അസ്യ ശ്രീ ആദിത്യകവചസ്തോത്രമഹാമന്ത്രസ്യ അഗസ്ത്യോ ഭഗവാനൃഷിഃ അനുഷ്ടുപ്ഛന്ദഃ ആദിത്യോ ദേവതാ ശ്രീം ബീജം ണീം ശക്തിഃ സൂം കീലകം മമ ആദിത്യപ്രസാദസിദ്ധ്യർഥേ ജപേ വിനിയോഗഃ । ധ്യാനം ജപാകുസുമസങ്കാശം ദ്വിഭുജം പദ്മഹസ്തകം സിന്ദൂരാംബരമാല്യം ച രക്തഗന്ധാനുലേപനം । മാണിക്യരത്നഖചിത-സർവാഭരണഭൂഷിതം സപ്താശ്വരഥവാഹം തു മേരും ചൈവ പ്രദക്ഷിണം ॥ ദേവാസുരവരൈർവന്ദ്യം ഘൃണിഭിഃ പരിസേവിതം । ധ്യായേത്പഠേത്സുവർണാഭം സൂര്യസ്യ കവചം മുദാ ॥ കവചം ഘൃണിഃ പാതു ശിരോദേശേ സൂര്യഃ പാതു ലലാടകം । ആദിത്യോ ലോചനേ പാതു ശ്രുതീ പാതു ദിവാകരഃ ॥ ഘ്രാണം പാതു സദാ ഭാനുഃ മുഖം പാതു സദാരവിഃ । ജിഹ്വാം പാതു ജഗന്നേത്രഃ കണ്ഠം പാതു വിഭാവസുഃ ॥ സ്കന്ധൗ ഗ്രഹപതിഃ പാതു ഭുജൗ പാതു പ്രഭാകരഃ । കരാവബ്ജകരഃ പാതു ഹൃദയം പാതു നഭോമണിഃ ॥ ദ്വാദശാത്മാ കടിം പാതു സവിതാ പാതു സക്ഥിനീ । ഊരൂ പാതു സുരശ്രേഷ്ടോ ജാനുനീ പാതു ഭാസ്കരഃ ॥ ജംഘേ മേ പാതു മാർതാണ്ഡോ ഗുൽഫൗ പാതു ത്വിഷാമ്പതിഃ । പാദൗ ദിനമണിഃ പാതു പാതു മിത്രോഽഖിലം വപുഃ ॥ ആദിത്യകവചം പുണ്യമഭേദ്യം വജ്രസന്നിഭം । സർവരോഗഭയാദിഭ്യോ മുച്യതേ നാത്ര സംശയഃ ॥ സംവത്സരമുപാസിത്വാ സാമ്രാജ്യപദവീം ലഭേത് । അശേഷരോഗശാന്ത്യർഥം ധ്യായേദാദിത്യമണ്ഡലം । ആദിത്യ മണ്ഡല സ്തുതിഃ – അനേകരത്നസംയുക്തം സ്വർണമാണിക്യഭൂഷണം । കല്പവൃക്ഷസമാകീർണം കദംബകുസുമപ്രിയം ॥ സിന്ദൂരവർണായ സുമണ്ഡലായ സുവർണരത്നാഭരണായ തുഭ്യം । പദ്മാദിനേത്രേ ച സുപങ്കജായ ബ്രഹ്മേന്ദ്ര-നാരായണ-ശങ്കരായ ॥ സംരക്തചൂർണം സസുവർണതോയം സകുങ്കുമാഭം സകുശം സപുഷ്പം । പ്രദത്തമാദായ ച ഹേമപാത്രേ പ്രശസ്തനാദം ഭഗവൻ പ്രസീദ ॥ ഇതി ആദിത്യകവചം ।