుర్భుజం వందే కేయూర మకుటోజ్వలం । వాసుదేవస్య నయనం శంకరస్య చ భూషణం ॥ ఏవం ధ్యాత్వా జపేన్నిత్యం శశినః కవచం శుభం ॥ అథ చంద్ర కవచం శశీ పాతు శిరోదేశం భాలం పాతు కలానిధిః । చక్షుషీ చంద్రమాః పాతు శ్రుతీ పాతు నిశాపతిః ॥ 1 ॥ ప్రాణం క్షపకరః పాతు ముఖం కుముదబాంధవః । పాతు కంఠం చ మే సోమః స్కంధే జైవాతృకస్తథా ॥ 2 ॥ కరౌ సుధాకరః పాతు వక్షః పాతు నిశాకరః । హృదయం పాతు మే చంద్రో నాభిం శంకరభూషణః ॥ 3 ॥ మధ్యం పాతు సురశ్రేష్ఠః కటిం పాతు సుధాకరః । ఊరూ తారాపతిః పాతు మృగాంకో జానునీ సదా ॥ 4 ॥ అబ్ధిజః పాతు మే జంఘే పాతు పాదౌ విధుః సదా । సర్వాణ్యన్యాని చాంగాని పాతు చంద్రోఖిలం వపుః ॥ 5 ॥ ఫలశ్రుతిః ఏతద్ధి కవచం దివ్యం భుక్తి ముక్తి ప్రదాయకం । యః పఠేచ్ఛృణుయాద్వాపి సర్వత్ర విజయీ భవేత్ ॥ 6 ॥ ॥ ఇతి శ్రీచంద్ర కవచం సంపూర్ణం ॥